| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. ஏகாஸனியத்தே²ரஅபதா³னவண்ணனா
4. Ekāsaniyattheraapadānavaṇṇanā
வருணோ நாம நாமேனாதிஆதி³கங் ஆயஸ்மதோ ஏகாஸனியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே வருணோ நாம தே³வராஜா ஹுத்வா நிப்³ப³த்தி. ஸோ ப⁴க³வந்தங் தி³ஸ்வா பஸன்னமானஸோ க³ந்த⁴மாலாதீ³ஹி கீ³தவாதி³தேஹி ச உபட்ட²யமானோ ஸபரிவாரோ பூஜேஸி. ததோ அபரபா⁴கே³ ப⁴க³வதி பரினிப்³பு³தே தஸ்ஸ மஹாபோ³தி⁴ருக்க²ங் பு³த்³த⁴த³ஸ்ஸனங் விய ஸப்³ப³தூரியதாளாவசரேஹி ஸபரிவாரோ உபஹாரமகாஸி. ஸோ தேன புஞ்ஞேன ததோ காலங்கத்வா நிம்மானரதிதே³வலோகே உப்பஜ்ஜி. ஏவங் தே³வஸம்பத்திமனுப⁴வித்வா மனுஸ்ஸேஸு ச மனுஸ்ஸபூ⁴தோ சக்கவத்திஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்வா ஸத்து² ஸாஸனே பப்³ப³ஜித்வா நசிரஸ்ஸேவ அரஹா அஹோஸி.
Varuṇonāma nāmenātiādikaṃ āyasmato ekāsaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle varuṇo nāma devarājā hutvā nibbatti. So bhagavantaṃ disvā pasannamānaso gandhamālādīhi gītavāditehi ca upaṭṭhayamāno saparivāro pūjesi. Tato aparabhāge bhagavati parinibbute tassa mahābodhirukkhaṃ buddhadassanaṃ viya sabbatūriyatāḷāvacarehi saparivāro upahāramakāsi. So tena puññena tato kālaṅkatvā nimmānaratidevaloke uppajji. Evaṃ devasampattimanubhavitvā manussesu ca manussabhūto cakkavattisampattiṃ anubhavitvā imasmiṃ buddhuppāde kulagehe nibbatto viññutaṃ patvā satthu sāsane pabbajitvā nacirasseva arahā ahosi.
31. ஸோ பச்சா² ஸககம்மங் ஸரித்வா தங் தத²தோ ஞத்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ வருணோ நாம நாமேனாதிஆதி³மாஹ. தத்த² யதா³ அஹங் ஸம்போ³த⁴னத்தா²ய பு³த்³த⁴ங் போ³தி⁴ஞ்ச பூஜேஸிங், ததா³ வருணோ நாம தே³வராஜா அஹோஸிந்தி ஸம்ப³ந்தோ⁴.
31. So pacchā sakakammaṃ saritvā taṃ tathato ñatvā somanassajāto pubbacaritāpadānaṃ pakāsento varuṇo nāma nāmenātiādimāha. Tattha yadā ahaṃ sambodhanatthāya buddhaṃ bodhiñca pūjesiṃ, tadā varuṇo nāma devarājā ahosinti sambandho.
34. த⁴ரணீருஹபாத³பந்தி எத்த² ருக்க²லதாபப்³ப³தஸத்த²ரதனாத³யோ தா⁴ரேதீதி த⁴ரணீ, தஸ்மிங் ருஹதி பதிட்ட²ஹதீதி த⁴ரணீருஹோ. பாதே³ன பிவதீதி பாத³போ, ஸிஞ்சிதஸிஞ்சிதோத³கங் பாதே³ன மூலேன பிவதி ருக்க²க்க²ந்த⁴ஸாகா²விடபேஹி ஆபோரஸங் பத்த²ரியதீதி அத்தோ², தங் த⁴ரணீருஹபாத³பங் போ³தி⁴ருக்க²ந்தி ஸம்ப³ந்தோ⁴.
34.Dharaṇīruhapādapanti ettha rukkhalatāpabbatasattharatanādayo dhāretīti dharaṇī, tasmiṃ ruhati patiṭṭhahatīti dharaṇīruho. Pādena pivatīti pādapo, siñcitasiñcitodakaṃ pādena mūlena pivati rukkhakkhandhasākhāviṭapehi āporasaṃ patthariyatīti attho, taṃ dharaṇīruhapādapaṃ bodhirukkhanti sambandho.
35. ஸககம்மாபி⁴ரத்³தோ⁴தி அத்தனோ குஸலகம்மேன அபி⁴ரத்³தோ⁴ பஸன்னோ உத்தமே போ³தி⁴ம்ஹி பஸன்னோதி ஸம்ப³ந்தோ⁴. ஸேஸங் ஸப்³ப³த்த² உத்தானமேவாதி.
35.Sakakammābhiraddhoti attano kusalakammena abhiraddho pasanno uttame bodhimhi pasannoti sambandho. Sesaṃ sabbattha uttānamevāti.
ஏகாஸனியத்தே²ரஅபதா³னவண்ணனா ஸமத்தா.
Ekāsaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. ஏகாஸனியத்தே²ரஅபதா³னங் • 4. Ekāsaniyattheraapadānaṃ
