| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
2. க³ணபோ⁴ஜனஸிக்கா²பத³வண்ணனா
2. Gaṇabhojanasikkhāpadavaṇṇanā
209-218. கு³ள்ஹபடிச்ச²ன்னோதி அபாகடோவ. ஏகோ புத்தேனாதி ஏகஸ்ஸேகங் ப⁴த்தங் ‘‘அஹங் அஞ்ஞேன நிமந்திதோ’’தி ந வுச்சதி. ‘‘ஸசே ஏகதோ க³ண்ஹந்தி , க³ணபோ⁴ஜனங் ஹோதீ’’தி (பாசி॰ அட்ட²॰ 217-218) வுத்தத்தா சத்தாரோ உபாஸகா சத்தாரோ பி⁴க்கூ² விஸுங் விஸுங் நிமந்தெத்வா ஹத்த²பாஸே டி²தானங் சே தெ³ந்தி, க³ணபோ⁴ஜனங் ஹோதி ஏவாதி ஏகே, தங் ந யுத்தங் விய. ‘‘விஞ்ஞத்திதோ பஸவனே க³ணஸ்ஸ ஏகதோ க³ஹணே இமினா ஸிக்கா²பதே³ன ஆபத்தி, விஸுங் க³ஹணே பணீதபோ⁴ஜனஸூபோத³னவிஞ்ஞத்தீஹீ’’தி லிகி²தங். ‘‘விஞ்ஞத்திதோ பஸவனங் அட்டு²ப்பத்திவஸேன அட்ட²கதா²யங் அனுஞ்ஞாதங். ஸூபோத³னாதி³வஸேன தத்த² ஆபத்தி ஏவா’’தி வுத்தங், தங் ந யுத்தங். கஸ்மா? பரிவாரே (பரி॰ 168) ஏவ த்³வின்னங் ஆகாரானங் ஆக³தத்தா, தஸ்மா அட்ட²கதா²யங் ‘‘அனுஞ்ஞாத’’ந்தி து³வுத்தங். அட்டு²ப்பத்தியங்யேவ பாகடந்தி ‘‘பத³பா⁴ஜனே ந வுத்த’’ந்தி வத்தப்³ப³ங். ஏகதோ க³ண்ஹந்தீதி க³ஹிதப⁴த்தாபி அஞ்ஞே யாவ க³ண்ஹந்தி, தாவ சே திட்ட²ந்தி, ஏகதோ க³ண்ஹந்தியேவ நாம. ‘‘க³ச்ச²தி சே, அனாபத்தீ’’தி வத³ந்தி.
209-218.Guḷhapaṭicchannoti apākaṭova. Eko puttenāti ekassekaṃ bhattaṃ ‘‘ahaṃ aññena nimantito’’ti na vuccati. ‘‘Sace ekato gaṇhanti, gaṇabhojanaṃ hotī’’ti (pāci. aṭṭha. 217-218) vuttattā cattāro upāsakā cattāro bhikkhū visuṃ visuṃ nimantetvā hatthapāse ṭhitānaṃ ce denti, gaṇabhojanaṃ hoti evāti eke, taṃ na yuttaṃ viya. ‘‘Viññattito pasavane gaṇassa ekato gahaṇe iminā sikkhāpadena āpatti, visuṃ gahaṇe paṇītabhojanasūpodanaviññattīhī’’ti likhitaṃ. ‘‘Viññattito pasavanaṃ aṭṭhuppattivasena aṭṭhakathāyaṃ anuññātaṃ. Sūpodanādivasena tattha āpatti evā’’ti vuttaṃ, taṃ na yuttaṃ. Kasmā? Parivāre (pari. 168) eva dvinnaṃ ākārānaṃ āgatattā, tasmā aṭṭhakathāyaṃ ‘‘anuññāta’’nti duvuttaṃ. Aṭṭhuppattiyaṃyeva pākaṭanti ‘‘padabhājane na vutta’’nti vattabbaṃ. Ekato gaṇhantīti gahitabhattāpi aññe yāva gaṇhanti, tāva ce tiṭṭhanti, ekato gaṇhantiyeva nāma. ‘‘Gacchati ce, anāpattī’’ti vadanti.
எத்தா²ஹ – ‘‘படிக்³க³ஹணமேவ ஹெத்த² பமாண’’ந்தி வுத்தங், அத² கஸ்மா பாளியங் ‘‘க³ணபோ⁴ஜனங் நாம யத்த² சத்தாரோ…பே॰… பு⁴ஞ்ஜந்தி, ஏதங் க³ணபோ⁴ஜனங் நாமா’’தி (பாசி॰ 218) வுத்தந்தி? வுச்சதி – யத்தா²தி உபயோக³த்தே² பு⁴ம்மவசனங். சத்தாரோதி க³ணஸ்ஸ ஹெட்டி²மபரிச்சே²த³னித³ஸ்ஸனங். பஞ்சன்னங் போ⁴ஜனானந்தி ஆபத்திப்பஹோனகபோ⁴ஜனநித³ஸ்ஸனங். அஞ்ஞதரேன போ⁴ஜனேன நிமந்திதாதி அகப்பியனிமந்தனநித³ஸ்ஸனங். நிமந்தனவஸேனேவ பன க³ணபோ⁴ஜனஸ்ஸ வுத்தத்தா ‘‘நிமந்திதா பு⁴ஞ்ஜந்தீதி வுத்த’’ந்தி வுத்தங். ‘‘அஞ்ஞதரங் போ⁴ஜனங் விஞ்ஞாபெத்வா பு⁴ஞ்ஜந்தீ’’தி பன ந வுத்தங் அட்டு²ப்பத்தியங்யேவ பாகடத்தா. யங் பு⁴ஞ்ஜந்தீதி ஏவங் ஸம்ப³ந்தோ⁴ வேதி³தப்³போ³. தத்த² பு⁴ஞ்ஜந்தீதி படிக்³கா³ஹகனியமவசனங். ந ஹி அப்படிக்³க³ஹிதகங் பி⁴க்கூ² பு⁴ஞ்ஜந்தி. இத³ங் வுத்தங் ஹோதி ‘‘க³ணஸ்ஸ யதோ படிக்³க³ஹிதாஹாரபோ⁴ஜனஹேது பாசித்திய’’ந்தி. ஆக³ந்துகபட்டங் மோக⁴ஸுத்தேன ஸிப்³பி³த்வா ட²பெந்தி, தத்த² அனுவாதே யதா² ஏகதலங் ஹோதி, ததா² ஹத்தே²ஹி க⁴ட்டேதி. வலேதீதி ஆவட்டேதி. பரிவத்தனந்தி ஸுத்தங் க³ண்ஹந்தானங் ஸுக²க்³க³ஹணத்த²ங் ஸுத்தபரிவத்தனங் கரோதி, பட்டங் ஸிப்³ப³ந்தானங் ஸுக²ஸிப்³ப³னத்த²ங் பட்டபரிவத்தனஞ்ச. நவசீவரகாரகோ இதா⁴தி⁴ப்பேதோ, ந இதரோதி. ‘‘பி³ம்பி³ஸாரங் ஆபுச்சி²த்வா ஸம்பா⁴ரே கயிரமானேயேவ காலா அதிக்கந்தா, பச்சா² க³ணபோ⁴ஜனஸிக்கா²பதே³ பஞ்ஞத்தே ப⁴க³வந்தங் உபஸங்கமித்வா புச்சீ²’’தி வத³ந்தி, அஞ்ஞதா² அட்ட²கதா²ய விருஜ்ஜ²னதோ.
Etthāha – ‘‘paṭiggahaṇameva hettha pamāṇa’’nti vuttaṃ, atha kasmā pāḷiyaṃ ‘‘gaṇabhojanaṃ nāma yattha cattāro…pe… bhuñjanti, etaṃ gaṇabhojanaṃ nāmā’’ti (pāci. 218) vuttanti? Vuccati – yatthāti upayogatthe bhummavacanaṃ. Cattāroti gaṇassa heṭṭhimaparicchedanidassanaṃ. Pañcannaṃ bhojanānanti āpattippahonakabhojananidassanaṃ. Aññatarena bhojanena nimantitāti akappiyanimantananidassanaṃ. Nimantanavaseneva pana gaṇabhojanassa vuttattā ‘‘nimantitā bhuñjantīti vutta’’nti vuttaṃ. ‘‘Aññataraṃ bhojanaṃ viññāpetvā bhuñjantī’’ti pana na vuttaṃ aṭṭhuppattiyaṃyeva pākaṭattā. Yaṃ bhuñjantīti evaṃ sambandho veditabbo. Tattha bhuñjantīti paṭiggāhakaniyamavacanaṃ. Na hi appaṭiggahitakaṃ bhikkhū bhuñjanti. Idaṃ vuttaṃ hoti ‘‘gaṇassa yato paṭiggahitāhārabhojanahetu pācittiya’’nti. Āgantukapaṭṭaṃ moghasuttena sibbitvā ṭhapenti, tattha anuvāte yathā ekatalaṃ hoti, tathā hatthehi ghaṭṭeti. Valetīti āvaṭṭeti. Parivattananti suttaṃ gaṇhantānaṃ sukhaggahaṇatthaṃ suttaparivattanaṃ karoti, paṭṭaṃ sibbantānaṃ sukhasibbanatthaṃ paṭṭaparivattanañca. Navacīvarakārako idhādhippeto, na itaroti. ‘‘Bimbisāraṃ āpucchitvā sambhāre kayiramāneyeva kālā atikkantā, pacchā gaṇabhojanasikkhāpade paññatte bhagavantaṃ upasaṅkamitvā pucchī’’ti vadanti, aññathā aṭṭhakathāya virujjhanato.
220. ‘‘த்³வே தயோ ஏகதோதி யேபி அகப்பியனிமந்தனங் ஸாதி³யித்வா’’திஆதி³வசனேன அகப்பியனிமந்தனபச்சயா ஏவ அனாபத்தி, விஞ்ஞத்திதோ ஆபத்தியேவாதி தீ³பேதி. அனிமந்திதோ சதுத்தோ² யஸ்ஸ ததே³தங் அனிமந்திதசதுத்த²ங். ஏஸ நயோ ஸப்³ப³த்த². பவேஸெத்வாதி நிஸீதா³பெத்வா. சீவரதா³னஸமயலத்³த⁴கசதுக்கங் சீவரகாரஸமயலத்³த⁴கசதுக்கந்தி ஏவமாதீ³னி. தானி சாதி யேஹி போ⁴ஜனேஹி விஸங்கேதோ நத்தி², தானி. மஹாதே²ரேதி உபஸம்பன்னே. அட்ட²த்வாதி டி²தேன நிமித்தங் த³ஸ்ஸிதங் ஹோதி. தத்த² தத்த² க³ந்த்வாதி ரதி²காதீ³ஸு பி⁴க்கு²ஸமீபே க³ந்த்வா. இமஸ்மிங் பன ஸிக்கா²பதே³ கத்த²சி பொத்த²கே ‘‘அனுஜானாமி, பி⁴க்க²வே, சீவரதா³னஸமயே க³ணபோ⁴ஜனங் பு⁴ஞ்ஜிதுங். ஏவஞ்சித³ங் ப⁴க³வதா பி⁴க்கூ²ன’’ந்தி பாடோ² தி³ஸ்ஸதி. கத்த²சி ‘‘பு⁴ஞ்ஜிது’’ந்தி வத்வா ‘‘ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாதா²’’தி பாடோ², அயங் ஸோப⁴னோ.
220. ‘‘Dve tayo ekatoti yepi akappiyanimantanaṃ sādiyitvā’’tiādivacanena akappiyanimantanapaccayā eva anāpatti, viññattito āpattiyevāti dīpeti. Animantito catuttho yassa tadetaṃ animantitacatutthaṃ. Esa nayo sabbattha. Pavesetvāti nisīdāpetvā. Cīvaradānasamayaladdhakacatukkaṃ cīvarakārasamayaladdhakacatukkanti evamādīni. Tāni cāti yehi bhojanehi visaṅketo natthi, tāni. Mahāthereti upasampanne. Aṭṭhatvāti ṭhitena nimittaṃ dassitaṃ hoti. Tattha tattha gantvāti rathikādīsu bhikkhusamīpe gantvā. Imasmiṃ pana sikkhāpade katthaci potthake ‘‘anujānāmi, bhikkhave, cīvaradānasamaye gaṇabhojanaṃ bhuñjituṃ. Evañcidaṃ bhagavatā bhikkhūna’’nti pāṭho dissati. Katthaci ‘‘bhuñjitu’’nti vatvā ‘‘evañca pana, bhikkhave, imaṃ sikkhāpadaṃ uddiseyyāthā’’ti pāṭho, ayaṃ sobhano.
க³ணபோ⁴ஜனஸிக்கா²பத³வண்ணனா நிட்டி²தா.
Gaṇabhojanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. க³ணபோ⁴ஜனஸிக்கா²பத³வண்ணனா • 2. Gaṇabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. க³ணபோ⁴ஜனஸிக்கா²பத³ங் • 2. Gaṇabhojanasikkhāpadaṃ
