| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-анудийгаа • Dhammasaṅgaṇī-anuṭīkā |
д̣̇ваад̣̇асамажид̇д̇аван̣н̣анаа
Dvādasamacittavaṇṇanā
429. сахаж̇аад̇аад̇хибад̇и над̇т̇и ‘‘чанд̣̇авад̇о жз вижигижчаа уббаж̇ж̇ад̇и, саа маяхам̣ уббаж̇ж̇зяяаа’’д̇иаад̣̇иббавад̇д̇ияаа абхааваа. ануд̣̇д̇хадад̇д̇аа бадисид̣̇д̇хад̇аа, яат̇аад̇хаммасаасанз аважанамби абхаавам̣ д̣̇ийбзд̇и.
429. Sahajātādhipati natthi ‘‘chandavato ce vicikicchā uppajjati, sā mayhaṃ uppajjeyyā’’tiādippavattiyā abhāvā. Anuddhaṭattā paṭisiddhatā, yathādhammasāsane avacanampi abhāvaṃ dīpeti.
аважанад̇од̇и а-гаарасса д̇ад̣̇ан̃н̃аважанад̇ам̣ д̣̇ассзд̇и. зд̇зна жа д̣̇ассанзна бахаад̇аб̣б̣зсу абхаававажанзна гааран̣асид̣̇д̇хияаа паласид̣̇д̇хийд̇и д̇ад̇т̇а абхаавасса гааран̣амзва д̇аава д̣̇ассзд̇ум̣ ‘‘бадисанд̇хианаагад̣дханад̇о’’д̇и вуд̇д̇ам̣. д̇зна д̇ам̣сабхаавад̇аа д̇асса жид̇д̇уббаад̣̇асса вуд̇д̇аа ход̇и. д̇ад̇о жа ‘‘б̣алавам̣ бадисанд̇хим̣ аагад̣дхад̇и, д̣̇уб̣б̣алам̣ наагад̣дхад̇ий’’д̇и ид̣̇ам̣ бадисанд̇хид̣̇аанасабхаавзсу. яасса бана бадисанд̇хид̣̇аанасабхааво зва над̇т̇и, на д̇асса б̣алавабхааво бадисанд̇хиаагад̣дханз гааран̣анд̇и аяамад̇т̇о д̣̇ассид̇о ход̇и. анаагад̣дханам̣ саад̇хзд̇и ‘‘яад̣̇и хи аагад̣дхзяяаа’’д̇иаад̣̇инаа. яасмаа жа нааг̇ад̇ам̣, д̇асмаа наагад̣дхад̇ийд̇и ад̇хиббааяо. ‘‘яасмаа бана д̇ам̣ бадисанд̇хид̣̇аанам̣ над̇т̇и, д̇асмаа нааг̇ад̇а’’нд̇и вуд̇д̇ад̇д̇аа ‘‘анаагад̣дханад̇о анааг̇аманам̣ саад̇хзд̇у’’нд̇и вуд̇д̇ам̣.
Avacanatoti a-kārassa tadaññavacanataṃ dasseti. Etena ca dassanena pahātabbesu abhāvavacanena kāraṇasiddhiyā phalasiddhīti tattha abhāvassa kāraṇameva tāva dassetuṃ ‘‘paṭisandhianākaḍḍhanato’’ti vuttaṃ. Tena taṃsabhāvatā tassa cittuppādassa vuttā hoti. Tato ca ‘‘balavaṃ paṭisandhiṃ ākaḍḍhati, dubbalaṃ nākaḍḍhatī’’ti idaṃ paṭisandhidānasabhāvesu. Yassa pana paṭisandhidānasabhāvo eva natthi, na tassa balavabhāvo paṭisandhiākaḍḍhane kāraṇanti ayamattho dassito hoti. Anākaḍḍhanaṃ sādheti ‘‘yadi hi ākaḍḍheyyā’’tiādinā. Yasmā ca nāgataṃ, tasmā nākaḍḍhatīti adhippāyo. ‘‘Yasmā pana taṃ paṭisandhidānaṃ natthi, tasmā nāgata’’nti vuttattā ‘‘anākaḍḍhanato anāgamanaṃ sādhetu’’nti vuttaṃ.
абааяаг̇аманийяассаад̇и абааяам̣ г̇амзд̇ийд̇и абааяаг̇аманийяам̣, д̇ам̣сабхааванд̇и ад̇т̇о. бадисанд̇хиаагад̣дханз сад̇и уд̣̇д̇хажжасахаг̇ад̇ам̣ зганд̇зна абааяаг̇аманийяам̣ сияаа. д̇зна вуд̇д̇ам̣ адтагат̇ааяам̣ (д̇ха. са. адта. 429) ‘‘ид̇арассааби зд̇т̇зва бадисанд̇хид̣̇аанам̣ бхавзяяаа’’д̇и. на хи агусалабадисанд̇хи суг̇ад̇ияам̣ самбхавад̇ийд̇и. ‘‘жад̇уухи абааязхи жа виббамуд̇д̇о (ку. баа. 6.11; су. ни. 234) авинибаад̇ад̇хаммо’’д̇и (са. ни. 2.41; 5.998, 1004) важанад̇о абааяаг̇аманийяан̃жа д̣̇ассанзна бахаад̇аб̣б̣ам̣. д̇знааха ‘‘абааяаг̇аманийяасса д̣̇ассанзна бахаад̇аб̣б̣ад̇д̇аа’’д̇и. на жзд̇ам̣ д̣̇ассанзна бахаад̇аб̣б̣ам̣, на со д̇асса абааяаг̇аманийяо рааг̇о д̣̇осо мохо д̇ад̣̇згадтаа жа гилзсаад̇и зд̇зна сан̇г̇аход̇и саггаа вад̇д̇ум̣ нияог̇ад̇о бхааванааяа бахаад̇аб̣б̣абхаавзна вуд̇д̇ад̇д̇аа. вуд̇д̇ан̃хзд̇ам̣ ‘‘гад̇амз д̇хаммаа бхааванааяа бахаад̇аб̣б̣аа, уд̣̇д̇хажжасахаг̇ад̇о жид̇д̇уббаад̣̇о’’д̇и (д̇ха. са. 1406).
Apāyagamanīyassāti apāyaṃ gametīti apāyagamanīyaṃ, taṃsabhāvanti attho. Paṭisandhiākaḍḍhane sati uddhaccasahagataṃ ekantena apāyagamanīyaṃ siyā. Tena vuttaṃ aṭṭhakathāyaṃ (dha. sa. aṭṭha. 429) ‘‘itarassāpi ettheva paṭisandhidānaṃ bhaveyyā’’ti. Na hi akusalapaṭisandhi sugatiyaṃ sambhavatīti. ‘‘Catūhi apāyehi ca vippamutto (khu. pā. 6.11; su. ni. 234) avinipātadhammo’’ti (sa. ni. 2.41; 5.998, 1004) vacanato apāyagamanīyañca dassanena pahātabbaṃ. Tenāha ‘‘apāyagamanīyassa dassanena pahātabbattā’’ti. Na cetaṃ dassanena pahātabbaṃ, na so tassa apāyagamanīyo rāgo doso moho tadekaṭṭhā ca kilesāti etena saṅgahoti sakkā vattuṃ niyogato bhāvanāya pahātabbabhāvena vuttattā. Vuttañhetaṃ ‘‘katame dhammā bhāvanāya pahātabbā, uddhaccasahagato cittuppādo’’ti (dha. sa. 1406).
‘‘гусалаагусалам̣ гаммам̣ вибаагаанам̣ канд̇хаанам̣ гадад̇д̇аа жа руубаанам̣ гаммабажжаязна бажжаяо’’д̇и (бадтаа. 1.1.427) вуд̇д̇агаммабажжаяабхааво наанаагкан̣игагаммабажжаяабхааво. со жа яад̣̇и уд̣̇д̇хажжасахаг̇ад̇ам̣ бадисанд̇хим̣ аагад̣дхзяяа, д̇ассааби сияаа. д̇ат̇аа жа сад̇и уд̣̇д̇хажжасахаг̇ад̇ам̣ д̣̇ассанзна бахаад̇аб̣б̣ам̣ сияаа д̣̇ассанзна бахаад̇аб̣б̣аанам̣язва наанаагкан̣игагаммабажжаяабхаавасса вуд̇д̇ад̇д̇аа. на жзд̇ам̣ д̣̇ассзнзна бахаад̇аб̣б̣анд̇и саб̣б̣ам̣ буб̣б̣з вияа аавад̇д̇ад̇и.
‘‘Kusalākusalaṃ kammaṃ vipākānaṃ khandhānaṃ kaṭattā ca rūpānaṃ kammapaccayena paccayo’’ti (paṭṭhā. 1.1.427) vuttakammapaccayabhāvo nānākkhaṇikakammapaccayabhāvo. So ca yadi uddhaccasahagataṃ paṭisandhiṃ ākaḍḍheyya, tassāpi siyā. Tathā ca sati uddhaccasahagataṃ dassanena pahātabbaṃ siyā dassanena pahātabbānaṃyeva nānākkhaṇikakammapaccayabhāvassa vuttattā. Na cetaṃ dassenena pahātabbanti sabbaṃ pubbe viya āvattati.
сахаж̇аад̇амзва вибхад̇д̇анд̇и яат̇аа д̣̇ассанзна бахаад̇аб̣б̣авибхан̇г̇з ‘‘д̣̇ассанзна бахаад̇аб̣б̣о д̇хаммо нзва д̣̇ассанзна на бхааванааяа бахаад̇аб̣б̣асса д̇хаммасса гаммабажжаязна бажжаяо’’д̇и (бадтаа. 2.8.86) сахаж̇аад̇ам̣ наанаагкан̣иганд̇и уд̣̇д̣̇исид̇ваа ‘‘сахаж̇аад̇аа д̣̇ассанзна бахаад̇аб̣б̣аа жзд̇анаа жид̇д̇асамудтаанаанам̣ руубаанам̣ гаммабажжаязна бажжаяо, наанаагкан̣игаа д̣̇ассанзна бахаад̇аб̣б̣аа жзд̇анаа вибаагаанам̣ канд̇хаанам̣ гадад̇д̇аа жа руубаанам̣ гаммабажжаязна бажжаяо’’д̇и вибхад̇д̇ам̣, звам̣ авибхаж̇ид̇ваа ‘‘бхааванааяа бахаад̇аб̣б̣аа жзд̇анаа жид̇д̇асамудтаанаанам̣ руубаанам̣ гаммабажжаязна бажжаяо’’д̇и (бадтаа. 2.8.89) зд̇д̇агамзва вуд̇д̇ам̣, на вуд̇д̇ам̣ ‘‘наанаагкан̣игаа жзд̇анаа вибаагаанам̣ канд̇хаанам̣ гадад̇д̇аа жа руубаанам̣ гаммабажжаязна бажжаяо’’д̇и. д̇зна на бхааванааяа бахаад̇аб̣б̣асса наанаагкан̣игагаммабажжаяабхаавод̇и вин̃н̃ааяад̇и. бажжанийязби яат̇аасамбхавам̣ сан̇г̇аахагабажжаяаанам̣ васзна бажжаяуд̣̇д̇хаарз гарияамаанз. ид̇арад̇т̇а жаад̇и д̣̇ассанзнабахаад̇аб̣б̣абад̣̇з. д̇ад̇т̇а хи ‘‘д̣̇ассанзна бахаад̇аб̣б̣о д̇хаммо нзва д̣̇ассанзна на бхааванааяа бахаад̇аб̣б̣асса д̇хаммасса аарамман̣абажжаязна бажжаяо, сахаж̇аад̇аубаниссаяабажчааж̇аад̇агаммабажжаязна бажжаяо’’д̇и (бадтаа. 2.8.71) гаммабажжаяоби вуд̇д̇од̇и.
Sahajātameva vibhattanti yathā dassanena pahātabbavibhaṅge ‘‘dassanena pahātabbo dhammo neva dassanena na bhāvanāya pahātabbassa dhammassa kammapaccayena paccayo’’ti (paṭṭhā. 2.8.86) sahajātaṃ nānākkhaṇikanti uddisitvā ‘‘sahajātā dassanena pahātabbā cetanā cittasamuṭṭhānānaṃ rūpānaṃ kammapaccayena paccayo, nānākkhaṇikā dassanena pahātabbā cetanā vipākānaṃ khandhānaṃ kaṭattā ca rūpānaṃ kammapaccayena paccayo’’ti vibhattaṃ, evaṃ avibhajitvā ‘‘bhāvanāya pahātabbā cetanā cittasamuṭṭhānānaṃ rūpānaṃ kammapaccayena paccayo’’ti (paṭṭhā. 2.8.89) ettakameva vuttaṃ, na vuttaṃ ‘‘nānākkhaṇikā cetanā vipākānaṃ khandhānaṃ kaṭattā ca rūpānaṃ kammapaccayena paccayo’’ti. Tena na bhāvanāya pahātabbassa nānākkhaṇikakammapaccayabhāvoti viññāyati. Paccanīyepi yathāsambhavaṃ saṅgāhakapaccayānaṃ vasena paccayuddhāre kariyamāne. Itarattha cāti dassanenapahātabbapade. Tattha hi ‘‘dassanena pahātabbo dhammo neva dassanena na bhāvanāya pahātabbassa dhammassa ārammaṇapaccayena paccayo, sahajātaupanissayapacchājātakammapaccayena paccayo’’ti (paṭṭhā. 2.8.71) kammapaccayopi vuttoti.
д̇ад̣̇абхааваад̇и наанаагкан̣игагаммабажжаяад̇д̇аабхааваа. на жа наанаагкан̣игагаммабажжаяам̣ винаа бадисанд̇хиаагад̣дханам̣ ад̇т̇ийд̇и ‘‘бадисанд̇хианаагад̣дханад̇о д̇ад̇т̇а анааг̇ад̇аа’’д̇и вуд̇д̇ам̣. зд̇т̇аад̇и ‘‘табзд̇ваа уд̣̇д̇хажжасахаг̇ад̇ам̣ сзсаани згаад̣̇асзва бадисанд̇хим̣ аагад̣дханд̇ий’’д̇и зд̇т̇а. бавад̇д̇ивибаагассаад̇и бавад̇д̇ияам̣ вибааго бавад̇д̇изгад̣̇зсад̇ааяа бавад̇д̇ибхууд̇о ваа вибааго зд̇ассаад̇и бавад̇д̇ивибаагам̣, гаммам̣, д̇асса. ат̇а ваа бавад̇д̇ияам̣ вибааго бавад̇д̇ивибааго. имасмим̣ бана ад̇т̇з наанаагкан̣игагаммабажжаяо зд̇ассаад̇и наанаа…бз… яо, д̇аб̣бхааво…бз… д̇аад̇и звам̣ бад̣̇ажчзд̣̇о д̣̇адтаб̣б̣о. на саггаа ниваарзд̇ум̣ наанаагкан̣игагаммабажжаяам̣ винаа вибаагасса ануббаж̇ж̇анад̇о.
Tadabhāvāti nānākkhaṇikakammapaccayattābhāvā. Na ca nānākkhaṇikakammapaccayaṃ vinā paṭisandhiākaḍḍhanaṃ atthīti ‘‘paṭisandhianākaḍḍhanato tattha anāgatā’’ti vuttaṃ. Etthāti ‘‘ṭhapetvā uddhaccasahagataṃ sesāni ekādaseva paṭisandhiṃ ākaḍḍhantī’’ti ettha. Pavattivipākassāti pavattiyaṃ vipāko pavattiekadesatāya pavattibhūto vā vipāko etassāti pavattivipākaṃ, kammaṃ, tassa. Atha vā pavattiyaṃ vipāko pavattivipāko. Imasmiṃ pana atthe nānākkhaṇikakammapaccayo etassāti nānā…pe… yo, tabbhāvo…pe… tāti evaṃ padacchedo daṭṭhabbo. Na sakkā nivāretuṃ nānākkhaṇikakammapaccayaṃ vinā vipākassa anuppajjanato.
ид̣̇аани бавад̇д̇ивибаагаанам̣ наанаагкан̣игагаммабажжаяалаабхид̇ааяа аахажжабхаасид̇ад̇ам̣ д̣̇ассзд̇ум̣ ‘‘вуд̇д̇ан̃жаа’’д̇иаад̣̇имааха. вибаагад̣̇аанам̣ бадисанд̇хивибаагад̇хаммад̇аад̇и ман̃н̃амаано ‘‘яад̣̇и бхааванаа’’д̇иаад̣̇имааха. ид̇аро вибаагад̣̇аанаабхаавзби сид̣̇д̇хо вибаагад̇хаммабхааво д̇аад̣̇исаанам̣ ан̃н̃зсамби лаб̣бхамаанад̇д̇аад̇и ааха ‘‘абхин̃н̃аажид̇д̇аад̣̇ийна’’нд̇и. аад̣̇и-сад̣̇д̣̇зна ад̇д̇ано гааламад̇игганд̇ам̣ д̣̇идтад̇хаммавзд̣̇анийяам̣ убабаж̇ж̇авзд̣̇анийяан̃жа сан̇г̇ан̣хаад̇и. вуд̇д̇ам̣ сияаад̇и ид̣̇ам̣ сахааяабажжаяалаабхад̇о бут̇уж̇ж̇анасанд̇аанавуд̇д̇ино уд̣̇д̇хажжасахаг̇ад̇асса вибаагуббаад̣̇анам̣, д̇ад̣̇абхааваа сзгкасанд̇ад̇ияам̣ д̇асса вибаагаануббаад̣̇анан̃жа яуд̇д̇ам̣ сияаад̇и вуд̇д̇ам̣. д̇знзвааха ‘‘ид̣̇ам̣ бана таанам̣ судту вижаарзд̇аб̣б̣а’’нд̇иаад̣̇и. д̇ат̇аа жа вагкад̇и ‘‘бут̇уж̇ж̇анзсу уббаж̇ж̇амаанаанам̣ сагабхан̣д̣з чанд̣̇арааг̇аад̣̇ийнам̣ уд̣̇д̇хажжасахаг̇ад̇ажид̇д̇уббаад̣̇асса жа сам̣яож̇анад̇д̇аяад̇ад̣̇згадтагилзсаанам̣ анубажчиннад̇ааяа абаригкийн̣асахааяаанам̣ вибаагуббаад̣̇анам̣ на саггаа бадигкибид̇унд̇и уд̣̇д̇хажжасахаг̇ад̇ад̇хаммаанам̣ вибааго вибхан̇г̇з вуд̇д̇о’’д̇и. д̇асса д̇аад̣̇исассзва сад̇и сахааяз вибаагуббаад̣̇анаважанам̣, асад̇и вибаагаануббаад̣̇анаважанам̣ вируж̇жхад̇ийд̇и жа бавад̇д̇ивибаагад̣̇ааяигам̣ ваа уд̣̇д̇хажжасахаг̇ад̇асса манаси гад̇ваа ‘‘вуд̇д̇ам̣ сияаа’’д̇и вуд̇д̇ам̣. ‘‘бавад̇д̇ивибааган̃хи санд̇хааяа ‘д̇зсам̣ вибаагз н̃аан̣а’нд̇и бадисамбхид̣̇аавибхан̇г̇з (вибха. 725-726) вуд̇д̇а’’нд̇и згз ван̣н̣аяанд̇и. звам̣ уд̣̇д̇хажжажзд̇анааби на ход̇и, сааби вин̃н̃аан̣абажжаяабхаавз абанзд̇аб̣б̣аад̇и ид̣̇амби бадисанд̇хивин̃н̃аан̣амзва санд̇хааяа вуд̇д̇анд̇и.
Idāni pavattivipākānaṃ nānākkhaṇikakammapaccayalābhitāya āhaccabhāsitataṃ dassetuṃ ‘‘vuttañcā’’tiādimāha. Vipākadānaṃ paṭisandhivipākadhammatāti maññamāno ‘‘yadi bhāvanā’’tiādimāha. Itaro vipākadānābhāvepi siddho vipākadhammabhāvo tādisānaṃ aññesampi labbhamānattāti āha ‘‘abhiññācittādīna’’nti. Ādi-saddena attano kālamatikkantaṃ diṭṭhadhammavedanīyaṃ upapajjavedanīyañca saṅgaṇhāti. Vuttaṃ siyāti idaṃ sahāyapaccayalābhato puthujjanasantānavuttino uddhaccasahagatassa vipākuppādanaṃ, tadabhāvā sekkhasantatiyaṃ tassa vipākānuppādanañca yuttaṃ siyāti vuttaṃ. Tenevāha ‘‘idaṃ pana ṭhānaṃ suṭṭhu vicāretabba’’ntiādi. Tathā ca vakkhati ‘‘puthujjanesu uppajjamānānaṃ sakabhaṇḍe chandarāgādīnaṃ uddhaccasahagatacittuppādassa ca saṃyojanattayatadekaṭṭhakilesānaṃ anupacchinnatāya aparikkhīṇasahāyānaṃ vipākuppādanaṃ na sakkā paṭikkhipitunti uddhaccasahagatadhammānaṃ vipāko vibhaṅge vutto’’ti. Tassa tādisasseva sati sahāye vipākuppādanavacanaṃ, asati vipākānuppādanavacanaṃ virujjhatīti ca pavattivipākadāyikaṃ vā uddhaccasahagatassa manasi katvā ‘‘vuttaṃ siyā’’ti vuttaṃ. ‘‘Pavattivipākañhi sandhāya ‘tesaṃ vipāke ñāṇa’nti paṭisambhidāvibhaṅge (vibha. 725-726) vutta’’nti eke vaṇṇayanti. Evaṃ uddhaccacetanāpi na hoti, sāpi viññāṇapaccayabhāve apanetabbāti idampi paṭisandhiviññāṇameva sandhāya vuttanti.
агусалабад̣̇аван̣н̣анаа нидтид̇аа.
Akusalapadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаммасан̇г̇ан̣ийбаал̣и • Dhammasaṅgaṇīpāḷi / д̣̇ваад̣̇аса агусалаани • Dvādasa akusalāni
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā / д̣̇ваад̣̇асамажид̇д̇ам̣ • Dvādasamacittaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā / д̣̇ваад̣̇асамажид̇д̇аван̣н̣анаа • Dvādasamacittavaṇṇanā
