| Library / Tipiṭaka / તિપિટક • Tipiṭaka / સારત્થદીપની-ટીકા • Sāratthadīpanī-ṭīkā |
૩. દુટ્ઠુલ્લવાચાસિક્ખાપદવણ્ણના
3. Duṭṭhullavācāsikkhāpadavaṇṇanā
૨૮૩. તતિયે ઉત્તરપદલોપેન છિન્નઓત્તપ્પા ‘‘છિન્નિકા’’તિ વુત્તાતિ આહ ‘‘છિન્નિકાતિ છિન્નઓતપ્પા’’તિ.
283. Tatiye uttarapadalopena chinnaottappā ‘‘chinnikā’’ti vuttāti āha ‘‘chinnikāti chinnaotappā’’ti.
૨૮૫. યથા યુવા યુવતિન્તિ એતેન ઓભાસને નિરાસઙ્કભાવં દસ્સેતિ. મેથુનુપસઞ્હિતાહીતિ ઇદં દુટ્ઠુલ્લવાચાય સિખાપ્પત્તલક્ખણદસ્સનં. ઇત્થિલક્ખણેનાતિ વુત્તમત્થં વિવરિતું ‘‘સુભલક્ખણેના’’તિ વુત્તં. ન તાવ સીસં એતીતિ ‘‘ઇત્થિલક્ખણેન સમન્નાગતાસી’’તિઆદિના વણ્ણભણનં સઙ્ઘાદિસેસાપત્તિજનકં હુત્વા મત્થકં ન પાપુણાતિ. વણ્ણભણનઞ્હિ યેનાકારેન ભણન્તસ્સ સઙ્ઘાદિસેસો હોતિ, તેનાકારેન ભણન્તસ્સ સિખાપ્પત્તં નામ હોતિ. ‘‘ઇત્થિલક્ખણેન સમન્નાગતાસીતિઆદિકં પન દુટ્ઠુલ્લવાચસ્સાદરાગવસેન ભણન્તસ્સ દુક્કટ’’ન્તિ ગણ્ઠિપદેસુ વુત્તં.
285.Yathā yuvā yuvatinti etena obhāsane nirāsaṅkabhāvaṃ dasseti. Methunupasañhitāhīti idaṃ duṭṭhullavācāya sikhāppattalakkhaṇadassanaṃ. Itthilakkhaṇenāti vuttamatthaṃ vivarituṃ ‘‘subhalakkhaṇenā’’ti vuttaṃ. Na tāva sīsaṃ etīti ‘‘itthilakkhaṇena samannāgatāsī’’tiādinā vaṇṇabhaṇanaṃ saṅghādisesāpattijanakaṃ hutvā matthakaṃ na pāpuṇāti. Vaṇṇabhaṇanañhi yenākārena bhaṇantassa saṅghādiseso hoti, tenākārena bhaṇantassa sikhāppattaṃ nāma hoti. ‘‘Itthilakkhaṇena samannāgatāsītiādikaṃ pana duṭṭhullavācassādarāgavasena bhaṇantassa dukkaṭa’’nti gaṇṭhipadesu vuttaṃ.
એકાદસહિ પદેહિ અઘટિતે સીસં ન એતીતિ ‘‘અનિમિત્તાસી’’તિઆદીહિ એકાદસહિ પદેહિ અઘટિતે અવણ્ણભણનં સીસં ન એતિ, અવણ્ણભણનં નામ ન હોતીતિ વુત્તં હોતિ. ઘટિતેપીતિ એકાદસહિ પદેહિ અવણ્ણભણને ઘટિતેપિ. ઇમેહિ તીહિ ઘટિતેયેવ સઙ્ઘાદિસેસોતિ ‘‘સિખરણી’’તિઆદીહિ તીહિયેવ પદેહિ અવણ્ણભણને ઘટિતેયેવ સઙ્ઘાદિસેસો પસ્સાવમગ્ગસ્સ નિયતવચનત્તા અચ્ચોળારિકત્તા ચ. અનિમિત્તાસીતિઆદીહિ પન અટ્ઠહિ પદેહિ ઘટિતે કેવલં અવણ્ણભણનમેવ સમ્પજ્જતિ, ન સઙ્ઘાદિસેસો, તસ્મા તાનિ થુલ્લચ્ચયવત્થૂનીતિ કેચિ. અક્કોસનમત્તત્તા દુક્કટવત્થૂનીતિ અપરે. પરિબ્બાજિકાવત્થુસ્મિં વિય થુલ્લચ્ચયમેવેત્થ યુત્તતરં દિસ્સતિ. કુઞ્ચિકપણાલિમત્તન્તિ કુઞ્ચિકાછિદ્દમત્તં.
Ekādasahi padehi aghaṭite sīsaṃ na etīti ‘‘animittāsī’’tiādīhi ekādasahi padehi aghaṭite avaṇṇabhaṇanaṃ sīsaṃ na eti, avaṇṇabhaṇanaṃ nāma na hotīti vuttaṃ hoti. Ghaṭitepīti ekādasahi padehi avaṇṇabhaṇane ghaṭitepi. Imehi tīhi ghaṭiteyeva saṅghādisesoti ‘‘sikharaṇī’’tiādīhi tīhiyeva padehi avaṇṇabhaṇane ghaṭiteyeva saṅghādiseso passāvamaggassa niyatavacanattā accoḷārikattā ca. Animittāsītiādīhi pana aṭṭhahi padehi ghaṭite kevalaṃ avaṇṇabhaṇanameva sampajjati, na saṅghādiseso, tasmā tāni thullaccayavatthūnīti keci. Akkosanamattattā dukkaṭavatthūnīti apare. Paribbājikāvatthusmiṃ viya thullaccayamevettha yuttataraṃ dissati. Kuñcikapaṇālimattanti kuñcikāchiddamattaṃ.
૨૮૬-૨૮૭. ગરુકાપત્તિન્તિ ભિક્ખુનિયા કાયસંસગ્ગે પારાજિકાપત્તિં સન્ધાય વદતિ. હસન્તો હસન્તોતિ સભાવદસ્સનત્થં વુત્તં. અહસન્તોપિ વાચસ્સાદરાગેન પુનપ્પુનં વદતિ, આપત્તિયેવ. કાયચિત્તતોતિ હત્થમુદ્દાય ઓભાસન્તસ્સ કાયચિત્તતો સમુટ્ઠાતિ.
286-287.Garukāpattinti bhikkhuniyā kāyasaṃsagge pārājikāpattiṃ sandhāya vadati. Hasanto hasantoti sabhāvadassanatthaṃ vuttaṃ. Ahasantopi vācassādarāgena punappunaṃ vadati, āpattiyeva. Kāyacittatoti hatthamuddāya obhāsantassa kāyacittato samuṭṭhāti.
૨૮૮. તસ્મા દુક્કટન્તિ અપ્પટિવિજાનનહેતુ દુક્કટં, પટિવિજાનન્તિયા પન અખેત્તપદત્તા થુલ્લચ્ચયેન ભવિતબ્બં. તેનેવ પરિબ્બાજિકાવત્થુસ્મિં પટિવિજાનન્તિયા થુલ્લચ્ચયં વક્ખતિ.
288.Tasmā dukkaṭanti appaṭivijānanahetu dukkaṭaṃ, paṭivijānantiyā pana akhettapadattā thullaccayena bhavitabbaṃ. Teneva paribbājikāvatthusmiṃ paṭivijānantiyā thullaccayaṃ vakkhati.
૨૮૯. અસદ્ધમ્મં સન્ધાયાહાતિ ‘‘વાપિત’’ન્તિ ઇમસ્સ બીજનિક્ખેપવચનત્તા વુત્તં. સંસીદતીતિ વહતિ પવત્તતિ. અથ વા સંસીદતીતિ સંસીદિસ્સતિ. મનુસ્સિત્થી, ઇત્થિસઞ્ઞિતા, દુટ્ઠુલ્લવાચસ્સાદરાગો, તેન રાગેન ઓભાસનં, તઙ્ખણવિજાનનન્તિ ઇમાનેત્થ પઞ્ચ અઙ્ગાનિ.
289.Asaddhammaṃsandhāyāhāti ‘‘vāpita’’nti imassa bījanikkhepavacanattā vuttaṃ. Saṃsīdatīti vahati pavattati. Atha vā saṃsīdatīti saṃsīdissati. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni.
દુટ્ઠુલ્લવાચાસિક્ખાપદવણ્ણના નિટ્ઠિતા.
Duṭṭhullavācāsikkhāpadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૩. દુટ્ઠુલ્લવાચાસિક્ખાપદં • 3. Duṭṭhullavācāsikkhāpadaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૩. દુટ્ઠુલ્લવાચાસિક્ખાપદવણ્ણના • 3. Duṭṭhullavācāsikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā
૩. દુટ્ઠુલ્લવાચાસિક્ખાપદવણ્ણના • 3. Duṭṭhullavācāsikkhāpadavaṇṇanā
પદભાજનીયવણ્ણના • Padabhājanīyavaṇṇanā
વિનીતવત્થુવણ્ણના • Vinītavatthuvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૩. દુટ્ઠુલ્લવાચાસિક્ખાપદવણ્ણના • 3. Duṭṭhullavācāsikkhāpadavaṇṇanā
