| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
(1.) згаганид̣̇д̣̇зсаван̣н̣анаа
(1.) Ekakaniddesavaṇṇanā
761. ид̣̇аани яат̇аанигкид̇д̇ааяа маад̇игааяа ‘‘бан̃жавин̃н̃аан̣аа на хзд̇умзваа’’д̇иаад̣̇инаа наязна аарад̣̇д̇хз нид̣̇д̣̇зсаваарз на хзд̇умзваад̇и саад̇хааран̣ахзд̇убадигкзбанид̣̇д̣̇зсо. д̇ад̇т̇а ‘‘хзд̇ухзд̇у, бажжаяахзд̇у, уд̇д̇амахзд̇у, саад̇хааран̣ахзд̇ууд̇и жад̇уб̣б̣ид̇хо хзд̇уу’’д̇иаад̣̇инаа наязна яам̣ вад̇д̇аб̣б̣ам̣ сияаа, д̇ам̣ саб̣б̣ам̣ руубаган̣д̣з ‘‘саб̣б̣ам̣ руубам̣ на хзд̇умзваа’’д̇иаад̣̇ийнам̣ ад̇т̇аван̣н̣анааяам̣ (д̇ха. са. адта. 594) вуд̇д̇амзва. ахзд̇угамзваад̇иаад̣̇ийсу б̣яан̃ж̇анасанд̇хивасзна магааро взд̣̇ид̇аб̣б̣о; ахзд̇угаа зваад̇и ад̇т̇о. сзсабад̣̇зсуби зсзва наяо. абижа ‘‘хзд̇уу д̇хаммаа нахзд̇уу д̇хаммаа’’д̇иаад̣̇ийсу (д̇ха. са. д̣̇угамаад̇игаа 1) д̇хаммагодтаасзсу бан̃жавин̃н̃аан̣аани хзд̇уу д̇хаммаад̇и ваа сахзд̇угаа д̇хаммаад̇и ваа на хонд̇и. зганд̇зна бана на хзд̇ууязва, ахзд̇угаа язваад̇и имааниби наязнзд̇т̇а саб̣б̣абад̣̇зсу ад̇т̇о взд̣̇ид̇аб̣б̣о. аб̣яаагад̇амзваад̇и бад̣̇ам̣ вибаагааб̣яаагад̇авасзна вуд̇д̇ам̣. саарамман̣амзваад̇и олуб̣бхаарамман̣авасзна. бажжаяаарамман̣ам̣ олуб̣бхаарамман̣анд̇и хи д̣̇увид̇хам̣ аарамман̣ам̣. имасмим̣ бана таанз олуб̣бхаарамман̣амзва д̇хурам̣, бажжаяаарамман̣амби лаб̣бхад̇иязва. ажзд̇асигамзваад̇и бад̣̇ам̣ жид̇д̇ам̣, руубам̣, ниб̣б̣аананд̇и д̇ийсу ажзд̇асигзсу жид̇д̇амзва санд̇хааяа вуд̇д̇ам̣. но абарияаабаннамзваад̇и г̇ад̇ибарияаабаннажуд̇ибарияаабаннасам̣саараваддабхавабарияаабаннабхаавад̇о барияаабаннаа зва, но абарияаабаннаа. логад̇о ваддад̇о на нияяанд̇ийд̇и анияяаанигаа . уббаннам̣ мановин̃н̃аан̣авин̃н̃зяяамзваад̇и руубаган̣д̣з жагкувин̃н̃аан̣аад̣̇ийнам̣ бажжуббаннаанзва руубаад̣̇ийни аараб̣бха бавад̇д̇ид̇о ад̇ийд̇аад̣̇ивисаяам̣ мановин̃н̃аан̣амби бан̃жавин̃н̃аан̣асод̇абад̇ид̇амзва гад̇ваа ‘‘убабаннам̣ чахи вин̃н̃аан̣зхи вин̃н̃зяяа’’нд̇и (д̇ха. са. 584) вуд̇д̇ам̣. бан̃жавин̃н̃аан̣аа бана яасмаа бажжуббаннааби жагкувин̃н̃аан̣аад̣̇ийнам̣ аарамман̣аа на хонд̇и, мановин̃н̃аан̣ассзва хонд̇и, д̇асмаа ‘‘мановин̃н̃аан̣авин̃н̃зяяамзваа’’д̇и вуд̇д̇ам̣. анижжамзваад̇и худ̇ваа абхаавадтзна анижжааязва. ж̇араабхибхууд̇амзваад̇и ж̇арааяа абхибхууд̇ад̇д̇аа ж̇араабхибхууд̇аа зва.
761. Idāni yathānikkhittāya mātikāya ‘‘pañcaviññāṇā na hetumevā’’tiādinā nayena āraddhe niddesavāre na hetumevāti sādhāraṇahetupaṭikkhepaniddeso. Tattha ‘‘hetuhetu, paccayahetu, uttamahetu, sādhāraṇahetūti catubbidho hetū’’tiādinā nayena yaṃ vattabbaṃ siyā, taṃ sabbaṃ rūpakaṇḍe ‘‘sabbaṃ rūpaṃ na hetumevā’’tiādīnaṃ atthavaṇṇanāyaṃ (dha. sa. aṭṭha. 594) vuttameva. Ahetukamevātiādīsu byañjanasandhivasena makāro veditabbo; ahetukā evāti attho. Sesapadesupi eseva nayo. Apica ‘‘hetū dhammā nahetū dhammā’’tiādīsu (dha. sa. dukamātikā 1) dhammakoṭṭhāsesu pañcaviññāṇāni hetū dhammāti vā sahetukā dhammāti vā na honti. Ekantena pana na hetūyeva, ahetukā yevāti imānipi nayenettha sabbapadesu attho veditabbo. Abyākatamevāti padaṃ vipākābyākatavasena vuttaṃ. Sārammaṇamevāti olubbhārammaṇavasena. Paccayārammaṇaṃ olubbhārammaṇanti hi duvidhaṃ ārammaṇaṃ. Imasmiṃ pana ṭhāne olubbhārammaṇameva dhuraṃ, paccayārammaṇampi labbhatiyeva. Acetasikamevāti padaṃ cittaṃ, rūpaṃ, nibbānanti tīsu acetasikesu cittameva sandhāya vuttaṃ. No apariyāpannamevāti gatipariyāpannacutipariyāpannasaṃsāravaṭṭabhavapariyāpannabhāvato pariyāpannā eva, no apariyāpannā. Lokato vaṭṭato na niyyantīti aniyyānikā. Uppannaṃ manoviññāṇaviññeyyamevāti rūpakaṇḍe cakkhuviññāṇādīnaṃ paccuppannāneva rūpādīni ārabbha pavattito atītādivisayaṃ manoviññāṇampi pañcaviññāṇasotapatitameva katvā ‘‘upapannaṃ chahi viññāṇehi viññeyya’’nti (dha. sa. 584) vuttaṃ. Pañcaviññāṇā pana yasmā paccuppannāpi cakkhuviññāṇādīnaṃ ārammaṇā na honti, manoviññāṇasseva honti, tasmā ‘‘manoviññāṇaviññeyyamevā’’ti vuttaṃ. Aniccamevāti hutvā abhāvaṭṭhena aniccāyeva. Jarābhibhūtamevāti jarāya abhibhūtattā jarābhibhūtā eva.
762. уббаннавад̇т̇угаа уббаннаарамман̣аад̇и анааг̇ад̇абадигкзбо. на хи д̇з анааг̇ад̇зсу вад̇т̇аарамман̣зсу уббаж̇ж̇анд̇и.
762. Uppannavatthukā uppannārammaṇāti anāgatapaṭikkhepo. Na hi te anāgatesu vatthārammaṇesu uppajjanti.
бурзж̇аад̇авад̇т̇угаа бурзж̇аад̇аарамман̣аад̇и сахуббад̇д̇ибадигкзбо. на хи д̇з сахуббаннам̣ вад̇т̇ум̣ ваа аарамман̣ам̣ ваа бадижжа уббаж̇ж̇анд̇и, саяам̣ бана бажчааж̇аад̇аа худ̇ваа бурзж̇аад̇зсу вад̇т̇аарамман̣зсу уббаж̇ж̇анд̇и.
Purejātavatthukā purejātārammaṇāti sahuppattipaṭikkhepo. Na hi te sahuppannaṃ vatthuṃ vā ārammaṇaṃ vā paṭicca uppajjanti, sayaṃ pana pacchājātā hutvā purejātesu vatthārammaṇesu uppajjanti.
аж̇жхад̇д̇игавад̇т̇угаад̇и аж̇жхад̇д̇аж̇жхад̇д̇авасзна вуд̇д̇ам̣. д̇аани хи аж̇жхад̇д̇игз бан̃жа басаад̣̇з вад̇т̇ум̣ гад̇ваа уббаж̇ж̇анд̇и. б̣аахираарамман̣аад̇и б̣аахираруубаад̣̇иаарамман̣аа. д̇ад̇т̇а жад̇уггам̣ взд̣̇ид̇аб̣б̣ам̣ – бан̃жавин̃н̃аан̣аа хи басаад̣̇авад̇т̇угад̇д̇аа аж̇жхад̇д̇игаа аж̇жхад̇д̇игавад̇т̇угаа, мановин̃н̃аан̣ам̣ хад̣̇аяаруубам̣ вад̇т̇ум̣ гад̇ваа уббаж̇ж̇анагаалз аж̇жхад̇д̇игам̣ б̣аахиравад̇т̇угам̣, бан̃жавин̃н̃аан̣асамбаяуд̇д̇аа д̇аяо канд̇хаа б̣аахираа аж̇жхад̇д̇игавад̇т̇угаа , мановин̃н̃аан̣асамбаяуд̇д̇аа д̇аяо канд̇хаа хад̣̇аяаруубам̣ вад̇т̇ум̣ гад̇ваа уббаж̇ж̇анагаалз б̣аахираа б̣аахиравад̇т̇угаа.
Ajjhattikavatthukāti ajjhattajjhattavasena vuttaṃ. Tāni hi ajjhattike pañca pasāde vatthuṃ katvā uppajjanti. Bāhirārammaṇāti bāhirarūpādiārammaṇā. Tattha catukkaṃ veditabbaṃ – pañcaviññāṇā hi pasādavatthukattā ajjhattikā ajjhattikavatthukā, manoviññāṇaṃ hadayarūpaṃ vatthuṃ katvā uppajjanakāle ajjhattikaṃ bāhiravatthukaṃ, pañcaviññāṇasampayuttā tayo khandhā bāhirā ajjhattikavatthukā , manoviññāṇasampayuttā tayo khandhā hadayarūpaṃ vatthuṃ katvā uppajjanakāle bāhirā bāhiravatthukā.
асамбхиннавад̇т̇угаад̇и анируд̣̇д̇хавад̇т̇угаа. на хи д̇з нируд̣̇д̇хам̣ ад̇ийд̇ам̣ вад̇т̇ум̣ бадижжа уббаж̇ж̇анд̇и. асамбхиннаарамман̣ад̇ааяаби зсзва наяо.
Asambhinnavatthukāti aniruddhavatthukā. Na hi te niruddhaṃ atītaṃ vatthuṃ paṭicca uppajjanti. Asambhinnārammaṇatāyapi eseva nayo.
ан̃н̃ам̣ жагкувин̃н̃аан̣асса вад̇т̇у жа аарамман̣ан̃жаад̇иаад̣̇ийсу жагкувин̃н̃аан̣асса хи ан̃н̃ам̣ вад̇т̇у, ан̃н̃ам̣ аарамман̣ам̣. ан̃н̃ам̣ сод̇авин̃н̃аан̣аад̣̇ийнам̣. жагкувин̃н̃аан̣ам̣ сод̇абасаад̣̇аад̣̇ийсу ан̃н̃ад̇арам̣ вад̇т̇ум̣, сад̣̇д̣̇аад̣̇ийсу ваа ан̃н̃ад̇арам̣ аарамман̣ам̣ гад̇ваа габбад̇о габбам̣ г̇анд̇вааби на уббаж̇ж̇ад̇и; жагкубасаад̣̇амзва бана вад̇т̇ум̣ гад̇ваа руубан̃жа аарамман̣ам̣ гад̇ваа уббаж̇ж̇ад̇и. звамасса вад̇т̇уби д̣̇ваарамби аарамман̣амби ниб̣ад̣̇д̇хам̣, ан̃н̃ам̣ вад̇т̇ум̣ ваа д̣̇ваарам̣ ваа аарамман̣ам̣ ваа на сан̇гамад̇и, ниб̣ад̣̇д̇хавад̇т̇у ниб̣ад̣̇д̇хад̣̇ваарам̣ ниб̣ад̣̇д̇хаарамман̣амзва худ̇ваа уббаж̇ж̇ад̇и. сод̇авин̃н̃аан̣аад̣̇ийсуби зсзва наяо.
Aññaṃ cakkhuviññāṇassa vatthu ca ārammaṇañcātiādīsu cakkhuviññāṇassa hi aññaṃ vatthu, aññaṃ ārammaṇaṃ. Aññaṃ sotaviññāṇādīnaṃ. Cakkhuviññāṇaṃ sotapasādādīsu aññataraṃ vatthuṃ, saddādīsu vā aññataraṃ ārammaṇaṃ katvā kappato kappaṃ gantvāpi na uppajjati; cakkhupasādameva pana vatthuṃ katvā rūpañca ārammaṇaṃ katvā uppajjati. Evamassa vatthupi dvārampi ārammaṇampi nibaddhaṃ, aññaṃ vatthuṃ vā dvāraṃ vā ārammaṇaṃ vā na saṅkamati, nibaddhavatthu nibaddhadvāraṃ nibaddhārammaṇameva hutvā uppajjati. Sotaviññāṇādīsupi eseva nayo.
763. на ан̃н̃аман̃н̃асса г̇ожарависаяам̣ бажжанубхонд̇ийд̇и зд̇т̇а ан̃н̃аман̃н̃асса жагку сод̇асса, сод̇ам̣ ваа жагкуссаад̇и звам̣ згам̣ згасса г̇ожарависаяам̣ на бажжанубход̇ийд̇и ад̇т̇о. сажз хи нийлаад̣̇ибхзд̣̇ам̣ руубаарамман̣ам̣ самод̇хаанзд̇ваа сод̇инд̣̇рияасса убанзяяа ‘ин̇гха д̇аава нам̣ вавад̇т̇аабзхи вибхаавзхи – гим̣ наамзд̇ам̣ аарамман̣а’нд̇и, жагкувин̃н̃аан̣ам̣ винааби мукзна ад̇д̇ано д̇хаммад̇ааяа звам̣ вад̣̇зяяа – ‘арз анд̇хаб̣аала, вассасад̇амби вассасахассамби барид̇хаавамаано ан̃н̃ад̇ра маяаа гухим̣ зд̇асса ж̇аананагам̣ лабхиссаси; аахара нам̣ жагкубасаад̣̇з убанзхи; ахамзд̇ам̣ аарамман̣ам̣ ж̇ааниссаами – яад̣̇и ваа нийлам̣ яад̣̇и ваа бийд̇агам̣. на хи зсо ан̃н̃асса висаяо; маяхамзвзсо висаяо’д̇и. сзсавин̃н̃аан̣зсуби зсзва наяо. звамзд̇з ан̃н̃аман̃н̃асса г̇ожарависаяам̣ на бажжанубхонд̇и наама.
763. Naaññamaññassa gocaravisayaṃ paccanubhontīti ettha aññamaññassa cakkhu sotassa, sotaṃ vā cakkhussāti evaṃ ekaṃ ekassa gocaravisayaṃ na paccanubhotīti attho. Sace hi nīlādibhedaṃ rūpārammaṇaṃ samodhānetvā sotindriyassa upaneyya ‘iṅgha tāva naṃ vavatthāpehi vibhāvehi – kiṃ nāmetaṃ ārammaṇa’nti, cakkhuviññāṇaṃ vināpi mukhena attano dhammatāya evaṃ vadeyya – ‘are andhabāla, vassasatampi vassasahassampi paridhāvamāno aññatra mayā kuhiṃ etassa jānanakaṃ labhissasi; āhara naṃ cakkhupasāde upanehi; ahametaṃ ārammaṇaṃ jānissāmi – yadi vā nīlaṃ yadi vā pītakaṃ. Na hi eso aññassa visayo; mayhameveso visayo’ti. Sesaviññāṇesupi eseva nayo. Evamete aññamaññassa gocaravisayaṃ na paccanubhonti nāma.
764. саманнаахаранд̇ассаад̇и ааваж̇ж̇анзнзва саманнаахаранд̇асса.
764. Samannāharantassāti āvajjaneneva samannāharantassa.
манасигаронд̇ассаад̇и ааваж̇ж̇анзнзва манасигаронд̇асса. зд̇аани хи жид̇д̇аани ааваж̇ж̇анзна саманнаахадагаалз манасигад̇агаалзязва жа уббаж̇ж̇анд̇и.
Manasikarontassāti āvajjaneneva manasikarontassa. Etāni hi cittāni āvajjanena samannāhaṭakāle manasikatakāleyeva ca uppajjanti.
на аб̣б̣огин̣н̣аад̇и ан̃н̃зна вин̃н̃аан̣зна аб̣б̣огин̣н̣аа ниранд̇араава нуббаж̇ж̇анд̇и. зд̇зна д̇зсам̣ ананд̇арад̇аа бадигкид̇д̇аа.
Na abbokiṇṇāti aññena viññāṇena abbokiṇṇā nirantarāva nuppajjanti. Etena tesaṃ anantaratā paṭikkhittā.
765. на абуб̣б̣ам̣ ажариманд̇и зд̇зна саб̣б̣зсамби сахуббад̇д̇и бадигкид̇д̇аа. на ан̃н̃аман̃н̃асса самананд̇араад̇и зд̇зна самананд̇арад̇аа бадигкид̇д̇аа.
765. Na apubbaṃ acarimanti etena sabbesampi sahuppatti paṭikkhittā. Naaññamaññassa samanantarāti etena samanantaratā paṭikkhittā.
766. аавадданаа ваад̇иаад̣̇ийни жад̇д̇аариби ааваж̇ж̇анассзва наамаани. д̇ан̃хи бхаван̇г̇асса аавадданад̇о аавадданаа, д̇ассзва аабхуж̇анад̇о аабхог̇о, руубаад̣̇ийнам̣ саманнаахаран̣ад̇о саманнаахааро, д̇зсам̣язва манасигаран̣ад̇о манасигаарод̇и вужжад̇и. звамзд̇т̇а сан̇кзбад̇о бан̃жаннам̣ вин̃н̃аан̣аанам̣ ааваж̇ж̇анадтаанз тад̇ваа ааваж̇ж̇анаад̣̇игижжам̣ гаад̇ум̣ самад̇т̇абхааво бадигкид̇д̇о.
766. Āvaṭṭanā vātiādīni cattāripi āvajjanasseva nāmāni. Tañhi bhavaṅgassa āvaṭṭanato āvaṭṭanā, tasseva ābhujanato ābhogo, rūpādīnaṃ samannāharaṇato samannāhāro, tesaṃyeva manasikaraṇato manasikāroti vuccati. Evamettha saṅkhepato pañcannaṃ viññāṇānaṃ āvajjanaṭṭhāne ṭhatvā āvajjanādikiccaṃ kātuṃ samatthabhāvo paṭikkhitto.
на ган̃жи д̇хаммам̣ бадивиж̇аанаад̇ийд̇и ‘‘манобуб̣б̣ан̇г̇амаа д̇хаммаа’’д̇и (д̇ха. ба. 1-2) звам̣ вуд̇д̇ам̣ згамби гусалам̣ ваа агусалам̣ ваа на бадивиж̇аанаад̇и.
Na kañci dhammaṃ paṭivijānātīti ‘‘manopubbaṅgamā dhammā’’ti (dha. pa. 1-2) evaṃ vuttaṃ ekampi kusalaṃ vā akusalaṃ vā na paṭivijānāti.
ан̃н̃ад̇ра абхинибаад̇амад̇д̇аад̇и табзд̇ваа руубаад̣̇ийнам̣ абхинибаад̇амад̇д̇ам̣. ид̣̇ам̣ вуд̇д̇ам̣ ход̇и – субан̣д̣ид̇оби бурисо, табзд̇ваа аабаат̇аг̇ад̇аани руубаад̣̇ийни, ан̃н̃ам̣ гусалаагусалзсу згад̇хаммамби бан̃жахи вин̃н̃аан̣зхи на бадивиж̇аанаад̇и. жагкувин̃н̃аан̣ам̣ банзд̇т̇а д̣̇ассанамад̇д̇амзва ход̇и. сод̇авин̃н̃аан̣аад̣̇ийни саванагхааяанасааяанапусанамад̇д̇аанзва. д̣̇ассанаад̣̇имад̇д̇ад̇о бана муд̇д̇аа ан̃н̃аа зд̇зсам̣ гусалаад̣̇ибадивин̃н̃ад̇д̇и наама над̇т̇и.
Aññatraabhinipātamattāti ṭhapetvā rūpādīnaṃ abhinipātamattaṃ. Idaṃ vuttaṃ hoti – supaṇḍitopi puriso, ṭhapetvā āpāthagatāni rūpādīni, aññaṃ kusalākusalesu ekadhammampi pañcahi viññāṇehi na paṭivijānāti. Cakkhuviññāṇaṃ panettha dassanamattameva hoti. Sotaviññāṇādīni savanaghāyanasāyanaphusanamattāneva. Dassanādimattato pana muttā aññā etesaṃ kusalādipaṭiviññatti nāma natthi.
манод̇хаад̇уяаабийд̇и самбадижчанаманод̇хаад̇уяааби. самбин̣д̣анад̇т̇о жзд̇т̇а бигааро. д̇асмаа манод̇хаад̇уяааби д̇ад̇о бараахи мановин̃н̃аан̣ад̇хаад̇уухибийд̇и саб̣б̣зхиби бан̃жад̣̇вааригавин̃н̃аан̣зхи на ган̃жи гусалаагусалам̣ д̇хаммам̣ бадивиж̇аанаад̇ийд̇и звамзд̇т̇а ад̇т̇о д̣̇адтаб̣б̣о.
Manodhātuyāpīti sampaṭicchanamanodhātuyāpi. Sampiṇḍanattho cettha pikāro. Tasmā manodhātuyāpi tato parāhi manoviññāṇadhātūhipīti sabbehipi pañcadvārikaviññāṇehi na kañci kusalākusalaṃ dhammaṃ paṭivijānātīti evamettha attho daṭṭhabbo.
на ган̃жи ирияаабат̇ам̣ габбзд̇ийд̇иаад̣̇ийсуби зсзва наяо. на хи бан̃жад̣̇вааригавин̃н̃аан̣зхи г̇аманаад̣̇ийсу ган̃жи ирияаабат̇ам̣ габбзд̇и, на гааяагаммам̣ на важийгаммам̣ бадтабзд̇и, на гусалаагусалам̣ д̇хаммам̣ самаад̣̇ияад̇и, на самаад̇хим̣ самаабаж̇ж̇ад̇и логияам̣ ваа логуд̇д̇арам̣ ваа, на самаад̇хид̇о вудтаад̇и логияаа ваа логуд̇д̇араа ваа, на бхавад̇о жавад̇и, на бхаванд̇арз убабаж̇ж̇ад̇и. саб̣б̣амби хзд̇ам̣ гусалаагусалад̇хаммабадивиж̇аананаад̣̇иважанабарияосаанам̣ гижжам̣ манод̣̇вааригажид̇д̇знзва ход̇и, на бан̃жад̣̇вааригзнаад̇и саб̣б̣ассаабзд̇асса гижжасса гаран̣з сахаж̇аванагаани вийт̇ижид̇д̇аани бадигкид̇д̇аани. яат̇аа жзд̇зсам̣ зд̇аани гижжаани над̇т̇и, звам̣ нияаамоггаманаад̣̇ийниби. на хи бан̃жад̣̇вааригаж̇аванзна мижчад̇д̇анияаамам̣ оггамад̇и, на саммад̇д̇анияаамам̣; на жзд̇ам̣ ж̇аванам̣ наамаг̇од̇д̇амаараб̣бха ж̇авад̇и, на гасин̣аад̣̇ибан̣н̣ад̇д̇им̣; на лагкан̣аарамман̣игавибассанаавасзна бавад̇д̇ад̇и, на вудтаанаг̇ааминийб̣алававибассанаавасзна; на руубааруубад̇хаммз аараб̣бха ж̇авад̇и, на ниб̣б̣аанам̣; на жзд̇зна сад̣̇д̇хим̣ бадисамбхид̣̇аан̃аан̣ам̣ уббаж̇ж̇ад̇и, на абхин̃н̃аан̃аан̣ам̣, на саавагабаарамийн̃аан̣ам̣, на бажжзгаб̣од̇хин̃аан̣ам̣, на саб̣б̣ан̃н̃уд̇ан̃аан̣ам̣. саб̣б̣оби банзса бабхзд̣̇о манод̣̇вааригаж̇аванзязва лаб̣бхад̇и.
Na kañci iriyāpathaṃ kappetītiādīsupi eseva nayo. Na hi pañcadvārikaviññāṇehi gamanādīsu kañci iriyāpathaṃ kappeti, na kāyakammaṃ na vacīkammaṃ paṭṭhapeti, na kusalākusalaṃ dhammaṃ samādiyati, na samādhiṃ samāpajjati lokiyaṃ vā lokuttaraṃ vā, na samādhito vuṭṭhāti lokiyā vā lokuttarā vā, na bhavato cavati, na bhavantare upapajjati. Sabbampi hetaṃ kusalākusaladhammapaṭivijānanādivacanapariyosānaṃ kiccaṃ manodvārikacitteneva hoti, na pañcadvārikenāti sabbassāpetassa kiccassa karaṇe sahajavanakāni vīthicittāni paṭikkhittāni. Yathā cetesaṃ etāni kiccāni natthi, evaṃ niyāmokkamanādīnipi. Na hi pañcadvārikajavanena micchattaniyāmaṃ okkamati, na sammattaniyāmaṃ; na cetaṃ javanaṃ nāmagottamārabbha javati, na kasiṇādipaṇṇattiṃ; na lakkhaṇārammaṇikavipassanāvasena pavattati, na vuṭṭhānagāminībalavavipassanāvasena; na rūpārūpadhamme ārabbha javati, na nibbānaṃ; na cetena saddhiṃ paṭisambhidāñāṇaṃ uppajjati, na abhiññāñāṇaṃ, na sāvakapāramīñāṇaṃ, na paccekabodhiñāṇaṃ, na sabbaññutañāṇaṃ. Sabbopi panesa pabhedo manodvārikajavaneyeva labbhati.
на субад̇и на бадиб̣уж̇жхад̇и на субинам̣ бассад̇ийд̇и саб̣б̣знааби жа бан̃жад̣̇вааригажид̇д̇зна нзва нид̣̇д̣̇ам̣ оггамад̇и, на нид̣̇д̣̇ааяад̇и, на бадиб̣уж̇жхад̇и, на гин̃жа субинам̣ бассад̇ийд̇и имзсу д̇ийсу таанзсу саха ж̇аванзна вийт̇ижид̇д̇ам̣ бадигкид̇д̇ам̣.
Na supati na paṭibujjhati na supinaṃ passatīti sabbenāpi ca pañcadvārikacittena neva niddaṃ okkamati, na niddāyati, na paṭibujjhati, na kiñca supinaṃ passatīti imesu tīsu ṭhānesu saha javanena vīthicittaṃ paṭikkhittaṃ.
нид̣̇д̣̇ааяанд̇асса хи махааваддим̣ ж̇аалзд̇ваа д̣̇ийбз жагкусамийбз убанийд̇з батамам̣ жагкуд̣̇вааригам̣ ааваж̇ж̇анам̣ бхаван̇г̇ам̣ на ааваддзд̇и, манод̣̇вааригамзва ааваддзд̇и. ат̇а ж̇аванам̣ ж̇авид̇ваа бхаван̇г̇ам̣ од̇арад̇и. д̣̇уд̇ияаваарз жагкуд̣̇вааригам̣ ааваж̇ж̇анам̣ бхаван̇г̇ам̣ ааваддзд̇и. д̇ад̇о жагкувин̃н̃аан̣аад̣̇ийни ж̇аванабарияосаанаани бавад̇д̇анд̇и. д̇ад̣̇ананд̇арам̣ бхаван̇г̇ам̣ бавад̇д̇ад̇и. д̇ад̇ияаваарз манод̣̇вааригаааваж̇ж̇анзна бхаван̇г̇з ааваддид̇з манод̣̇вааригаж̇аванам̣ ж̇авад̇и. д̇зна жид̇д̇зна н̃ад̇ваа ‘гим̣ аяам̣ имасмим̣ таанз аалого’д̇и ж̇аанаад̇и.
Niddāyantassa hi mahāvaṭṭiṃ jāletvā dīpe cakkhusamīpe upanīte paṭhamaṃ cakkhudvārikaṃ āvajjanaṃ bhavaṅgaṃ na āvaṭṭeti, manodvārikameva āvaṭṭeti. Atha javanaṃ javitvā bhavaṅgaṃ otarati. Dutiyavāre cakkhudvārikaṃ āvajjanaṃ bhavaṅgaṃ āvaṭṭeti. Tato cakkhuviññāṇādīni javanapariyosānāni pavattanti. Tadanantaraṃ bhavaṅgaṃ pavattati. Tatiyavāre manodvārikaāvajjanena bhavaṅge āvaṭṭite manodvārikajavanaṃ javati. Tena cittena ñatvā ‘kiṃ ayaṃ imasmiṃ ṭhāne āloko’ti jānāti.
д̇ат̇аа нид̣̇д̣̇ааяанд̇асса ган̣н̣асамийбз д̇ууриязсу баг̇г̇ахид̇зсу, гхаанасамийбз суг̇анд̇хзсу ваа д̣̇уг̇г̇анд̇хзсу ваа бубпзсу убанийд̇зсу, мукз саббимхи ваа паан̣ид̇з ваа багкид̇д̇з, бидтияам̣ баан̣инаа бахаарз д̣̇иннз батамам̣ сод̇ад̣̇вааригаад̣̇ийни ааваж̇ж̇анаани бхаван̇г̇ам̣ на ааваддзнд̇и, манод̣̇вааригамзва ааваддзд̇и. ат̇а ж̇аванам̣ ж̇авид̇ваа бхаван̇г̇ам̣ од̇арад̇и. д̣̇уд̇ияаваарз сод̇ад̣̇вааригаад̣̇ийни ааваж̇ж̇анаани бхаван̇г̇ам̣ ааваддзнд̇и. д̇ад̇о сод̇агхаанаж̇ивхаагааяавин̃н̃аан̣аад̣̇ийни ж̇аванабарияосаанаани бавад̇д̇анд̇и. д̇ад̣̇ананд̇арам̣ бхаван̇г̇ам̣ бавад̇д̇ад̇и. д̇ад̇ияаваарз манод̣̇вааригаааваж̇ж̇анзна бхаван̇г̇з ааваддид̇з манод̣̇вааригаж̇аванам̣ ж̇авад̇и. д̇зна жид̇д̇зна н̃ад̇ваа ‘гим̣ аяам̣ имасмим̣ таанз сад̣̇д̣̇о – сан̇касад̣̇д̣̇о, бхзрисад̣̇д̣̇о’д̇и ваа ‘гим̣ аяам̣ имасмим̣ таанз г̇анд̇хо – муулаг̇анд̇хо, саараг̇анд̇хо’д̇и ваа ‘гим̣ ид̣̇ам̣ маяхам̣ мукз багкид̇д̇арасам̣ – саббийд̇и ваа паан̣ид̇а’нд̇и ваа ‘гзнамхи бидтияам̣ бахад̇о, ад̇ит̇ад̣̇д̇хо мз бахааро’д̇и ваа вад̇д̇ааро хонд̇и. звам̣ манод̣̇вааригаж̇аванзнзва бадиб̣уж̇жхад̇и, на бан̃жад̣̇вааригзна. субинамби д̇знзва бассад̇и, на бан̃жад̣̇вааригзна.
Tathā niddāyantassa kaṇṇasamīpe tūriyesu paggahitesu, ghānasamīpe sugandhesu vā duggandhesu vā pupphesu upanītesu, mukhe sappimhi vā phāṇite vā pakkhitte, piṭṭhiyaṃ pāṇinā pahāre dinne paṭhamaṃ sotadvārikādīni āvajjanāni bhavaṅgaṃ na āvaṭṭenti, manodvārikameva āvaṭṭeti. Atha javanaṃ javitvā bhavaṅgaṃ otarati. Dutiyavāre sotadvārikādīni āvajjanāni bhavaṅgaṃ āvaṭṭenti. Tato sotaghānajivhākāyaviññāṇādīni javanapariyosānāni pavattanti. Tadanantaraṃ bhavaṅgaṃ pavattati. Tatiyavāre manodvārikaāvajjanena bhavaṅge āvaṭṭite manodvārikajavanaṃ javati. Tena cittena ñatvā ‘kiṃ ayaṃ imasmiṃ ṭhāne saddo – saṅkhasaddo, bherisaddo’ti vā ‘kiṃ ayaṃ imasmiṃ ṭhāne gandho – mūlagandho, sāragandho’ti vā ‘kiṃ idaṃ mayhaṃ mukhe pakkhittarasaṃ – sappīti vā phāṇita’nti vā ‘kenamhi piṭṭhiyaṃ pahato, atithaddho me pahāro’ti vā vattāro honti. Evaṃ manodvārikajavaneneva paṭibujjhati, na pañcadvārikena. Supinampi teneva passati, na pañcadvārikena.
д̇ан̃жа банзд̇ам̣ субинам̣ бассанд̇о жад̇уухи гааран̣зхи бассад̇и – д̇хаад̇угкобхад̇о ваа анубхууд̇абуб̣б̣ад̇о ваа д̣̇звад̇обасам̣хаарад̇о ваа буб̣б̣анимид̇д̇ад̇о ваад̇и. д̇ад̇т̇а бид̇д̇аад̣̇ийнам̣ кобхагаран̣абажжаяаяог̇зна кубхид̇ад̇хаад̇уго ‘д̇хаад̇угкобхад̇о’ субинам̣ бассад̇и. бассанд̇о жа наанаавид̇хам̣ субинам̣ бассад̇и – баб̣б̣ад̇аа бад̇анд̇о вияа, аагаасзна г̇ажчанд̇о вияа, ваал̣амиг̇ахад̇т̇ижораад̣̇ийхи ануб̣ад̣̇д̇хо вияа жа ход̇и. ‘анубхууд̇абуб̣б̣ад̇о’ бассанд̇о буб̣б̣з анубхууд̇абуб̣б̣ам̣ аарамман̣ам̣ бассад̇и. ‘д̣̇звад̇обасам̣хаарад̇о’ бассанд̇асса д̣̇звад̇аа ад̇т̇агаамад̇ааяа ваа анад̇т̇агаамад̇ааяа ваа ад̇т̇ааяа ваа анад̇т̇ааяа ваа наанаавид̇хаани аарамман̣аани убасам̣харанд̇и. со д̇аасам̣ д̣̇звад̇аанам̣ аанубхаавзна д̇аани аарамман̣аани бассад̇и. буб̣б̣анимид̇д̇ад̇о бассанд̇о бун̃н̃аабун̃н̃авасзна уббаж̇ж̇ид̇угаамасса ад̇т̇асса ваа анад̇т̇асса ваа буб̣б̣анимид̇д̇абхууд̇ам̣ субинам̣ бассад̇и б̣од̇хисад̇д̇амаад̇аа вияа буд̇д̇абадилаабханимид̇д̇ам̣, б̣од̇хисад̇д̇о вияа бан̃жа махаасубинз (а. ни. 5.196), госаларааж̇аа вияа жа сол̣аса субинзд̇и (ж̇аа. 1.1.41).
Tañca panetaṃ supinaṃ passanto catūhi kāraṇehi passati – dhātukkhobhato vā anubhūtapubbato vā devatopasaṃhārato vā pubbanimittato vāti. Tattha pittādīnaṃ khobhakaraṇapaccayayogena khubhitadhātuko ‘dhātukkhobhato’ supinaṃ passati. Passanto ca nānāvidhaṃ supinaṃ passati – pabbatā patanto viya, ākāsena gacchanto viya, vāḷamigahatthicorādīhi anubaddho viya ca hoti. ‘Anubhūtapubbato’ passanto pubbe anubhūtapubbaṃ ārammaṇaṃ passati. ‘Devatopasaṃhārato’ passantassa devatā atthakāmatāya vā anatthakāmatāya vā atthāya vā anatthāya vā nānāvidhāni ārammaṇāni upasaṃharanti. So tāsaṃ devatānaṃ ānubhāvena tāni ārammaṇāni passati. Pubbanimittato passanto puññāpuññavasena uppajjitukāmassa atthassa vā anatthassa vā pubbanimittabhūtaṃ supinaṃ passati bodhisattamātā viya puttapaṭilābhanimittaṃ, bodhisatto viya pañca mahāsupine (a. ni. 5.196), kosalarājā viya ca soḷasa supineti (jā. 1.1.41).
д̇ад̇т̇а яам̣ д̇хаад̇угкобхад̇о анубхууд̇абуб̣б̣ад̇о жа субинам̣ бассад̇и, на д̇ам̣ сажжам̣ ход̇и. яам̣ д̣̇звад̇обасам̣хаарад̇о бассад̇и, д̇ам̣ сажжам̣ ваа ход̇и алигам̣ ваа. гуд̣̇д̇хаа хи д̣̇звад̇аа убааязна винаасзд̇угаамаа вибарийд̇амби гад̇ваа д̣̇ассзнд̇и. д̇ад̇рид̣̇ам̣ вад̇т̇у – рохан̣з гира нааг̇амахаавихаарз махаат̇зро бхигкусан̇гхам̣ анабалогзд̇ваава згам̣ нааг̇аругкам̣ чинд̣̇аабзси. ругкз ад̇хивад̇т̇аа д̣̇звад̇аа т̇зрасса гуд̣̇д̇хаа батамамзва нам̣ балобхзд̇ваа бажчаа ‘ид̇о д̇з сад̇д̇ад̣̇ивасамад̇т̇агз убадтааго рааж̇аа мариссад̇ий’д̇и субинз аарожзси. т̇зро нам̣ гат̇ам̣ аахарид̇ваа рааж̇ород̇хаанам̣ аажигки. д̇аа згаббахаарзнзва махаавиравам̣ виравим̣су. рааж̇аа ‘гим̣ зд̇а’нд̇и бужчи. д̇аа ‘звам̣ т̇зрзна вуд̇д̇а’нд̇и аарожаяим̣су. рааж̇аа д̣̇ивасз г̇ан̣аабзд̇ваа сад̇д̇аахз вийд̇ивад̇д̇з гуж̇жхид̇ваа т̇зрасса хад̇т̇абаад̣̇з чинд̣̇аабзси.
Tattha yaṃ dhātukkhobhato anubhūtapubbato ca supinaṃ passati, na taṃ saccaṃ hoti. Yaṃ devatopasaṃhārato passati, taṃ saccaṃ vā hoti alikaṃ vā. Kuddhā hi devatā upāyena vināsetukāmā viparītampi katvā dassenti. Tatridaṃ vatthu – rohaṇe kira nāgamahāvihāre mahāthero bhikkhusaṅghaṃ anapaloketvāva ekaṃ nāgarukkhaṃ chindāpesi. Rukkhe adhivatthā devatā therassa kuddhā paṭhamameva naṃ palobhetvā pacchā ‘ito te sattadivasamatthake upaṭṭhāko rājā marissatī’ti supine ārocesi. Thero naṃ kathaṃ āharitvā rājorodhānaṃ ācikkhi. Tā ekappahāreneva mahāviravaṃ viraviṃsu. Rājā ‘kiṃ eta’nti pucchi. Tā ‘evaṃ therena vutta’nti ārocayiṃsu. Rājā divase gaṇāpetvā sattāhe vītivatte kujjhitvā therassa hatthapāde chindāpesi.
яам̣ бана буб̣б̣анимид̇д̇ад̇о бассад̇и д̇ам̣ зганд̇асажжамзва ход̇и. зд̇зсан̃жа жад̇уннам̣ муулагааран̣аанам̣ сам̣саг̇г̇абхзд̣̇ад̇оби субинабхзд̣̇о ход̇иязва. д̇ан̃жа банзд̇ам̣ жад̇уб̣б̣ид̇хам̣ субинам̣ сзгкабут̇уж̇ж̇анаава бассанд̇и аббахийнавибаллаасад̇д̇аа; асзгкаа на бассанд̇и бахийнавибаллаасад̇д̇аа.
Yaṃ pana pubbanimittato passati taṃ ekantasaccameva hoti. Etesañca catunnaṃ mūlakāraṇānaṃ saṃsaggabhedatopi supinabhedo hotiyeva. Tañca panetaṃ catubbidhaṃ supinaṃ sekkhaputhujjanāva passanti appahīnavipallāsattā; asekkhā na passanti pahīnavipallāsattā.
гим̣ бана д̇ам̣ бассанд̇о суд̇д̇о бассад̇и, бадиб̣уд̣̇д̇хо? уд̣̇ааху нзва суд̇д̇о бассад̇и на бадиб̣уд̣̇д̇ход̇и? гин̃жзд̇т̇а яад̣̇и д̇аава суд̇д̇о бассад̇и, абхид̇хаммавирод̇хо аабаж̇ж̇ад̇и. бхаван̇г̇ажид̇д̇зна хи субад̇и. д̇ан̃жа руубанимид̇д̇аад̣̇иаарамман̣ам̣ рааг̇аад̣̇исамбаяуд̇д̇ам̣ ваа на ход̇и. субинам̣ бассанд̇асса жа ийд̣̇исаани жид̇д̇аани уббаж̇ж̇анд̇и. ат̇а бадиб̣уд̣̇д̇хо бассад̇и, винаяавирод̇хо аабаж̇ж̇ад̇и. яан̃хи бадиб̣уд̣̇д̇хо бассад̇и, д̇ам̣ саб̣б̣охааригажид̇д̇зна бассад̇и. саб̣б̣охааригажид̇д̇зна жа гад̇з вийд̇иггамз анаабад̇д̇и наама над̇т̇и. субинам̣ бассанд̇зна бана гад̇з вийд̇иггамз зганд̇ам̣ анаабад̇д̇и зва. ат̇а нзва суд̇д̇о на бадиб̣уд̣̇д̇хо бассад̇и, на субинам̣ наама бассад̇и. зван̃хи сад̇и субинасса абхаавова аабаж̇ж̇ад̇и? на абхааво . гасмаа? яасмаа габимид̣̇д̇хабарзд̇о бассад̇и. вуд̇д̇ам̣ хзд̇ам̣ – ‘‘габимид̣̇д̇хабарзд̇о ко, махаарааж̇а, субинам̣ бассад̇ий’’д̇и (ми. ба. 5.3.5). ‘габимид̣̇д̇хабарзд̇о’д̇и маггаданид̣̇д̣̇ааяа яуд̇д̇о. яат̇аа хи маггадасса нид̣̇д̣̇аа лахубаривад̇д̇аа ход̇и, звам̣ яаа нид̣̇д̣̇аа бунаббунам̣ гусалаад̣̇ижид̇д̇авогин̣н̣ад̇д̇аа лахубаривад̇д̇аа; яассаа бавад̇д̇ияам̣ бунаббунам̣ бхаван̇г̇ад̇о уд̇д̇аран̣ам̣ ход̇и, д̇ааяа яуд̇д̇о субинам̣ бассад̇и. д̇знааяам̣ субино гусалоби ход̇и агусалоби аб̣яаагад̇оби 386. д̇ад̇т̇а субинанд̇з жзд̇ияаванд̣̇анад̇хаммассаванад̇хаммад̣̇зсанаад̣̇ийни гаронд̇асса гусало, баан̣аад̇ибаад̇аад̣̇ийни гаронд̇асса агусало, д̣̇вийхи анд̇зхи муд̇д̇о ааваж̇ж̇анад̇ад̣̇аарамман̣агкан̣з аб̣яаагад̇од̇и взд̣̇ид̇аб̣б̣о. субинзнзва ‘д̣̇идтам̣ вияа мз, суд̇ам̣ вияа мз’д̇и гат̇анагаалзби аб̣яаагад̇оязва.
Kiṃ pana taṃ passanto sutto passati, paṭibuddho? Udāhu neva sutto passati na paṭibuddhoti? Kiñcettha yadi tāva sutto passati, abhidhammavirodho āpajjati. Bhavaṅgacittena hi supati. Tañca rūpanimittādiārammaṇaṃ rāgādisampayuttaṃ vā na hoti. Supinaṃ passantassa ca īdisāni cittāni uppajjanti. Atha paṭibuddho passati, vinayavirodho āpajjati. Yañhi paṭibuddho passati, taṃ sabbohārikacittena passati. Sabbohārikacittena ca kate vītikkame anāpatti nāma natthi. Supinaṃ passantena pana kate vītikkame ekantaṃ anāpatti eva. Atha neva sutto na paṭibuddho passati, na supinaṃ nāma passati. Evañhi sati supinassa abhāvova āpajjati? Na abhāvo . Kasmā? Yasmā kapimiddhapareto passati. Vuttaṃ hetaṃ – ‘‘kapimiddhapareto kho, mahārāja, supinaṃ passatī’’ti (mi. pa. 5.3.5). ‘Kapimiddhapareto’ti makkaṭaniddāya yutto. Yathā hi makkaṭassa niddā lahuparivattā hoti, evaṃ yā niddā punappunaṃ kusalādicittavokiṇṇattā lahuparivattā; yassā pavattiyaṃ punappunaṃ bhavaṅgato uttaraṇaṃ hoti, tāya yutto supinaṃ passati. Tenāyaṃ supino kusalopi hoti akusalopi abyākatopi 386. Tattha supinante cetiyavandanadhammassavanadhammadesanādīni karontassa kusalo, pāṇātipātādīni karontassa akusalo, dvīhi antehi mutto āvajjanatadārammaṇakkhaṇe abyākatoti veditabbo. Supineneva ‘diṭṭhaṃ viya me, sutaṃ viya me’ti kathanakālepi abyākatoyeva.
гим̣ бана субинз гад̇ам̣ гусалаагусалам̣ гаммам̣ савибаагам̣ авибааганд̇и? савибаагам̣; д̣̇уб̣б̣алад̇д̇аа бана бадисанд̇хим̣ аагад̣дхид̇ум̣ на саггод̇и, д̣̇иннааяа ан̃н̃агаммзна бадисанд̇хияаа бавад̇д̇з взд̣̇анийяам̣ ход̇и.
Kiṃ pana supine kataṃ kusalākusalaṃ kammaṃ savipākaṃ avipākanti? Savipākaṃ; dubbalattā pana paṭisandhiṃ ākaḍḍhituṃ na sakkoti, dinnāya aññakammena paṭisandhiyā pavatte vedanīyaṃ hoti.
звам̣ яаат̇аавагавад̇т̇увибхааванаа бан̃н̃аад̇и бан̃жаннам̣ вин̃н̃аан̣аанам̣ на хзд̇вадто яаат̇аавадто. д̇ам̣ яаат̇аавадтам̣ вад̇т̇ум̣ вибхаавзд̇ийд̇и яаат̇аавагавад̇т̇увибхааванаа. д̇ат̇аа бан̃жаннам̣ вин̃н̃аан̣аанам̣ ахзд̇угадто, ж̇араабхибхууд̇адто, на субинам̣ бассанадто, яаат̇аавадто. д̇ам̣ яаат̇аавадтам̣ вад̇т̇ум̣ вибхаавзд̇ийд̇и яаат̇аавагавад̇т̇увибхааванаа. ид̇и яаа хздтаа ‘‘яаат̇аавагавад̇т̇увибхааванаа бан̃н̃аа’’д̇и маад̇игааяа нигкид̇д̇аа, саа звам̣ яаат̇аавагавад̇т̇увибхааванаа бан̃н̃аад̇и взд̣̇ид̇аб̣б̣аа. д̇ассаа зва жа васзна звам̣ згавид̇хзна н̃аан̣авад̇т̇ууд̇и звам̣ згзгагодтаасзна н̃аан̣аг̇ан̣анаа згзна ваа аагаарзна н̃аан̣абарижчзд̣̇о ход̇и.
Evaṃ yāthāvakavatthuvibhāvanā paññāti pañcannaṃ viññāṇānaṃ na hetvaṭṭho yāthāvaṭṭho. Taṃ yāthāvaṭṭhaṃ vatthuṃ vibhāvetīti yāthāvakavatthuvibhāvanā. Tathā pañcannaṃ viññāṇānaṃ ahetukaṭṭho, jarābhibhūtaṭṭho, na supinaṃ passanaṭṭho, yāthāvaṭṭho. Taṃ yāthāvaṭṭhaṃ vatthuṃ vibhāvetīti yāthāvakavatthuvibhāvanā. Iti yā heṭṭhā ‘‘yāthāvakavatthuvibhāvanā paññā’’ti mātikāya nikkhittā, sā evaṃ yāthāvakavatthuvibhāvanā paññāti veditabbā. Tassā eva ca vasena evaṃ ekavidhena ñāṇavatthūti evaṃ ekekakoṭṭhāsena ñāṇagaṇanā ekena vā ākārena ñāṇaparicchedo hoti.
згаганид̣̇д̣̇зсаван̣н̣анаа.
Ekakaniddesavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 16. н̃аан̣авибхан̇г̇о • 16. Ñāṇavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 16. н̃аан̣авибхан̇г̇о • 16. Ñāṇavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 16. н̃аан̣авибхан̇г̇о • 16. Ñāṇavibhaṅgo
