| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[149] 9. згабан̣н̣аж̇аад̇агаван̣н̣анаа
[149] 9. Ekapaṇṇajātakavaṇṇanā
згабан̣н̣о аяам̣ ругкод̇и ид̣̇ам̣ сад̇т̇аа взсаалим̣ убаниссааяа махааванз гуудааг̇аарасаалааяам̣ вихаранд̇о взсаалигам̣ д̣̇удталижчавигумаарам̣ аараб̣бха гат̇зси. д̇асмин̃хи гаалз взсаалинаг̇арам̣ г̇аавуд̇аг̇аавуд̇анд̇арз д̇ийхи баагаарзхи баригкид̇д̇ам̣ д̇ийсу таанзсу г̇обураддаалагаяуд̇д̇ам̣ барамасобхаг̇г̇аббад̇д̇ам̣. д̇ад̇т̇а нижжагаалам̣ раж̇ж̇ам̣ гаарзд̇ваа васанд̇аанан̃н̃зва рааж̇уунам̣ сад̇д̇а сахассаани сад̇д̇а сад̇аани сад̇д̇а жа рааж̇аано хонд̇и, д̇ад̇д̇агааязва убарааж̇аано, д̇ад̇д̇агаа сзнаабад̇ино, д̇ад̇д̇агаа бхан̣д̣ааг̇ааригаа. д̇зсам̣ рааж̇агумаараанам̣ анд̇арз зго д̣̇удталижчавигумааро наама ахоси год̇хано жан̣д̣о парусо саахасиго, д̣̇ан̣д̣зна гхаддид̇ааасийвисо вияа нижжам̣ баж̇ж̇алид̇о год̇хзна. д̇асса бурад̇о д̣̇вз д̇ийн̣и важанаани гат̇зд̇ум̣ самад̇т̇о наама над̇т̇и. д̇ам̣ нзва маад̇аабид̇аро, на н̃аад̇аяо, на мид̇д̇асухаж̇ж̇аа сигкаабзд̇ум̣ сагким̣су. ат̇асса маад̇аабид̇уунам̣ зд̇ад̣̇ахоси ‘‘аяам̣ гумааро ад̇ипарусо саахасиго, табзд̇ваа саммаасамб̣уд̣̇д̇хам̣ ан̃н̃о имам̣ винзд̇ум̣ самад̇т̇о наама над̇т̇и, б̣уд̣̇д̇хавзнзяязна бхавид̇аб̣б̣а’’нд̇и. д̇з д̇ам̣ аад̣̇ааяа сад̇т̇у санд̇игам̣ г̇анд̇ваа ванд̣̇ид̇ваа аахам̣су ‘‘бханд̇з, аяам̣ гумааро жан̣д̣о парусо год̇хзна баж̇ж̇алад̇и, имасса оваад̣̇ам̣ д̣̇зт̇аа’’д̇и.
Ekapaṇṇo ayaṃ rukkhoti idaṃ satthā vesāliṃ upanissāya mahāvane kūṭāgārasālāyaṃ viharanto vesālikaṃ duṭṭhalicchavikumāraṃ ārabbha kathesi. Tasmiñhi kāle vesālinagaraṃ gāvutagāvutantare tīhi pākārehi parikkhittaṃ tīsu ṭhānesu gopuraṭṭālakayuttaṃ paramasobhaggappattaṃ. Tattha niccakālaṃ rajjaṃ kāretvā vasantānaññeva rājūnaṃ satta sahassāni satta satāni satta ca rājāno honti, tattakāyeva uparājāno, tattakā senāpatino, tattakā bhaṇḍāgārikā. Tesaṃ rājakumārānaṃ antare eko duṭṭhalicchavikumāro nāma ahosi kodhano caṇḍo pharuso sāhasiko, daṇḍena ghaṭṭitaāsīviso viya niccaṃ pajjalito kodhena. Tassa purato dve tīṇi vacanāni kathetuṃ samattho nāma natthi. Taṃ neva mātāpitaro, na ñātayo, na mittasuhajjā sikkhāpetuṃ sakkhiṃsu. Athassa mātāpitūnaṃ etadahosi ‘‘ayaṃ kumāro atipharuso sāhasiko, ṭhapetvā sammāsambuddhaṃ añño imaṃ vinetuṃ samattho nāma natthi, buddhaveneyyena bhavitabba’’nti. Te taṃ ādāya satthu santikaṃ gantvā vanditvā āhaṃsu ‘‘bhante, ayaṃ kumāro caṇḍo pharuso kodhena pajjalati, imassa ovādaṃ dethā’’ti.
сад̇т̇аа д̇ам̣ гумаарам̣ овад̣̇и – ‘‘гумаара, имзсу наама сад̇д̇зсу жан̣д̣зна парусзна саахасигзна вихзтагаж̇аад̇игзна на бхавид̇аб̣б̣ам̣, парусаваажо жа наама виж̇аад̇амаад̇уяааби бид̇уноби буд̇д̇ад̣̇аарассаби бхаад̇ибхаг̇инийнамби баж̇аабад̇ияааби мид̇д̇аб̣анд̇хаваанамби аббияо ход̇и аманаабо, д̣ам̣сид̇ум̣ ааг̇ажчанд̇о саббо вияа, адавияам̣ удтид̇ажоро вияа, каад̣̇ид̇ум̣ ааг̇ажчанд̇о яагко вияа жа уб̣б̣зж̇анийяо худ̇ваа д̣̇уд̇ияажид̇д̇аваарз нираяаад̣̇ийсу ниб̣б̣ад̇д̇ад̇и. д̣̇идтзязва жа д̇хаммз год̇хано буг̇г̇ало ман̣д̣ид̇абасаад̇хид̇оби д̣̇уб̣б̣ан̣н̣ова ход̇и, бун̣н̣ажанд̣̇асассиригамбисса мукам̣ ж̇аалаабхихад̇абад̣̇умам̣ вияа малаг̇г̇ахид̇аган̃жанаад̣̇аасаман̣д̣алам̣ вияа жа вируубам̣ ход̇и д̣̇уд̣̇д̣̇асигам̣. год̇хам̣ ниссааяа хи сад̇д̇аа сад̇т̇ам̣ аад̣̇ааяа ад̇д̇анаава ад̇д̇аанам̣ бахаранд̇и, висам̣ каад̣̇анд̇и, раж̇ж̇уяаа уб̣б̣анд̇ханд̇и, бабаад̇аа бабад̇анд̇и. звам̣ год̇хавасзна гаалам̣ гад̇ваа нираяаад̣̇ийсу уббаж̇ж̇анд̇и, вихзтагаж̇аад̇игааби д̣̇идтзва д̇хаммз г̇арахам̣ бад̇ваа гааяасса бхзд̣̇аа нираяаад̣̇ийсу уббаж̇ж̇анд̇и, буна мануссад̇д̇ам̣ лабхид̇ваа виж̇аад̇агаалад̇о бадтааяа рог̇аб̣ахулаава хонд̇и. жагкурог̇о сод̇арог̇од̇иаад̣̇ийсу жа рог̇зсу згад̇о удтааяа згасмим̣ бад̇анд̇и, рог̇зна абаримуд̇д̇аава худ̇ваа нижжам̣ д̣̇угкид̇аава хонд̇и, д̇асмаа саб̣б̣зсу сад̇д̇зсу мзд̇д̇ажид̇д̇зна хид̇ажид̇д̇зна муд̣̇ужид̇д̇зна бхавид̇аб̣б̣ам̣. зваруубо хи буг̇г̇ало нираяаад̣̇ибхаязхи на баримужжад̇ий’’д̇и. со гумааро сад̇т̇у оваад̣̇ам̣ суд̇ваа зговаад̣̇знзва нихад̇амаано д̣̇анд̇о ниб̣б̣исзвано мзд̇д̇ажид̇д̇о муд̣̇ужид̇д̇о ахоси. ан̃н̃ам̣ аггосанд̇амби бахаранд̇амби нивад̇д̇ид̇ваа на ологзси, уд̣̇д̇хадад̣̇аато вияа саббо, ал̣ажчинно вияа гаггадаго, чиннависаан̣о вияа жа усабхо ахоси.
Satthā taṃ kumāraṃ ovadi – ‘‘kumāra, imesu nāma sattesu caṇḍena pharusena sāhasikena viheṭhakajātikena na bhavitabbaṃ, pharusavāco ca nāma vijātamātuyāpi pitunopi puttadārassapi bhātibhaginīnampi pajāpatiyāpi mittabandhavānampi appiyo hoti amanāpo, ḍaṃsituṃ āgacchanto sappo viya, aṭaviyaṃ uṭṭhitacoro viya, khādituṃ āgacchanto yakkho viya ca ubbejanīyo hutvā dutiyacittavāre nirayādīsu nibbattati. Diṭṭheyeva ca dhamme kodhano puggalo maṇḍitapasādhitopi dubbaṇṇova hoti, puṇṇacandasassirikampissa mukhaṃ jālābhihatapadumaṃ viya malaggahitakañcanādāsamaṇḍalaṃ viya ca virūpaṃ hoti duddasikaṃ. Kodhaṃ nissāya hi sattā satthaṃ ādāya attanāva attānaṃ paharanti, visaṃ khādanti, rajjuyā ubbandhanti, papātā papatanti. Evaṃ kodhavasena kālaṃ katvā nirayādīsu uppajjanti, viheṭhakajātikāpi diṭṭheva dhamme garahaṃ patvā kāyassa bhedā nirayādīsu uppajjanti, puna manussattaṃ labhitvā vijātakālato paṭṭhāya rogabahulāva honti. Cakkhurogo sotarogotiādīsu ca rogesu ekato uṭṭhāya ekasmiṃ patanti, rogena aparimuttāva hutvā niccaṃ dukkhitāva honti, tasmā sabbesu sattesu mettacittena hitacittena muducittena bhavitabbaṃ. Evarūpo hi puggalo nirayādibhayehi na parimuccatī’’ti. So kumāro satthu ovādaṃ sutvā ekovādeneva nihatamāno danto nibbisevano mettacitto muducitto ahosi. Aññaṃ akkosantampi paharantampi nivattitvā na olokesi, uddhaṭadāṭho viya sappo, aḷacchinno viya kakkaṭako, chinnavisāṇo viya ca usabho ahosi.
д̇асса д̇ам̣ бавад̇д̇им̣ н̃ад̇ваа бхигкуу д̇хаммасабхааяам̣ гат̇ам̣ самудтаабзсум̣ ‘‘аавусо, д̣̇удталижчавигумаарам̣ сужирамби овад̣̇ид̇ваа нзва маад̇аабид̇аро, на н̃аад̇имид̇д̇аад̣̇аяо д̣̇амзд̇ум̣ сагким̣су, саммаасамб̣уд̣̇д̇хо бана д̇ам̣ зговаад̣̇знзва д̣̇амзд̇ваа ниб̣б̣исзванам̣ гад̇ваа мад̇д̇аваравааран̣ам̣ вияа самуг̇г̇ахид̇аанзн̃ж̇агааран̣ам̣ агааси. яаава субхаасид̇ам̣ жид̣̇ам̣ – ‘хад̇т̇ид̣̇амагзна, бхигкавз, хад̇т̇ид̣̇аммо саарид̇о згам̣язва д̣̇исам̣ д̇хаавад̇и бурад̇т̇имам̣ ваа бажчимам̣ ваа уд̇д̇арам̣ ваа д̣̇агкин̣ам̣ ваа. ассад̣̇амагзна…бз… г̇од̣̇амагзна…бз… д̣̇агкин̣ам̣ ваа. д̇ат̇ааг̇ад̇зна хи, бхигкавз, арахад̇аа саммаасамб̣уд̣̇д̇хзна бурисад̣̇аммо саарид̇о адта д̣̇исаа вид̇хаавад̇и, руубий руубаани бассад̇и. аяамзгаа д̣̇исаа…бз… со вужжад̇и ‘яог̇г̇аажарияаанам̣ ануд̇д̇аро бурисад̣̇аммасаарат̇ий’д̇и (ма. ни. 3.312). на хи, аавусо, саммаасамб̣уд̣̇д̇хзна сад̣̇исо бурисад̣̇аммасаарат̇ий наама ад̇т̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзвзса маяаа зговаад̣̇знзва д̣̇амид̇о, буб̣б̣збаахам̣ имам̣ зговаад̣̇знзва д̣̇амзси’’нд̇и вад̇ваа ад̇ийд̇ам̣ аахари.
Tassa taṃ pavattiṃ ñatvā bhikkhū dhammasabhāyaṃ kathaṃ samuṭṭhāpesuṃ ‘‘āvuso, duṭṭhalicchavikumāraṃ sucirampi ovaditvā neva mātāpitaro, na ñātimittādayo dametuṃ sakkhiṃsu, sammāsambuddho pana taṃ ekovādeneva dametvā nibbisevanaṃ katvā mattavaravāraṇaṃ viya samuggahitāneñjakāraṇaṃ akāsi. Yāva subhāsitaṃ cidaṃ – ‘hatthidamakena, bhikkhave, hatthidammo sārito ekaṃyeva disaṃ dhāvati puratthimaṃ vā pacchimaṃ vā uttaraṃ vā dakkhiṇaṃ vā. Assadamakena…pe… godamakena…pe… dakkhiṇaṃ vā. Tathāgatena hi, bhikkhave, arahatā sammāsambuddhena purisadammo sārito aṭṭha disā vidhāvati, rūpī rūpāni passati. Ayamekā disā…pe… so vuccati ‘yoggācariyānaṃ anuttaro purisadammasārathī’ti (ma. ni. 3.312). Na hi, āvuso, sammāsambuddhena sadiso purisadammasārathī nāma atthī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idānevesa mayā ekovādeneva damito, pubbepāhaṃ imaṃ ekovādeneva damesi’’nti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о уд̣̇ижжаб̣раахман̣агулз ниб̣б̣ад̇д̇ид̇ваа ваяаббад̇д̇о д̇аггасилааяам̣ д̇аяо взд̣̇з саб̣б̣асиббаани жа уг̇г̇ахзд̇ваа гин̃жи гаалам̣ гхарааваасам̣ васид̇ваа маад̇аабид̇уунам̣ ажжаязна исибаб̣б̣аж̇ж̇ам̣ баб̣б̣аж̇ид̇ваа абхин̃н̃аа жа самаабад̇д̇ияо жа ниб̣б̣ад̇д̇зд̇ваа химаванд̇з ваасам̣ габбзси. д̇ад̇т̇а жирам̣ васид̇ваа лон̣амб̣иласзванад̇т̇ааяа ж̇анабад̣̇ам̣ г̇анд̇ваа б̣аараан̣асим̣ бад̇ваа рааж̇уяяаанз васид̇ваа бунад̣̇ивасз сунивад̇т̇о субааруд̇о д̇аабасаагаббасамбанно бхигкааяа наг̇арам̣ бависид̇ваа рааж̇ан̇г̇ан̣ам̣ баабун̣и. рааж̇аа сийхабан̃ж̇арзна ологзнд̇о д̇ам̣ д̣̇исваа ирияаабат̇з басийд̣̇ид̇ваа ‘‘аяам̣ д̇аабасо санд̇инд̣̇рияо санд̇амаанасо яуг̇амад̇д̇ад̣̇асо, бад̣̇аваарз бад̣̇аваарз сахассад̇т̇авигам̣ табзнд̇о вияа сийхавиж̇амбхид̇зна ааг̇ажчад̇и. сажз санд̇ад̇хаммо наамзго ад̇т̇и, имасса д̇знаб̣бханд̇арз бхавид̇аб̣б̣а’’нд̇и жинд̇зд̇ваа згам̣ амажжам̣ ологзси. со ‘‘гим̣ гароми, д̣̇зваа’’д̇и ааха. зд̇ам̣ ‘‘д̇аабасам̣ аанзхий’’д̇и. со ‘‘саад̇ху, д̣̇зваа’’д̇и б̣од̇хисад̇д̇ам̣ убасан̇гамид̇ваа ванд̣̇ид̇ваа хад̇т̇ад̇о бхигкаабхааж̇анам̣ г̇ахзд̇ваа ‘‘гим̣, махаабун̃н̃аа’’д̇и вуд̇д̇з ‘‘бханд̇з, рааж̇аа д̇ам̣ баггосад̇ий’’д̇и ааха. б̣од̇хисад̇д̇о ‘‘на маяам̣ рааж̇агулуубагаа, хзмаванд̇игаа наамамхаа’’д̇и ааха. амажжо г̇анд̇ваа д̇амад̇т̇ам̣ ран̃н̃о аарожзси. рааж̇аа ‘‘ан̃н̃о амхаагам̣ гулуубаго над̇т̇и, аанзхи на’’нд̇и ааха. амажжо г̇анд̇ваа б̣од̇хисад̇д̇ам̣ ванд̣̇ид̇ваа яаажид̇ваа рааж̇анивзсанам̣ бавзсзси.
Atīte bārāṇasiyaṃ brahmadatte rajjaṃ kārente bodhisatto udiccabrāhmaṇakule nibbattitvā vayappatto takkasilāyaṃ tayo vede sabbasippāni ca uggahetvā kiñci kālaṃ gharāvāsaṃ vasitvā mātāpitūnaṃ accayena isipabbajjaṃ pabbajitvā abhiññā ca samāpattiyo ca nibbattetvā himavante vāsaṃ kappesi. Tattha ciraṃ vasitvā loṇambilasevanatthāya janapadaṃ gantvā bārāṇasiṃ patvā rājuyyāne vasitvā punadivase sunivattho supāruto tāpasākappasampanno bhikkhāya nagaraṃ pavisitvā rājaṅgaṇaṃ pāpuṇi. Rājā sīhapañjarena olokento taṃ disvā iriyāpathe pasīditvā ‘‘ayaṃ tāpaso santindriyo santamānaso yugamattadaso, padavāre padavāre sahassatthavikaṃ ṭhapento viya sīhavijambhitena āgacchati. Sace santadhammo nāmeko atthi, imassa tenabbhantare bhavitabba’’nti cintetvā ekaṃ amaccaṃ olokesi. So ‘‘kiṃ karomi, devā’’ti āha. Etaṃ ‘‘tāpasaṃ ānehī’’ti. So ‘‘sādhu, devā’’ti bodhisattaṃ upasaṅkamitvā vanditvā hatthato bhikkhābhājanaṃ gahetvā ‘‘kiṃ, mahāpuññā’’ti vutte ‘‘bhante, rājā taṃ pakkosatī’’ti āha. Bodhisatto ‘‘na mayaṃ rājakulūpakā, hemavantikā nāmamhā’’ti āha. Amacco gantvā tamatthaṃ rañño ārocesi. Rājā ‘‘añño amhākaṃ kulūpako natthi, ānehi na’’nti āha. Amacco gantvā bodhisattaṃ vanditvā yācitvā rājanivesanaṃ pavesesi.
рааж̇аа б̣од̇хисад̇д̇ам̣ ванд̣̇ид̇ваа самуссид̇асзд̇ажчад̇д̇з ган̃жанабаллан̇гз нисийд̣̇аабзд̇ваа ад̇д̇ано бадияад̇д̇ам̣ наанаг̇г̇арасабхож̇анам̣ бхож̇зд̇ваа ‘‘гахам̣, бханд̇з, васат̇аа’’д̇и бужчи. ‘‘хзмаванд̇игаа маяам̣, махаарааж̇аа’’д̇и. ‘‘ид̣̇аани гахам̣ г̇ажчат̇аа’’д̇и? ‘‘вассаарад̇д̇аануруубам̣ сзнаасанам̣ убад̇хаарзма, махаарааж̇аа’’д̇и. ‘‘д̇зна хи, бханд̇з, амхааган̃н̃зва уяяаанз васат̇аа’’д̇и бадин̃н̃ам̣ г̇ахзд̇ваа саяамби бхун̃ж̇ид̇ваа б̣од̇хисад̇д̇ам̣ аад̣̇ааяа уяяаанам̣ г̇анд̇ваа бан̣н̣асаалам̣ маабзд̇ваа рад̇д̇идтаанад̣̇иваадтаанааби гаарзд̇ваа баб̣б̣аж̇ид̇абаригкаарз д̣̇ад̇ваа уяяаанабаалам̣ бадижчаабзд̇ваа наг̇арам̣ баависи. д̇ад̇о бадтааяа б̣од̇хисад̇д̇о уяяаанз васад̇и. рааж̇аабисса д̣̇ивасз д̣̇ивасз д̣̇вад̇д̇игкад̇д̇ум̣ убадтаанам̣ г̇ажчад̇и.
Rājā bodhisattaṃ vanditvā samussitasetacchatte kañcanapallaṅke nisīdāpetvā attano paṭiyattaṃ nānaggarasabhojanaṃ bhojetvā ‘‘kahaṃ, bhante, vasathā’’ti pucchi. ‘‘Hemavantikā mayaṃ, mahārājā’’ti. ‘‘Idāni kahaṃ gacchathā’’ti? ‘‘Vassārattānurūpaṃ senāsanaṃ upadhārema, mahārājā’’ti. ‘‘Tena hi, bhante, amhākaññeva uyyāne vasathā’’ti paṭiññaṃ gahetvā sayampi bhuñjitvā bodhisattaṃ ādāya uyyānaṃ gantvā paṇṇasālaṃ māpetvā rattiṭṭhānadivāṭṭhānāpi kāretvā pabbajitaparikkhāre datvā uyyānapālaṃ paṭicchāpetvā nagaraṃ pāvisi. Tato paṭṭhāya bodhisatto uyyāne vasati. Rājāpissa divase divase dvattikkhattuṃ upaṭṭhānaṃ gacchati.
д̇асса бана ран̃н̃о д̣̇удтагумааро наама буд̇д̇о ахоси жан̣д̣о парусо, нзва нам̣ рааж̇аа д̣̇амзд̇ум̣ асагки, на сзсан̃аад̇агаа. амажжааби б̣раахман̣аг̇ахабад̇игааби згад̇о худ̇ваа ‘‘саами, маа звам̣ гари, звам̣ гаад̇ум̣ на лаб̣бхаа’’д̇и гуж̇жхид̇ваа гат̇знд̇ааби гат̇ам̣ г̇аахаабзд̇ум̣ наасагким̣су. рааж̇аа жинд̇зси ‘‘табзд̇ваа мама аяяам̣ химаванд̇ад̇аабасам̣ ан̃н̃о имам̣ гумаарам̣ д̣̇амзд̇ум̣ самад̇т̇о наама над̇т̇и, соязва нам̣ д̣̇амзссад̇ий’’д̇и. со гумаарам̣ аад̣̇ааяа б̣од̇хисад̇д̇асса санд̇игам̣ г̇анд̇ваа ‘‘бханд̇з, аяам̣ гумааро жан̣д̣о парусо , маяам̣ имам̣ д̣̇амзд̇ум̣ на саггома, д̇умхз нам̣ згзна убааязна сигкаабзт̇аа’’д̇и гумаарам̣ б̣од̇хисад̇д̇асса нияяаад̣̇зд̇ваа баггаами. б̣од̇хисад̇д̇о гумаарам̣ г̇ахзд̇ваа уяяаанз вижаранд̇о згад̇о згзна, згад̇о згзнаад̇и д̣̇вийхиязва бад̇д̇зхи згам̣ нимб̣абод̇агам̣ д̣̇исваа гумаарам̣ ааха – ‘‘гумаара, зд̇асса д̇аава ругкабод̇агасса бан̣н̣ам̣ каад̣̇ид̇ваа расам̣ ж̇аанаахий’’д̇и? со д̇асса згам̣ бад̇д̇ам̣ каад̣̇ид̇ваа расам̣ н̃ад̇ваа ‘‘д̇хий’’д̇и саха кзл̣зна бхуумияам̣ нудтаабхи. ‘‘гим̣ зд̇ам̣, гумаараа’’д̇и вуд̇д̇з ‘‘бханд̇з, ид̣̇аанзвзса ругко халаахалависуубамо, вад̣дханд̇о бана б̣ахуу мануссз маарзссад̇ий’’д̇и д̇ам̣ нимб̣абод̇агам̣ уббаадзд̇ваа хад̇т̇зхи баримад̣̇д̣̇ид̇ваа имам̣ г̇аат̇амааха –
Tassa pana rañño duṭṭhakumāro nāma putto ahosi caṇḍo pharuso, neva naṃ rājā dametuṃ asakkhi, na sesañātakā. Amaccāpi brāhmaṇagahapatikāpi ekato hutvā ‘‘sāmi, mā evaṃ kari, evaṃ kātuṃ na labbhā’’ti kujjhitvā kathentāpi kathaṃ gāhāpetuṃ nāsakkhiṃsu. Rājā cintesi ‘‘ṭhapetvā mama ayyaṃ himavantatāpasaṃ añño imaṃ kumāraṃ dametuṃ samattho nāma natthi, soyeva naṃ damessatī’’ti. So kumāraṃ ādāya bodhisattassa santikaṃ gantvā ‘‘bhante, ayaṃ kumāro caṇḍo pharuso , mayaṃ imaṃ dametuṃ na sakkoma, tumhe naṃ ekena upāyena sikkhāpethā’’ti kumāraṃ bodhisattassa niyyādetvā pakkāmi. Bodhisatto kumāraṃ gahetvā uyyāne vicaranto ekato ekena, ekato ekenāti dvīhiyeva pattehi ekaṃ nimbapotakaṃ disvā kumāraṃ āha – ‘‘kumāra, etassa tāva rukkhapotakassa paṇṇaṃ khāditvā rasaṃ jānāhī’’ti? So tassa ekaṃ pattaṃ khāditvā rasaṃ ñatvā ‘‘dhī’’ti saha kheḷena bhūmiyaṃ nuṭṭhābhi. ‘‘Kiṃ etaṃ, kumārā’’ti vutte ‘‘bhante, idānevesa rukkho halāhalavisūpamo, vaḍḍhanto pana bahū manusse māressatī’’ti taṃ nimbapotakaṃ uppāṭetvā hatthehi parimadditvā imaṃ gāthamāha –
149.
149.
‘‘згабан̣н̣о аяам̣ ругко, на бхуумяаа жад̇уран̇г̇уло;
‘‘Ekapaṇṇo ayaṃ rukkho, na bhūmyā caturaṅgulo;
палзна висагаббзна, махааяам̣ гим̣ бхависсад̇ий’’д̇и.
Phalena visakappena, mahāyaṃ kiṃ bhavissatī’’ti.
д̇ад̇т̇а згабан̣н̣од̇и убхосу бассзсу згзгабан̣н̣о. на бхуумяаа жад̇уран̇г̇улод̇и бхуумид̇о жад̇уран̇г̇уламад̇д̇амби на вад̣дхид̇о. палзнаад̇и паларасзна. висагаббзнаад̇и халаахалависасад̣̇исзна. звам̣ куд̣̇д̣̇агоби самаано зваруубзна д̇ид̇д̇агзна бан̣н̣зна саманнааг̇ад̇од̇и ад̇т̇о. махааяам̣ гим̣ бхависсад̇ийд̇и яад̣̇аа банааяам̣ вуд̣̇д̇хиббад̇д̇о махаа бхависсад̇и, д̇ад̣̇аа гим̣ наама бхависсад̇и, ад̣̇д̇хаа мануссамаараго бхависсад̇ийд̇и зд̇ам̣ уббаадзд̇ваа мад̣̇д̣̇ид̇ваа чад̣д̣зсинд̇и ааха.
Tattha ekapaṇṇoti ubhosu passesu ekekapaṇṇo. Na bhūmyā caturaṅguloti bhūmito caturaṅgulamattampi na vaḍḍhito. Phalenāti phalarasena. Visakappenāti halāhalavisasadisena. Evaṃ khuddakopi samāno evarūpena tittakena paṇṇena samannāgatoti attho. Mahāyaṃ kiṃ bhavissatīti yadā panāyaṃ vuddhippatto mahā bhavissati, tadā kiṃ nāma bhavissati, addhā manussamārako bhavissatīti etaṃ uppāṭetvā madditvā chaḍḍesinti āha.
ат̇а нам̣ б̣од̇хисад̇д̇о зд̇ад̣̇авожа ‘‘гумаара, д̇вам̣ имам̣ нимб̣абод̇агам̣ ‘ид̣̇аанзва звам̣д̇ид̇д̇аго, махаллагагаалз гим̣ бхависсад̇и, гуд̇о имам̣ ниссааяа вуд̣дхий’д̇и уббаадзд̇ваа мад̣̇д̣̇ид̇ваа чад̣д̣зси? яат̇аа д̇вам̣ зд̇асмим̣ бадибаж̇ж̇и, звамзва д̇ава радтаваасиноби ‘аяам̣ гумааро д̣̇ахарагаалзязва звам̣ жан̣д̣о парусо, махаллагагаалз раж̇ж̇ам̣ бад̇ваа гим̣ наама гариссад̇и, гуд̇о амхаагам̣ зд̇ам̣ ниссааяа вуд̣дхий’д̇и д̇ава гуласанд̇агам̣ раж̇ж̇ам̣ ад̣̇ад̇ваа нимб̣абод̇агам̣ вияа д̇ам̣ уббаадзд̇ваа радтаа баб̣б̣ааж̇анийяагаммам̣ гариссанд̇и, д̇асмаа нимб̣аругкабадибхааг̇ад̇ам̣ хид̇ваа ид̇о бадтааяа канд̇имзд̇д̇аануд̣̇д̣̇аяасамбанно хохий’’д̇и. со д̇ад̇о бадтааяа нихад̇амаано ниб̣б̣исзвано канд̇имзд̇д̇аануд̣̇д̣̇аяасамбанно худ̇ваа б̣од̇хисад̇д̇асса оваад̣̇з тад̇ваа бид̇у ажжаязна раж̇ж̇ам̣ бад̇ваа д̣̇аанаад̣̇ийни бун̃н̃аани гад̇ваа яат̇аагаммам̣ аг̇амааси.
Atha naṃ bodhisatto etadavoca ‘‘kumāra, tvaṃ imaṃ nimbapotakaṃ ‘idāneva evaṃtittako, mahallakakāle kiṃ bhavissati, kuto imaṃ nissāya vuḍḍhī’ti uppāṭetvā madditvā chaḍḍesi? Yathā tvaṃ etasmiṃ paṭipajji, evameva tava raṭṭhavāsinopi ‘ayaṃ kumāro daharakāleyeva evaṃ caṇḍo pharuso, mahallakakāle rajjaṃ patvā kiṃ nāma karissati, kuto amhākaṃ etaṃ nissāya vuḍḍhī’ti tava kulasantakaṃ rajjaṃ adatvā nimbapotakaṃ viya taṃ uppāṭetvā raṭṭhā pabbājanīyakammaṃ karissanti, tasmā nimbarukkhapaṭibhāgataṃ hitvā ito paṭṭhāya khantimettānuddayasampanno hohī’’ti. So tato paṭṭhāya nihatamāno nibbisevano khantimettānuddayasampanno hutvā bodhisattassa ovāde ṭhatvā pitu accayena rajjaṃ patvā dānādīni puññāni katvā yathākammaṃ agamāsi.
сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзвзса д̣̇удталижчавигумааро маяаа д̣̇амид̇о, буб̣б̣збаахам̣ зд̇ам̣ д̣̇амзсим̣язваа’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа д̣̇удтагумааро аяам̣ лижчавигумааро ахоси, рааж̇аа аананд̣̇о, оваад̣̇ад̣̇ааяагад̇аабасо бана ахамзва ахоси’’нд̇и.
Satthā imaṃ dhammadesanaṃ āharitvā ‘‘na, bhikkhave, idānevesa duṭṭhalicchavikumāro mayā damito, pubbepāhaṃ etaṃ damesiṃyevā’’ti vatvā jātakaṃ samodhānesi – ‘‘tadā duṭṭhakumāro ayaṃ licchavikumāro ahosi, rājā ānando, ovādadāyakatāpaso pana ahameva ahosi’’nti.
згабан̣н̣аж̇аад̇агаван̣н̣анаа навамаа.
Ekapaṇṇajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 149. згабан̣н̣аж̇аад̇агам̣ • 149. Ekapaṇṇajātakaṃ
