| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૧૬. એકધમ્મપાળિ
16. Ekadhammapāḷi
૧. પઠમવગ્ગો
1. Paṭhamavaggo
૨૯૬. ‘‘એકધમ્મો , ભિક્ખવે, ભાવિતો બહુલીકતો એકન્તનિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતિ. કતમો એકધમ્મો? બુદ્ધાનુસ્સતિ. અયં ખો, ભિક્ખવે, એકધમ્મો ભાવિતો બહુલીકતો એકન્તનિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતી’’તિ.
296. ‘‘Ekadhammo , bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Buddhānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
૨૯૭. ‘‘એકધમ્મો, ભિક્ખવે, ભાવિતો બહુલીકતો એકન્તનિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતિ. કતમો એકધમ્મો? ધમ્માનુસ્સતિ…પે॰… સઙ્ઘાનુસ્સતિ… સીલાનુસ્સતિ… ચાગાનુસ્સતિ… દેવતાનુસ્સતિ… આનાપાનસ્સતિ… મરણસ્સતિ… કાયગતાસતિ… ઉપસમાનુસ્સતિ. અયં ખો, ભિક્ખવે, એકધમ્મો ભાવિતો બહુલીકતો એકન્તનિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતી’’તિ.
297. ‘‘Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Dhammānussati…pe… saṅghānussati… sīlānussati… cāgānussati… devatānussati… ānāpānassati… maraṇassati… kāyagatāsati… upasamānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
વગ્ગો પઠમો.
Vaggo paṭhamo.
૨. દુતિયવગ્ગો
2. Dutiyavaggo
૨૯૮. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા ઉપ્પજ્જન્તિ ઉપ્પન્ના વા અકુસલા ધમ્મા ભિય્યોભાવાય વેપુલ્લાય સંવત્તન્તિ યથયિદં, ભિક્ખવે, મિચ્છાદિટ્ઠિ. મિચ્છાદિટ્ઠિકસ્સ, ભિક્ખવે, અનુપ્પન્ના ચેવ અકુસલા ધમ્મા ઉપ્પજ્જન્તિ ઉપ્પન્ના ચ અકુસલા ધમ્મા ભિય્યોભાવાય વેપુલ્લાય સંવત્તન્તી’’તિ.
298. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ, bhikkhave, micchādiṭṭhi. Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantī’’ti.
૨૯૯. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા કુસલા ધમ્મા ઉપ્પજ્જન્તિ ઉપ્પન્ના વા કુસલા ધમ્મા ભિય્યોભાવાય વેપુલ્લાય સંવત્તન્તિ યથયિદં , ભિક્ખવે, સમ્માદિટ્ઠિ. સમ્માદિટ્ઠિકસ્સ , ભિક્ખવે, અનુપ્પન્ના ચેવ કુસલા ધમ્મા ઉપ્પજ્જન્તિ ઉપ્પન્ના ચ કુસલા ધમ્મા ભિય્યોભાવાય વેપુલ્લાય સંવત્તન્તી’’તિ.
299. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ , bhikkhave, sammādiṭṭhi. Sammādiṭṭhikassa , bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantī’’ti.
૩૦૦. ‘‘નાહં , ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા કુસલા ધમ્મા નુપ્પજ્જન્તિ ઉપ્પન્ના વા કુસલા ધમ્મા પરિહાયન્તિ યથયિદં , ભિક્ખવે, મિચ્છાદિટ્ઠિ. મિચ્છાદિટ્ઠિકસ્સ, ભિક્ખવે, અનુપ્પન્ના ચેવ કુસલા ધમ્મા નુપ્પજ્જન્તિ ઉપ્પન્ના ચ કુસલા ધમ્મા પરિહાયન્તી’’તિ.
300. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ , bhikkhave, micchādiṭṭhi. Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī’’ti.
૩૦૧. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા અકુસલા ધમ્મા નુપ્પજ્જન્તિ ઉપ્પન્ના વા અકુસલા ધમ્મા પરિહાયન્તિ યથયિદં, ભિક્ખવે, સમ્માદિટ્ઠિ. સમ્માદિટ્ઠિકસ્સ, ભિક્ખવે, અનુપ્પન્ના ચેવ અકુસલા ધમ્મા નુપ્પજ્જન્તિ ઉપ્પન્ના ચ અકુસલા ધમ્મા પરિહાયન્તી’’તિ.
301. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ, bhikkhave, sammādiṭṭhi. Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī’’ti.
૩૦૨. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા મિચ્છાદિટ્ઠિ ઉપ્પજ્જતિ ઉપ્પન્ના વા મિચ્છાદિટ્ઠિ પવડ્ઢતિ યથયિદં, ભિક્ખવે, અયોનિસોમનસિકારો. અયોનિસો, ભિક્ખવે, મનસિ કરોતો અનુપ્પન્ના ચેવ મિચ્છાદિટ્ઠિ ઉપ્પજ્જતિ ઉપ્પન્ના ચ મિચ્છાદિટ્ઠિ પવડ્ઢતી’’તિ.
302. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī’’ti.
૩૦૩. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યેન અનુપ્પન્ના વા સમ્માદિટ્ઠિ ઉપ્પજ્જતિ ઉપ્પન્ના વા સમ્માદિટ્ઠિ પવડ્ઢતિ યથયિદં, ભિક્ખવે, યોનિસોમનસિકારો. યોનિસો, ભિક્ખવે, મનસિ કરોતો અનુપ્પન્ના ચેવ સમ્માદિટ્ઠિ ઉપ્પજ્જતિ ઉપ્પન્ના ચ સમ્માદિટ્ઠિ પવડ્ઢતી’’તિ.
303. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ, bhikkhave, yonisomanasikāro. Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī’’ti.
૩૦૪. ‘‘નાહં , ભિક્ખવે, અઞ્ઞં એકધમ્મમ્પિ સમનુપસ્સામિ યેન 1 સત્તા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જન્તિ યથયિદં, ભિક્ખવે, મિચ્છાદિટ્ઠિ. મિચ્છાદિટ્ઠિયા, ભિક્ખવે, સમન્નાગતા સત્તા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જન્તી’’તિ.
304. ‘‘Nāhaṃ , bhikkhave, aññaṃ ekadhammampi samanupassāmi yena 2 sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti yathayidaṃ, bhikkhave, micchādiṭṭhi. Micchādiṭṭhiyā, bhikkhave, samannāgatā sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti.
૩૦૫. ‘‘નાહં , ભિક્ખવે, અઞ્ઞં એકધમ્મમ્પિ સમનુપસ્સામિ યેન સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તિ યથયિદં, ભિક્ખવે, સમ્માદિટ્ઠિ. સમ્માદિટ્ઠિયા, ભિક્ખવે, સમન્નાગતા સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ.
305. ‘‘Nāhaṃ , bhikkhave, aññaṃ ekadhammampi samanupassāmi yena sattā kāyassa bhedā paraṃ maraṇā sugatiṃ saggaṃ lokaṃ upapajjanti yathayidaṃ, bhikkhave, sammādiṭṭhi. Sammādiṭṭhiyā, bhikkhave, samannāgatā sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
૩૦૬. ‘‘મિચ્છાદિટ્ઠિકસ્સ, ભિક્ખવે, પુરિસપુગ્ગલસ્સ યઞ્ચેવ કાયકમ્મં યથાદિટ્ઠિ સમત્તં સમાદિન્નં યઞ્ચ વચીકમ્મં…પે॰… યઞ્ચ મનોકમ્મં યથાદિટ્ઠિ સમત્તં સમાદિન્નં યા ચ ચેતના યા ચ પત્થના યો ચ પણિધિ યે ચ સઙ્ખારા સબ્બે તે ધમ્મા અનિટ્ઠાય અકન્તાય અમનાપાય અહિતાય દુક્ખાય સંવત્તન્તિ. તં કિસ્સ હેતુ? દિટ્ઠિ હિસ્સ 3, ભિક્ખવે, પાપિકા. સેય્યથાપિ, ભિક્ખવે , નિમ્બબીજં વા કોસાતકિબીજં વા તિત્તકલાબુબીજં વા અલ્લાય પથવિયા 4 નિક્ખિત્તં યઞ્ચેવ પથવિરસં ઉપાદિયતિ યઞ્ચ આપોરસં ઉપાદિયતિ સબ્બં તં તિત્તકત્તાય કટુકત્તાય અસાતત્તાય સંવત્તતિ. તં કિસ્સ હેતુ? બીજં હિસ્સ 5, ભિક્ખવે, પાપકં. એવમેવં ખો, ભિક્ખવે, મિચ્છાદિટ્ઠિકસ્સ પુરિસપુગ્ગલસ્સ યઞ્ચેવ કાયકમ્મં યથાદિટ્ઠિ સમત્તં સમાદિન્નં યઞ્ચ વચીકમ્મં…પે॰… યઞ્ચ મનોકમ્મં યથાદિટ્ઠિ સમત્તં સમાદિન્નં યા ચ ચેતના યા ચ પત્થના યો ચ પણિધિ યે ચ સઙ્ખારા સબ્બે તે ધમ્મા અનિટ્ઠાય અકન્તાય અમનાપાય અહિતાય દુક્ખાય સંવત્તન્તિ. તં કિસ્સ હેતુ? દિટ્ઠિ હિસ્સ, ભિક્ખવે, પાપિકા’’તિ.
306. ‘‘Micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā. Seyyathāpi, bhikkhave , nimbabījaṃ vā kosātakibījaṃ vā tittakalābubījaṃ vā allāya pathaviyā 7 nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa 8, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave, pāpikā’’ti.
૩૦૭. ‘‘સમ્માદિટ્ઠિકસ્સ, ભિક્ખવે, પુરિસપુગ્ગલસ્સ યઞ્ચેવ કાયકમ્મં યથાદિટ્ઠિ સમત્તં સમાદિન્નં યઞ્ચ વચીકમ્મં…પે॰… યઞ્ચ મનોકમ્મં યથાદિટ્ઠિ સમત્તં સમાદિન્નં યા ચ ચેતના યા ચ પત્થના યો ચ પણિધિ યે ચ સઙ્ખારા સબ્બે તે ધમ્મા ઇટ્ઠાય કન્તાય મનાપાય હિતાય સુખાય સંવત્તન્તિ. તં કિસ્સ હેતુ? દિટ્ઠિ હિસ્સ, ભિક્ખવે, ભદ્દિકા. સેય્યથાપિ, ભિક્ખવે, ઉચ્છુબીજં વા સાલિબીજં વા મુદ્દિકાબીજં વા અલ્લાય પથવિયા નિક્ખિત્તં યઞ્ચેવ પથવિરસં ઉપાદિયતિ યઞ્ચ આપોરસં ઉપાદિયતિ સબ્બં તં મધુરત્તાય સાતત્તાય અસેચનકત્તાય સંવત્તતિ. તં કિસ્સ હેતુ? બીજં હિસ્સ, ભિક્ખવે, ભદ્દકં. એવમેવં ખો, ભિક્ખવે, સમ્માદિટ્ઠિકસ્સ પુરિસપુગ્ગલસ્સ યઞ્ચેવ કાયકમ્મં યથાદિટ્ઠિ સમત્તં સમાદિન્નં યઞ્ચ વચીકમ્મં…પે॰… યઞ્ચ મનોકમ્મં યથાદિટ્ઠિ સમત્તં સમાદિન્નં યા ચ ચેતના યા ચ પત્થના યો ચ પણિધિ યે ચ સઙ્ખારા સબ્બે તે ધમ્મા ઇટ્ઠાય કન્તાય મનાપાય હિતાય સુખાય સંવત્તન્તિ. તં કિસ્સ હેતુ? દિટ્ઠિ હિસ્સ, ભિક્ખવે, ભદ્દિકા’’તિ.
307. ‘‘Sammādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā. Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ madhurattāya sātattāya asecanakattāya saṃvattati. Taṃ kissa hetu? Bījaṃ hissa, bhikkhave, bhaddakaṃ. Evamevaṃ kho, bhikkhave, sammādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti.
વગ્ગો દુતિયો.
Vaggo dutiyo.
૩. તતિયવગ્ગો
3. Tatiyavaggo
૩૦૮. ‘‘એકપુગ્ગલો , ભિક્ખવે, લોકે ઉપ્પજ્જમાનો ઉપ્પજ્જતિ બહુજનઅહિતાય બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાનં. કતમો એકપુગ્ગલો? મિચ્છાદિટ્ઠિકો હોતિ વિપરીતદસ્સનો. સો બહુજનં સદ્ધમ્મા વુટ્ઠાપેત્વા અસદ્ધમ્મે પતિટ્ઠાપેતિ. અયં ખો, ભિક્ખવે, એકપુગ્ગલો લોકે ઉપ્પજ્જમાનો ઉપ્પજ્જતિ બહુજનઅહિતાય બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાન’’ન્તિ.
308. ‘‘Ekapuggalo , bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṃ. Katamo ekapuggalo? Micchādiṭṭhiko hoti viparītadassano. So bahujanaṃ saddhammā vuṭṭhāpetvā asaddhamme patiṭṭhāpeti. Ayaṃ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussāna’’nti.
૩૦૯. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ બહુજનહિતાય બહુજનસુખાય, બહુનો જનસ્સ અત્થાય હિતાય સુખાય દેવમનુસ્સાનં. કતમો એકપુગ્ગલો? સમ્માદિટ્ઠિકો હોતિ અવિપરીતદસ્સનો. સો બહુજનં અસદ્ધમ્મા વુટ્ઠાપેત્વા સદ્ધમ્મે પતિટ્ઠાપેતિ. અયં ખો, ભિક્ખવે, એકપુગ્ગલો લોકે ઉપપજ્જમાનો ઉપ્પજ્જતિ બહુજનહિતાય બહુજનસુખાય, બહુનો જનસ્સ અત્થાય હિતાય સુખાય દેવમનુસ્સાન’’ન્તિ.
309. ‘‘Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katamo ekapuggalo? Sammādiṭṭhiko hoti aviparītadassano. So bahujanaṃ asaddhammā vuṭṭhāpetvā saddhamme patiṭṭhāpeti. Ayaṃ kho, bhikkhave, ekapuggalo loke upapajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
૩૧૦. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યં એવં મહાસાવજ્જં યથયિદં, ભિક્ખવે, મિચ્છાદિટ્ઠિ. મિચ્છાદિટ્ઠિપરમાનિ, ભિક્ખવે, મહાસાવજ્જાની’’તિ 9.
310. ‘‘Nāhaṃ, bhikkhave, aññaṃ ekadhammampi samanupassāmi yaṃ evaṃ mahāsāvajjaṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, mahāsāvajjānī’’ti 10.
૩૧૧. ‘‘નાહં, ભિક્ખવે, અઞ્ઞં એકપુગ્ગલમ્પિ સમનુપસ્સામિ યો એવં બહુજનઅહિતાય પટિપન્નો બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાનં યથયિદં, ભિક્ખવે, મક્ખલિ મોઘપુરિસો. સેય્યથાપિ, ભિક્ખવે, નદીમુખે ખિપ્પં 11 ઉડ્ડેય્ય 12 બહૂનં મચ્છાનં અહિતાય દુક્ખાય અનયાય બ્યસનાય; એવમેવં ખો, ભિક્ખવે , મક્ખલિ મોઘપુરિસો મનુસ્સખિપ્પં મઞ્ઞે લોકે ઉપ્પન્નો બહૂનં સત્તાનં અહિતાય દુક્ખાય અનયાય બ્યસનાયા’’તિ.
311. ‘‘Nāhaṃ, bhikkhave, aññaṃ ekapuggalampi samanupassāmi yo evaṃ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṃ yathayidaṃ, bhikkhave, makkhali moghapuriso. Seyyathāpi, bhikkhave, nadīmukhe khippaṃ 13 uḍḍeyya 14 bahūnaṃ macchānaṃ ahitāya dukkhāya anayāya byasanāya; evamevaṃ kho, bhikkhave , makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti.
૩૧૨. ‘‘દુરક્ખાતે , ભિક્ખવે, ધમ્મવિનયે યો ચ સમાદપેતિ 15 યઞ્ચ સમાદપેતિ યો ચ સમાદપિતો તથત્તાય પટિપજ્જતિ સબ્બે તે બહું અપુઞ્ઞં પસવન્તિ. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.
312. ‘‘Durakkhāte , bhikkhave, dhammavinaye yo ca samādapeti 16 yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti. Taṃ kissa hetu? Durakkhātattā, bhikkhave, dhammassā’’ti.
૩૧૩. ‘‘સ્વાક્ખાતે , ભિક્ખવે, ધમ્મવિનયે યો ચ સમાદપેતિ યઞ્ચ સમાદપેતિ યો ચ સમાદપિતો તથત્તાય પટિપજ્જતિ સબ્બે તે બહું પુઞ્ઞં પસવન્તિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.
313. ‘‘Svākkhāte , bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti. Taṃ kissa hetu? Svākkhātattā, bhikkhave, dhammassā’’ti.
૩૧૪. ‘‘દુરક્ખાતે, ભિક્ખવે, ધમ્મવિનયે દાયકેન મત્તા જાનિતબ્બા, નો પટિગ્ગાહકેન. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.
314. ‘‘Durakkhāte, bhikkhave, dhammavinaye dāyakena mattā jānitabbā, no paṭiggāhakena. Taṃ kissa hetu? Durakkhātattā, bhikkhave, dhammassā’’ti.
૩૧૫. ‘‘સ્વાક્ખાતે, ભિક્ખવે, ધમ્મવિનયે પટિગ્ગાહકેન મત્તા જાનિતબ્બા, નો દાયકેન. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.
315. ‘‘Svākkhāte, bhikkhave, dhammavinaye paṭiggāhakena mattā jānitabbā, no dāyakena. Taṃ kissa hetu? Svākkhātattā, bhikkhave, dhammassā’’ti.
૩૧૬. ‘‘દુરક્ખાતે, ભિક્ખવે, ધમ્મવિનયે યો આરદ્ધવીરિયો સો દુક્ખં વિહરતિ. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.
316. ‘‘Durakkhāte, bhikkhave, dhammavinaye yo āraddhavīriyo so dukkhaṃ viharati. Taṃ kissa hetu? Durakkhātattā, bhikkhave, dhammassā’’ti.
૩૧૭. ‘‘સ્વાક્ખાતે, ભિક્ખવે, ધમ્મવિનયે યો કુસીતો સો દુક્ખં વિહરતિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.
317. ‘‘Svākkhāte, bhikkhave, dhammavinaye yo kusīto so dukkhaṃ viharati. Taṃ kissa hetu? Svākkhātattā, bhikkhave, dhammassā’’ti.
૩૧૮. ‘‘દુરક્ખાતે, ભિક્ખવે, ધમ્મવિનયે યો કુસીતો સો સુખં વિહરતિ . તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.
318. ‘‘Durakkhāte, bhikkhave, dhammavinaye yo kusīto so sukhaṃ viharati . Taṃ kissa hetu? Durakkhātattā, bhikkhave, dhammassā’’ti.
૩૧૯. ‘‘સ્વાક્ખાતે, ભિક્ખવે, ધમ્મવિનયે યો આરદ્ધવીરિયો સો સુખં વિહરતિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.
319. ‘‘Svākkhāte, bhikkhave, dhammavinaye yo āraddhavīriyo so sukhaṃ viharati. Taṃ kissa hetu? Svākkhātattā, bhikkhave, dhammassā’’ti.
૩૨૦. ‘‘સેય્યથાપિ , ભિક્ખવે, અપ્પમત્તકોપિ ગૂથો દુગ્ગન્ધો હોતિ; એવમેવં ખો અહં, ભિક્ખવે, અપ્પમત્તકમ્પિ ભવં ન વણ્ણેમિ, અન્તમસો અચ્છરાસઙ્ઘાતમત્તમ્પિ’’.
320. ‘‘Seyyathāpi , bhikkhave, appamattakopi gūtho duggandho hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
૩૨૧. ‘‘સેય્યથાપિ, ભિક્ખવે, અપ્પમત્તકમ્પિ મુત્તં દુગ્ગન્ધં હોતિ… અપ્પમત્તકોપિ ખેળો દુગ્ગન્ધો હોતિ… અપ્પમત્તકોપિ પુબ્બો દુગ્ગન્ધો હોતિ… અપ્પમત્તકમ્પિ લોહિતં દુગ્ગન્ધં હોતિ; એવમેવં ખો અહં, ભિક્ખવે, અપ્પમત્તકમ્પિ ભવં ન વણ્ણેમિ, અન્તમસો અચ્છરાસઙ્ઘાતમત્તમ્પિ’’.
321. ‘‘Seyyathāpi, bhikkhave, appamattakampi muttaṃ duggandhaṃ hoti… appamattakopi kheḷo duggandho hoti… appamattakopi pubbo duggandho hoti… appamattakampi lohitaṃ duggandhaṃ hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
વગ્ગો તતિયો.
Vaggo tatiyo.
૪. ચતુત્થવગ્ગો
4. Catutthavaggo
૩૨૨. ‘‘સેય્યથાપિ , ભિક્ખવે, અપ્પમત્તકં ઇમસ્મિં જમ્બુદીપે આરામરામણેય્યકં વનરામણેય્યકં ભૂમિરામણેય્યકં પોક્ખરણિરામણેય્યકં; અથ ખો એતદેવ બહુતરં યદિદં ઉક્કૂલવિકૂલં નદીવિદુગ્ગં ખાણુકણ્ટકટ્ઠાનં 17 પબ્બતવિસમં; એવમેવં ખો, ભિક્ખવે, અપ્પકા તે સત્તા યે થલજા, અથ ખો એતેવ સત્તા બહુતરા યે ઓદકા’’.
322. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ 18 pabbatavisamaṃ; evamevaṃ kho, bhikkhave, appakā te sattā ye thalajā, atha kho eteva sattā bahutarā ye odakā’’.
૩૨૩. … એવમેવં ખો, ભિક્ખવે, અપ્પકા તે સત્તા યે મનુસ્સેસુ પચ્ચાજાયન્તિ; અથ ખો એતેવ સત્તા બહુતરા યે અઞ્ઞત્ર મનુસ્સેહિ પચ્ચાજાયન્તિ.
323. … Evamevaṃ kho, bhikkhave, appakā te sattā ye manussesu paccājāyanti; atha kho eteva sattā bahutarā ye aññatra manussehi paccājāyanti.
… એવમેવં ખો, ભિક્ખવે, અપ્પકા તે સત્તા યે મજ્ઝિમેસુ જનપદેસુ પચ્ચાજાયન્તિ; અથ ખો એતેવ સત્તા બહુતરા યે પચ્ચન્તિમેસુ જનપદેસુ પચ્ચાજાયન્તિ અવિઞ્ઞાતારેસુ મિલક્ખેસુ 19.
… Evamevaṃ kho, bhikkhave, appakā te sattā ye majjhimesu janapadesu paccājāyanti; atha kho eteva sattā bahutarā ye paccantimesu janapadesu paccājāyanti aviññātāresu milakkhesu 20.
૩૨૪. … એવમેવં ખો, ભિક્ખવે, અપ્પકા તે સત્તા યે પઞ્ઞવન્તો અજળા અનેળમૂગા પટિબલા સુભાસિતદુબ્ભાસિતસ્સ અત્થમઞ્ઞાતું; અથ ખો એતેવ સત્તા બહુતરા યે દુપ્પઞ્ઞા જળા એળમૂગા ન પટિબલા સુભાસિતદુબ્ભાસિતસ્સ અત્થમઞ્ઞાતું.
324. … Evamevaṃ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ; atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ.
૩૨૫. … એવમેવં ખો, ભિક્ખવે, અપ્પકા તે સત્તા યે અરિયેન પઞ્ઞાચક્ખુના સમન્નાગતા; અથ ખો એતેવ સત્તા બહુતરા યે અવિજ્જાગતા સમ્મૂળ્હા.
325. … Evamevaṃ kho, bhikkhave, appakā te sattā ye ariyena paññācakkhunā samannāgatā; atha kho eteva sattā bahutarā ye avijjāgatā sammūḷhā.
૩૨૬. … એવમેવં ખો, ભિક્ખવે, અપ્પકા તે સત્તા યે લભન્તિ તથાગતં દસ્સનાય; અથ ખો એતેવ સત્તા બહુતરા યે ન લભન્તિ તથાગતં દસ્સનાય.
326. … Evamevaṃ kho, bhikkhave, appakā te sattā ye labhanti tathāgataṃ dassanāya; atha kho eteva sattā bahutarā ye na labhanti tathāgataṃ dassanāya.
૩૨૭. … એવમેવં ખો, ભિક્ખવે, અપ્પકા તે સત્તા યે લભન્તિ તથાગતપ્પવેદિતં ધમ્મવિનયં સવનાય; અથ ખો એતેવ સત્તા બહુતરા યે ન લભન્તિ તથાગતપ્પવેદિતં ધમ્મવિનયં સવનાય.
327. … Evamevaṃ kho, bhikkhave, appakā te sattā ye labhanti tathāgatappaveditaṃ dhammavinayaṃ savanāya; atha kho eteva sattā bahutarā ye na labhanti tathāgatappaveditaṃ dhammavinayaṃ savanāya.
૩૨૮. … એવમેવં ખો, ભિક્ખવે, અપ્પકા તે સત્તા યે સુત્વા ધમ્મં ધારેન્તિ; અથ ખો એતેવ સત્તા બહુતરા યે સુત્વા ધમ્મં ન ધારેન્તિ.
328. … Evamevaṃ kho, bhikkhave, appakā te sattā ye sutvā dhammaṃ dhārenti; atha kho eteva sattā bahutarā ye sutvā dhammaṃ na dhārenti.
૩૨૯. … એવમેવં ખો, ભિક્ખવે, અપ્પકા તે સત્તા યે ધાતાનં 21 ધમ્માનં અત્થં ઉપપરિક્ખન્તિ; અથ ખો એતેવ સત્તા બહુતરા યે ધાતાનં ધમ્માનં અત્થં ન ઉપપરિક્ખન્તિ.
329. … Evamevaṃ kho, bhikkhave, appakā te sattā ye dhātānaṃ 22 dhammānaṃ atthaṃ upaparikkhanti; atha kho eteva sattā bahutarā ye dhātānaṃ dhammānaṃ atthaṃ na upaparikkhanti.
૩૩૦. … એવમેવં ખો, ભિક્ખવે, અપ્પકા તે સત્તા યે અત્થમઞ્ઞાય ધમ્મમઞ્ઞાય ધમ્માનુધમ્મં પટિપજ્જન્તિ; અથ ખો એતેવ સત્તા બહુતરા યે અત્થમઞ્ઞાય ધમ્મમઞ્ઞાય ધમ્માનુધમ્મં ન પટિપજ્જન્તિ.
330. … Evamevaṃ kho, bhikkhave, appakā te sattā ye atthamaññāya dhammamaññāya dhammānudhammaṃ paṭipajjanti; atha kho eteva sattā bahutarā ye atthamaññāya dhammamaññāya dhammānudhammaṃ na paṭipajjanti.
૩૩૧. … એવમેવં ખો, ભિક્ખવે, અપ્પકા તે સત્તા યે સંવેજનિયેસુ ઠાનેસુ સંવિજ્જન્તિ; અથ ખો એતેવ સત્તા બહુતરા યે સંવેજનિયેસુ ઠાનેસુ ન સંવિજ્જન્તિ.
331. … Evamevaṃ kho, bhikkhave, appakā te sattā ye saṃvejaniyesu ṭhānesu saṃvijjanti; atha kho eteva sattā bahutarā ye saṃvejaniyesu ṭhānesu na saṃvijjanti.
૩૩૨. … એવમેવં ખો, ભિક્ખવે, અપ્પકા તે સત્તા યે સંવિગ્ગા યોનિસો પદહન્તિ; અથ ખો એતેવ સત્તા બહુતરા યે સંવિગ્ગા યોનિસો ન પદહન્તિ.
332. … Evamevaṃ kho, bhikkhave, appakā te sattā ye saṃviggā yoniso padahanti; atha kho eteva sattā bahutarā ye saṃviggā yoniso na padahanti.
૩૩૪. … એવમેવં ખો, ભિક્ખવે, અપ્પકા તે સત્તા યે અન્નગ્ગરસગ્ગાનં લાભિનો; અથ ખો એતેવ સત્તા બહુતરા યે અન્નગ્ગરસગ્ગાનં ન લાભિનો, ઉઞ્છેન કપાલાભતેન યાપેન્તિ.
334. … Evamevaṃ kho, bhikkhave, appakā te sattā ye annaggarasaggānaṃ lābhino; atha kho eteva sattā bahutarā ye annaggarasaggānaṃ na lābhino, uñchena kapālābhatena yāpenti.
૩૩૫. … એવમેવં ખો, ભિક્ખવે, અપ્પકા તે સત્તા યે અત્થરસસ્સ ધમ્મરસસ્સ વિમુત્તિરસસ્સ લાભિનો; અથ ખો એતેવ સત્તા બહુતરા યે અત્થરસસ્સ ધમ્મરસસ્સ વિમુત્તિરસસ્સ ન લાભિનો. તસ્માતિહ, ભિક્ખવે , એવં સિક્ખિતબ્બં – અત્થરસસ્સ ધમ્મરસસ્સ વિમુત્તિરસસ્સ લાભિનો ભવિસ્સામાતિ. એવઞ્હિ વો, ભિક્ખવે, સિક્ખિતબ્બન્તિ.
335. … Evamevaṃ kho, bhikkhave, appakā te sattā ye attharasassa dhammarasassa vimuttirasassa lābhino; atha kho eteva sattā bahutarā ye attharasassa dhammarasassa vimuttirasassa na lābhino. Tasmātiha, bhikkhave , evaṃ sikkhitabbaṃ – attharasassa dhammarasassa vimuttirasassa lābhino bhavissāmāti. Evañhi vo, bhikkhave, sikkhitabbanti.
૩૩૬-૩૩૮. ‘‘સેય્યથાપિ , ભિક્ખવે, અપ્પમત્તકં ઇમસ્મિં જમ્બુદીપે આરામરામણેય્યકં વનરામણેય્યકં ભૂમિરામણેય્યકં પોક્ખરણિરામણેય્યકં; અથ ખો એતદેવ બહુતરં યદિદં ઉક્કૂલવિકૂલં નદીવિદુગ્ગં ખાણુકણ્ટકટ્ઠાનં પબ્બતવિસમં. એવમેવં ખો, ભિક્ખવે, અપ્પકા તે સત્તા યે મનુસ્સા ચુતા મનુસ્સેસુ પચ્ચાજાયન્તિ, અથ ખો એતેવ સત્તા બહુતરા યે મનુસ્સા ચુતા નિરયે પચ્ચાજાયન્તિ…પે॰… તિરચ્છાનયોનિયા પચ્ચાજાયન્તિ…પે॰… પેત્તિવિસયે પચ્ચાજાયન્તિ’’.
336-338. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ. Evamevaṃ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti…pe… tiracchānayoniyā paccājāyanti…pe… pettivisaye paccājāyanti’’.
૩૩૯-૩૪૧. … એવમેવં ખો, ભિક્ખવે, અપ્પકા તે સત્તા યે મનુસ્સા ચુતા દેવેસુ પચ્ચાજાયન્તિ; અથ ખો એતેવ સત્તા બહુતરા યે મનુસ્સા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
339-341. … Evamevaṃ kho, bhikkhave, appakā te sattā ye manussā cutā devesu paccājāyanti; atha kho eteva sattā bahutarā ye manussā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૪૨-૩૪૪. … એવમેવં ખો, ભિક્ખવે, અપ્પકા તે સત્તા યે દેવા ચુતા દેવેસુ પચ્ચાજાયન્તિ; અથ ખો એતેવ સત્તા બહુતરા યે દેવા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
342-344. … Evamevaṃ kho, bhikkhave, appakā te sattā ye devā cutā devesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૪૫-૩૪૭. … એવમેવં ખો, ભિક્ખવે, અપ્પકા તે સત્તા યે દેવા ચુતા મનુસ્સેસુ પચ્ચાજાયન્તિ; અથ ખો એતેવ સત્તા બહુતરા યે દેવા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
345-347. … Evamevaṃ kho, bhikkhave, appakā te sattā ye devā cutā manussesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૪૮-૩૫૦. … એવમેવં ખો, ભિક્ખવે, અપ્પકા તે સત્તા યે નિરયા ચુતા મનુસ્સેસુ પચ્ચાજાયન્તિ; અથ ખો એતેવ સત્તા બહુતરા યે નિરયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
348-350. … Evamevaṃ kho, bhikkhave, appakā te sattā ye nirayā cutā manussesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૫૧-૩૫૩. … એવમેવં ખો, ભિક્ખવે, અપ્પકા તે સત્તા યે નિરયા ચુતા દેવેસુ પચ્ચાજાયન્તિ; અથ ખો એતેવ સત્તા બહુતરા યે નિરયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
351-353. … Evamevaṃ kho, bhikkhave, appakā te sattā ye nirayā cutā devesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૫૪-૩૫૬. … એવમેવં ખો, ભિક્ખવે, અપ્પકા તે સત્તા યે તિરચ્છાનયોનિયા ચુતા મનુસ્સેસુ પચ્ચાજાયન્તિ; અથ ખો એતેવ સત્તા બહુતરા યે તિરચ્છાનયોનિયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
354-356. … Evamevaṃ kho, bhikkhave, appakā te sattā ye tiracchānayoniyā cutā manussesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૫૭-૩૫૯. … એવમેવં ખો, ભિક્ખવે, અપ્પકા તે સત્તા યે તિરચ્છાનયોનિયા ચુતા દેવેસુ પચ્ચાજાયન્તિ; અથ ખો એતેવ સત્તા બહુતરા યે તિરચ્છાનયોનિયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
357-359. … Evamevaṃ kho, bhikkhave, appakā te sattā ye tiracchānayoniyā cutā devesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૬૦-૩૬૨. … એવમેવં ખો, ભિક્ખવે, અપ્પકા તે સત્તા યે પેત્તિવિસયા ચુતા મનુસ્સેસુ પચ્ચાજાયન્તિ; અથ ખો એતેવ સત્તા બહુતરા યે પેત્તિવિસયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
360-362. … Evamevaṃ kho, bhikkhave, appakā te sattā ye pettivisayā cutā manussesu paccājāyanti; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
૩૬૩-૩૬૫. … એવમેવં ખો, ભિક્ખવે, અપ્પકા તે સત્તા યે પેત્તિવિસયા ચુતા દેવેસુ પચ્ચાજાયન્તિ ; અથ ખો એતેવ સત્તા બહુતરા યે પેત્તિવિસયા ચુતા નિરયે પચ્ચાજાયન્તિ… તિરચ્છાનયોનિયા પચ્ચાજાયન્તિ… પેત્તિવિસયે પચ્ચાજાયન્તિ.
363-365. … Evamevaṃ kho, bhikkhave, appakā te sattā ye pettivisayā cutā devesu paccājāyanti ; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
વગ્ગો ચતુત્થો.
Vaggo catuttho.
જમ્બુદીપપેય્યાલો નિટ્ઠિતો.
Jambudīpapeyyālo niṭṭhito.
એકધમ્મપાળિ સોળસમો.
Ekadhammapāḷi soḷasamo.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૧૬. એકધમ્મપાળિ • 16. Ekadhammapāḷi
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧૬. એકધમ્મપાળિ • 16. Ekadhammapāḷi
