| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४४. एकविहारिवग्गो
44. Ekavihārivaggo
१. एकविहारिकत्थेरअपदानं
1. Ekavihārikattheraapadānaṃ
१.
1.
‘‘इमम्हि भद्दके कप्पे, ब्रह्मबन्धु महायसो।
‘‘Imamhi bhaddake kappe, brahmabandhu mahāyaso;
कस्सपो नाम गोत्तेन, उप्पज्जि वदतं वरो॥
Kassapo nāma gottena, uppajji vadataṃ varo.
२.
2.
‘‘निप्पपञ्चो निरालम्बो, आकाससममानसो।
‘‘Nippapañco nirālambo, ākāsasamamānaso;
सुञ्ञताबहुलो तादी, अनिमित्तरतो वसी॥
Suññatābahulo tādī, animittarato vasī.
३.
3.
महाकारुणिको वीरो, विनयोपायकोविदो॥
Mahākāruṇiko vīro, vinayopāyakovido.
४.
4.
‘‘उय्युत्तो परकिच्चेसु, विनयन्तो सदेवके।
‘‘Uyyutto parakiccesu, vinayanto sadevake;
निब्बानगमनं मग्गं, गतिं पङ्कविसोसनं॥
Nibbānagamanaṃ maggaṃ, gatiṃ paṅkavisosanaṃ.
५.
5.
‘‘अमतं परमस्सादं, जरामच्चुनिवारणं।
‘‘Amataṃ paramassādaṃ, jarāmaccunivāraṇaṃ;
महापरिसमज्झे सो, निसिन्नो लोकतारको॥
Mahāparisamajjhe so, nisinno lokatārako.
६.
6.
उद्धरन्तो महादुग्गा, विप्पनट्ठे अनायके॥
Uddharanto mahāduggā, vippanaṭṭhe anāyake.
७.
7.
‘‘देसेन्तो विरजं धम्मं, दिट्ठो मे लोकनायको।
‘‘Desento virajaṃ dhammaṃ, diṭṭho me lokanāyako;
तस्स धम्मं सुणित्वान, पब्बजिं अनगारियं॥
Tassa dhammaṃ suṇitvāna, pabbajiṃ anagāriyaṃ.
८.
8.
‘‘पब्बजित्वा तदापाहं, चिन्तेन्तो जिनसासनं।
‘‘Pabbajitvā tadāpāhaṃ, cintento jinasāsanaṃ;
एककोव वने रम्मे, वसिं संसग्गपीळितो॥
Ekakova vane ramme, vasiṃ saṃsaggapīḷito.
९.
9.
मनसो वूपकासस्स, संसग्गभयदस्सिनो॥
Manaso vūpakāsassa, saṃsaggabhayadassino.
१०.
10.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
११.
11.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
१२.
12.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा एकविहारिको थेरो इमा गाथायो
Itthaṃ sudaṃ āyasmā ekavihāriko thero imā gāthāyo
अभासित्थाति।
Abhāsitthāti.
एकविहारिकत्थेरस्सापदानं पठमं।
Ekavihārikattherassāpadānaṃ paṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
