| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૧૧. એકાદસકવારો
11. Ekādasakavāro
૩૩૧. એકાદ પુગ્ગલા અનુપસમ્પન્ના ન ઉપસમ્પાદેતબ્બા, ઉપસમ્પન્ના નાસેતબ્બા. એકાદસ પાદુકા અકપ્પિયા. એકાદસ પત્તા અકપ્પિયા. એકાદસ ચીવરાનિ અકપ્પિયાનિ. એકાદસ યાવતતિયકા. ભિક્ખુનીનં એકાદસ અન્તરાયિકા ધમ્મા પુચ્છિતબ્બા. એકાદસ ચીવરાનિ અધિટ્ઠાતબ્બાનિ. એકાદસ ચીવરાનિ ન વિકપ્પેતબ્બાનિ. એકાદસે અરુણુગ્ગમને નિસ્સગ્ગિયં હોતિ. એકાદસ ગણ્ઠિકા કપ્પિયા. એકાદસ વિધા 1 કપ્પિયા. એકાદસ પથવી અકપ્પિયા. એકાદસ પથવી કપ્પિયા. એકાદસ નિસ્સયપટિપ્પસ્સદ્ધિયો. એકાદસ પુગ્ગલા અવન્દિયા. એકાદસ પરમાનિ. એકાદસ વરાનિ યાચિંસુ. એકાદસ સીમાદોસા. અક્કોસકપરિભાસકે પુગ્ગલે એકાદસાદીનવા પાટિકઙ્ખા. 2 મેત્તાય ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય એકાદસાનિસંસા પાટિકઙ્ખા . સુખં સુપતિ, સુખં પટિબુજ્ઝતિ, ન પાપકં સુપિનં પસ્સતિ, મનુસ્સાનં પિયો હોતિ, અમનુસ્સાનં પિયો હોતિ, દેવતા રક્ખન્તિ, નાસ્સ અગ્ગિ વા વિસં વા સત્થં વા કમતિ, તુવટ્ટં ચિત્તં સમાધિયતિ, મુખવણ્ણો વિપ્પસીદતિ, અસમ્મૂળ્હો કાલઙ્કરોતિ, ઉત્તરિ અપ્પટિવિજ્ઝન્તો બ્રહ્મલોકૂપગો હોતિ – મેત્તાય ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય ઇમે એકાદસાનિસંસા પાટિકઙ્ખાતિ.
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
એકાદસકં નિટ્ઠિતં.
Ekādasakaṃ niṭṭhitaṃ.
તસ્સુદ્દાનં –
Tassuddānaṃ –
નાસેતબ્બા પાદુકા ચ, પત્તા ચ ચીવરાનિ ચ;
Nāsetabbā pādukā ca, pattā ca cīvarāni ca;
તતિયા પુચ્છિતબ્બા ચ, અધિટ્ઠાનવિકપ્પના.
Tatiyā pucchitabbā ca, adhiṭṭhānavikappanā.
અરુણા ગણ્ઠિકા વિધા, અકપ્પિયા ચ કપ્પિયં;
Aruṇā gaṇṭhikā vidhā, akappiyā ca kappiyaṃ;
નિસ્સયાવન્દિયા ચેવ, પરમાનિ વરાનિ ચ;
Nissayāvandiyā ceva, paramāni varāni ca;
સીમાદોસા ચ અક્કોસા, મેત્તાયેકાદસા કતાતિ.
Sīmādosā ca akkosā, mettāyekādasā katāti.
એકુત્તરિકનયો.
Ekuttarikanayo.
તસ્સુદ્દાનં –
Tassuddānaṃ –
એકકા ચ દુકા ચેવ, તિકા ચ ચતુપઞ્ચકા;
Ekakā ca dukā ceva, tikā ca catupañcakā;
છસત્તટ્ઠનવકા ચ, દસ એકાદસાનિ ચ.
Chasattaṭṭhanavakā ca, dasa ekādasāni ca.
હિતાય સબ્બસત્તાનં, ઞાતધમ્મેન તાદિના;
Hitāya sabbasattānaṃ, ñātadhammena tādinā;
એકુત્તરિકા વિમલા, મહાવીરેન દેસિતાતિ.
Ekuttarikā vimalā, mahāvīrena desitāti.
એકુત્તરિકનયો નિટ્ઠિતો.
Ekuttarikanayo niṭṭhito.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / એકાદસકવારવણ્ણના • Ekādasakavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / એકાદસકવારવણ્ણના • Ekādasakavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / એકાદસકવારવણ્ણના • Ekādasakavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / એકુત્તરિકનયો એકાદસકવારવણ્ણના • Ekuttarikanayo ekādasakavāravaṇṇanā
