| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
3. д̣̇удтадтагасуд̇д̇аван̣н̣анаа
3. Duṭṭhaṭṭhakasuttavaṇṇanā
787. вад̣̇анд̇и вз д̣̇удтаманаабийд̇и д̣̇удтадтагасуд̇д̇ам̣. гаа уббад̇д̇и? аад̣̇иг̇аат̇ааяа д̇аава уббад̇д̇и – мунисуд̇д̇анаязна бхаг̇авад̇о бхигкусан̇гхасса жа уббанналаабхасаггаарам̣ асахамаанаа д̇ид̇т̇ияаа сунд̣̇арим̣ бариб̣б̣ааж̇игам̣ уяяож̇зсум̣. саа гира ж̇анабад̣̇агаляаан̣ий сзд̇авад̇т̇абариб̣б̣ааж̇игаава ахоси. саа сунхаад̇аа сунивад̇т̇аа маалааг̇анд̇хавилзбанавибхуусид̇аа бхаг̇авад̇о д̇хаммам̣ суд̇ваа саавад̇т̇иваасийнам̣ ж̇зд̇аванад̇о нигкаманавзлааяа саавад̇т̇ид̇о нигкамид̇ваа ж̇зд̇аванаабхимукий г̇ажчад̇и. мануссзхи жа ‘‘гухим̣ г̇ажчасий’’д̇и бужчид̇аа ‘‘саман̣ам̣ г̇од̇амам̣ саавагз жасса рамаяид̇ум̣ г̇ажчаамий’’д̇и вад̇ваа ж̇зд̇аванад̣̇ваарагодтагз вижарид̇ваа ж̇зд̇аванад̣̇ваарагодтагз бид̣̇ахид̇з наг̇арам̣ бависид̇ваа бабхаад̇з буна ж̇зд̇аванам̣ г̇анд̇ваа г̇анд̇хагудисамийбз бубпаани вижинанд̇ий вияа жарад̇и . б̣уд̣̇д̇хубадтаанам̣ ааг̇ад̇зхи жа мануссзхи ‘‘гимад̇т̇ам̣ ааг̇ад̇аасий’’д̇и бужчид̇аа яам̣гин̃жид̣̇зва бхан̣ад̇и. звам̣ ад̣дхамаасамад̇д̇з вийд̇игганд̇з д̇ид̇т̇ияаа д̇ам̣ ж̇ийвид̇аа воробзд̇ваа барикаад̇адз нигкибид̇ваа бабхаад̇з ‘‘сунд̣̇арим̣ на бассаамаа’’д̇и голаахалам̣ гад̇ваа ран̃н̃о жа аарожзд̇ваа д̇зна анун̃н̃аад̇аа ж̇зд̇аванам̣ бависид̇ваа вижинанд̇аа вияа д̇ам̣ нигкид̇д̇адтаанаа уд̣̇д̇харид̇ваа ман̃жагам̣ ааробзд̇ваа наг̇арам̣ абхихарид̇ваа убаггосам̣ агам̣су. саб̣б̣ам̣ баал̣ияам̣ (уд̣̇аа. 38) ааг̇ад̇анаязнзва взд̣̇ид̇аб̣б̣ам̣.
787.Vadantive duṭṭhamanāpīti duṭṭhaṭṭhakasuttaṃ. Kā uppatti? Ādigāthāya tāva uppatti – munisuttanayena bhagavato bhikkhusaṅghassa ca uppannalābhasakkāraṃ asahamānā titthiyā sundariṃ paribbājikaṃ uyyojesuṃ. Sā kira janapadakalyāṇī setavatthaparibbājikāva ahosi. Sā sunhātā sunivatthā mālāgandhavilepanavibhūsitā bhagavato dhammaṃ sutvā sāvatthivāsīnaṃ jetavanato nikkhamanavelāya sāvatthito nikkhamitvā jetavanābhimukhī gacchati. Manussehi ca ‘‘kuhiṃ gacchasī’’ti pucchitā ‘‘samaṇaṃ gotamaṃ sāvake cassa ramayituṃ gacchāmī’’ti vatvā jetavanadvārakoṭṭhake vicaritvā jetavanadvārakoṭṭhake pidahite nagaraṃ pavisitvā pabhāte puna jetavanaṃ gantvā gandhakuṭisamīpe pupphāni vicinantī viya carati . Buddhupaṭṭhānaṃ āgatehi ca manussehi ‘‘kimatthaṃ āgatāsī’’ti pucchitā yaṃkiñcideva bhaṇati. Evaṃ aḍḍhamāsamatte vītikkante titthiyā taṃ jīvitā voropetvā parikhātaṭe nikkhipitvā pabhāte ‘‘sundariṃ na passāmā’’ti kolāhalaṃ katvā rañño ca ārocetvā tena anuññātā jetavanaṃ pavisitvā vicinantā viya taṃ nikkhittaṭṭhānā uddharitvā mañcakaṃ āropetvā nagaraṃ abhiharitvā upakkosaṃ akaṃsu. Sabbaṃ pāḷiyaṃ (udā. 38) āgatanayeneva veditabbaṃ.
бхаг̇аваа д̇ам̣ д̣̇ивасам̣ бажжуусасамаяз б̣уд̣̇д̇хажагкунаа логам̣ вологзнд̇о ‘‘д̇ид̇т̇ияаа аж̇ж̇а аяасам̣ уббаад̣̇зссанд̇ий’’д̇и н̃ад̇ваа ‘‘д̇зсам̣ сад̣̇д̣̇ахид̇ваа маад̣̇исз жид̇д̇ам̣ багобзд̇ваа махааж̇ано абааяаабхимуко маа ахосий’’д̇и г̇анд̇хагудид̣̇ваарам̣ бид̣̇ахид̇ваа анд̇ог̇анд̇хагудияам̣язва ажчи, на наг̇арам̣ бин̣д̣ааяа баависи. бхигкуу бана д̣̇ваарам̣ бид̣̇ахид̇ам̣ д̣̇исваа буб̣б̣асад̣̇исамзва бависим̣су. мануссаа бхигкуу д̣̇исваа наанаббагаарзхи аггосим̣су. ат̇а ааяасмаа аананд̣̇о бхаг̇авад̇о д̇ам̣ бавад̇д̇им̣ аарожзд̇ваа ‘‘д̇ид̇т̇иязхи, бханд̇з, махаааяасо уббаад̣̇ид̇о, на саггаа ид̇ха васид̇ум̣, вибуло ж̇амб̣уд̣̇ийбо, ан̃н̃ад̇т̇а г̇ажчаамаа’’д̇и ааха. д̇ад̇т̇аби аяасз удтид̇з гухим̣ г̇амиссаси аананд̣̇аад̇и? ‘‘ан̃н̃ам̣ наг̇арам̣ бхаг̇аваа’’д̇и. ат̇а бхаг̇аваа ‘‘ааг̇амзхи, аананд̣̇а, сад̇д̇аахамзвааяам̣ сад̣̇д̣̇о бхависсад̇и, сад̇д̇аахажжаязна язхи аяасо гад̇о, д̇зсам̣язва убари бад̇иссад̇ий’’д̇и вад̇ваа аананд̣̇ад̇т̇зрасса д̇хаммад̣̇зсанад̇т̇ам̣ ‘‘вад̣̇анд̇и вз’’д̇и имам̣ г̇аат̇амабхааси.
Bhagavā taṃ divasaṃ paccūsasamaye buddhacakkhunā lokaṃ volokento ‘‘titthiyā ajja ayasaṃ uppādessantī’’ti ñatvā ‘‘tesaṃ saddahitvā mādise cittaṃ pakopetvā mahājano apāyābhimukho mā ahosī’’ti gandhakuṭidvāraṃ pidahitvā antogandhakuṭiyaṃyeva acchi, na nagaraṃ piṇḍāya pāvisi. Bhikkhū pana dvāraṃ pidahitaṃ disvā pubbasadisameva pavisiṃsu. Manussā bhikkhū disvā nānappakārehi akkosiṃsu. Atha āyasmā ānando bhagavato taṃ pavattiṃ ārocetvā ‘‘titthiyehi, bhante, mahāayaso uppādito, na sakkā idha vasituṃ, vipulo jambudīpo, aññattha gacchāmā’’ti āha. Tatthapi ayase uṭṭhite kuhiṃ gamissasi ānandāti? ‘‘Aññaṃ nagaraṃ bhagavā’’ti. Atha bhagavā ‘‘āgamehi, ānanda, sattāhamevāyaṃ saddo bhavissati, sattāhaccayena yehi ayaso kato, tesaṃyeva upari patissatī’’ti vatvā ānandattherassa dhammadesanatthaṃ ‘‘vadanti ve’’ti imaṃ gāthamabhāsi.
д̇ад̇т̇а вад̣̇анд̇ийд̇и бхаг̇аванд̇ам̣ бхигкусан̇гхан̃жа убавад̣̇анд̇и. д̣̇удтаманааби згз ат̇оби вз сажжаманаад̇и згажжз д̣̇удтажид̇д̇аа, згажжз д̇ат̇асан̃н̃иноби худ̇ваа, д̇ид̇т̇ияаа д̣̇удтажид̇д̇аа, яз д̇зсам̣ важанам̣ суд̇ваа сад̣̇д̣̇ахим̣су, д̇з сажжаманаад̇и ад̇хиббааяо. ваад̣̇ан̃жа ж̇аад̇анд̇и зд̇ам̣ аггосаваад̣̇ам̣ уббаннам̣. муни но убзд̇ийд̇и агаарагад̇ааяа жа агуббанад̇ааяа жа б̣уд̣̇д̇хамуни на убзд̇и. д̇асмаа муний над̇т̇и кило гухин̃жийд̇и д̇зна гааран̣зна аяам̣ муни рааг̇аад̣̇икилзхи над̇т̇и кило гухин̃жийд̇и взд̣̇ид̇аб̣б̣о.
Tattha vadantīti bhagavantaṃ bhikkhusaṅghañca upavadanti. Duṭṭhamanāpi eke athopi ve saccamanāti ekacce duṭṭhacittā, ekacce tathasaññinopi hutvā, titthiyā duṭṭhacittā, ye tesaṃ vacanaṃ sutvā saddahiṃsu, te saccamanāti adhippāyo. Vādañca jātanti etaṃ akkosavādaṃ uppannaṃ. Muni no upetīti akārakatāya ca akuppanatāya ca buddhamuni na upeti. Tasmā munī natthi khilo kuhiñcīti tena kāraṇena ayaṃ muni rāgādikhilehi natthi khilo kuhiñcīti veditabbo.
788. иман̃жа г̇аат̇ам̣ вад̇ваа бхаг̇аваа аананд̣̇ад̇т̇зрам̣ бужчи, ‘‘звам̣ кум̣сзд̇ваа вамбхзд̇ваа вужжамаанаа бхигкуу, аананд̣̇а, гим̣ вад̣̇анд̇ий’’д̇и. на гин̃жи бхаг̇аваад̇и. ‘‘на, аананд̣̇а, ‘ахам̣ сийлаваа’д̇и саб̣б̣ад̇т̇а д̇ун̣хий бхавид̇аб̣б̣ам̣, логз хи наабхаасамаанам̣ ж̇аананд̇и миссам̣ б̣аалзхи бан̣д̣ид̇а’’нд̇и вад̇ваа, ‘‘бхигкуу, аананд̣̇а, д̇з мануссз звам̣ бадижод̣̇знд̇уу’’д̇и д̇хаммад̣̇зсанад̇т̇ааяа ‘‘абхууд̇аваад̣̇ий нираяам̣ убзд̇ий’’д̇и имам̣ г̇аат̇амабхааси. т̇зро д̇ам̣ уг̇г̇ахзд̇ваа бхигкуу ааха – ‘‘мануссаа д̇умхзхи имааяа г̇аат̇ааяа бадижод̣̇зд̇аб̣б̣аа’’д̇и. бхигкуу д̇ат̇аа агам̣су. бан̣д̣ид̇амануссаа д̇ун̣хий ахзсум̣. рааж̇ааби рааж̇абурисз саб̣б̣ад̇о бзсзд̇ваа язсам̣ д̇худ̇д̇аанам̣ лан̃ж̇ам̣ д̣̇ад̇ваа д̇ид̇т̇ияаа д̇ам̣ маараабзсум̣, д̇з г̇ахзд̇ваа ниг̇г̇аяха д̇ам̣ бавад̇д̇им̣ н̃ад̇ваа д̇ид̇т̇ияз барибхааси. мануссааби д̇ид̇т̇ияз д̣̇исваа лзд̣д̣унаа бахаранд̇и, бам̣сунаа огиранд̇и ‘‘бхаг̇авад̇о аяасам̣ уббаад̣̇зсу’’нд̇и. аананд̣̇ад̇т̇зро д̇ам̣ д̣̇исваа бхаг̇авад̇о аарожзси, бхаг̇аваа т̇зрасса имам̣ г̇аат̇амабхааси ‘‘саган̃хи д̣̇идтим̣…бз… вад̣̇зяяаа’’д̇и.
788. Imañca gāthaṃ vatvā bhagavā ānandattheraṃ pucchi, ‘‘evaṃ khuṃsetvā vambhetvā vuccamānā bhikkhū, ānanda, kiṃ vadantī’’ti. Na kiñci bhagavāti. ‘‘Na, ānanda, ‘ahaṃ sīlavā’ti sabbattha tuṇhī bhavitabbaṃ, loke hi nābhāsamānaṃ jānanti missaṃ bālehi paṇḍita’’nti vatvā, ‘‘bhikkhū, ānanda, te manusse evaṃ paṭicodentū’’ti dhammadesanatthāya ‘‘abhūtavādī nirayaṃ upetī’’ti imaṃ gāthamabhāsi. Thero taṃ uggahetvā bhikkhū āha – ‘‘manussā tumhehi imāya gāthāya paṭicodetabbā’’ti. Bhikkhū tathā akaṃsu. Paṇḍitamanussā tuṇhī ahesuṃ. Rājāpi rājapurise sabbato pesetvā yesaṃ dhuttānaṃ lañjaṃ datvā titthiyā taṃ mārāpesuṃ, te gahetvā niggayha taṃ pavattiṃ ñatvā titthiye paribhāsi. Manussāpi titthiye disvā leḍḍunā paharanti, paṃsunā okiranti ‘‘bhagavato ayasaṃ uppādesu’’nti. Ānandatthero taṃ disvā bhagavato ārocesi, bhagavā therassa imaṃ gāthamabhāsi ‘‘sakañhi diṭṭhiṃ…pe… vadeyyā’’ti.
д̇ассад̇т̇о – яааяам̣ д̣̇идти д̇ид̇т̇ияаж̇анасса ‘‘сунд̣̇арим̣ маарзд̇ваа саман̣аанам̣ сагяабуд̇д̇ияаанам̣ аван̣н̣ам̣ багаасзд̇ваа зд̇знубааязна лад̣̇д̇хам̣ саггаарам̣ саад̣̇ияиссаамаа’’д̇и, со д̇ам̣ д̣̇идтим̣ гат̇ам̣ ад̇иггамзяяа, ат̇а ко со аяасо д̇амзва д̇ид̇т̇ияаж̇анам̣ бажжааг̇ад̇о д̇ам̣ д̣̇идтим̣ ажжзд̇ум̣ асаггонд̇ам̣. яо ваа сассад̇аад̣̇иваад̣̇ий, соби сагам̣ д̣̇идтим̣ гат̇ам̣ ажжаязяяа д̇зна д̣̇идтижчанд̣̇зна анунийд̇о д̇ааяа жа д̣̇идтиружияаа нивидто, абижа ко бана саяам̣ самад̇д̇аани багуб̣б̣амаано ад̇д̇анаава барибун̣н̣аани д̇аани д̣̇идтиг̇ад̇аани гаронд̇о яат̇аа ж̇аанзяяа, д̇ат̇зва вад̣̇зяяаад̇и.
Tassattho – yāyaṃ diṭṭhi titthiyajanassa ‘‘sundariṃ māretvā samaṇānaṃ sakyaputtiyānaṃ avaṇṇaṃ pakāsetvā etenupāyena laddhaṃ sakkāraṃ sādiyissāmā’’ti, so taṃ diṭṭhiṃ kathaṃ atikkameyya, atha kho so ayaso tameva titthiyajanaṃ paccāgato taṃ diṭṭhiṃ accetuṃ asakkontaṃ. Yo vā sassatādivādī, sopi sakaṃ diṭṭhiṃ kathaṃ accayeyya tena diṭṭhicchandena anunīto tāya ca diṭṭhiruciyā niviṭṭho, apica kho pana sayaṃ samattānipakubbamāno attanāva paripuṇṇāni tāni diṭṭhigatāni karonto yathā jāneyya, tatheva vadeyyāti.
789. ат̇а рааж̇аа сад̇д̇аахажжаязна д̇ам̣ гун̣абам̣ чад̣д̣аабзд̇ваа сааяанхасамаяам̣ вихаарам̣ г̇анд̇ваа бхаг̇аванд̇ам̣ абхиваад̣̇зд̇ваа ааха – ‘‘нану, бханд̇з, ийд̣̇исз аяасз уббаннз маяхамби аарожзд̇аб̣б̣ам̣ сияаа’’д̇и. звам̣ вуд̇д̇з бхаг̇аваа, ‘‘на, махаарааж̇а, ‘ахам̣ сийлаваа г̇ун̣асамбанно’д̇и барзсам̣ аарожзд̇ум̣ арияаанам̣ бад̇ирууба’’нд̇и вад̇ваа д̇ассаа адтуббад̇д̇ияам̣ ‘‘яо ад̇д̇ано сийлавад̇ааний’’д̇и авасзсаг̇аат̇ааяо абхааси.
789. Atha rājā sattāhaccayena taṃ kuṇapaṃ chaḍḍāpetvā sāyanhasamayaṃ vihāraṃ gantvā bhagavantaṃ abhivādetvā āha – ‘‘nanu, bhante, īdise ayase uppanne mayhampi ārocetabbaṃ siyā’’ti. Evaṃ vutte bhagavā, ‘‘na, mahārāja, ‘ahaṃ sīlavā guṇasampanno’ti paresaṃ ārocetuṃ ariyānaṃ patirūpa’’nti vatvā tassā aṭṭhuppattiyaṃ ‘‘yo attano sīlavatānī’’ti avasesagāthāyo abhāsi.
д̇ад̇т̇а сийлавад̇аанийд̇и баад̇имогкаад̣̇ийни сийлаани ааран̃н̃игаад̣̇ийни д̇худ̇ан̇г̇авад̇аани жа. анаанубудтод̇и абужчид̇о. бааваад̇и вад̣̇ад̇и. анарияад̇хаммам̣ гусалаа д̇амааху, яо аад̇умаанам̣ саяамзва бааваад̇и яо звам̣ ад̇д̇аанам̣ саяамзва вад̣̇ад̇и, д̇асса д̇ам̣ ваад̣̇ам̣ ‘‘анарияад̇хаммо зсо’’д̇и гусалаа звам̣ гат̇знд̇и.
Tattha sīlavatānīti pātimokkhādīni sīlāni āraññikādīni dhutaṅgavatāni ca. Anānupuṭṭhoti apucchito. Pāvāti vadati. Anariyadhammaṃ kusalā tamāhu, yo ātumānaṃ sayameva pāvāti yo evaṃ attānaṃ sayameva vadati, tassa taṃ vādaṃ ‘‘anariyadhammo eso’’ti kusalā evaṃ kathenti.
790. санд̇од̇и рааг̇аад̣̇игилзсавуубасамзна санд̇о, д̇ат̇аа абхиниб̣б̣уд̇ад̇д̇о. ид̇иханд̇и сийлзсу агад̇т̇амаанод̇и ‘‘ахамасми сийласамбанно’’д̇иаад̣̇инаа наязна ид̇и сийлзсу агад̇т̇амаано, сийланимид̇д̇ам̣ ад̇д̇уубанааяигам̣ ваажам̣ абхаасамаанод̇и вуд̇д̇ам̣ ход̇и. д̇амарияад̇хаммам̣ гусалаа вад̣̇анд̇ийд̇и д̇асса д̇ам̣ агад̇т̇анам̣ ‘‘арияад̇хаммо зсо’’д̇и б̣уд̣̇д̇хаад̣̇аяо канд̇хаад̣̇игусалаа вад̣̇анд̇и. яассуссад̣̇аа над̇т̇и гухин̃жи логзд̇и яасса кийн̣аасавасса рааг̇аад̣̇аяо сад̇д̇а уссад̣̇аа гухин̃жи логз над̇т̇и, д̇асса д̇ам̣ агад̇т̇анам̣ ‘‘арияад̇хаммо зсо’’д̇и звам̣ гусалаа вад̣̇анд̇ийд̇и самб̣анд̇хо.
790.Santoti rāgādikilesavūpasamena santo, tathā abhinibbutatto. Itihanti sīlesu akatthamānoti ‘‘ahamasmi sīlasampanno’’tiādinā nayena iti sīlesu akatthamāno, sīlanimittaṃ attūpanāyikaṃ vācaṃ abhāsamānoti vuttaṃ hoti. Tamariyadhammaṃ kusalā vadantīti tassa taṃ akatthanaṃ ‘‘ariyadhammo eso’’ti buddhādayo khandhādikusalā vadanti. Yassussadā natthi kuhiñci loketi yassa khīṇāsavassa rāgādayo satta ussadā kuhiñci loke natthi, tassa taṃ akatthanaṃ ‘‘ariyadhammo eso’’ti evaṃ kusalā vadantīti sambandho.
791. звам̣ кийн̣аасавабадибад̇д̇им̣ д̣̇ассзд̇ваа ид̣̇аани д̣̇идтиг̇ад̇игаанам̣ д̇ид̇т̇ияаанам̣ бадибад̇д̇им̣ ран̃н̃о д̣̇ассзнд̇о ааха – ‘‘багаббид̇аа сан̇кад̇аа’’д̇и. д̇ад̇т̇а багаббид̇аад̇и баригаббид̇аа. сан̇кад̇аад̇и бажжаяаабхисан̇кад̇аа. яассаад̇и яасса гассажи д̣̇идтиг̇ад̇игасса. д̇хаммаад̇и д̣̇идтияо. бурагкад̇аад̇и бурад̇о гад̇аа. санд̇ийд̇и сам̣виж̇ж̇анд̇и. авийвад̣̇аад̇аад̇и авод̣̇аад̇аа. яад̣̇ад̇д̇ани бассад̇и аанисам̣сам̣, д̇ам̣ ниссид̇о губбабадижжасанд̇инд̇и яассзд̇з д̣̇идтид̇хаммаа бурагкад̇аа авод̣̇аад̇аа санд̇и, со звам̣вид̇хо яасмаа ад̇д̇ани д̇ассаа д̣̇идтияаа д̣̇идтид̇хаммиган̃жа саггаараад̣̇им̣, самбарааяиган̃жа г̇ад̇ивисзсаад̣̇им̣ аанисам̣сам̣ бассад̇и, д̇асмаа д̇ан̃жа аанисам̣сам̣, д̇ан̃жа губбад̇ааяа жа бадижжасамуббаннад̇ааяа жа саммуд̇исанд̇ид̇ааяа жа губбабадижжасанд̇исан̇каад̇ам̣ д̣̇идтим̣ ниссид̇ова ход̇и, со д̇анниссид̇ад̇д̇аа ад̇д̇аанам̣ ваа уггам̣сзяяа барз ваа вамбхзяяа абхууд̇зхиби г̇ун̣ад̣̇осзхи.
791. Evaṃ khīṇāsavapaṭipattiṃ dassetvā idāni diṭṭhigatikānaṃ titthiyānaṃ paṭipattiṃ rañño dassento āha – ‘‘pakappitā saṅkhatā’’ti. Tattha pakappitāti parikappitā. Saṅkhatāti paccayābhisaṅkhatā. Yassāti yassa kassaci diṭṭhigatikassa. Dhammāti diṭṭhiyo. Purakkhatāti purato katā. Santīti saṃvijjanti. Avīvadātāti avodātā. Yadattani passati ānisaṃsaṃ, taṃ nissito kuppapaṭiccasantinti yassete diṭṭhidhammā purakkhatā avodātā santi, so evaṃvidho yasmā attani tassā diṭṭhiyā diṭṭhidhammikañca sakkārādiṃ, samparāyikañca gativisesādiṃ ānisaṃsaṃ passati, tasmā tañca ānisaṃsaṃ, tañca kuppatāya ca paṭiccasamuppannatāya ca sammutisantitāya ca kuppapaṭiccasantisaṅkhātaṃ diṭṭhiṃ nissitova hoti, so tannissitattā attānaṃ vā ukkaṃseyya pare vā vambheyya abhūtehipi guṇadosehi.
792. звам̣ ниссид̇зна жа д̣̇идтийнивзсаа…бз… аад̣̇ияад̇ий жа д̇хамманд̇и. д̇ад̇т̇а д̣̇идтийнивзсаад̇и ид̣̇ам̣сажжаабхинивзсасан̇каад̇аани д̣̇идтинивзсанаани. на хи сваад̇ивад̇д̇аад̇и сукзна ад̇ивад̇д̇ид̇аб̣б̣аа на хонд̇и. д̇хаммзсу нижчзяяа самуг̇г̇ахийд̇анд̇и д̣̇ваасадтид̣̇идтид̇хаммзсу д̇ам̣ д̇ам̣ самуг̇г̇ахид̇ам̣ абхинивидтам̣ д̇хаммам̣ нижчинид̇ваа бавад̇д̇ад̇д̇аа д̣̇идтинивзсаа на хи сваад̇ивад̇д̇аад̇и вуд̇д̇ам̣ ход̇и. д̇асмаа наро д̇зсу нивзсанзсу, нирассад̇ий аад̣̇ияад̇ий жа д̇хамманд̇и яасмаа на хи сваад̇ивад̇д̇аа , д̇асмаа наро д̇зсуязва д̣̇идтинивзсанзсу аж̇асийлаг̇осийлагуггурасийлабан̃жаад̇абамаруббабаад̇ауггудигаббад̇хаанаган̣дагаабассаяаад̣̇ибхзд̣̇ам̣ сад̇т̇аарад̇хаммагкаанаг̇ан̣аад̣̇ибхзд̣̇ан̃жа д̇ам̣ д̇ам̣ д̇хаммам̣ нирассад̇и жа аад̣̇ияад̇и жа ж̇ахад̇и жа г̇ан̣хаад̇и жа ванамаггадо вияа д̇ам̣ д̇ам̣ сааканд̇и вуд̇д̇ам̣ ход̇и. звам̣ нирассанд̇о жа аад̣̇ияанд̇о жа анавадтид̇ажид̇д̇ад̇д̇аа асанд̇зхиби г̇ун̣ад̣̇осзхи ад̇д̇ано ваа барасса ваа яасааяасам̣ уббаад̣̇зяяа.
792. Evaṃ nissitena ca diṭṭhīnivesā…pe… ādiyatī ca dhammanti. Tattha diṭṭhīnivesāti idaṃsaccābhinivesasaṅkhātāni diṭṭhinivesanāni. Na hi svātivattāti sukhena ativattitabbā na honti. Dhammesu niccheyya samuggahītanti dvāsaṭṭhidiṭṭhidhammesu taṃ taṃ samuggahitaṃ abhiniviṭṭhaṃ dhammaṃ nicchinitvā pavattattā diṭṭhinivesā na hi svātivattāti vuttaṃ hoti. Tasmā naro tesu nivesanesu, nirassatī ādiyatī ca dhammanti yasmā na hi svātivattā , tasmā naro tesuyeva diṭṭhinivesanesu ajasīlagosīlakukkurasīlapañcātapamaruppapātaukkuṭikappadhānakaṇṭakāpassayādibhedaṃ satthāradhammakkhānagaṇādibhedañca taṃ taṃ dhammaṃ nirassati ca ādiyati ca jahati ca gaṇhāti ca vanamakkaṭo viya taṃ taṃ sākhanti vuttaṃ hoti. Evaṃ nirassanto ca ādiyanto ca anavaṭṭhitacittattā asantehipi guṇadosehi attano vā parassa vā yasāyasaṃ uppādeyya.
793. яо банааяам̣ саб̣б̣ад̣̇идтиг̇ад̇аад̣̇ид̣̇осад̇хунанааяа бан̃н̃ааяа саманнааг̇ад̇ад̇д̇аа д̇хоно, д̇асса д̇хонасса хи…бз… ануубаяо со. гим̣ вуд̇д̇ам̣ ход̇и? д̇хонад̇хаммасаманнааг̇амаа д̇хонасса д̇худ̇асаб̣б̣абаабасса арахад̇о гад̇т̇ажи логз д̇зсу д̇зсу бхавзсу багаббид̇аа д̣̇идти над̇т̇и, со д̇ассаа д̣̇идтияаа абхаавзна, яааяа жа ад̇д̇анаа гад̇ам̣ баабагаммам̣ бадижчаад̣̇знд̇аа д̇ид̇т̇ияаа мааяааяа маанзна ваа зд̇ам̣ аг̇ад̇им̣ г̇ажчанд̇и, д̇амби мааяан̃жа маанан̃жа бахааяа д̇хоно рааг̇аад̣̇ийнам̣ д̣̇осаанам̣ гзна г̇ажчзяяа, д̣̇идтад̇хаммз самбарааяз ваа нираяаад̣̇ийсу г̇ад̇ивисзсзсу гзна сан̇кам̣ г̇ажчзяяа, ануубаяо со, со хи д̇ан̣хаад̣̇идтиубаяаанам̣ д̣̇виннам̣ абхаавзна ануубаяод̇и.
793. Yo panāyaṃ sabbadiṭṭhigatādidosadhunanāya paññāya samannāgatattā dhono, tassa dhonassa hi…pe… anūpayo so. Kiṃ vuttaṃ hoti? Dhonadhammasamannāgamā dhonassa dhutasabbapāpassa arahato katthaci loke tesu tesu bhavesu pakappitā diṭṭhi natthi, so tassā diṭṭhiyā abhāvena, yāya ca attanā kataṃ pāpakammaṃ paṭicchādentā titthiyā māyāya mānena vā etaṃ agatiṃ gacchanti, tampi māyañca mānañca pahāya dhono rāgādīnaṃ dosānaṃ kena gaccheyya, diṭṭhadhamme samparāye vā nirayādīsu gativisesesu kena saṅkhaṃ gaccheyya, anūpayo so, so hi taṇhādiṭṭhiupayānaṃ dvinnaṃ abhāvena anūpayoti.
794. яо бана д̇зсам̣ д̣̇виннам̣ бхаавзна убаяо ход̇и, со убаяо хи…бз… д̣̇идтимид̇хзва саб̣б̣анд̇и. д̇ад̇т̇а убаяод̇и д̇ан̣хаад̣̇идтиниссид̇о. д̇хаммзсу убзд̇и ваад̣̇анд̇и ‘‘рад̇д̇о’’д̇и ваа ‘‘д̣̇удто’’д̇и ваа звам̣ д̇зсу д̇зсу д̇хаммзсу убзд̇и ваад̣̇ам̣. ануубаяам̣ гзна гат̇ам̣ вад̣̇зяяаад̇и д̇ан̣хаад̣̇идтибахаанзна ануубаяам̣ кийн̣аасавам̣ гзна рааг̇зна ваа д̣̇осзна ваа гат̇ам̣ ‘‘рад̇д̇о’’д̇и ваа ‘‘д̣̇удто’’д̇и ваа вад̣̇зяяа, звам̣ анубаваж̇ж̇о жа со гим̣ д̇ид̇т̇ияаа вияа гад̇абадижчаад̣̇аго бхависсад̇ийд̇и ад̇хиббааяо. ад̇д̇аа нирад̇д̇аа на хи д̇асса ад̇т̇ийд̇и д̇асса хи ад̇д̇ад̣̇идти ваа ужчзд̣̇ад̣̇идти ваа над̇т̇и, г̇ахан̣ам̣ мун̃жанам̣ вааби ад̇д̇анирад̇д̇асан̃н̃ид̇ам̣ над̇т̇и. гим̣гааран̣аа над̇т̇ийд̇и жз? ад̇хоси со д̣̇идтимид̇хзва саб̣б̣ам̣, яасмаа со ид̇хзва ад̇д̇абхаавз н̃аан̣аваад̇зна саб̣б̣ам̣ д̣̇идтиг̇ад̇ам̣ ад̇хоси, баж̇ахи, винод̣̇зсийд̇и арахад̇д̇анигуудзна д̣̇зсанам̣ нидтаабзси. д̇ам̣ суд̇ваа рааж̇аа ад̇д̇амано бхаг̇аванд̇ам̣ абхиваад̣̇зд̇ваа баггаамийд̇и.
794. Yo pana tesaṃ dvinnaṃ bhāvena upayo hoti, so upayo hi…pe… diṭṭhimidheva sabbanti. Tattha upayoti taṇhādiṭṭhinissito. Dhammesu upeti vādanti ‘‘ratto’’ti vā ‘‘duṭṭho’’ti vā evaṃ tesu tesu dhammesu upeti vādaṃ. Anūpayaṃ kena kathaṃ vadeyyāti taṇhādiṭṭhipahānena anūpayaṃ khīṇāsavaṃ kena rāgena vā dosena vā kathaṃ ‘‘ratto’’ti vā ‘‘duṭṭho’’ti vā vadeyya, evaṃ anupavajjo ca so kiṃ titthiyā viya katapaṭicchādako bhavissatīti adhippāyo. Attā nirattā na hi tassa atthīti tassa hi attadiṭṭhi vā ucchedadiṭṭhi vā natthi, gahaṇaṃ muñcanaṃ vāpi attanirattasaññitaṃ natthi. Kiṃkāraṇā natthīti ce? Adhosi so diṭṭhimidheva sabbaṃ, yasmā so idheva attabhāve ñāṇavātena sabbaṃ diṭṭhigataṃ adhosi, pajahi, vinodesīti arahattanikūṭena desanaṃ niṭṭhāpesi. Taṃ sutvā rājā attamano bhagavantaṃ abhivādetvā pakkāmīti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа д̣̇удтадтагасуд̇д̇аван̣н̣анаа нидтид̇аа.
Suttanipāta-aṭṭhakathāya duṭṭhaṭṭhakasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 3. д̣̇удтадтагасуд̇д̇ам̣ • 3. Duṭṭhaṭṭhakasuttaṃ
