| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४. एकासनियत्थेरअपदानं
4. Ekāsaniyattheraapadānaṃ
३१.
31.
‘‘वरुणो नाम नामेन, देवराजा अहं तदा।
‘‘Varuṇo nāma nāmena, devarājā ahaṃ tadā;
उपट्ठहेसिं सम्बुद्धं, सयोग्गबलवाहनो॥
Upaṭṭhahesiṃ sambuddhaṃ, sayoggabalavāhano.
३२.
32.
‘‘निब्बुते लोकनाथम्हि, अत्थदस्सीनरुत्तमे।
‘‘Nibbute lokanāthamhi, atthadassīnaruttame;
तूरियं सब्बमादाय, अगमं बोधिमुत्तमं॥
Tūriyaṃ sabbamādāya, agamaṃ bodhimuttamaṃ.
३३.
33.
‘‘वादितेन च नच्चेन, सम्मताळसमाहितो।
‘‘Vāditena ca naccena, sammatāḷasamāhito;
सम्मुखा विय सम्बुद्धं, उपट्ठिं बोधिमुत्तमं॥
Sammukhā viya sambuddhaṃ, upaṭṭhiṃ bodhimuttamaṃ.
३४.
34.
‘‘उपट्ठहित्वा तं बोधिं, धरणीरुहपादपं।
‘‘Upaṭṭhahitvā taṃ bodhiṃ, dharaṇīruhapādapaṃ;
पल्लङ्कं आभुजित्वान, तत्थ कालङ्कतो अहं॥
Pallaṅkaṃ ābhujitvāna, tattha kālaṅkato ahaṃ.
३५.
35.
‘‘सककम्माभिरद्धोहं, पसन्नो बोधिमुत्तमे।
‘‘Sakakammābhiraddhohaṃ, pasanno bodhimuttame;
तेन चित्तप्पसादेन, निम्मानं उपपज्जहं॥
Tena cittappasādena, nimmānaṃ upapajjahaṃ.
३६.
36.
‘‘सट्ठितूरियसहस्सानि, परिवारेन्ति मं सदा।
‘‘Saṭṭhitūriyasahassāni, parivārenti maṃ sadā;
मनुस्सेसु च देवेसु, वत्तमानं भवाभवे॥
Manussesu ca devesu, vattamānaṃ bhavābhave.
३७.
37.
‘‘तिविधग्गी निब्बुता मय्हं, भवा सब्बे समूहता।
‘‘Tividhaggī nibbutā mayhaṃ, bhavā sabbe samūhatā;
३८.
38.
‘‘सुबाहू नाम नामेन, चतुत्तिंसासु खत्तिया।
‘‘Subāhū nāma nāmena, catuttiṃsāsu khattiyā;
सत्तरतनसम्पन्ना, पञ्चकप्पसते इतो॥
Sattaratanasampannā, pañcakappasate ito.
३९.
39.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा एकासनियो थेरो इमा गाथायो अभासित्थाति।
Itthaṃ sudaṃ āyasmā ekāsaniyo thero imā gāthāyo abhāsitthāti.
एकासनियत्थेरस्सापदानं चतुत्थं।
Ekāsaniyattherassāpadānaṃ catutthaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ४. एकासनियत्थेरअपदानवण्णना • 4. Ekāsaniyattheraapadānavaṇṇanā
