A World of Knowledge
    Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

    ೫೨೦. ಗನ್ಧತಿನ್ದುಕಜಾತಕಂ (೧೦)

    520. Gandhatindukajātakaṃ (10)

    ೩೩೨.

    332.

    ಅಪ್ಪಮಾದೋ ಅಮತಂ ಪದಂ 1, ಪಮಾದೋ ಮಚ್ಚುನೋ ಪದಂ।

    Appamādo amataṃ padaṃ 2, pamādo maccuno padaṃ;

    ಅಪ್ಪಮತ್ತಾ ನ ಮೀಯನ್ತಿ, ಯೇ ಪಮತ್ತಾ ಯಥಾ ಮತಾ॥

    Appamattā na mīyanti, ye pamattā yathā matā.

    ೩೩೩.

    333.

    ಮದಾ ಪಮಾದೋ ಜಾಯೇಥ, ಪಮಾದಾ ಜಾಯತೇ ಖಯೋ।

    Madā pamādo jāyetha, pamādā jāyate khayo;

    ಖಯಾ ಪದೋಸಾ 3 ಜಾಯನ್ತಿ, ಮಾ ಪಮಾದೋ 4 ಭರತೂಸಭ 5

    Khayā padosā 6 jāyanti, mā pamādo 7 bharatūsabha 8.

    ೩೩೪.

    334.

    ಬಹೂ ಹಿ ಖತ್ತಿಯಾ ಜೀನಾ, ಅತ್ಥಂ ರಟ್ಠಂ ಪಮಾದಿನೋ।

    Bahū hi khattiyā jīnā, atthaṃ raṭṭhaṃ pamādino;

    ಅಥೋಪಿ ಗಾಮಿನೋ ಗಾಮಾ, ಅನಗಾರಾ ಅಗಾರಿನೋ॥

    Athopi gāmino gāmā, anagārā agārino.

    ೩೩೫.

    335.

    ಖತ್ತಿಯಸ್ಸ ಪಮತ್ತಸ್ಸ, ರಟ್ಠಸ್ಮಿಂ ರಟ್ಠವಡ್ಢನ।

    Khattiyassa pamattassa, raṭṭhasmiṃ raṭṭhavaḍḍhana;

    ಸಬ್ಬೇ ಭೋಗಾ ವಿನಸ್ಸನ್ತಿ, ರಞ್ಞೋ ತಂ ವುಚ್ಚತೇ ಅಘಂ॥

    Sabbe bhogā vinassanti, rañño taṃ vuccate aghaṃ.

    ೩೩೬.

    336.

    ನೇಸ ಧಮ್ಮೋ ಮಹಾರಾಜ, ಅತಿವೇಲಂ ಪಮಜ್ಜಸಿ।

    Nesa dhammo mahārāja, ativelaṃ pamajjasi;

    ಇದ್ಧಂ ಫೀತಂ ಜನಪದಂ, ಚೋರಾ ವಿದ್ಧಂಸಯನ್ತಿ ನಂ॥

    Iddhaṃ phītaṃ janapadaṃ, corā viddhaṃsayanti naṃ.

    ೩೩೭.

    337.

    ನ ತೇ ಪುತ್ತಾ ಭವಿಸ್ಸನ್ತಿ, ನ ಹಿರಞ್ಞಂ ನ ಧಾನಿಯಂ 9

    Na te puttā bhavissanti, na hiraññaṃ na dhāniyaṃ 10;

    ರಟ್ಠೇ ವಿಲುಪ್ಪಮಾನಮ್ಹಿ, ಸಬ್ಬಭೋಗೇಹಿ ಜಿಯ್ಯಸಿ॥

    Raṭṭhe viluppamānamhi, sabbabhogehi jiyyasi.

    ೩೩೮.

    338.

    ಸಬ್ಬಭೋಗಾ ಪರಿಜಿಣ್ಣಂ, ರಾಜಾನಂ ವಾಪಿ ಖತ್ತಿಯಂ 11

    Sabbabhogā parijiṇṇaṃ, rājānaṃ vāpi khattiyaṃ 12;

    ಞಾತಿಮಿತ್ತಾ ಸುಹಜ್ಜಾ ಚ, ನ ತಂ ಮಞ್ಞನ್ತಿ ಮಾನಿಯಂ 13

    Ñātimittā suhajjā ca, na taṃ maññanti māniyaṃ 14.

    ೩೩೯.

    339.

    ಹತ್ಥಾರೋಹಾ ಅನೀಕಟ್ಠಾ, ರಥಿಕಾ ಪತ್ತಿಕಾರಕಾ।

    Hatthārohā anīkaṭṭhā, rathikā pattikārakā;

    ತಮೇವಮುಪಜೀವನ್ತಾ, ನ ತಂ ಮಞ್ಞನ್ತಿ ಮಾನಿಯಂ॥

    Tamevamupajīvantā, na taṃ maññanti māniyaṃ.

    ೩೪೦.

    340.

    ಅಸಂವಿಹಿತಕಮ್ಮನ್ತಂ, ಬಾಲಂ ದುಮ್ಮನ್ತಿಮನ್ತಿನಂ।

    Asaṃvihitakammantaṃ, bālaṃ dummantimantinaṃ;

    ಸಿರೀ ಜಹತಿ ದುಮ್ಮೇಧಂ, ಜಿಣ್ಣಂವ ಉರಗೋ ತಚಂ॥

    Sirī jahati dummedhaṃ, jiṇṇaṃva urago tacaṃ.

    ೩೪೧.

    341.

    ಸುಸಂವಿಹಿತಕಮ್ಮನ್ತಂ , ಕಾಲುಟ್ಠಾಯಿಂ ಅತನ್ದಿತಂ।

    Susaṃvihitakammantaṃ , kāluṭṭhāyiṃ atanditaṃ;

    ಸಬ್ಬೇ ಭೋಗಾಭಿವಡ್ಢನ್ತಿ, ಗಾವೋ ಸಉಸಭಾಮಿವ॥

    Sabbe bhogābhivaḍḍhanti, gāvo sausabhāmiva.

    ೩೪೨.

    342.

    ಉಪಸ್ಸುತಿಂ ಮಹಾರಾಜ, ರಟ್ಠೇ ಜನಪದೇ ಚರ।

    Upassutiṃ mahārāja, raṭṭhe janapade cara;

    ತತ್ಥ ದಿಸ್ವಾ ಚ ಸುತ್ವಾ ಚ, ತತೋ ತಂ 15 ಪಟಿಪಜ್ಜಸಿ॥

    Tattha disvā ca sutvā ca, tato taṃ 16 paṭipajjasi.

    ೩೪೩.

    343.

    ಏವಂ ವೇದೇತು ಪಞ್ಚಾಲೋ, ಸಙ್ಗಾಮೇ ಸರಮಪ್ಪಿತೋ 17

    Evaṃ vedetu pañcālo, saṅgāme saramappito 18;

    ಯಥಾಹಮಜ್ಜ ವೇದೇಮಿ, ಕಣ್ಟಕೇನ ಸಮಪ್ಪಿತೋ॥

    Yathāhamajja vedemi, kaṇṭakena samappito.

    ೩೪೪.

    344.

    ಜಿಣ್ಣೋ ದುಬ್ಬಲಚಕ್ಖೂಸಿ, ನ ರೂಪಂ ಸಾಧು ಪಸ್ಸಸಿ।

    Jiṇṇo dubbalacakkhūsi, na rūpaṃ sādhu passasi;

    ಕಿಂ ತತ್ಥ ಬ್ರಹ್ಮದತ್ತಸ್ಸ, ಯಂ ತಂ ಮಗ್ಗೇಯ್ಯ 19 ಕಣ್ಟಕೋ 20

    Kiṃ tattha brahmadattassa, yaṃ taṃ maggeyya 21 kaṇṭako 22.

    ೩೪೫.

    345.

    ಬಹ್ವೇತ್ಥ ಬ್ರಹ್ಮದತ್ತಸ್ಸ, ಸೋಹಂ 23 ಮಗ್ಗಸ್ಮಿ 24 ಬ್ರಾಹ್ಮಣ।

    Bahvettha brahmadattassa, sohaṃ 25 maggasmi 26 brāhmaṇa;

    ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ॥

    Arakkhitā jānapadā, adhammabalinā hatā.

    ೩೪೬.

    346.

    ರತ್ತಿಞ್ಹಿ 27 ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ।

    Rattiñhi 28 corā khādanti, divā khādanti tuṇḍiyā;

    ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ॥

    Raṭṭhasmiṃ kūṭarājassa, bahu adhammiko jano.

    ೩೪೭.

    347.

    ಏತಾದಿಸೇ ಭಯೇ ಜಾತೇ 29, ಭಯಟ್ಟಾ ತಾತ 30 ಮಾಣವಾ।

    Etādise bhaye jāte 31, bhayaṭṭā tāta 32 māṇavā;

    ನಿಲ್ಲೇನಕಾನಿ ಕುಬ್ಬನ್ತಿ, ವನೇ ಆಹತ್ವ ಕಣ್ಟಕಂ॥

    Nillenakāni kubbanti, vane āhatva kaṇṭakaṃ.

    ೩೪೮.

    348.

    ಕದಾಸ್ಸು ನಾಮಯಂ ರಾಜಾ, ಬ್ರಹ್ಮದತ್ತೋ ಮರಿಸ್ಸತಿ।

    Kadāssu nāmayaṃ rājā, brahmadatto marissati;

    ಯಸ್ಸ ರಟ್ಠಮ್ಹಿ ಜಿಯ್ಯನ್ತಿ, ಅಪ್ಪತಿಕಾ ಕುಮಾರಿಕಾ॥

    Yassa raṭṭhamhi jiyyanti, appatikā kumārikā.

    ೩೪೯.

    349.

    ದುಬ್ಭಾಸಿತಞ್ಹಿ ತೇ ಜಮ್ಮಿ, ಅನತ್ಥಪದಕೋವಿದೇ।

    Dubbhāsitañhi te jammi, anatthapadakovide;

    ಕುಹಿಂ ರಾಜಾ ಕುಮಾರೀನಂ, ಭತ್ತಾರಂ ಪರಿಯೇಸತಿ॥

    Kuhiṃ rājā kumārīnaṃ, bhattāraṃ pariyesati.

    ೩೫೦.

    350.

    ನ ಮೇ ದುಬ್ಭಾಸಿತಂ ಬ್ರಹ್ಮೇ, ಕೋವಿದತ್ಥಪದಾ ಅಹಂ।

    Na me dubbhāsitaṃ brahme, kovidatthapadā ahaṃ;

    ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ॥

    Arakkhitā jānapadā, adhammabalinā hatā.

    ೩೫೧.

    351.

    ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ।

    Rattiñhi corā khādanti, divā khādanti tuṇḍiyā;

    ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ।

    Raṭṭhasmiṃ kūṭarājassa, bahu adhammiko jano;

    ದುಜ್ಜೀವೇ ದುಬ್ಭರೇ ದಾರೇ, ಕುತೋ ಭತ್ತಾ ಕುಮಾರಿಯೋ॥

    Dujjīve dubbhare dāre, kuto bhattā kumāriyo.

    ೩೫೨.

    352.

    ಏವಂ ಸಯತು ಪಞ್ಚಾಲೋ, ಸಙ್ಗಾಮೇ ಸತ್ತಿಯಾ ಹತೋ।

    Evaṃ sayatu pañcālo, saṅgāme sattiyā hato;

    ಯಥಾಯಂ ಕಪಣೋ ಸೇತಿ, ಹತೋ ಫಾಲೇನ ಸಾಲಿಯೋ॥

    Yathāyaṃ kapaṇo seti, hato phālena sāliyo.

    ೩೫೩.

    353.

    ಅಧಮ್ಮೇನ ತುವಂ ಜಮ್ಮ, ಬ್ರಹ್ಮದತ್ತಸ್ಸ ಕುಜ್ಝಸಿ।

    Adhammena tuvaṃ jamma, brahmadattassa kujjhasi;

    ಯೋ ತ್ವಂ ಸಪಸಿ ರಾಜಾನಂ, ಅಪರಜ್ಝಿತ್ವಾನ ಅತ್ತನೋ 33

    Yo tvaṃ sapasi rājānaṃ, aparajjhitvāna attano 34.

    ೩೫೪.

    354.

    ಧಮ್ಮೇನ ಬ್ರಹ್ಮದತ್ತಸ್ಸ, ಅಹಂ ಕುಜ್ಝಾಮಿ ಬ್ರಾಹ್ಮಣ।

    Dhammena brahmadattassa, ahaṃ kujjhāmi brāhmaṇa;

    ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ॥

    Arakkhitā jānapadā, adhammabalinā hatā.

    ೩೫೫.

    355.

    ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ।

    Rattiñhi corā khādanti, divā khādanti tuṇḍiyā;

    ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ॥

    Raṭṭhasmiṃ kūṭarājassa, bahu adhammiko jano.

    ೩೫೬.

    356.

    ಸಾ ನೂನ ಪುನ ರೇ ಪಕ್ಕಾ, ವಿಕಾಲೇ ಭತ್ತಮಾಹರಿ।

    Sā nūna puna re pakkā, vikāle bhattamāhari;

    ಭತ್ತಹಾರಿಂ ಅಪೇಕ್ಖನ್ತೋ, ಹತೋ ಫಾಲೇನ ಸಾಲಿಯೋ॥

    Bhattahāriṃ apekkhanto, hato phālena sāliyo.

    ೩೫೭.

    357.

    ಏವಂ ಹಞ್ಞತು ಪಞ್ಚಾಲೋ, ಸಙ್ಗಾಮೇ ಅಸಿನಾ ಹತೋ 35

    Evaṃ haññatu pañcālo, saṅgāme asinā hato 36;

    ಯಥಾಹಮಜ್ಜ ಪಹತೋ, ಖೀರಞ್ಚ ಮೇ ಪವಟ್ಟಿತಂ॥

    Yathāhamajja pahato, khīrañca me pavaṭṭitaṃ.

    ೩೫೮.

    358.

    ಯಂ ಪಸು ಖೀರಂ ಛಡ್ಡೇತಿ, ಪಸುಪಾಲಂ ವಿಹಿಂಸತಿ 37

    Yaṃ pasu khīraṃ chaḍḍeti, pasupālaṃ vihiṃsati 38;

    ಕಿಂ ತತ್ಥ ಬ್ರಹ್ಮದತ್ತಸ್ಸ, ಯಂ ನೋ ಗರಹತೇ 39 ಭವಂ॥

    Kiṃ tattha brahmadattassa, yaṃ no garahate 40 bhavaṃ.

    ೩೫೯.

    359.

    ಗಾರಯ್ಹೋ ಬ್ರಹ್ಮೇ ಪಞ್ಚಾಲೋ, ಬ್ರಹ್ಮದತ್ತಸ್ಸ ರಾಜಿನೋ।

    Gārayho brahme pañcālo, brahmadattassa rājino;

    ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ॥

    Arakkhitā jānapadā, adhammabalinā hatā.

    ೩೬೦.

    360.

    ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ।

    Rattiñhi corā khādanti, divā khādanti tuṇḍiyā;

    ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ॥

    Raṭṭhasmiṃ kūṭarājassa, bahu adhammiko jano.

    ೩೬೧.

    361.

    ಚಣ್ಡಾ ಅಟನಕಾ 41 ಗಾವೀ, ಯಂ ಪುರೇ ನ ದುಹಾಮಸೇ।

    Caṇḍā aṭanakā 42 gāvī, yaṃ pure na duhāmase;

    ತಂ ದಾನಿ ಅಜ್ಜ ದೋಹಾಮ, ಖೀರಕಾಮೇಹುಪದ್ದುತಾ॥

    Taṃ dāni ajja dohāma, khīrakāmehupaddutā.

    ೩೬೨.

    362.

    ಏವಂ ಕನ್ದತು ಪಞ್ಚಾಲೋ, ವಿಪುತ್ತೋ ವಿಪ್ಪಸುಕ್ಖತು।

    Evaṃ kandatu pañcālo, viputto vippasukkhatu;

    ಯಥಾಯಂ ಕಪಣಾ ಗಾವೀ, ವಿಪುತ್ತಾ ಪರಿಧಾವತಿ॥

    Yathāyaṃ kapaṇā gāvī, viputtā paridhāvati.

    ೩೬೩.

    363.

    ಯಂ ಪಸು ಪಸುಪಾಲಸ್ಸ, ಸಮ್ಭಮೇಯ್ಯ 43 ರವೇಯ್ಯ ವಾ।

    Yaṃ pasu pasupālassa, sambhameyya 44 raveyya vā;

    ಕೋ ನೀಧ ಅಪರಾಧತ್ಥಿ, ಬ್ರಹ್ಮದತ್ತಸ್ಸ ರಾಜಿನೋ॥

    Ko nīdha aparādhatthi, brahmadattassa rājino.

    ೩೬೪.

    364.

    ಅಪರಾಧೋ ಮಹಾಬ್ರಹ್ಮೇ, ಬ್ರಹ್ಮದತ್ತಸ್ಸ ರಾಜಿನೋ।

    Aparādho mahābrahme, brahmadattassa rājino;

    ಅರಕ್ಖಿತಾ ಜಾನಪದಾ, ಅಧಮ್ಮಬಲಿನಾ ಹತಾ॥

    Arakkhitā jānapadā, adhammabalinā hatā.

    ೩೬೫.

    365.

    ರತ್ತಿಞ್ಹಿ ಚೋರಾ ಖಾದನ್ತಿ, ದಿವಾ ಖಾದನ್ತಿ ತುಣ್ಡಿಯಾ।

    Rattiñhi corā khādanti, divā khādanti tuṇḍiyā;

    ರಟ್ಠಸ್ಮಿಂ ಕೂಟರಾಜಸ್ಸ, ಬಹು ಅಧಮ್ಮಿಕೋ ಜನೋ।

    Raṭṭhasmiṃ kūṭarājassa, bahu adhammiko jano;

    ಕಥಂ ನೋ ಅಸಿಕೋಸತ್ಥಾ, ಖೀರಪಾ ಹಞ್ಞತೇ ಪಜಾ॥

    Kathaṃ no asikosatthā, khīrapā haññate pajā.

    ೩೬೬.

    366.

    ಏವಂ ಖಜ್ಜತು ಪಞ್ಚಾಲೋ, ಹತೋ ಯುದ್ಧೇ ಸಪುತ್ತಕೋ।

    Evaṃ khajjatu pañcālo, hato yuddhe saputtako;

    ಯಥಾಹಮಜ್ಜ ಖಜ್ಜಾಮಿ, ಗಾಮಿಕೇಹಿ 45 ಅರಞ್ಞಜೋ॥

    Yathāhamajja khajjāmi, gāmikehi 46 araññajo.

    ೩೬೭.

    367.

    ನ ಸಬ್ಬಭೂತೇಸು ವಿಧೇನ್ತಿ 47 ರಕ್ಖಂ, ರಾಜಾನೋ ಮಣ್ಡೂಕ ಮನುಸ್ಸಲೋಕೇ।

    Na sabbabhūtesu vidhenti 48 rakkhaṃ, rājāno maṇḍūka manussaloke;

    ನೇತ್ತಾವತಾ ರಾಜಾ ಅಧಮ್ಮಚಾರೀ, ಯಂ ತಾದಿಸಂ ಜೀವಮದೇಯ್ಯು ಧಙ್ಕಾ॥

    Nettāvatā rājā adhammacārī, yaṃ tādisaṃ jīvamadeyyu dhaṅkā.

    ೩೬೮.

    368.

    ಅಧಮ್ಮರೂಪೋ ವತ ಬ್ರಹ್ಮಚಾರೀ, ಅನುಪ್ಪಿಯಂ ಭಾಸಸಿ ಖತ್ತಿಯಸ್ಸ।

    Adhammarūpo vata brahmacārī, anuppiyaṃ bhāsasi khattiyassa;

    ವಿಲುಪ್ಪಮಾನಾಯ ಪುಥುಪ್ಪಜಾಯ, ಪೂಜೇಸಿ ರಾಜಂ ಪರಮಪ್ಪಮಾದಂ 49

    Viluppamānāya puthuppajāya, pūjesi rājaṃ paramappamādaṃ 50.

    ೩೬೯.

    369.

    ಸಚೇ ಇಮಂ ಬ್ರಹ್ಮೇ ಸುರಜ್ಜಕಂ ಸಿಯಾ, ಫೀತಂ ರಟ್ಠಂ ಮುದಿತಂ 51 ವಿಪ್ಪಸನ್ನಂ।

    Sace imaṃ brahme surajjakaṃ siyā, phītaṃ raṭṭhaṃ muditaṃ 52 vippasannaṃ;

    ಭುತ್ವಾ ಬಲಿಂ ಅಗ್ಗಪಿಣ್ಡಞ್ಚ ಕಾಕಾ, ನ ಮಾದಿಸಂ ಜೀವಮದೇಯ್ಯು ಧಙ್ಕಾತಿ॥

    Bhutvā baliṃ aggapiṇḍañca kākā, na mādisaṃ jīvamadeyyu dhaṅkāti.

    ಗನ್ಧತಿನ್ದುಕಜಾತಕಂ ದಸಮಂ।

    Gandhatindukajātakaṃ dasamaṃ.

    ತಸ್ಸುದ್ದಾನಂ –

    Tassuddānaṃ –

    ಕಿಂಛನ್ದ ಕುಮ್ಭ ಜಯದ್ದಿಸ ಛದ್ದನ್ತ, ಅಥ ಪಣ್ಡಿತಸಮ್ಭವ ಸಿರಕಪಿ।

    Kiṃchanda kumbha jayaddisa chaddanta, atha paṇḍitasambhava sirakapi;

    ದಕರಕ್ಖಸ ಪಣ್ಡರನಾಗವರೋ, ಅಥ ಸಮ್ಬುಲ ತಿನ್ದುಕದೇವಸುತೋತಿ॥

    Dakarakkhasa paṇḍaranāgavaro, atha sambula tindukadevasutoti.

    ತಿಂಸನಿಪಾತಂ ನಿಟ್ಠಿತಂ।

    Tiṃsanipātaṃ niṭṭhitaṃ.

    ಜಾತಕಪಾಳಿಯಾ ಪಠಮೋ ಭಾಗೋ ನಿಟ್ಠಿತೋ।

    Jātakapāḷiyā paṭhamo bhāgo niṭṭhito.







    Footnotes:
    1. ಅಮತಪದಂ (ಸೀ॰ ಪೀ॰)
    2. amatapadaṃ (sī. pī.)
    3. ಖಯಾ ಚ ದೋಸಾ (ಸೀ॰)
    4. ಮಾ ಮದೋ (ಸೀ॰ ಸ್ಯಾ॰ ಪೀ॰)
    5. ಭಾರಧೂಸಭ (ಕ॰)
    6. khayā ca dosā (sī.)
    7. mā mado (sī. syā. pī.)
    8. bhāradhūsabha (ka.)
    9. ನ ಹಿರಞ್ಞನಿಧಾನಿಯಾ (ಕ॰)
    10. na hiraññanidhāniyā (ka.)
    11. ಖತ್ತಿಯ (ಕ॰)
    12. khattiya (ka.)
    13. ಮನ್ತಿಯಂ (ಸ್ಯಾ॰)
    14. mantiyaṃ (syā.)
    15. ತ್ವಂ (ಕ॰)
    16. tvaṃ (ka.)
    17. ಸಮಪ್ಪಿತೋ (ಸೀ॰ ಪೀ॰)
    18. samappito (sī. pī.)
    19. ಮಗ್ಘೇಯ್ಯ (ಪೀ॰)
    20. ಕಣ್ಡಕೋ (ಸೀ॰ ಸ್ಯಾ॰ ಪೀ॰)
    21. maggheyya (pī.)
    22. kaṇḍako (sī. syā. pī.)
    23. ಯೋಹಂ (ಸೀ॰ ಸ್ಯಾ॰ ಪೀ॰)
    24. ಮಗ್ಗೋಸ್ಮಿ (ಪೀ॰)
    25. yohaṃ (sī. syā. pī.)
    26. maggosmi (pī.)
    27. ರತ್ತಿಞ್ಚ (ಸೀ॰)
    28. rattiñca (sī.)
    29. ತಾತ (ಸೀ॰ ಪೀ॰)
    30. ತಾವ (ಸೀ॰ ಪೀ॰)
    31. tāta (sī. pī.)
    32. tāva (sī. pī.)
    33. ಅತ್ತನಾ (ಪೀ॰)
    34. attanā (pī.)
    35. ದಳ್ಹಂ (ಪೀ॰)
    36. daḷhaṃ (pī.)
    37. ಪಸುಪಾಲಞ್ಚ ಹಿಂಸತಿ (ಸೀ॰), ಪಸು ಫಾಲಞ್ಚ ಹಿಂಸತಿ (ಪೀ॰)
    38. pasupālañca hiṃsati (sī.), pasu phālañca hiṃsati (pī.)
    39. ಗರಹತೋ (ಪೀ॰)
    40. garahato (pī.)
    41. ಅಟನಕ (ಪೀ॰), ಅಕಟನಾ (ಕ॰)
    42. aṭanaka (pī.), akaṭanā (ka.)
    43. ಪಬ್ಭಮೇಯ್ಯ (ಸೀ॰ ಪೀ॰)
    44. pabbhameyya (sī. pī.)
    45. ಗಾಮಕೇಹಿ (ಸೀ॰ ಪೀ॰)
    46. gāmakehi (sī. pī.)
    47. ವಿಧನ್ತಿ (ಕ॰)
    48. vidhanti (ka.)
    49. ರಾಜಂ ಪರಮಪ್ಪವಾದಂ (ಸೀ॰), ರಾಜಾ ಪರಮಪ್ಪವಾದಿಂ (ಸ್ಯಾ॰)
    50. rājaṃ paramappavādaṃ (sī.), rājā paramappavādiṃ (syā.)
    51. ಪೂರಿತಂ (ಕ॰)
    52. pūritaṃ (ka.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೫೨೦] ೧೦. ಗನ್ಧತಿನ್ದುಕಜಾತಕವಣ್ಣನಾ • [520] 10. Gandhatindukajātakavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact