| Library / Tipiṭaka / ཏིཔིཊཀ • Tipiṭaka / སུཏྟནིཔཱཏ-ཨཊྛཀཐཱ • Suttanipāta-aṭṭhakathā |
༡༢. དྭཡཏཱནུཔསྶནཱསུཏྟཝཎྞནཱ
12. Dvayatānupassanāsuttavaṇṇanā
ཨེཝཾ མེ སུཏནྟི དྭཡཏཱནུཔསྶནཱསུཏྟཾ། ཀཱ ཨུཔྤཏྟི? ཨིམསྶ སུཏྟསྶ ཨཏྟཛ྄ཛྷཱསཡཏོ ཨུཔྤཏྟི། ཨཏྟཛ྄ཛྷཱསཡེན ཧི བྷགཝཱ ཨིམཾ སུཏྟཾ དེསེསི། ཨཡམེཏྠ སངྑེཔོ, ཝིཏྠཱརོ པནསྶ ཨཏྠཝཎྞནཱཡམེཝ ཨཱཝི བྷཝིསྶཏི། ཏཏྠ ཨེཝཾ མེ སུཏནྟིཨཱདཱིནི ཝུཏྟནཡཱནེཝ། པུབྦཱརཱམེཏི སཱཝཏྠིནགརསྶ པུརཏྠིམདིསཱཡཾ ཨཱརཱམེ། མིགཱརམཱཏུ པཱསཱདེཏི ཨེཏྠ ཝིསཱཁཱ ཨུཔཱསིཀཱ ཨཏྟནོ སསུརེན མིགཱརེན སེཊྛིནཱ མཱཏུཊྛཱནེ ཋཔིཏཏྟཱ ‘‘མིགཱརམཱཏཱ’’ཏི ཝུཙྩཏི། ཏཱཡ མིགཱརམཱཏུཡཱ ནཝཀོཊིཨགྒྷནཀཾ མཧཱལཏཱཔིལ༹ནྡྷནཾ ཝིསྶཛྫེཏྭཱ ཀཱརཱཔིཏོ པཱསཱདོ ཧེཊྛཱ ཙ ཨུཔརི ཙ པཉྩ པཉྩ གབྦྷསཏཱནི ཀཏྭཱ སཧསྶཀཱུཊཱགཱརགབྦྷོ, སོ ‘‘མིགཱརམཱཏུཔཱསཱདོ’’ཏི ཝུཙྩཏི། ཏསྨིཾ མིགཱརམཱཏུ པཱསཱདེ།
Evaṃme sutanti dvayatānupassanāsuttaṃ. Kā uppatti? Imassa suttassa attajjhāsayato uppatti. Attajjhāsayena hi bhagavā imaṃ suttaṃ desesi. Ayamettha saṅkhepo, vitthāro panassa atthavaṇṇanāyameva āvi bhavissati. Tattha evaṃ me sutantiādīni vuttanayāneva. Pubbārāmeti sāvatthinagarassa puratthimadisāyaṃ ārāme. Migāramātu pāsādeti ettha visākhā upāsikā attano sasurena migārena seṭṭhinā mātuṭṭhāne ṭhapitattā ‘‘migāramātā’’ti vuccati. Tāya migāramātuyā navakoṭiagghanakaṃ mahālatāpiḷandhanaṃ vissajjetvā kārāpito pāsādo heṭṭhā ca upari ca pañca pañca gabbhasatāni katvā sahassakūṭāgāragabbho, so ‘‘migāramātupāsādo’’ti vuccati. Tasmiṃ migāramātu pāsāde.
ཏེན ཁོ པན སམཡེན བྷགཝཱཏི ཡཾ སམཡཾ བྷགཝཱ སཱཝཏྠིཾ ནིསྶཱཡ པུབྦཱརཱམེ མིགཱརམཱཏུ པཱསཱདེ ཝིཧརཏི, ཏེན སམཡེན། ཏདཧུཔོསཐེཏི ཏསྨིཾ ཨཧུ ཨུཔོསཐེ, ཨུཔོསཐདིཝསེཏི ཝུཏྟཾ ཧོཏི། པནྣརསེཏི ཨིདཾ ཨུཔོསཐགྒཧཎེན སམྤཏྟཱཝསེསུཔོསཐཔཊིཀྑེཔཝཙནཾ། པུཎྞཱཡ པུཎྞམཱཡ རཏྟིཡཱཏི པནྣརསདིཝསཏྟཱ དིཝསགཎནཱཡ ཨབྦྷཱདིཨུཔཀྐིལེསཝིརཧཏྟཱ རཏྟིགུཎསམྤཏྟིཡཱ ཙ པུཎྞཏྟཱ པུཎྞཱཡ, པརིཔུཎྞཙནྡཏྟཱ པུཎྞམཱཡ ཙ རཏྟིཡཱ། བྷིཀྑུསངྒྷཔརིཝུཏོཏི བྷིཀྑུསངྒྷེན པརིཝུཏོ། ཨབྦྷོཀཱསེ ནིསིནྣོ ཧོཏཱིཏི མིགཱརམཱཏུ རཏནཔཱསཱདཔརིཝེཎེ ཨབྦྷོཀཱསེ ཨུཔརི ཨཔྤཊིཙྪནྣེ ཨོཀཱསེ པཉྙཏྟཝརབུདྡྷཱསནེ ནིསིནྣོ ཧོཏི། ཏུཎྷཱིབྷཱུཏཾ ཏུཎྷཱིབྷཱུཏནྟི ཨཏཱིཝ ཏུཎྷཱིབྷཱུཏཾ, ཡཏོ ཡཏོ ཝཱ ཨནུཝིལོཀེཏི , ཏཏོ ཏཏོ ཏུཎྷཱིབྷཱུཏཾ, ཏུཎྷཱིབྷཱུཏཾ ཝཱཙཱཡ, པུན ཏུཎྷཱིབྷཱུཏཾ ཀཱཡེན། བྷིཀྑུསངྒྷཾ ཨནུཝིལོཀེཏྭཱཏི ཏཾ པརིཝཱརེཏྭཱ ནིསིནྣཾ ཨནེཀསཧསྶབྷིཀྑུཔརིམཱཎཾ ཏུཎྷཱིབྷཱུཏཾ ཏུཎྷཱིབྷཱུཏཾ བྷིཀྑུསངྒྷཾ ‘‘ཨེཏྟཀཱ ཨེཏྠ སོཏཱཔནྣཱ, ཨེཏྟཀཱ སཀདཱགཱམིནོ, ཨེཏྟཀཱ ཨནཱགཱམིནོ ཨེཏྟཀཱ ཨཱརདྡྷཝིཔསྶཀཱ ཀལྱཱཎཔུཐུཛྫནཱ, ཨིམསྶ བྷིཀྑུསངྒྷསྶ ཀཱིདིསཱི དྷམྨདེསནཱ སཔྤཱཡཱ’’ཏི སཔྤཱཡདྷམྨདེསནཱཔརིཙྪེདནཏྠཾ ཨིཏོ ཙིཏོ ཙ ཝིལོཀེཏྭཱ།
Tena kho pana samayena bhagavāti yaṃ samayaṃ bhagavā sāvatthiṃ nissāya pubbārāme migāramātu pāsāde viharati, tena samayena. Tadahuposatheti tasmiṃ ahu uposathe, uposathadivaseti vuttaṃ hoti. Pannaraseti idaṃ uposathaggahaṇena sampattāvasesuposathapaṭikkhepavacanaṃ. Puṇṇāya puṇṇamāya rattiyāti pannarasadivasattā divasagaṇanāya abbhādiupakkilesavirahattā rattiguṇasampattiyā ca puṇṇattā puṇṇāya, paripuṇṇacandattā puṇṇamāya ca rattiyā. Bhikkhusaṅghaparivutoti bhikkhusaṅghena parivuto. Abbhokāse nisinno hotīti migāramātu ratanapāsādapariveṇe abbhokāse upari appaṭicchanne okāse paññattavarabuddhāsane nisinno hoti. Tuṇhībhūtaṃ tuṇhībhūtanti atīva tuṇhībhūtaṃ, yato yato vā anuviloketi , tato tato tuṇhībhūtaṃ, tuṇhībhūtaṃ vācāya, puna tuṇhībhūtaṃ kāyena. Bhikkhusaṅghaṃ anuviloketvāti taṃ parivāretvā nisinnaṃ anekasahassabhikkhuparimāṇaṃ tuṇhībhūtaṃ tuṇhībhūtaṃ bhikkhusaṅghaṃ ‘‘ettakā ettha sotāpannā, ettakā sakadāgāmino, ettakā anāgāmino ettakā āraddhavipassakā kalyāṇaputhujjanā, imassa bhikkhusaṅghassa kīdisī dhammadesanā sappāyā’’ti sappāyadhammadesanāparicchedanatthaṃ ito cito ca viloketvā.
ཡེ ཏེ, བྷིཀྑཝེ, ཀུསལཱ དྷམྨཱཏི ཡེ ཏེ ཨཱརོགྱཊྛེན ཨནཝཛྫཊྛེན ཨིཊྛཕལཊྛེན ཀོསལླསམྦྷཱུཏཊྛེན ཙ ཀུསལཱ སཏྟཏིཾསབོདྷིཔཀྑིཡདྷམྨཱ, ཏཛྫོཏཀཱ ཝཱ པརིཡཏྟིདྷམྨཱ། ཨརིཡཱ ནིཡྻཱནིཀཱ སམྦོདྷགཱམིནོཏི ཨུཔགནྟབྦཊྛེན ཨརིཡཱ, ལོཀཏོ ནིཡྻཱནཊྛེན ནིཡྻཱནིཀཱ, སམྦོདྷསངྑཱཏཾ ཨརཧཏྟཾ གམནཊྛེན སམྦོདྷགཱམིནོ། ཏེསཾ ཝོ བྷིཀྑཝེ…པེ॰… སཝནཱཡ, ཏེསཾ བྷིཀྑཝེ ཀུསལཱནཾ…པེ॰… སམྦོདྷགཱམཱིནཾ ཀཱ ཨུཔནིསཱ, ཀིཾ ཀཱརཎཾ, ཀིཾ པཡོཛནཾ ཏུམྷཱཀཾ སཝནཱཡ, ཀིམཏྠཾ ཏུམྷེ ཏེ དྷམྨེ སུཎཱཐཱཏི ཝུཏྟཾ ཧོཏི། ཡཱཝདེཝ དྭཡཏཱནཾ དྷམྨཱནཾ ཡཐཱབྷཱུཏཾ ཉཱཎཱཡཱཏི ཨེཏྠ ཡཱཝདེཝཱཏི པརིཙྪེདཱཝདྷཱརཎཝཙནཾ། དྭེ ཨཝཡཝཱ ཨེཏེསནྟི དྭཡཱ, དྭཡཱ ཨེཝ དྭཡཏཱ, ཏེསཾ དྭཡཏཱནཾ། ‘‘དྭཡཱན’’ནྟིཔི པཱཋོ། ཡཐཱབྷཱུཏཾ ཉཱཎཱཡཱཏི ཨཝིཔརཱིཏཉཱཎཱཡ། ཀིཾ ཝུཏྟཾ ཧོཏི? ཡདེཏཾ ལོཀིཡལོཀུཏྟརཱདིབྷེདེན དྭིདྷཱ ཝཝཏྠིཏཱནཾ དྷམྨཱནཾ ཝིཔསྶནཱསངྑཱཏཾ ཡཐཱབྷཱུཏཉཱཎཾ, ཨེཏདཏྠཱཡ ན ཨིཏོ བྷིཡྻོཏི, སཝནེན ཧི ཨེཏྟཀཾ ཧོཏི, ཏདུཏྟརི ཝིསེསཱདྷིགམོ བྷཱཝནཱཡཱཏི། ཀིཉྩ དྭཡཏཾ ཝདེཐཱཏི ཨེཏྠ པན སཙེ, ཝོ བྷིཀྑཝེ, སིཡཱ, ཀིཉྩ ཏུམྷེ, བྷནྟེ, དྭཡཏཾ ཝདེཐཱཏི ཨཡམདྷིཔྤཱཡོ། པདཏྠོ པན ‘‘ཀིཉྩ དྭཡཏཱབྷཱཝཾ ཝདེཐཱ’’ཏི།
Yete, bhikkhave, kusalā dhammāti ye te ārogyaṭṭhena anavajjaṭṭhena iṭṭhaphalaṭṭhena kosallasambhūtaṭṭhena ca kusalā sattatiṃsabodhipakkhiyadhammā, tajjotakā vā pariyattidhammā. Ariyāniyyānikā sambodhagāminoti upagantabbaṭṭhena ariyā, lokato niyyānaṭṭhena niyyānikā, sambodhasaṅkhātaṃ arahattaṃ gamanaṭṭhena sambodhagāmino. Tesaṃ vo bhikkhave…pe… savanāya, tesaṃ bhikkhave kusalānaṃ…pe… sambodhagāmīnaṃ kā upanisā, kiṃ kāraṇaṃ, kiṃ payojanaṃ tumhākaṃ savanāya, kimatthaṃ tumhe te dhamme suṇāthāti vuttaṃ hoti. Yāvadeva dvayatānaṃ dhammānaṃ yathābhūtaṃ ñāṇāyāti ettha yāvadevāti paricchedāvadhāraṇavacanaṃ. Dve avayavā etesanti dvayā, dvayā eva dvayatā, tesaṃ dvayatānaṃ. ‘‘Dvayāna’’ntipi pāṭho. Yathābhūtaṃ ñāṇāyāti aviparītañāṇāya. Kiṃ vuttaṃ hoti? Yadetaṃ lokiyalokuttarādibhedena dvidhā vavatthitānaṃ dhammānaṃ vipassanāsaṅkhātaṃ yathābhūtañāṇaṃ, etadatthāya na ito bhiyyoti, savanena hi ettakaṃ hoti, taduttari visesādhigamo bhāvanāyāti. Kiñca dvayataṃ vadethāti ettha pana sace, vo bhikkhave, siyā, kiñca tumhe, bhante, dvayataṃ vadethāti ayamadhippāyo. Padattho pana ‘‘kiñca dvayatābhāvaṃ vadethā’’ti.
(༡) ཏཏོ བྷགཝཱ དྭཡཏཾ དསྶེནྟོ ‘‘ཨིདཾ དུཀྑ’’ནྟི ཨེཝམཱདིམཱཧ། ཏཏྠ དྭཡཏཱནཾ ཙཏུསཙྩདྷམྨཱནཾ ‘‘ཨིདཾ དུཀྑཾ, ཨཡཾ དུཀྑསམུདཡོ’’ཏི ཨེཝཾ ལོཀིཡསྶ ཨེཀསྶ ཨཝཡཝསྶ སཧེཏུཀསྶ ཝཱ དུཀྑསྶ དསྶནེན ཨཡཾ ཨེཀཱནུཔསྶནཱ, ཨིཏརཱ ལོཀུཏྟརསྶ དུཏིཡསྶ ཨཝཡཝསྶ སཨུཔཱཡསྶ ཝཱ ནིརོདྷསྶ དསྶནེན དུཏིཡཱནུཔསྶནཱ། པཋམཱ ཙེཏྠ ཏཏིཡཙཏུཏྠཝིསུདྡྷཱིཧི ཧོཏི, དུཏིཡཱ པཉྩམཝིསུདྡྷིཡཱ། ཨེཝཾ སམྨཱ དྭཡཏཱནུཔསྶིནོཏི ཨིམིནཱ ཝུཏྟནཡེན སམྨཱ དྭཡདྷམྨེ ཨནུཔསྶནྟསྶ སཏིཡཱ ཨཝིཔྤཝཱསེན ཨཔྤམཏྟསྶ, ཀཱཡིཀཙེཏསིཀཝཱིརིཡཱཏཱཔེན ཨཱཏཱཔིནོ ཀཱཡེ ཙ ཛཱིཝིཏེ ཙ ནིརཔེཀྑཏྟཱ , པཧིཏཏྟསྶ། པཱཊིཀངྑནྟི ཨིཙྪིཏབྦཾ། དིཊྛེཝ དྷམྨེ ཨཉྙཱཏི ཨསྨིཾཡེཝ ཨཏྟབྷཱཝེ ཨརཧཏྟཾ། སཏི ཝཱ ཨུཔཱདིསེསེ ཨནཱགཱམིཏཱཏི ‘‘ཨུཔཱདིསེས’’ནྟི པུནབྦྷཝཝསེན ཨུཔཱདཱཏབྦཀྑནྡྷསེསཾ ཝུཙྩཏི, ཏསྨིཾ ཝཱ སཏི ཨནཱགཱམིབྷཱཝོ པཊིཀངྑོཏི དསྶེཏི། ཏཏྠ ཀིཉྩཱཔི ཧེཊྛིམཕལཱནིཔི ཨེཝཾ དྭཡཏཱནུཔསྶིནོཝ ཧོནྟི, ཨུཔརིམཕལེསུ པན ཨུསྶཱཧཾ ཛནེནྟོ ཨེཝམཱཧ།
(1) Tato bhagavā dvayataṃ dassento ‘‘idaṃ dukkha’’nti evamādimāha. Tattha dvayatānaṃ catusaccadhammānaṃ ‘‘idaṃ dukkhaṃ, ayaṃ dukkhasamudayo’’ti evaṃ lokiyassa ekassa avayavassa sahetukassa vā dukkhassa dassanena ayaṃ ekānupassanā, itarā lokuttarassa dutiyassa avayavassa saupāyassa vā nirodhassa dassanena dutiyānupassanā. Paṭhamā cettha tatiyacatutthavisuddhīhi hoti, dutiyā pañcamavisuddhiyā. Evaṃ sammā dvayatānupassinoti iminā vuttanayena sammā dvayadhamme anupassantassa satiyā avippavāsena appamattassa, kāyikacetasikavīriyātāpena ātāpino kāye ca jīvite ca nirapekkhattā , pahitattassa. Pāṭikaṅkhanti icchitabbaṃ. Diṭṭheva dhamme aññāti asmiṃyeva attabhāve arahattaṃ. Sati vā upādisese anāgāmitāti ‘‘upādisesa’’nti punabbhavavasena upādātabbakkhandhasesaṃ vuccati, tasmiṃ vā sati anāgāmibhāvo paṭikaṅkhoti dasseti. Tattha kiñcāpi heṭṭhimaphalānipi evaṃ dvayatānupassinova honti, uparimaphalesu pana ussāhaṃ janento evamāha.
ཨིདམཝོཙཱཏིཨཱདི སངྒཱིཏིཀཱརཱནཾ ཝཙནཾ། ཏཏྠ ཨིདནྟི ‘‘ཡེ ཏེ, བྷིཀྑཝེ’’ཏིཨཱདིཝུཏྟནིདསྶནཾ། ཨེཏནྟི ཨིདཱནི ‘‘ཡེ དུཀྑ’’ནྟི ཨེཝམཱདིཝཏྟབྦགཱཐཱབནྡྷནིདསྶནཾ། ཨིམཱ ཙ གཱཐཱ ཙཏུསཙྩདཱིཔཀཏྟཱ ཝུཏྟཏྠདཱིཔིཀཱ ཨེཝ, ཨེཝཾ སནྟེཔི གཱཐཱརུཙིཀཱནཾ པཙྪཱ ཨཱགཏཱནཾ པུབྦེ ཝུཏྟཾ ཨསམཏྠཏཱཡ ཨནུགྒཧེཏྭཱ ‘‘ཨིདཱནི ཡདི ཝདེཡྻ སུནྡར’’ནྟི ཨཱཀངྑནྟཱནཾ ཝིཀྑིཏྟཙིཏྟཱནཉྩ ཨཏྠཱཡ ཝུཏྟཱ། ཝིསེསཏྠདཱིཔིཀཱ ཝཱཏི ཨཝིཔསྶཀེ ཝིཔསྶཀེ ཙ དསྶེཏྭཱ ཏེསཾ ཝཊྚཝིཝཊྚདསྶནཏོ, ཏསྨཱ ཝིསེསཏྠདསྶནཏྠམེཝ ཝུཏྟཱ། ཨེས ནཡོ ཨིཏོ པརམྤི གཱཐཱཝཙནེསུ།
Idamavocātiādi saṅgītikārānaṃ vacanaṃ. Tattha idanti ‘‘ye te, bhikkhave’’tiādivuttanidassanaṃ. Etanti idāni ‘‘ye dukkha’’nti evamādivattabbagāthābandhanidassanaṃ. Imā ca gāthā catusaccadīpakattā vuttatthadīpikā eva, evaṃ santepi gāthārucikānaṃ pacchā āgatānaṃ pubbe vuttaṃ asamatthatāya anuggahetvā ‘‘idāni yadi vadeyya sundara’’nti ākaṅkhantānaṃ vikkhittacittānañca atthāya vuttā. Visesatthadīpikā vāti avipassake vipassake ca dassetvā tesaṃ vaṭṭavivaṭṭadassanato, tasmā visesatthadassanatthameva vuttā. Esa nayo ito parampi gāthāvacanesu.
༧༣༠. ཏཏྠ ཡཏྠ ཙཱཏི ནིབྦཱནཾ དསྶེཏི། ནིབྦཱནེ ཧི དུཀྑཾ སབྦསོ ཨུཔརུཛ྄ཛྷཏི, སབྦཔྤཀཱརཾ ཨུཔརུཛ྄ཛྷཏི, སཧེཏུཀཾ ཨུཔརུཛ྄ཛྷཏི, ཨསེསཉྩ ཨུཔརུཛ྄ཛྷཏི། ཏཉྩ མགྒནྟི ཏཉྩ ཨཊྛངྒིཀཾ མགྒཾ།
730. Tattha yattha cāti nibbānaṃ dasseti. Nibbāne hi dukkhaṃ sabbaso uparujjhati, sabbappakāraṃ uparujjhati, sahetukaṃ uparujjhati, asesañca uparujjhati. Tañca magganti tañca aṭṭhaṅgikaṃ maggaṃ.
༧༣༡-༣. ཙེཏོཝིམུཏྟིཧཱིནཱ ཏེ, ཨཐོ པཉྙཱཝིམུཏྟིཡཱཏི ཨེཏྠ ཨརཧཏྟཕལསམཱདྷི རཱགཝིརཱགཱ ཙེཏོཝིམུཏྟི, ཨརཧཏྟཕལཔཉྙཱ ཨཝིཛྫཱཝིརཱགཱ པཉྙཱཝིམུཏྟཱིཏི ཝེདིཏབྦཱ། ཏཎྷཱཙརིཏེན ཝཱ ཨཔྤནཱཛྷཱནབལེན ཀིལེསེ ཝིཀྑམྦྷེཏྭཱ ཨདྷིགཏཾ ཨརཧཏྟཕལཾ རཱགཝིརཱགཱ ཙེཏོཝིམུཏྟི, དིཊྛིཙརིཏེན ཨུཔཙཱརཛ྄ཛྷཱནམཏྟཾ ནིབྦཏྟེཏྭཱ ཝིཔསྶིཏྭཱ ཨདྷིགཏཾ ཨརཧཏྟཕལཾ ཨཝིཛྫཱཝིརཱགཱ པཉྙཱཝིམུཏྟི། ཨནཱགཱམིཕལཾ ཝཱ ཀཱམརཱགཾ སནྡྷཱཡ རཱགཝིརཱགཱ ཙེཏོཝིམུཏྟི, ཨརཧཏྟཕལཾ སབྦཔྤཀཱརཏོ ཨཝིཛྫཱཝིརཱགཱ པཉྙཱཝིམུཏྟཱིཏི། ཨནྟཀིརིཡཱཡཱཏི ཝཊྚདུཀྑསྶ ཨནྟཀརཎཏྠཱཡ ། ཛཱཏིཛརཱུཔགཱཏི ཛཱཏིཛརཾ ཨུཔགཏཱ, ཛཱཏིཛརཱཡ ཝཱ ཨུཔགཏཱ, ན པརིམུཙྩནྟི ཛཱཏིཛརཱཡཱཏི ཨེཝཾ ཝེདིཏབྦཱ། སེསམེཏྠ ཨཱདིཏོ པབྷུཏི པཱཀཊམེཝ། གཱཐཱཔརིཡོསཱནེ ཙ སཊྛིམཏྟཱ བྷིཀྑཱུ ཏཾ དེསནཾ ཨུགྒཧེཏྭཱ ཝིཔསྶིཏྭཱ ཏསྨིཾཡེཝ ཨཱསནེ ཨརཧཏྟཾ པཱཔུཎིཾསུ། ཡཐཱ ཙེཏྠ, ཨེཝཾ སབྦཝཱརེསུ།
731-3.Cetovimuttihīnā te, atho paññāvimuttiyāti ettha arahattaphalasamādhi rāgavirāgā cetovimutti, arahattaphalapaññā avijjāvirāgā paññāvimuttīti veditabbā. Taṇhācaritena vā appanājhānabalena kilese vikkhambhetvā adhigataṃ arahattaphalaṃ rāgavirāgā cetovimutti, diṭṭhicaritena upacārajjhānamattaṃ nibbattetvā vipassitvā adhigataṃ arahattaphalaṃ avijjāvirāgā paññāvimutti. Anāgāmiphalaṃ vā kāmarāgaṃ sandhāya rāgavirāgā cetovimutti, arahattaphalaṃ sabbappakārato avijjāvirāgā paññāvimuttīti. Antakiriyāyāti vaṭṭadukkhassa antakaraṇatthāya . Jātijarūpagāti jātijaraṃ upagatā, jātijarāya vā upagatā, na parimuccanti jātijarāyāti evaṃ veditabbā. Sesamettha ādito pabhuti pākaṭameva. Gāthāpariyosāne ca saṭṭhimattā bhikkhū taṃ desanaṃ uggahetvā vipassitvā tasmiṃyeva āsane arahattaṃ pāpuṇiṃsu. Yathā cettha, evaṃ sabbavāresu.
(༢) ཨཏོ ཨེཝ བྷགཝཱ ‘‘སིཡཱ ཨཉྙེནཔི པརིཡཱཡེནཱ’’ཏིཨཱདིནཱ ནཡེན ནཱནཔྤཀཱརཏོ དྭཡཏཱནུཔསྶནཾ ཨཱཧ། ཏཏྠ དུཏིཡཝཱརེ ཨུཔདྷིཔཙྩཡཱཏི སཱསཝཀམྨཔཙྩཡཱ། སཱསཝཀམྨཉྷི ཨིདྷ ‘‘ཨུཔདྷཱི’’ཏི ཨདྷིཔྤེཏཾ། ཨསེསཝིརཱགནིརོདྷཱཏི ཨསེསཾ ཝིརཱགེན ནིརོདྷཱ, ཨསེསཝིརཱགསངྑཱཏཱ ཝཱ ནིརོདྷཱ།
(2) Ato eva bhagavā ‘‘siyā aññenapi pariyāyenā’’tiādinā nayena nānappakārato dvayatānupassanaṃ āha. Tattha dutiyavāre upadhipaccayāti sāsavakammapaccayā. Sāsavakammañhi idha ‘‘upadhī’’ti adhippetaṃ. Asesavirāganirodhāti asesaṃ virāgena nirodhā, asesavirāgasaṅkhātā vā nirodhā.
༧༣༤. ཨུཔདྷིནིདཱནཱཏི ཀམྨཔཙྩཡཱ། དུཀྑསྶ ཛཱཏིཔྤབྷཝཱནུཔསྶཱིཏི ཝཊྚདུཀྑསྶ ཛཱཏིཀཱརཎཾ ‘‘ཨུཔདྷཱི’’ཏི ཨནུཔསྶནྟོ། སེསམེཏྠ པཱཀཊམེཝ། ཨེཝཾ ཨཡམྤི ཝཱརོ ཙཏྟཱརི སཙྩཱནི དཱིཔེཏྭཱ ཨརཧཏྟནིཀཱུཊེནེཝ ཝུཏྟོ། ཡཐཱ ཙཱཡཾ, ཨེཝཾ སབྦཝཱརཱ།
734.Upadhinidānāti kammapaccayā. Dukkhassa jātippabhavānupassīti vaṭṭadukkhassa jātikāraṇaṃ ‘‘upadhī’’ti anupassanto. Sesamettha pākaṭameva. Evaṃ ayampi vāro cattāri saccāni dīpetvā arahattanikūṭeneva vutto. Yathā cāyaṃ, evaṃ sabbavārā.
(༣) ཏཏྠ ཏཏིཡཝཱརེ ཨཝིཛྫཱཔཙྩཡཱཏི བྷཝགཱམིཀམྨསམྦྷཱརཨཝིཛྫཱཔཙྩཡཱ། དུཀྑཾ པན སབྦཏྠ ཝཊྚདུཀྑམེཝ།
(3) Tattha tatiyavāre avijjāpaccayāti bhavagāmikammasambhāraavijjāpaccayā. Dukkhaṃ pana sabbattha vaṭṭadukkhameva.
༧༣༥. ཛཱཏིམརཎསཾསཱརནྟི ཁནྡྷནིབྦཏྟིཾ ཛཱཏིཾ ཁནྡྷབྷེདཾ མརཎཾ ཁནྡྷཔཊིཔཱཊིཾ སཾསཱརཉྩ། ཝཛནྟཱིཏི གཙྪནྟི ཨུཔེནྟི། ཨིཏྠབྷཱཝཉྙཐཱབྷཱཝནྟི ཨིམཾ མནུསྶབྷཱཝཾ ཨིཏོ ཨཝསེསཨཉྙནིཀཱཡབྷཱཝཉྩ། གཏཱིཏི པཙྩཡབྷཱཝོ།
735.Jātimaraṇasaṃsāranti khandhanibbattiṃ jātiṃ khandhabhedaṃ maraṇaṃ khandhapaṭipāṭiṃ saṃsārañca. Vajantīti gacchanti upenti. Itthabhāvaññathābhāvanti imaṃ manussabhāvaṃ ito avasesaaññanikāyabhāvañca. Gatīti paccayabhāvo.
༧༣༦. ཨཝིཛྫཱ ཧཱཡནྟི ཨཝིཛྫཱ ཧི ཨཡཾ། ཝིཛྫཱགཏཱ ཙ ཡེ སཏྟཱཏི ཡེ ཙ ཨརཧཏྟམགྒཝིཛྫཱཡ ཀིལེསེ ཝིཛ྄ཛྷིཏྭཱ གཏཱ ཁཱིཎཱསཝསཏྟཱ། སེསམུཏྟཱནཏྠམེཝ།
736.Avijjā hāyanti avijjā hi ayaṃ. Vijjāgatā ca ye sattāti ye ca arahattamaggavijjāya kilese vijjhitvā gatā khīṇāsavasattā. Sesamuttānatthameva.
(༤) ཙཏུཏྠཝཱརེ སངྑཱརཔཙྩཡཱཏི པུཉྙཱཔུཉྙཱནེཉྫཱབྷིསངྑཱརཔཙྩཡཱ།
(4) Catutthavāre saṅkhārapaccayāti puññāpuññāneñjābhisaṅkhārapaccayā.
༧༣༨-༩. ཨེཏམཱདཱིནཝཾ ཉཏྭཱཏི ཡདིདཾ དུཀྑཾ སངྑཱརཔཙྩཡཱ, ཨེཏཾ ཨཱདཱིནཝནྟི ཉཏྭཱ། སབྦསངྑཱརསམཐཱཏི སབྦེསཾ ཝུཏྟཔྤཀཱརཱནཾ སངྑཱརཱནཾ མགྒཉཱཎེན སམཐཱ, ཨུཔཧཏཏཱཡ ཕལསམཏྠཏཱཡཱཏི ཝུཏྟཾ ཧོཏི། སཉྙཱནནྟི ཀཱམསཉྙཱདཱིནཾ མགྒེནེཝ ཨུཔརོདྷནཱ། ཨེཏཾ ཉཏྭཱ ཡཐཱཏཐནྟི ཨེཏཾ དུཀྑཀྑཡཾ ཨཝིཔརཱིཏཾ ཉཏྭཱ། སམྨདྡསཱཏི སམྨཱདསྶནཱ། སམྨདཉྙཱཡཱཏི སངྑཏཾ ཨནིཙྩཱདིཏོ, ཨསངྑཏཉྩ ནིཙྩཱདིཏོ ཉཏྭཱ། མཱརསཾཡོགནྟི ཏེབྷཱུམཀཝཊྚཾ། སེསམུཏྟཱནཏྠམེཝ།
738-9.Etamādīnavaṃ ñatvāti yadidaṃ dukkhaṃ saṅkhārapaccayā, etaṃ ādīnavanti ñatvā. Sabbasaṅkhārasamathāti sabbesaṃ vuttappakārānaṃ saṅkhārānaṃ maggañāṇena samathā, upahatatāya phalasamatthatāyāti vuttaṃ hoti. Saññānanti kāmasaññādīnaṃ maggeneva uparodhanā. Etaṃ ñatvā yathātathanti etaṃ dukkhakkhayaṃ aviparītaṃ ñatvā. Sammaddasāti sammādassanā. Sammadaññāyāti saṅkhataṃ aniccādito, asaṅkhatañca niccādito ñatvā. Mārasaṃyoganti tebhūmakavaṭṭaṃ. Sesamuttānatthameva.
(༥) པཉྩམཝཱརེ ཝིཉྙཱཎཔཙྩཡཱཏི ཀམྨསཧཛཱཏཨབྷིསངྑཱརཝིཉྙཱཎཔཙྩཡཱ།
(5) Pañcamavāre viññāṇapaccayāti kammasahajātaabhisaṅkhāraviññāṇapaccayā.
༧༤༡. ནིཙྪཱཏོཏི ནིཏྟཎྷོ། པརིནིབྦུཏོཏི ཀིལེསཔརིནིབྦཱནེན པརིནིབྦུཏོ ཧོཏི། སེསཾ པཱཀཊམེཝ།
741.Nicchātoti nittaṇho. Parinibbutoti kilesaparinibbānena parinibbuto hoti. Sesaṃ pākaṭameva.
(༦) ཚཊྛཝཱརེ ཕསྶཔཙྩཡཱཏི ཨབྷིསངྑཱརཝིཉྙཱཎསམྤཡུཏྟཕསྶཔཙྩཡཱཏི ཨཏྠོ། ཨེཝཾ ཨེཏྠ པདཔཊིཔཱཊིཡཱ ཝཏྟབྦཱནི ནཱམརཱུཔསལཱ༹ཡཏནཱནི ཨཝཏྭཱ ཕསྶོ ཝུཏྟོ། ཏཱནི ཧི རཱུཔམིསྶཀཏྟཱ ཀམྨསམྤཡུཏྟཱནེཝ ན ཧོནྟི, ཨིདཉྩ ཝཊྚདུཀྑཾ ཀམྨཏོ ཝཱ སམྦྷཝེཡྻ ཀམྨསམྤཡུཏྟདྷམྨཏོ ཝཱཏི།
(6) Chaṭṭhavāre phassapaccayāti abhisaṅkhāraviññāṇasampayuttaphassapaccayāti attho. Evaṃ ettha padapaṭipāṭiyā vattabbāni nāmarūpasaḷāyatanāni avatvā phasso vutto. Tāni hi rūpamissakattā kammasampayuttāneva na honti, idañca vaṭṭadukkhaṃ kammato vā sambhaveyya kammasampayuttadhammato vāti.
༧༤༢-༣. བྷཝསོཏཱནུསཱརིནནྟི ཏཎྷཱནུསཱརིནཾ། པརིཉྙཱཡཱཏི ཏཱིཧི པརིཉྙཱཧི པརིཛཱནིཏྭཱ། ཨཉྙཱཡཱཏི ཨརཧཏྟམགྒཔཉྙཱཡ ཉཏྭཱ། ཨུཔསམེ རཏཱཏི ཕལསམཱཔཏྟིཝསེན ནིབྦཱནེ རཏཱ། ཕསྶཱབྷིསམཡཱཏི ཕསྶནིརོདྷཱ། སེསཾ པཱཀཊམེཝ།
742-3.Bhavasotānusārinanti taṇhānusārinaṃ. Pariññāyāti tīhi pariññāhi parijānitvā. Aññāyāti arahattamaggapaññāya ñatvā. Upasame ratāti phalasamāpattivasena nibbāne ratā. Phassābhisamayāti phassanirodhā. Sesaṃ pākaṭameva.
(༧) སཏྟམཝཱརེ ཝེདནཱཔཙྩཡཱཏི ཀམྨསམྤཡུཏྟཝེདནཱཔཙྩཡཱ།
(7) Sattamavāre vedanāpaccayāti kammasampayuttavedanāpaccayā.
༧༤༤-༥. ཨདུཀྑམསུཁཾ སཧཱཏི ཨདུཀྑམསུཁེན སཧ། ཨེཏཾ དུཀྑནྟི ཉཏྭཱནཱཏི ཨེཏཾ སབྦཾ ཝེདཡིཏཾ ‘‘དུཀྑཀཱརཎ’’ནྟི ཉཏྭཱ, ཝིཔརིཎཱམཊྛིཏིཨཉྙཱཎདུཀྑཏཱཧི ཝཱ དུཀྑཾ ཉཏྭཱ། མོསདྷམྨནྟི ནསྶནདྷམྨཾ། པལོཀིནནྟི ཛརཱམརཎེཧི པལུཛྫནདྷམྨཾ། ཕུསྶ ཕུསྶཱཏི ཨུདཡབྦཡཉཱཎེན ཕུསིཏྭཱ ཕུསིཏྭཱ། ཝཡཾ པསྶནྟི ཨནྟེ བྷངྒམེཝ པསྶནྟོ། ཨེཝཾ ཏཏྠ ཝིཛཱནཏཱིཏི ཨེཝཾ ཏཱ ཝེདནཱ ཝིཛཱནཱཏི, ཏཏྠ ཝཱ དུཀྑབྷཱཝཾ ཝིཛཱནཱཏི། ཝེདནཱནཾ ཁཡཱཏི ཏཏོ པརཾ མགྒཉཱཎེན ཀམྨསམྤཡུཏྟཱནཾ ཝེདནཱནཾ ཁཡཱ། སེསམུཏྟཱནམེཝ།
744-5.Adukkhamasukhaṃ sahāti adukkhamasukhena saha. Etaṃ dukkhanti ñatvānāti etaṃ sabbaṃ vedayitaṃ ‘‘dukkhakāraṇa’’nti ñatvā, vipariṇāmaṭṭhitiaññāṇadukkhatāhi vā dukkhaṃ ñatvā. Mosadhammanti nassanadhammaṃ. Palokinanti jarāmaraṇehi palujjanadhammaṃ. Phussa phussāti udayabbayañāṇena phusitvā phusitvā. Vayaṃ passanti ante bhaṅgameva passanto. Evaṃ tattha vijānatīti evaṃ tā vedanā vijānāti, tattha vā dukkhabhāvaṃ vijānāti. Vedanānaṃ khayāti tato paraṃ maggañāṇena kammasampayuttānaṃ vedanānaṃ khayā. Sesamuttānameva.
(༨) ཨཊྛམཝཱརེ ཏཎྷཱཔཙྩཡཱཏི ཀམྨསམྦྷཱརཏཎྷཱཔཙྩཡཱ །
(8) Aṭṭhamavāre taṇhāpaccayāti kammasambhārataṇhāpaccayā .
༧༤༧. ཨེཏམཱདཱིནཝཾ ཉཏྭཱ, ཏཎྷཾ དུཀྑསྶ སམྦྷཝནྟི ཨེཏཾ དུཀྑསྶ སམྦྷཝཾ ཏཎྷཱཡ ཨཱདཱིནཝཾ ཉཏྭཱ། སེསམུཏྟཱནམེཝ།
747.Etamādīnavaṃ ñatvā, taṇhaṃ dukkhassa sambhavanti etaṃ dukkhassa sambhavaṃ taṇhāya ādīnavaṃ ñatvā. Sesamuttānameva.
(༩) ནཝམཝཱརེ ཨུཔཱདཱནཔཙྩཡཱཏི ཀམྨསམྦྷཱརཨུཔཱདཱནཔཙྩཡཱ།
(9) Navamavāre upādānapaccayāti kammasambhāraupādānapaccayā.
༧༤༨-༩. བྷཝོཏི ཝིཔཱཀབྷཝོ ཁནྡྷཔཱཏུབྷཱཝོ། བྷཱུཏོ དུཀྑནྟི བྷཱུཏོ སམྦྷཱུཏོ ཝཊྚདུཀྑཾ ནིགཙྪཏི། ཛཱཏསྶ མརཎནྟི ཡཏྲཱཔི ‘‘བྷཱུཏོ སུཁཾ ནིགཙྪཏཱི’’ཏི བཱལཱ མཉྙནྟི, ཏཏྲཱཔི དུཀྑམེཝ དསྶེནྟོ ཨཱཧ – ‘‘ཛཱཏསྶ མརཎཾ ཧོཏཱི’’ཏི། དུཏིཡགཱཐཱཡ ཡོཛནཱ – ཨནིཙྩཱདཱིཧི སམྨདཉྙཱཡ པཎྜིཏཱ ཨུཔཱདཱནཀྑཡཱ ཛཱཏིཀྑཡཾ ནིབྦཱནཾ ཨབྷིཉྙཱཡ ན གཙྪནྟི པུནབྦྷཝནྟི།
748-9.Bhavoti vipākabhavo khandhapātubhāvo. Bhūto dukkhanti bhūto sambhūto vaṭṭadukkhaṃ nigacchati. Jātassa maraṇanti yatrāpi ‘‘bhūto sukhaṃ nigacchatī’’ti bālā maññanti, tatrāpi dukkhameva dassento āha – ‘‘jātassa maraṇaṃ hotī’’ti. Dutiyagāthāya yojanā – aniccādīhi sammadaññāya paṇḍitā upādānakkhayā jātikkhayaṃ nibbānaṃ abhiññāya na gacchanti punabbhavanti.
(༡༠) དསམཝཱརེ ཨཱརམྦྷཔཙྩཡཱཏི ཀམྨསམྤཡུཏྟཝཱིརིཡཔཙྩཡཱ།
(10) Dasamavāre ārambhapaccayāti kammasampayuttavīriyapaccayā.
༧༥༡. ཨནཱརམྦྷེ ཝིམུཏྟིནོཏི ཨནཱརམྦྷེ ནིབྦཱནེ ཝིམུཏྟསྶ། སེསམུཏྟཱནམེཝ།
751.Anārambhe vimuttinoti anārambhe nibbāne vimuttassa. Sesamuttānameva.
(༡༡) ཨེཀཱདསམཝཱརེ ཨཱཧཱརཔཙྩཡཱཏི ཀམྨསམྤཡུཏྟཱཧཱརཔཙྩཡཱ། ཨཔརོ ནཡོ – ཙཏུབྦིདྷཱ སཏྟཱ རཱུཔཱུཔགཱ, ཝེདནཱུཔགཱ, སཉྙཱུཔགཱ, སངྑཱརཱུཔགཱཏི། ཏཏྠ ཨེཀཱདསཝིདྷཱཡ ཀཱམདྷཱཏུཡཱ སཏྟཱ རཱུཔཱུཔགཱ ཀབལཱི༹ཀཱརཱཧཱརསེཝནཏོ། རཱུཔདྷཱཏུཡཱ སཏྟཱ ཨཉྙཏྲ ཨསཉྙེཧི ཝེདནཱུཔགཱ ཕསྶཱཧཱརསེཝནཏོ། ཧེཊྛཱ ཏིཝིདྷཱཡ ཨརཱུཔདྷཱཏུཡཱ སཏྟཱ སཉྙཱུཔགཱ སཉྙཱབྷིནིབྦཏྟམནོསཉྩེཏནཱཧཱརསེཝནཏོ ། བྷཝགྒེ སཏྟཱ སངྑཱརཱུཔགཱ སངྑཱརཱབྷིནིབྦཏྟཝིཉྙཱཎཱཧཱརསེཝནཏོཏི། ཨེཝམྤི ཡཾ ཀིཉྩི དུཀྑཾ སམྦྷོཏི, སབྦཾ ཨཱཧཱརཔཙྩཡཱཏི ཝེདིཏབྦཾ།
(11) Ekādasamavāre āhārapaccayāti kammasampayuttāhārapaccayā. Aparo nayo – catubbidhā sattā rūpūpagā, vedanūpagā, saññūpagā, saṅkhārūpagāti. Tattha ekādasavidhāya kāmadhātuyā sattā rūpūpagā kabaḷīkārāhārasevanato. Rūpadhātuyā sattā aññatra asaññehi vedanūpagā phassāhārasevanato. Heṭṭhā tividhāya arūpadhātuyā sattā saññūpagā saññābhinibbattamanosañcetanāhārasevanato . Bhavagge sattā saṅkhārūpagā saṅkhārābhinibbattaviññāṇāhārasevanatoti. Evampi yaṃ kiñci dukkhaṃ sambhoti, sabbaṃ āhārapaccayāti veditabbaṃ.
༧༥༥. ཨཱརོགྱནྟི ནིབྦཱནཾ། སངྑཱཡ སེཝཱིཏི ཙཏྟཱརོ པཙྩཡེ པཙྩཝེཀྑིཏྭཱ སེཝམཱནོ, ‘‘པཉྩཀྑནྡྷཱ དྭཱདསཱཡཏནཱནི ཨཊྛཱརསདྷཱཏུཡོ’’ཏི ཨེཝཾ ཝཱ ལོཀཾ སངྑཱཡ ‘‘ཨནིཙྩཾ དུཀྑཾ ཨནཏྟཱ’’ཏི ཉཱཎེན སེཝམཱནོ། དྷམྨཊྛོཏི ཙཏུསཙྩདྷམྨེ ཋིཏོ། སངྑྱཾ ནོཔེཏཱིཏི ‘‘དེཝོ’’ཏི ཝཱ ‘‘མནུསྶོ’’ཏི ཝཱ ཨཱདིཀཾ སངྑྱཾ ན གཙྪཏི། སེསམུཏྟཱནམེཝ།
755.Ārogyanti nibbānaṃ. Saṅkhāya sevīti cattāro paccaye paccavekkhitvā sevamāno, ‘‘pañcakkhandhā dvādasāyatanāni aṭṭhārasadhātuyo’’ti evaṃ vā lokaṃ saṅkhāya ‘‘aniccaṃ dukkhaṃ anattā’’ti ñāṇena sevamāno. Dhammaṭṭhoti catusaccadhamme ṭhito. Saṅkhyaṃ nopetīti ‘‘devo’’ti vā ‘‘manusso’’ti vā ādikaṃ saṅkhyaṃ na gacchati. Sesamuttānameva.
(༡༢) དྭཱདསམཝཱརེ ཨིཉྫིཏཔཙྩཡཱཏི ཏཎྷཱམཱནདིཊྛིཀམྨཀིལེསཨིཉྫིཏེསུ ཡཏོ ཀུཏོཙི ཀམྨསམྦྷཱརིཉྫིཏཔཙྩཡཱ།
(12) Dvādasamavāre iñjitapaccayāti taṇhāmānadiṭṭhikammakilesaiñjitesu yato kutoci kammasambhāriñjitapaccayā.
༧༥༧. ཨེཛཾ ཝོསྶཛྫཱཏི ཏཎྷཾ ཙཛིཏྭཱ། སངྑཱརེ ཨུཔརུནྡྷིཡཱཏི ཀམྨཾ ཀམྨསམྤཡུཏྟེ ཙ སངྑཱརེ ནིརོདྷེཏྭཱ། སེསམུཏྟཱནམེཝ།
757.Ejaṃ vossajjāti taṇhaṃ cajitvā. Saṅkhāre uparundhiyāti kammaṃ kammasampayutte ca saṅkhāre nirodhetvā. Sesamuttānameva.
(༡༣) ཏེརསམཝཱརེ ནིསྶིཏསྶ ཙལིཏནྟི ཏཎྷཱཡ ཏཎྷཱདིཊྛིམཱནེཧི ཝཱ ཁནྡྷེ ནིསྶིཏསྶ སཱིཧསུཏྟེ (སཾ॰ ནི॰ ༣.༧༨) དེཝཱནཾ ཝིཡ བྷཡཙལནཾ ཧོཏི། སེསམུཏྟཱནམེཝ།
(13) Terasamavāre nissitassa calitanti taṇhāya taṇhādiṭṭhimānehi vā khandhe nissitassa sīhasutte (saṃ. ni. 3.78) devānaṃ viya bhayacalanaṃ hoti. Sesamuttānameva.
(༡༤) ཙུདྡསམཝཱརེ རཱུཔེཧཱིཏི རཱུཔབྷཝེཧི རཱུཔསམཱཔཏྟཱིཧི ཝཱ། ཨརཱུཔཱཏི ཨརཱུཔབྷཝཱ ཨརཱུཔསམཱཔཏྟིཡོ ཝཱ། ནིརོདྷོཏི ནིབྦཱནཾ།
(14) Cuddasamavāre rūpehīti rūpabhavehi rūpasamāpattīhi vā. Arūpāti arūpabhavā arūpasamāpattiyo vā. Nirodhoti nibbānaṃ.
༧༦༡. མཙྩུཧཱཡིནོཏི མརཎམཙྩུ ཀིལེསམཙྩུ དེཝཔུཏྟམཙྩུཧཱཡིནོ, ཏིཝིདྷམྤི ཏཾ མཙྩུཾ ཧིཏྭཱ གཱམིནོཏི ཝུཏྟཾ ཧོཏི། སེསམུཏྟཱནམེཝ།
761.Maccuhāyinoti maraṇamaccu kilesamaccu devaputtamaccuhāyino, tividhampi taṃ maccuṃ hitvā gāminoti vuttaṃ hoti. Sesamuttānameva.
(༡༥) པནྣརསམཝཱརེ ཡནྟི ནཱམརཱུཔཾ སནྡྷཱཡཱཧ། ཏཉྷི ལོཀེན དྷུཝསུབྷསུཁཏྟཝསེན ‘‘ཨིདཾ སཙྩ’’ནྟི ཨུཔནིཛ྄ཛྷཱཡིཏཾ དིཊྛམཱལོཀིཏཾ། ཏདམརིཡཱནནྟི ཨིདཾ ཨརིཡཱནཾ, ཨནུནཱསིཀཨིཀཱརལོཔཾ ཀཏྭཱ ཝུཏྟཾ། ཨེཏཾ མུསཱཏི ཨེཏཾ དྷུཝཱདིཝསེན གཧིཏམྤི མུསཱ, ན ཏཱདིསཾ ཧོཏཱིཏི། པུན ཡནྟི ནིབྦཱནཾ སནྡྷཱཡཱཧ། ཏཉྷི ལོཀེན རཱུཔཝེདནཱདཱིནམབྷཱཝཏོ ‘‘ཨིདཾ མུསཱ ནཏྠི ཀིཉྩཱི’’ཏི ཨུཔནིཛ྄ཛྷཱཡིཏཾ། ཏདམརིཡཱནཾ ཨེཏཾ སཙྩནྟི ཏཾ ཨིདཾ ཨརིཡཱནཾ ཨེཏཾ ནིཀྐིལེསསངྑཱཏཱ སུབྷབྷཱཝཱ, པཝཏྟིདུཀྑཔཊིཔཀྑསངྑཱཏཱ སུཁབྷཱཝཱ, ཨཙྩནྟསནྟིསངྑཱཏཱ ནིཙྩབྷཱཝཱ ཙ ཨནཔགམནེན པརམཏྠཏོ ‘‘སཙྩ’’ནྟི ཡཐཱབྷཱུཏཾ སམྨཔྤཉྙཱཡ སུདིཊྛཾ།
(15) Pannarasamavāre yanti nāmarūpaṃ sandhāyāha. Tañhi lokena dhuvasubhasukhattavasena ‘‘idaṃ sacca’’nti upanijjhāyitaṃ diṭṭhamālokitaṃ. Tadamariyānanti idaṃ ariyānaṃ, anunāsikaikāralopaṃ katvā vuttaṃ. Etaṃ musāti etaṃ dhuvādivasena gahitampi musā, na tādisaṃ hotīti. Puna yanti nibbānaṃ sandhāyāha. Tañhi lokena rūpavedanādīnamabhāvato ‘‘idaṃ musā natthi kiñcī’’ti upanijjhāyitaṃ. Tadamariyānaṃ etaṃ saccanti taṃ idaṃ ariyānaṃ etaṃ nikkilesasaṅkhātā subhabhāvā, pavattidukkhapaṭipakkhasaṅkhātā sukhabhāvā, accantasantisaṅkhātā niccabhāvā ca anapagamanena paramatthato ‘‘sacca’’nti yathābhūtaṃ sammappaññāya sudiṭṭhaṃ.
༧༦༢-༣. ཨནཏྟནི ཨཏྟམཱནིནྟི ཨནཏྟནི ནཱམརཱུཔེ ཨཏྟམཱནིཾ། ཨིདཾ སཙྩནྟི མཉྙཏཱིཏི ཨིདཾ ནཱམརཱུཔཾ དྷུཝཱདིཝསེན ‘‘སཙྩ’’ནྟི མཉྙཏི། ཡེན ཡེན ཧཱིཏི ཡེན ཡེན རཱུཔེ ཝཱ ཝེདནཱཡ ཝཱ ‘‘མམ རཱུཔཾ, མམ ཝེདནཱ’’ཏིཨཱདིནཱ ནཡེན མཉྙནྟི། ཏཏོ ཏནྟི ཏཏོ མཉྙིཏཱཀཱརཱ ཏཾ ནཱམརཱུཔཾ ཧོཏི ཨཉྙཐཱ། ཀིཾ ཀཱརཎཾ? ཏཉྷི ཏསྶ མུསཱ ཧོཏི, ཡསྨཱ ཏཾ ཡཐཱམཉྙིཏཱཀཱརཱ མུསཱ ཧོཏི, ཏསྨཱ ཨཉྙཐཱ ཧོཏཱིཏི ཨཏྠོ། ཀསྨཱ པན མུསཱ ཧོཏཱིཏི? མོསདྷམྨཉྷི ཨིཏྟརཾ, ཡསྨཱ ཡཾ ཨིཏྟརཾ པརིཏྟཔཙྩུཔཊྛཱནཾ, ཏཾ མོསདྷམྨཾ ནསྶནདྷམྨཾ ཧོཏི, ཏཐཱརཱུཔཉྩ ནཱམརཱུཔནྟི། སཙྩཱབྷིསམཡཱཏི སཙྩཱཝབོདྷཱ། སེསམུཏྟཱནམེཝ།
762-3.Anattani attamāninti anattani nāmarūpe attamāniṃ. Idaṃ saccanti maññatīti idaṃ nāmarūpaṃ dhuvādivasena ‘‘sacca’’nti maññati. Yena yena hīti yena yena rūpe vā vedanāya vā ‘‘mama rūpaṃ, mama vedanā’’tiādinā nayena maññanti. Tato tanti tato maññitākārā taṃ nāmarūpaṃ hoti aññathā. Kiṃ kāraṇaṃ? Tañhi tassa musā hoti, yasmā taṃ yathāmaññitākārā musā hoti, tasmā aññathā hotīti attho. Kasmā pana musā hotīti? Mosadhammañhi ittaraṃ, yasmā yaṃ ittaraṃ parittapaccupaṭṭhānaṃ, taṃ mosadhammaṃ nassanadhammaṃ hoti, tathārūpañca nāmarūpanti. Saccābhisamayāti saccāvabodhā. Sesamuttānameva.
(༡༦) སོལ༹སམཝཱརེ ཡནྟི ཚབྦིདྷམིཊྛཱརམྨཎཾ སནྡྷཱཡཱཧ། ཏཉྷི ལོཀེན སལབྷམཙྪམཀྐཊཱདཱིཧི པདཱིཔབལི༹སལེཔཱདཡོ ཝིཡ ‘‘ཨིདཾ སུཁ’’ནྟི ཨུཔནིཛ྄ཛྷཱཡིཏཾ། ཏདམརིཡཱནཾ ཨེཏཾ དུཀྑནྟི ཏཾ ཨིདཾ ཨརིཡཱནཾ ‘‘ཀཱམཱ ཧི ཙིཏྲཱ མདྷུརཱ མནོརམཱ, ཝིརཱུཔརཱུཔེན མཐེནྟི ཙིཏྟ’’ནྟིཨཱདིནཱ (སུ॰ ནི॰ ༥༠; ཙཱུལ༹ནི॰ ཁགྒཝིསཱཎསུཏྟནིདྡེས ༡༣༦) ནཡེན ‘‘ཨེཏཾ དུཀྑ’’ནྟི ཡཐཱབྷཱུཏཾ སམྨཔྤཉྙཱཡ སུདིཊྛཾ། པུན ཡནྟི ནིབྦཱནམེཝ སནྡྷཱཡཱཧ། ཏཉྷི ལོཀེན ཀཱམགུཎཱབྷཱཝཱ ‘‘དུཀྑ’’ནྟི ཨུཔནིཛ྄ཛྷཱཡིཏཾ། ཏདམརིཡཱནནྟི ཏཾ ཨིདཾ ཨརིཡཱནཾ པརམཏྠསུཁཏོ ‘‘ཨེཏཾ སུཁ’’ནྟི ཡཐཱབྷཱུཏཾ སམྨཔྤཉྙཱཡ སུདིཊྛཾ།
(16) Soḷasamavāre yanti chabbidhamiṭṭhārammaṇaṃ sandhāyāha. Tañhi lokena salabhamacchamakkaṭādīhi padīpabaḷisalepādayo viya ‘‘idaṃ sukha’’nti upanijjhāyitaṃ. Tadamariyānaṃ etaṃ dukkhanti taṃ idaṃ ariyānaṃ ‘‘kāmā hi citrā madhurā manoramā, virūparūpena mathenti citta’’ntiādinā (su. ni. 50; cūḷani. khaggavisāṇasuttaniddesa 136) nayena ‘‘etaṃ dukkha’’nti yathābhūtaṃ sammappaññāya sudiṭṭhaṃ. Puna yanti nibbānameva sandhāyāha. Tañhi lokena kāmaguṇābhāvā ‘‘dukkha’’nti upanijjhāyitaṃ. Tadamariyānanti taṃ idaṃ ariyānaṃ paramatthasukhato ‘‘etaṃ sukha’’nti yathābhūtaṃ sammappaññāya sudiṭṭhaṃ.
༧༦༥-༦. ཀེཝལཱཏི ཨནཝསེསཱ། ཨིཊྛཱཏི ཨིཙྪིཏཱ པཏྠིཏཱ། ཀནྟཱཏི པིཡཱ། མནཱཔཱཏི མནཝུཌྜྷིཀརཱ། ཡཱཝཏཏྠཱིཏི ཝུཙྩཏཱིཏི ཡཱཝཏཱ ཨེཏེ ཚ ཨཱརམྨཎཱ ཨཏྠཱིཏི ཝུཙྩནྟི། ཝཙནབྱཏྟཡོ ཝེདིཏབྦོ། ཨེཏེ ཝོཏི ཨེཏྠ ཝོཏི ནིཔཱཏམཏྟཾ།
765-6.Kevalāti anavasesā. Iṭṭhāti icchitā patthitā. Kantāti piyā. Manāpāti manavuḍḍhikarā. Yāvatatthīti vuccatīti yāvatā ete cha ārammaṇā atthīti vuccanti. Vacanabyattayo veditabbo. Ete voti ettha voti nipātamattaṃ.
༧༦༧-༨. སུཁནྟི དིཊྛམརིཡེཧི, སཀྐཱཡསྶུཔརོདྷནནྟི ‘‘སུཁ’’མིཏི ཨརིཡེཧི པཉྩཀྑནྡྷནིརོདྷོ དིཊྛོ, ནིབྦཱནནྟི ཝུཏྟཾ ཧོཏི། པཙྩནཱིཀམིདཾ ཧོཏཱིཏི པཊིལོམམིདཾ དསྶནཾ ཧོཏི། པསྶཏནྟི པསྶནྟཱནཾ, པཎྜིཏཱནནྟི ཝུཏྟཾ ཧོཏི། ཡཾ པརེཏི ཨེཏྠ ཡནྟི ཝཏྠུཀཱམེ སནྡྷཱཡཱཧ། པུན ཡཾ པརེཏི ཨེཏྠ ནིབྦཱནཾ།
767-8.Sukhanti diṭṭhamariyehi, sakkāyassuparodhananti ‘‘sukha’’miti ariyehi pañcakkhandhanirodho diṭṭho, nibbānanti vuttaṃ hoti. Paccanīkamidaṃ hotīti paṭilomamidaṃ dassanaṃ hoti. Passatanti passantānaṃ, paṇḍitānanti vuttaṃ hoti. Yaṃ pareti ettha yanti vatthukāme sandhāyāha. Puna yaṃ pareti ettha nibbānaṃ.
༧༦༩-༧༡. པསྶཱཏི སོཏཱརཾ ཨཱལཔཏི། དྷམྨནྟི ནིབྦཱནདྷམྨཾ། སམྤམཱུལ༹ྷེཏྠཝིདྡསཱུཏི སམྤམཱུལ༹ྷཱ ཨེཏྠ ཨཝིདྡསཱུ བཱལཱ། ཀིཾཀཱརཎཾ སམྤམཱུལ༹ྷཱ? ནིཝུཏཱནཾ ཏམོ ཧོཏི , ཨནྡྷཀཱརོ ཨཔསྶཏཾ , བཱལཱནཾ ཨཝིཛྫཱཡ ནིཝུཏཱནཾ ཨོཏྠཊཱནཾ ཨནྡྷབྷཱཝཀརཎོ ཏམོ ཧོཏི, ཡེན ནིབྦཱནདྷམྨཾ དཊྛུཾ ན སཀྐོནྟི། སཏཉྩ ཝིཝཊཾ ཧོཏི, ཨཱལོཀོ པསྶཏཱམིཝཱཏི སཏཉྩ སཔྤུརིསཱནཾ པཉྙཱདསྶནེན པསྶཏཾ ཨཱལོཀོཝ ཝིཝཊཾ ཧོཏི ནིབྦཱནཾ། སནྟིཀེ ན ཝིཛཱནནྟི, མགཱ དྷམྨསྶཀོཝིདཱཏི ཡཾ ཨཏྟནོ སརཱིརེ ཏཙཔཉྩཀམཏྟཾ པརིཙྪིནྡིཏྭཱ ཨནནྟརམེཝ ཨདྷིགནྟབྦཏོ, ཨཏྟནོ ཁནྡྷཱནཾ ཝཱ ནིརོདྷམཏྟཏོ སནྟིཀེ ནིབྦཱནཾ, ཏཾ ཨེཝཾ སནྟིཀེ སནྟམྤི ན ཝིཛཱནནྟི མགབྷཱུཏཱ ཛནཱ མགྒཱམགྒདྷམྨསྶ སཙྩདྷམྨསྶ ཝཱ ཨཀོཝིདཱ, སབྦཐཱ བྷཝརཱག…པེ॰… སུསམྦུདྷོ། ཏཏྠ མཱརདྷེཡྻཱནུཔནྣེཧཱིཏི ཏེབྷཱུམཀཝཊྚཾ ཨནུཔནྣེཧི།
769-71.Passāti sotāraṃ ālapati. Dhammanti nibbānadhammaṃ. Sampamūḷhetthaviddasūti sampamūḷhā ettha aviddasū bālā. Kiṃkāraṇaṃ sampamūḷhā? Nivutānaṃ tamo hoti, andhakāro apassataṃ, bālānaṃ avijjāya nivutānaṃ otthaṭānaṃ andhabhāvakaraṇo tamo hoti, yena nibbānadhammaṃ daṭṭhuṃ na sakkonti. Satañca vivaṭaṃ hoti, āloko passatāmivāti satañca sappurisānaṃ paññādassanena passataṃ ālokova vivaṭaṃ hoti nibbānaṃ. Santike na vijānanti, magā dhammassakovidāti yaṃ attano sarīre tacapañcakamattaṃ paricchinditvā anantarameva adhigantabbato, attano khandhānaṃ vā nirodhamattato santike nibbānaṃ, taṃ evaṃ santike santampi na vijānanti magabhūtā janā maggāmaggadhammassa saccadhammassa vā akovidā, sabbathā bhavarāga…pe… susambudho. Tattha māradheyyānupannehīti tebhūmakavaṭṭaṃ anupannehi.
༧༧༢. པཙྪིམགཱཐཱཡ སམྦནྡྷོ ‘‘ཨེཝཾ ཨསུསམྦུདྷཾ ཀོ ནུ ཨཉྙཏྲ མརིཡེཧཱི’’ཏི། ཏསྶཏྠོ – ཋཔེཏྭཱ ཨརིཡེ ཀོ ནུ ཨཉྙོ ནིབྦཱནཔདཾ ཛཱནིཏུཾ ཨརཧཏི, ཡཾ པདཾ ཙཏུཏྠེན ཨརིཡམགྒེན སམྨདཉྙཱཡ ཨནནྟརམེཝ ཨནཱསཝཱ ཧུཏྭཱ ཀིལེསཔརིནིབྦཱནེན པརིནིབྦནྟི, སམྨདཉྙཱཡ ཝཱ ཨནཱསཝཱ ཧུཏྭཱ ཨནྟེ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦནྟཱིཏི ཨརཧཏྟནིཀཱུཊེན དེསནཾ ནིཊྛཱཔེསི།
772. Pacchimagāthāya sambandho ‘‘evaṃ asusambudhaṃ ko nu aññatra mariyehī’’ti. Tassattho – ṭhapetvā ariye ko nu añño nibbānapadaṃ jānituṃ arahati, yaṃ padaṃ catutthena ariyamaggena sammadaññāya anantarameva anāsavā hutvā kilesaparinibbānena parinibbanti, sammadaññāya vā anāsavā hutvā ante anupādisesāya nibbānadhātuyā parinibbantīti arahattanikūṭena desanaṃ niṭṭhāpesi.
ཨཏྟམནཱཏི ཏུཊྛམནཱ། ཨབྷིནནྡུནྟི ཨབྷིནནྡིཾསུ། ཨིམསྨིཉྩ པན ཝེཡྻཱཀརཎསྨིནྟི ཨིམསྨིཾ སོལ༹སམེ ཝེཡྻཱཀརཎེ། བྷཉྙམཱནེཏི བྷཎིཡམཱནེ། སེསཾ པཱཀཊམེཝ།
Attamanāti tuṭṭhamanā. Abhinandunti abhinandiṃsu. Imasmiñca pana veyyākaraṇasminti imasmiṃ soḷasame veyyākaraṇe. Bhaññamāneti bhaṇiyamāne. Sesaṃ pākaṭameva.
ཨེཝཾ སབྦེསུཔི སོལ༹སསུ ཝེཡྻཱཀརཎེསུ སཊྛིམཏྟེ སཊྛིམཏྟེ ཀཏྭཱ སཊྛིཨདྷིཀཱནཾ ནཝནྣཾ བྷིཀྑུསཏཱནཾ ཨནུཔཱདཱཡ ཨཱསཝེཧི ཙིཏྟཱནི ཝིམུཙྩིཾསུ, སོལ༹སཀྑཏྟུཾ ཙཏྟཱརི ཙཏྟཱརི ཀཏྭཱ ཙཏུསཊྛི སཙྩཱནེཏྠ ཝེནེཡྻཝསེན ནཱནཔྤཀཱརཏོ དེསིཏཱནཱིཏི།
Evaṃ sabbesupi soḷasasu veyyākaraṇesu saṭṭhimatte saṭṭhimatte katvā saṭṭhiadhikānaṃ navannaṃ bhikkhusatānaṃ anupādāya āsavehi cittāni vimucciṃsu, soḷasakkhattuṃ cattāri cattāri katvā catusaṭṭhi saccānettha veneyyavasena nānappakārato desitānīti.
པརམཏྠཛོཏིཀཱཡ ཁུདྡཀ-ཨཊྛཀཐཱཡ
Paramatthajotikāya khuddaka-aṭṭhakathāya
སུཏྟནིཔཱཏ-ཨཊྛཀཐཱཡ དྭཡཏཱནུཔསྶནཱསུཏྟཝཎྞནཱ
Suttanipāta-aṭṭhakathāya dvayatānupassanāsuttavaṇṇanā
ནིཊྛིཏྟཱ།
Niṭṭhittā.
ནིཊྛིཏོ ཙ ཏཏིཡོ ཝགྒོ ཨཏྠཝཎྞནཱནཡཏོ, ནཱམེན
Niṭṭhito ca tatiyo vaggo atthavaṇṇanānayato, nāmena
མཧཱཝགྒོཏི།
Mahāvaggoti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / སུཏྟནིཔཱཏཔཱལི༹ • Suttanipātapāḷi / ༡༢. དྭཡཏཱནུཔསྶནཱསུཏྟཾ • 12. Dvayatānupassanāsuttaṃ
