| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. ஏகமக்³க³கதா²வண்ணனா
5. Ekamaggakathāvaṇṇanā
810-811. இதா³னி ஏகமக்³க³கதா² நாம ஹோதி. தத்த² யேஸங் பு³த்³தே⁴ ப⁴க³வதி அயோனிஸோ பேமவஸேனேவ ‘‘ப⁴க³வா ஸோதாபன்னோ ஹுத்வா ஸகதா³கா³மீ, ஸகதா³கா³மீ ஹுத்வா அனாகா³மீ, அனாகா³மீ ஹுத்வா அரஹத்தங் ஸச்சா²காஸி, ஏகேனேவ பன அரியமக்³கே³ன சத்தாரி ப²லானி ஸச்சா²காஸீ’’தி லத்³தி⁴, ஸெய்யதா²பி தேஸஞ்ஞேவ; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் சதூஹி ப²லேஹி ஸத்³தி⁴ங் உப்பன்னானங் சதுன்னங் ப²ஸ்ஸாதீ³னங் ஏகதோ ஸமோதா⁴னவஸேன சோதே³துங் சதுன்னங் ப²ஸ்ஸானந்திஆதி³மாஹ. ஸோதாபத்திமக்³கே³னாதிஆதி³ ‘‘கதரமக்³கே³ன ஸச்சி²கரோதீ’’தி புச்ச²னத்த²ங் வுத்தங். அரஹத்தமக்³கே³னாதி ச வுத்தே தேன ஸக்காயதி³ட்டி²ஆதீ³னங் பஹானாபா⁴வவஸேன சோதே³தி. ப⁴க³வா ஸோதாபன்னோதி பு³த்³த⁴பூ⁴தஸ்ஸ ஸோதாபன்னபா⁴வோ நத்தீ²தி படிக்கி²பதி. பரதோ பஞ்ஹத்³வயேபி ஏஸேவ நயோ. ஸேஸமெத்த² யதா²பாளிமேவ நிய்யாதீதி.
810-811. Idāni ekamaggakathā nāma hoti. Tattha yesaṃ buddhe bhagavati ayoniso pemavaseneva ‘‘bhagavā sotāpanno hutvā sakadāgāmī, sakadāgāmī hutvā anāgāmī, anāgāmī hutvā arahattaṃ sacchākāsi, ekeneva pana ariyamaggena cattāri phalāni sacchākāsī’’ti laddhi, seyyathāpi tesaññeva; te sandhāya pucchā sakavādissa, paṭiññā itarassa. Atha naṃ catūhi phalehi saddhiṃ uppannānaṃ catunnaṃ phassādīnaṃ ekato samodhānavasena codetuṃ catunnaṃ phassānantiādimāha. Sotāpattimaggenātiādi ‘‘kataramaggena sacchikarotī’’ti pucchanatthaṃ vuttaṃ. Arahattamaggenāti ca vutte tena sakkāyadiṭṭhiādīnaṃ pahānābhāvavasena codeti. Bhagavā sotāpannoti buddhabhūtassa sotāpannabhāvo natthīti paṭikkhipati. Parato pañhadvayepi eseva nayo. Sesamettha yathāpāḷimeva niyyātīti.
ஏகமக்³க³கதா²வண்ணனா.
Ekamaggakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (181) 5. ஏகமக்³க³கதா² • (181) 5. Ekamaggakathā
