| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
3. ஆனாபானஸ்ஸதிகதா²
3. Ānāpānassatikathā
1. க³ணனவார
1. Gaṇanavāra
152. ஸோளஸவத்து²கங் ஆனாபானஸ்ஸதிஸமாதி⁴ங் 1 பா⁴வயதோ ஸமாதி⁴கானி த்³வே ஞாணஸதானி உப்பஜ்ஜந்தி – அட்ட² பரிபந்தே² 2 ஞாணானி, அட்ட² ச உபகாரே ஞாணானி, அட்டா²ரஸ உபக்கிலேஸே ஞாணானி, தேரஸ வோதா³னே ஞாணானி, பா³த்திங்ஸ ஸதோகாரிஸ்ஸ 3 ஞாணானி, சதுவீஸதி ஸமாதி⁴வஸேன ஞாணானி, த்³வேஸத்ததி விபஸ்ஸனாவஸேன ஞாணானி, அட்ட² நிப்³பி³தா³ஞாணானி, அட்ட² நிப்³பி³தா³னுலோமஞாணானி, அட்ட² நிப்³பி³தா³படிப்பஸ்ஸத்³தி⁴ஞாணானி, ஏகவீஸதி விமுத்திஸுகே² ஞாணானி.
152. Soḷasavatthukaṃ ānāpānassatisamādhiṃ 4 bhāvayato samādhikāni dve ñāṇasatāni uppajjanti – aṭṭha paripanthe 5 ñāṇāni, aṭṭha ca upakāre ñāṇāni, aṭṭhārasa upakkilese ñāṇāni, terasa vodāne ñāṇāni, bāttiṃsa satokārissa 6 ñāṇāni, catuvīsati samādhivasena ñāṇāni, dvesattati vipassanāvasena ñāṇāni, aṭṭha nibbidāñāṇāni, aṭṭha nibbidānulomañāṇāni, aṭṭha nibbidāpaṭippassaddhiñāṇāni, ekavīsati vimuttisukhe ñāṇāni.
கதமானி அட்ட² பரிபந்தே² ஞாணானி, அட்ட² ச உபகாரே ஞாணானி? காமச்ச²ந்தோ³ ஸமாதி⁴ஸ்ஸ பரிபந்தோ², நெக்க²ம்மங் ஸமாதி⁴ஸ்ஸ உபகாரங். ப்³யாபாதோ³ ஸமாதி⁴ஸ்ஸ பரிபந்தோ², அப்³யாபாதோ³ ஸமாதி⁴ஸ்ஸ உபகாரங். தி²னமித்³த⁴ங் ஸமாதி⁴ஸ்ஸ பரிபந்தோ², ஆலோகஸஞ்ஞா ஸமாதி⁴ஸ்ஸ உபகாரங். உத்³த⁴ச்சங் ஸமாதி⁴ஸ்ஸ பரிபந்தோ², அவிக்கே²போ ஸமாதி⁴ஸ்ஸ உபகாரங். விசிகிச்சா² ஸமாதி⁴ஸ்ஸ பரிபந்தோ², த⁴ம்மவவத்தா²னங் ஸமாதி⁴ஸ்ஸ உபகாரங். அவிஜ்ஜா ஸமாதி⁴ஸ்ஸ பரிபந்தோ², ஞாணங் ஸமாதி⁴ஸ்ஸ உபகாரங். அரதி ஸமாதி⁴ஸ்ஸ பரிபந்தோ², பாமோஜ்ஜங் ஸமாதி⁴ஸ்ஸ உபகாரங். ஸப்³பே³பி அகுஸலா த⁴ம்மா ஸமாதி⁴ஸ்ஸ பரிபந்தா², ஸப்³பே³பி குஸலா த⁴ம்மா ஸமாதி⁴ஸ்ஸ உபகாரா. இமானி அட்ட² பரிபந்தே² ஞாணானி, அட்ட² ச உபகாரே ஞாணானி.
Katamāni aṭṭha paripanthe ñāṇāni, aṭṭha ca upakāre ñāṇāni? Kāmacchando samādhissa paripantho, nekkhammaṃ samādhissa upakāraṃ. Byāpādo samādhissa paripantho, abyāpādo samādhissa upakāraṃ. Thinamiddhaṃ samādhissa paripantho, ālokasaññā samādhissa upakāraṃ. Uddhaccaṃ samādhissa paripantho, avikkhepo samādhissa upakāraṃ. Vicikicchā samādhissa paripantho, dhammavavatthānaṃ samādhissa upakāraṃ. Avijjā samādhissa paripantho, ñāṇaṃ samādhissa upakāraṃ. Arati samādhissa paripantho, pāmojjaṃ samādhissa upakāraṃ. Sabbepi akusalā dhammā samādhissa paripanthā, sabbepi kusalā dhammā samādhissa upakārā. Imāni aṭṭha paripanthe ñāṇāni, aṭṭha ca upakāre ñāṇāni.
க³ணனவாரோ பட²மோ.
Gaṇanavāro paṭhamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 1. க³ணனவாரவண்ணனா • 1. Gaṇanavāravaṇṇanā
