| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೬. ದುತಿಯಯೋಧಾಜೀವಸುತ್ತವಣ್ಣನಾ
6. Dutiyayodhājīvasuttavaṇṇanā
೭೬. ಛಟ್ಠೇ ಚಮ್ಮನ್ತಿ ಇಮಿನಾ ಚಮ್ಮಮಯಂ ಚಮ್ಮಮಿತಿ ಸಿಬ್ಬಿತಂ, ಅಞ್ಞಂ ವಾ ಕೇಟಕಫಲಕಾದಿಂ ಸಙ್ಗಣ್ಹಾತಿ। ಧನುಕಲಾಪಂ ಸನ್ನಯ್ಹಿತ್ವಾತಿ ಧನುಞ್ಚೇವ ತೂಣಿರಞ್ಚ ಸನ್ನಯ್ಹಿತ್ವಾ ಸಜ್ಜೇತ್ವಾ। ಧನುದಣ್ಡಸ್ಸ ಜಿಯಾಯತ್ತಭಾವಕರಣಾದಿಪಿ ಹಿ ಧನುನೋ ಸನ್ನಯ್ಹನಂ। ತೇನೇವಾಹ ‘‘ಧನುಞ್ಚ ಸರಕಲಾಪಞ್ಚ ಸನ್ನಯ್ಹಿತ್ವಾ’’ತಿ। ಯುದ್ಧಸನ್ನಿವೇಸೇನ ಠಿತನ್ತಿ ದ್ವಿನ್ನಂ ಸೇನಾನಂ ಬ್ಯೂಹನಸಂವಿಧಾನನಯೇನ ಕತೋ ಯೋ ಸನ್ನಿವೇಸೋ, ತಸ್ಸ ವಸೇನ ಠಿತಂ, ಸೇನಾಬ್ಯೂಹಸಂವಿಧಾನವಸೇನ ಸನ್ನಿವಿಟ್ಠನ್ತಿ ವುತ್ತಂ ಹೋತಿ। ಉಸ್ಸಾಹಞ್ಚ ವಾಯಾಮಞ್ಚ ಕರೋತೀತಿ ಯುಜ್ಝನವಸೇನ ಉಸ್ಸಾಹಂ ವಾಯಾಮಞ್ಚ ಕರೋತಿ। ಪರಿಯಾಪಾದೇನ್ತೀತಿ ಮರಣಪರಿಯನ್ತಿಕಂ ಅಪರಂ ಪಾಪೇನ್ತಿ। ತೇನಾಹ ‘‘ಪರಿಯಾಪಾದಯನ್ತೀ’’ತಿ, ಜೀವಿತಂ ಪರಿಯಾಪಾದಯನ್ತಿ ಮರಣಂ ಪಟಿಪಜ್ಜಾಪೇನ್ತೀತಿ ವುತ್ತಂ ಹೋತಿ।
76. Chaṭṭhe cammanti iminā cammamayaṃ cammamiti sibbitaṃ, aññaṃ vā keṭakaphalakādiṃ saṅgaṇhāti. Dhanukalāpaṃ sannayhitvāti dhanuñceva tūṇirañca sannayhitvā sajjetvā. Dhanudaṇḍassa jiyāyattabhāvakaraṇādipi hi dhanuno sannayhanaṃ. Tenevāha ‘‘dhanuñca sarakalāpañca sannayhitvā’’ti. Yuddhasannivesena ṭhitanti dvinnaṃ senānaṃ byūhanasaṃvidhānanayena kato yo sanniveso, tassa vasena ṭhitaṃ, senābyūhasaṃvidhānavasena sanniviṭṭhanti vuttaṃ hoti. Ussāhañca vāyāmañca karotīti yujjhanavasena ussāhaṃ vāyāmañca karoti. Pariyāpādentīti maraṇapariyantikaṃ aparaṃ pāpenti. Tenāha ‘‘pariyāpādayantī’’ti, jīvitaṃ pariyāpādayanti maraṇaṃ paṭipajjāpentīti vuttaṃ hoti.
ಅರಕ್ಖಿತೇನೇವ ಕಾಯೇನಾತಿಆದೀಸು ಹತ್ಥಪಾದೇ ಕೀಳಾಪೇನ್ತೋ ಗೀವಂ ವಿಪರಿವತ್ತೇನ್ತೋ ಕಾಯಂ ನ ರಕ್ಖತಿ ನಾಮ। ನಾನಪ್ಪಕಾರಂ ದುಟ್ಠುಲ್ಲಂ ಕರೋನ್ತೋ ವಾಚಂ ನ ರಕ್ಖತಿ ನಾಮ। ಕಾಮವಿತಕ್ಕಾದಯೋ ವಿತಕ್ಕೇನ್ತೋ ಚಿತ್ತಂ ನ ರಕ್ಖತಿ ನಾಮ। ಅನುಪಟ್ಠಿತಾಯ ಸತಿಯಾತಿ ಕಾಯಗತಾಯ ಸತಿಯಾ ಅನುಪಟ್ಠಿತಾಯ। ರಾಗೇನ ಅನುಗತೋತಿ ರಾಗೇನ ಅನುಪಹತೋ। ರಾಗಪರೇತೋತಿ ವಾ ರಾಗೇನ ಫುಟ್ಠೋ ಫುಟ್ಠವಿಸೇನ ವಿಯ ಸಪ್ಪೇನ।
Arakkhitenevakāyenātiādīsu hatthapāde kīḷāpento gīvaṃ viparivattento kāyaṃ na rakkhati nāma. Nānappakāraṃ duṭṭhullaṃ karonto vācaṃ na rakkhati nāma. Kāmavitakkādayo vitakkento cittaṃ na rakkhati nāma. Anupaṭṭhitāya satiyāti kāyagatāya satiyā anupaṭṭhitāya. Rāgena anugatoti rāgena anupahato. Rāgaparetoti vā rāgena phuṭṭho phuṭṭhavisena viya sappena.
ಅನುದಹನಟ್ಠೇನಾತಿ ಅನುಪಾಯಪ್ಪಟಿಪತ್ತಿಯಾ। ಸಮ್ಪತಿ ಆಯತಿಞ್ಚ ಮಹಾಭಿತಾಪಟ್ಠೇನ। ಅನವತ್ಥಿತಸಭಾವತಾಯ ಇತ್ತರಪಚ್ಚುಪಟ್ಠಾನಟ್ಠೇನ। ಮುಹುತ್ತರಮಣೀಯತಾಯ ತಾವಕಾಲಿಕಟ್ಠೇನ। ಬ್ಯತ್ತೇಹಿ ಅಭಿಭವನೀಯತಾಯ ಸಬ್ಬಙ್ಗಪಚ್ಚಙ್ಗಪಲಿಭಞ್ಜನಟ್ಠೇನ। ಛೇದನಭೇದನಾದಿಅಧಿಕರಣಭಾವೇನ ಉಗ್ಘಟ್ಟನಸದಿಸತಾಯ ಅಧಿಕುಟ್ಟನಟ್ಠೇನ। ಅವಣೇ ವಣಂ ಉಪ್ಪಾದೇತ್ವಾ ಅನ್ತೋ ಅನುಪವಿಸನಸಭಾವತಾಯ ವಿನಿವಿಜ್ಝನಟ್ಠೇನ। ದಿಟ್ಠಧಮ್ಮಿಕಸಮ್ಪರಾಯಿಕ ಅನತ್ಥನಿಮಿತ್ತತಾಯ ಸಾಸಙ್ಕಸಪ್ಪಟಿಭಯಟ್ಠೇನ।
Anudahanaṭṭhenāti anupāyappaṭipattiyā. Sampati āyatiñca mahābhitāpaṭṭhena. Anavatthitasabhāvatāya ittarapaccupaṭṭhānaṭṭhena. Muhuttaramaṇīyatāya tāvakālikaṭṭhena. Byattehi abhibhavanīyatāya sabbaṅgapaccaṅgapalibhañjanaṭṭhena. Chedanabhedanādiadhikaraṇabhāvena ugghaṭṭanasadisatāya adhikuṭṭanaṭṭhena. Avaṇe vaṇaṃ uppādetvā anto anupavisanasabhāvatāya vinivijjhanaṭṭhena. Diṭṭhadhammikasamparāyika anatthanimittatāya sāsaṅkasappaṭibhayaṭṭhena.
ದುತಿಯಯೋಧಾಜೀವಸುತ್ತವಣ್ಣನಾ ನಿಟ್ಠಿತಾ।
Dutiyayodhājīvasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೬. ದುತಿಯಯೋಧಾಜೀವಸುತ್ತಂ • 6. Dutiyayodhājīvasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ದುತಿಯಯೋಧಾಜೀವಸುತ್ತವಣ್ಣನಾ • 6. Dutiyayodhājīvasuttavaṇṇanā
