| Library / Tipiṭaka / திபிடக • Tipiṭaka / பேதவத்து²-அட்ட²கதா² • Petavatthu-aṭṭhakathā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
பேதவத்து²-அட்ட²கதா²
Petavatthu-aṭṭhakathā
க³ந்தா²ரம்ப⁴கதா²
Ganthārambhakathā
மஹாகாருணிகங் நாத²ங், ஞெய்யஸாக³ரபாரகு³ங்;
Mahākāruṇikaṃ nāthaṃ, ñeyyasāgarapāraguṃ;
வந்தே³ நிபுணக³ம்பீ⁴ர-விசித்ரனயதே³ஸனங்.
Vande nipuṇagambhīra-vicitranayadesanaṃ.
விஜ்ஜாசரணஸம்பன்னா, யேன நிய்யந்தி லோகதோ;
Vijjācaraṇasampannā, yena niyyanti lokato;
வந்தே³ தமுத்தமங் த⁴ம்மங், ஸம்மாஸம்பு³த்³த⁴பூஜிதங்.
Vande tamuttamaṃ dhammaṃ, sammāsambuddhapūjitaṃ.
ஸீலாதி³கு³ணஸம்பன்னோ, டி²தோ மக்³க³ப²லேஸு யோ;
Sīlādiguṇasampanno, ṭhito maggaphalesu yo;
வந்தே³ அரியஸங்க⁴ங் தங், புஞ்ஞக்கெ²த்தங் அனுத்தரங்.
Vande ariyasaṅghaṃ taṃ, puññakkhettaṃ anuttaraṃ.
வந்த³னாஜனிதங் புஞ்ஞங், இதி யங் ரதனத்தயே;
Vandanājanitaṃ puññaṃ, iti yaṃ ratanattaye;
ஹதந்தராயோ ஸப்³ப³த்த², ஹுத்வாஹங் தஸ்ஸ தேஜஸா.
Hatantarāyo sabbattha, hutvāhaṃ tassa tejasā.
பேதேஹி ச கதங் கம்மங், யங் யங் புரிமஜாதிஸு;
Petehi ca kataṃ kammaṃ, yaṃ yaṃ purimajātisu;
பேதபா⁴வாவஹங் தங் தங், தேஸஞ்ஹி ப²லபே⁴த³தோ.
Petabhāvāvahaṃ taṃ taṃ, tesañhi phalabhedato.
பகாஸயந்தீ பு³த்³தா⁴னங், தே³ஸனா யா விஸேஸதோ;
Pakāsayantī buddhānaṃ, desanā yā visesato;
ஸங்வேக³ஜனநீ கம்ம-ப²லபச்சக்க²காரினீ.
Saṃvegajananī kamma-phalapaccakkhakārinī.
பேதவத்தூ²தி நாமேன, ஸுபரிஞ்ஞாதவத்து²கா;
Petavatthūti nāmena, supariññātavatthukā;
யங் கு²த்³த³கனிகாயஸ்மிங், ஸங்கா³யிங்ஸு மஹேஸயோ.
Yaṃ khuddakanikāyasmiṃ, saṅgāyiṃsu mahesayo.
தஸ்ஸ ஸம்மாவலம்பி³த்வா, போராணட்ட²கதா²னயங்;
Tassa sammāvalambitvā, porāṇaṭṭhakathānayaṃ;
தத்த² தத்த² நிதா³னானி, விபா⁴வெந்தோ விஸேஸதோ.
Tattha tattha nidānāni, vibhāvento visesato.
ஸுவிஸுத்³த⁴ங் அஸங்கிண்ணங், நிபுணத்த²வினிச்ச²யங்;
Suvisuddhaṃ asaṃkiṇṇaṃ, nipuṇatthavinicchayaṃ;
மஹாவிஹாரவாஸீனங், ஸமயங் அவிலோமயங்.
Mahāvihāravāsīnaṃ, samayaṃ avilomayaṃ.
யதா²ப³லங் கரிஸ்ஸாமி, அத்த²ஸங்வண்ணனங் ஸுப⁴ங்;
Yathābalaṃ karissāmi, atthasaṃvaṇṇanaṃ subhaṃ;
ஸக்கச்சங் பா⁴ஸதோ தங் மே, நிஸாமயத² ஸாத⁴வோதி.
Sakkaccaṃ bhāsato taṃ me, nisāmayatha sādhavoti.
தத்த² பேதவத்தூ²தி ஸெட்டி²புத்தாதி³கஸ்ஸ தஸ்ஸ தஸ்ஸ ஸத்தஸ்ஸ பேதபா⁴வஹேதுபூ⁴தங் கம்மங், தஸ்ஸ பன பகாஸனவஸேன பவத்தோ ‘‘கெ²த்தூபமா அரஹந்தோ’’திஆதி³கா பரியத்தித⁴ம்மோ இத⁴ ‘‘பேதவத்தூ²’’தி அதி⁴ப்பேதோ.
Tattha petavatthūti seṭṭhiputtādikassa tassa tassa sattassa petabhāvahetubhūtaṃ kammaṃ, tassa pana pakāsanavasena pavatto ‘‘khettūpamā arahanto’’tiādikā pariyattidhammo idha ‘‘petavatthū’’ti adhippeto.
தயித³ங் பேதவத்து² கேன பா⁴ஸிதங், கத்த² பா⁴ஸிதங், கதா³ பா⁴ஸிதங், கஸ்மா ச பா⁴ஸிதந்தி? வுச்சதே – இத³ஞ்ஹி பேதவத்து² து³விதே⁴ன பவத்தங் அட்டு²ப்பத்திவஸேன, புச்சா²விஸ்ஸஜ்ஜனவஸேன ச. தத்த² யங் அட்டு²ப்பத்திவஸேன பவத்தங், தங் ப⁴க³வதா பா⁴ஸிதங், இதரங் நாரத³த்தே²ராதீ³ஹி புச்சி²தங் தேஹி தேஹி பேதேஹி பா⁴ஸிதங். ஸத்தா² பன யஸ்மா நாரத³த்தே²ராதீ³ஹி தஸ்மிங் தஸ்மிங் புச்சா²விஸ்ஸஜ்ஜனே ஆரோசிதே தங் தங் அட்டு²ப்பத்திங் கத்வா ஸம்பத்தபரிஸாய த⁴ம்மங் தே³ஸேஸி, தஸ்மா ஸப்³ப³ம்பேதங் பேதவத்து² ஸத்தா²ரா பா⁴ஸிதமேவ நாம ஜாதங். பவத்திதவரத⁴ம்மசக்கே ஹி ஸத்த²ரி தத்த² தத்த² ராஜக³ஹாதீ³ஸு விஹரந்தே யேபு⁴ய்யேன தாய தாய அட்டு²ப்பத்தியா புச்சா²விஸ்ஸஜ்ஜனவஸேன ஸத்தானங் கம்மப²லபச்சக்க²கரணாய தங் தங் பேதவத்து² தே³ஸனாருள்ஹந்தி அயங் தாவெத்த² ‘‘கேன பா⁴ஸித’’ந்திஆதீ³னங் பதா³னங் ஸாதா⁴ரணதோ விஸ்ஸஜ்ஜனா. அஸாதா⁴ரணதோ பன தஸ்ஸ தஸ்ஸ வத்து²ஸ்ஸ அத்த²வண்ணனாயமேவ ஆக³மிஸ்ஸதி.
Tayidaṃ petavatthu kena bhāsitaṃ, kattha bhāsitaṃ, kadā bhāsitaṃ, kasmā ca bhāsitanti? Vuccate – idañhi petavatthu duvidhena pavattaṃ aṭṭhuppattivasena, pucchāvissajjanavasena ca. Tattha yaṃ aṭṭhuppattivasena pavattaṃ, taṃ bhagavatā bhāsitaṃ, itaraṃ nāradattherādīhi pucchitaṃ tehi tehi petehi bhāsitaṃ. Satthā pana yasmā nāradattherādīhi tasmiṃ tasmiṃ pucchāvissajjane ārocite taṃ taṃ aṭṭhuppattiṃ katvā sampattaparisāya dhammaṃ desesi, tasmā sabbampetaṃ petavatthu satthārā bhāsitameva nāma jātaṃ. Pavattitavaradhammacakke hi satthari tattha tattha rājagahādīsu viharante yebhuyyena tāya tāya aṭṭhuppattiyā pucchāvissajjanavasena sattānaṃ kammaphalapaccakkhakaraṇāya taṃ taṃ petavatthu desanāruḷhanti ayaṃ tāvettha ‘‘kena bhāsita’’ntiādīnaṃ padānaṃ sādhāraṇato vissajjanā. Asādhāraṇato pana tassa tassa vatthussa atthavaṇṇanāyameva āgamissati.
தங் பனேதங் பேதவத்து² வினயபிடகங் ஸுத்தந்தபிடகங் அபி⁴த⁴ம்மபிடகந்தி தீஸு பிடகேஸு ஸுத்தந்தபிடகபரியாபன்னங், தீ³க⁴னிகாயோ மஜ்ஜி²மனிகாயோ ஸங்யுத்தனிகாயோ அங்கு³த்தரனிகாயோ கு²த்³த³கனிகாயோதி பஞ்சஸு நிகாயேஸு கு²த்³த³கனிகாயபரியாபன்னங், ஸுத்தங் கெ³ய்யங் வெய்யாகரணங் கா³தா² உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லந்தி நவஸு ஸாஸனங்கே³ஸு கா³தா²ஸங்க³ஹங்.
Taṃ panetaṃ petavatthu vinayapiṭakaṃ suttantapiṭakaṃ abhidhammapiṭakanti tīsu piṭakesu suttantapiṭakapariyāpannaṃ, dīghanikāyo majjhimanikāyo saṃyuttanikāyo aṅguttaranikāyo khuddakanikāyoti pañcasu nikāyesu khuddakanikāyapariyāpannaṃ, suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhutadhammaṃ vedallanti navasu sāsanaṅgesu gāthāsaṅgahaṃ.
‘‘த்³வாஸீதி பு³த்³த⁴தோ க³ண்ஹிங், த்³வே ஸஹஸ்ஸானி பி⁴க்கு²தோ;
‘‘Dvāsīti buddhato gaṇhiṃ, dve sahassāni bhikkhuto;
சதுராஸீதி ஸஹஸ்ஸானி, யே மே த⁴ம்மா பவத்தினோ’’தி. (தே²ரகா³॰ 1027) –
Caturāsīti sahassāni, ye me dhammā pavattino’’ti. (theragā. 1027) –
ஏவங் த⁴ம்மப⁴ண்டா³கா³ரிகேன படிஞ்ஞாதேஸு சதுராஸீதியா த⁴ம்மக்க²ந்த⁴ஸஹஸ்ஸேஸு கதிபயத⁴ம்மக்க²ந்த⁴ஸங்க³ஹங், பா⁴ணவாரதோ சதுபா⁴ணவாரமத்தங், வக்³க³தோ – உரக³வக்³கோ³ உப்³ப³ரிவக்³கோ³ சூளவக்³கோ³ மஹாவக்³கோ³தி சதுவக்³க³ஸங்க³ஹங். தேஸு பட²மவக்³கே³ த்³வாத³ஸ வத்தூ²னி, து³தியவக்³கே³ தேரஸ வத்தூ²னி, ததியவக்³கே³ த³ஸ வத்தூ²னி, சதுத்த²வக்³கே³ ஸோளஸ வத்தூ²னீதி வத்து²தோ ஏகபஞ்ஞாஸவத்து²படிமண்டி³தங். தஸ்ஸ வக்³கே³ஸு உரக³வக்³கோ³ ஆதி³, வத்தூ²ஸு கெ²த்தூபமபேதவத்து² ஆதி³, தஸ்ஸாபி ‘‘கெ²த்தூபமா அரஹந்தோ’’தி அயங் கா³தா² ஆதி³.
Evaṃ dhammabhaṇḍāgārikena paṭiññātesu caturāsītiyā dhammakkhandhasahassesu katipayadhammakkhandhasaṅgahaṃ, bhāṇavārato catubhāṇavāramattaṃ, vaggato – uragavaggo ubbarivaggo cūḷavaggo mahāvaggoti catuvaggasaṅgahaṃ. Tesu paṭhamavagge dvādasa vatthūni, dutiyavagge terasa vatthūni, tatiyavagge dasa vatthūni, catutthavagge soḷasa vatthūnīti vatthuto ekapaññāsavatthupaṭimaṇḍitaṃ. Tassa vaggesu uragavaggo ādi, vatthūsu khettūpamapetavatthu ādi, tassāpi ‘‘khettūpamā arahanto’’ti ayaṃ gāthā ādi.
