| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༡. ཨེཀཱདསམསིཀྑཱཔདཾ
11. Ekādasamasikkhāpadaṃ
༡༡༦༦. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན ཐུལླནནྡཱ བྷིཀྑུནཱི – ‘‘སིཀྑམཱནཾ ཝུཊྛཱཔེསྶཱམཱི’’ཏི ཐེརེ བྷིཀྑཱུ སནྣིཔཱཏེཏྭཱ པཧཱུཏཾ ཁཱདནཱིཡཾ བྷོཛནཱིཡཾ པསྶིཏྭཱ – ‘‘ན ཏཱཝཱཧཾ, ཨཡྻཱ, སིཀྑམཱནཾ ཝུཊྛཱཔེསྶཱམཱི’’ཏི ཐེརེ བྷིཀྑཱུ ཨུཡྻོཛེཏྭཱ དེཝདཏྟཾ ཀོཀཱལིཀཾ ཀཊམོདཀཏིསྶཀཾ ཁཎྜདེཝིཡཱ པུཏྟཾ སམུདྡདཏྟཾ སནྣིཔཱཏེཏྭཱ སིཀྑམཱནཾ ཝུཊྛཱཔེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1166. Tena samayena buddho bhagavā rājagahe viharati veḷuvane kalandakanivāpe. Tena kho pana samayena thullanandā bhikkhunī – ‘‘sikkhamānaṃ vuṭṭhāpessāmī’’ti there bhikkhū sannipātetvā pahūtaṃ khādanīyaṃ bhojanīyaṃ passitvā – ‘‘na tāvāhaṃ, ayyā, sikkhamānaṃ vuṭṭhāpessāmī’’ti there bhikkhū uyyojetvā devadattaṃ kokālikaṃ kaṭamodakatissakaṃ khaṇḍadeviyā puttaṃ samuddadattaṃ sannipātetvā sikkhamānaṃ vuṭṭhāpesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā pārivāsikachandadānena sikkhamānaṃ vuṭṭhāpessatī’’ti…pe… saccaṃ kira, bhikkhave, thullanandā bhikkhunī pārivāsikachandadānena sikkhamānaṃ vuṭṭhāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī pārivāsikachandadānena sikkhamānaṃ vuṭṭhāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༡༦༧. ‘‘ཡཱ པན བྷིཀྑུནཱི པཱརིཝཱསིཀཚནྡདཱནེན སིཀྑམཱནཾ ཝུཊྛཱཔེཡྻ, པཱཙིཏྟིཡ’’ནྟི།
1167.‘‘Yā pana bhikkhunī pārivāsikachandadānena sikkhamānaṃ vuṭṭhāpeyya, pācittiya’’nti.
༡༡༦༨. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1168.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
པཱརིཝཱསིཀཚནྡདཱནེནཱཏི ཝུཊྛིཏཱཡ པརིསཱཡ། སིཀྑམཱནཱ ནཱམ དྭེ ཝསྶཱནི ཚསུ དྷམྨེསུ སིཀྑིཏསིཀྑཱ། ཝུཊྛཱཔེཡྻཱཏི ཨུཔསམྤཱདེཡྻ།
Pārivāsikachandadānenāti vuṭṭhitāya parisāya. Sikkhamānā nāma dve vassāni chasu dhammesu sikkhitasikkhā. Vuṭṭhāpeyyāti upasampādeyya.
‘‘ཝུཊྛཱཔེསྶཱམཱི’’ཏི གཎཾ ཝཱ ཨཱཙརིནིཾ ཝཱ པཏྟཾ ཝཱ ཙཱིཝརཾ ཝཱ པརིཡེསཏི, སཱིམཾ ཝཱ སམྨནྣཏི, ཨཱཔཏྟི དུཀྐཊསྶ། ཉཏྟིཡཱ དུཀྐཊཾ། དྭཱིཧི ཀམྨཝཱཙཱཧི དུཀྐཊཱ། ཀམྨཝཱཙཱཔརིཡོསཱནེ ཨུཔཛ྄ཛྷཱཡཱཡ ཨཱཔཏྟི པཱཙིཏྟིཡསྶ ། གཎསྶ ཙ ཨཱཙརིནིཡཱ ཙ ཨཱཔཏྟི དུཀྐཊསྶ།
‘‘Vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne upajjhāyāya āpatti pācittiyassa . Gaṇassa ca ācariniyā ca āpatti dukkaṭassa.
༡༡༦༩. ཨནཱཔཏྟི ཨཝུཊྛིཏཱཡ པརིསཱཡ ཝུཊྛཱཔེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
1169. Anāpatti avuṭṭhitāya parisāya vuṭṭhāpeti, ummattikāya, ādikammikāyāti.
ཨེཀཱདསམསིཀྑཱཔདཾ ནིཊྛིཏཾ།
Ekādasamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༡. ཨེཀཱདསམསིཀྑཱཔདཝཎྞནཱ • 11. Ekādasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༨. ཀུམཱརིབྷཱུཏཝགྒཝཎྞནཱ • 8. Kumāribhūtavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. དུཏིཡཱདིསིཀྑཱཔདཝཎྞནཱ • 2. Dutiyādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༡. ཨེཀཱདསམསིཀྑཱཔདཾ • 11. Ekādasamasikkhāpadaṃ
