| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२. एकत्थम्भिकत्थेरअपदानं
2. Ekatthambhikattheraapadānaṃ
१३.
13.
‘‘सिद्धत्थस्स भगवतो, महापूगगणो अहु।
‘‘Siddhatthassa bhagavato, mahāpūgagaṇo ahu;
सरणं गता च ते बुद्धं, सद्दहन्ति तथागतं॥
Saraṇaṃ gatā ca te buddhaṃ, saddahanti tathāgataṃ.
१४.
14.
‘‘सब्बे सङ्गम्म मन्तेत्वा, माळं कुब्बन्ति सत्थुनो।
‘‘Sabbe saṅgamma mantetvā, māḷaṃ kubbanti satthuno;
एकत्थम्भं अलभन्ता, विचिनन्ति ब्रहावने॥
Ekatthambhaṃ alabhantā, vicinanti brahāvane.
१५.
15.
‘‘तेहं अरञ्ञे दिस्वान, उपगम्म गणं तदा।
‘‘Tehaṃ araññe disvāna, upagamma gaṇaṃ tadā;
अञ्जलिं पग्गहेत्वान, परिपुच्छिं गणं अहं॥
Añjaliṃ paggahetvāna, paripucchiṃ gaṇaṃ ahaṃ.
१६.
16.
‘‘ते मे पुट्ठा वियाकंसु, सीलवन्तो उपासका।
‘‘Te me puṭṭhā viyākaṃsu, sīlavanto upāsakā;
माळं मयं कत्तुकामा, एकत्थम्भो न लब्भति॥
Māḷaṃ mayaṃ kattukāmā, ekatthambho na labbhati.
१७.
17.
‘‘एकत्थम्भं ममं देथ, अहं दस्सामि सत्थुनो।
‘‘Ekatthambhaṃ mamaṃ detha, ahaṃ dassāmi satthuno;
१८.
18.
‘‘ते मे थम्भं पवेच्छिंसु, पसन्ना तुट्ठमानसा।
‘‘Te me thambhaṃ pavecchiṃsu, pasannā tuṭṭhamānasā;
ततो पटिनिवत्तित्वा, अगमंसु सकं घरं॥
Tato paṭinivattitvā, agamaṃsu sakaṃ gharaṃ.
१९.
19.
‘‘अचिरं गते पूगगणे, थम्भं अहासहं तदा।
‘‘Aciraṃ gate pūgagaṇe, thambhaṃ ahāsahaṃ tadā;
हट्ठो हट्ठेन चित्तेन, पठमं उस्सपेसहं॥
Haṭṭho haṭṭhena cittena, paṭhamaṃ ussapesahaṃ.
२०.
20.
‘‘तेन चित्तप्पसादेन, विमानं उपपज्जहं।
‘‘Tena cittappasādena, vimānaṃ upapajjahaṃ;
२१.
21.
‘‘वज्जमानासु भेरीसु, परिचारेमहं सदा।
‘‘Vajjamānāsu bherīsu, paricāremahaṃ sadā;
पञ्चपञ्ञासकप्पम्हि, राजा आसिं यसोधरो॥
Pañcapaññāsakappamhi, rājā āsiṃ yasodharo.
२२.
22.
‘‘तत्थापि भवनं मय्हं, सत्तभूमं समुग्गतं।
‘‘Tatthāpi bhavanaṃ mayhaṃ, sattabhūmaṃ samuggataṃ;
कूटागारवरूपेतं, एकत्थम्भं मनोरमं॥
Kūṭāgāravarūpetaṃ, ekatthambhaṃ manoramaṃ.
२३.
23.
‘‘एकवीसतिकप्पम्हि, उदेनो नाम खत्तियो।
‘‘Ekavīsatikappamhi, udeno nāma khattiyo;
तत्रापि भवनं मय्हं, सत्तभूमं समुग्गतं॥
Tatrāpi bhavanaṃ mayhaṃ, sattabhūmaṃ samuggataṃ.
२४.
24.
‘‘यं यं योनुपपज्जामि, देवत्तं अथ मानुसं।
‘‘Yaṃ yaṃ yonupapajjāmi, devattaṃ atha mānusaṃ;
२५.
25.
‘‘चतुन्नवुतितो कप्पे, यं थम्भमददं तदा।
‘‘Catunnavutito kappe, yaṃ thambhamadadaṃ tadā;
दुग्गतिं नाभिजानामि, एकत्थम्भस्सिदं फलं॥
Duggatiṃ nābhijānāmi, ekatthambhassidaṃ phalaṃ.
२६.
26.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा एकत्थम्भिको थेरो इमा गाथायो अभासित्थाति।
Itthaṃ sudaṃ āyasmā ekatthambhiko thero imā gāthāyo abhāsitthāti.
एकत्थम्भिकत्थेरस्सापदानं दुतियं।
Ekatthambhikattherassāpadānaṃ dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / २. एकत्थम्भिकत्थेरअपदानवण्णना • 2. Ekatthambhikattheraapadānavaṇṇanā
