| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
གནྠཱརམྦྷཀཐཱཝཎྞནཱ
Ganthārambhakathāvaṇṇanā
ཏཏྠཱདོ ཏཱཝ སབྦསཀྐཏསྶ སབྦསཏྟུཏྟམསྶ སཏྠུནོ པཎཱམཾ དསྶེནྟོ ཨཱཧ ‘‘ནཏྭཱ ནཱཐ’’ནྟྱཱདི། ནཱཐཾ ཙཏཱུཧི ནཱཐངྒེཧི སམནྣཱགཏཾ བྷགཝནྟཾ ནཏྭཱ ཝནྡིཏྭཱ ཨཱདོ ཨཱདིམྷི ཨུཔསམྤནྣཏོ པཊྛཱཡ ནཝཀེན བྷིཀྑུནཱ ཨདྷུནཱ པབྦཛིཏེན ཨུཔསམྤནྣེན མཱུལབྷཱསཱཡ མཱགདྷབྷཱསཱཡ སིཀྑིཏུཾ སམཱསཏོ སངྑེཔེན མཱུལསིཀྑཾ ཨཧཾ པཝཀྑཱམཱིཏི པིཎྜཏྠོ།
Tatthādo tāva sabbasakkatassa sabbasattuttamassa satthuno paṇāmaṃ dassento āha ‘‘natvā nātha’’ntyādi. Nāthaṃ catūhi nāthaṅgehi samannāgataṃ bhagavantaṃ natvā vanditvā ādo ādimhi upasampannato paṭṭhāya navakena bhikkhunā adhunā pabbajitena upasampannena mūlabhāsāya māgadhabhāsāya sikkhituṃ samāsato saṅkhepena mūlasikkhaṃ ahaṃ pavakkhāmīti piṇḍattho.
ཨཡཾ པན ཨཝཡཝཏྠོ – ནཏྭཱཏི ཏནྣིནྣཏཔྤོཎཏཔྤབྦྷཱརོ ཧུཏྭཱ ཀཱཡཝཙཱིམནོདྭཱརེཧི ཝནྡིཏྭཱཏི ཨཏྠོ། ནཱཐཏཱིཏི ནཱཐོ, ཝེནེཡྻཱནཾ ཧིཏསུཁཾ མེཏྟཱཡནཝསེན ཨཱསཱིསཏི པཏྠེཏཱིཏི ཨཏྠོ, ཨཐ ཝཱ ནཱཐཏི ཝེནེཡྻགཏེ ཀིལེསེ ཨུཔཏཱཔེཏཱིཏི ཨཏྠོ, ནཱཐཏི ཝཱ ཡཱཙཏཱིཏི ཨཏྠོ། བྷགཝཱ ཧི ‘‘སཱདྷུ, བྷིཀྑཝེ, བྷིཀྑུ ཀཱལེན ཀཱལཾ ཨཏྟསམྤཏྟིཾ པཙྩཝེཀྑེཡྻཱ’’ཏིཨཱདིནཱ (ཨ॰ ནི॰ ༨.༧) སཏྟཱནཾ ཏཾ ཏཾ ཧིཏཔྤཊིཔཏྟིཾ ཡཱཙིཏྭཱཔི ཀརུཎཱཡ སམུསྶཱཧིཏོ ཏེ ཏཏྠ ནིཡོཛེཏི། པརམེན ཝཱ ཙིཏྟིསྶརིཡེན སམནྣཱགཏོ སབྦསཏྟེ ཨཱིསཏི ཨབྷིབྷཝཏཱིཏི པརམིསྶརོ བྷགཝཱ ‘‘ནཱཐོ’’ཏི ཝུཙྩཏི། སབྦོ ཙཱཡམཏྠོ སདྡསཏྠཱནུསཱརཏོ ཝེདིཏབྦོ། པཝཀྑཱམཱིཏི པཀཱརེན ཀཐེསྶཱམི། མཱུལསིཀྑཱཏི ཨདྷིསཱིལཨདྷིཙིཏྟཨདྷིཔཉྙཱཝསེན ཏིསྶོཔི སིཀྑཱ, ཨུཔསམྤནྣསྶ སུཔྤཏིཊྛིཏབྷཱཝསཱདྷནཊྛེན མཱུལཱ ཙ སཱ སིཀྑིཏབྦཏོ སིཀྑཱ ཙཱཏི མཱུལསིཀྑཱ། གནྠཝསེནེཏྠ སངྑིཔིཏྭཱ ཝུཏྟཏྟཱ ཏདྡཱིཔནོ གནྠོ ‘‘མཱུལསིཀྑཱ’’ཏི ཝུཙྩཏི།
Ayaṃ pana avayavattho – natvāti tanninnatappoṇatappabbhāro hutvā kāyavacīmanodvārehi vanditvāti attho. Nāthatīti nātho, veneyyānaṃ hitasukhaṃ mettāyanavasena āsīsati patthetīti attho, atha vā nāthati veneyyagate kilese upatāpetīti attho, nāthati vā yācatīti attho. Bhagavā hi ‘‘sādhu, bhikkhave, bhikkhu kālena kālaṃ attasampattiṃ paccavekkheyyā’’tiādinā (a. ni. 8.7) sattānaṃ taṃ taṃ hitappaṭipattiṃ yācitvāpi karuṇāya samussāhito te tattha niyojeti. Paramena vā cittissariyena samannāgato sabbasatte īsati abhibhavatīti paramissaro bhagavā ‘‘nātho’’ti vuccati. Sabbo cāyamattho saddasatthānusārato veditabbo. Pavakkhāmīti pakārena kathessāmi. Mūlasikkhāti adhisīlaadhicittaadhipaññāvasena tissopi sikkhā, upasampannassa suppatiṭṭhitabhāvasādhanaṭṭhena mūlā ca sā sikkhitabbato sikkhā cāti mūlasikkhā. Ganthavasenettha saṅkhipitvā vuttattā taddīpano gantho ‘‘mūlasikkhā’’ti vuccati.
ཏཏྠ ཀཏམཾ སཱིལཾ, ཀཏམཾ ཨདྷིསཱིལཾ, ཀཏམཾ ཙིཏྟཾ, ཀཏམཾ ཨདྷིཙིཏྟཾ, ཀཏམཱ པཉྙཱ, ཀཏམཱ ཨདྷིཔཉྙཱཏི? ཝུཙྩཏེ – པཉྩངྒཨཊྛངྒདསངྒསཱིལཾ ཏཱཝ སཱིལམེཝ། པཱཏིམོཀྑསཾཝརསཱིལཾ པན ‘‘ཨདྷིསཱིལ’’ནྟི ཝུཙྩཏི། ཏཉྷི སཱུརིཡོ ཝིཡ པཛྫོཏཱནཾ, སིནེརུ ཝིཡ པབྦཏཱནཾ སབྦལོཀིཡསཱིལཱནཾ ཨདྷིཀཉྩེཝ ཨུཏྟམཉྩ། པཱཏིམོཀྑསཾཝརཏོཔི ཙ མགྒཕལསམྤཡུཏྟམེཝ སཱིལཾ ཨདྷིསཱིལཾ, ཏཾ པན ཨིདྷ ནཱདྷིཔྤེཏཾ། ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི། ཀཱམཱཝཙརཱནི པན ཨཊྛ ཀུསལཙིཏྟཱནི, ལོཀིཡཨཊྛསམཱཔཏྟིཙིཏྟཱནི ཙ ཨེཀཛ྄ཛྷཾ ཀཏྭཱ ཙིཏྟམེཝ། ཝིཔསྶནཱཔཱདཀཾ ཨཊྛསམཱཔཏྟིཙིཏྟཾ པན ‘‘ཨདྷིཙིཏྟ’’ནྟི ཝུཙྩཏི། ཏཉྷི སབྦལོཀིཡཙིཏྟཱནཾ ཨདྷིཀཉྩེཝ ཨུཏྟམཉྩ། ཏཏོཔི ཙ མགྒཕལཙིཏྟམེཝ ཨདྷིཙིཏྟཾ, ཏཾ པན ཨིདྷ ནཱདྷིཔྤེཏཾ། ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི། ‘‘ཨཏྠི དིནྣཾ, ཨཏྠི ཡིཊྛ’’ནྟིཨཱདིནཡཔྤཝཏྟཾ ཀམྨསྶཀཏཱཉཱཎཾ པཉྙཱ, ཏིལཀྑཎཱཀཱརཔརིཙྪེདཀཾ པན ཝིཔསྶནཱཉཱཎཾ ‘‘ཨདྷིཔཉྙཱ’’ཏི ཝུཙྩཏི། སཱ ཧི སབྦལོཀིཡཔཉྙཱནཾ ཨདྷིཀཱ ཙེཝ ཨུཏྟམཱ ཙ། ཏཏོཔི ཙ མགྒཕལཔཉྙཱཝ ཨདྷིཔཉྙཱ, སཱ པན ཨིདྷ ནཱདྷིཔྤེཏཱ། ན ཧི ཏཾ སིཀྑནྟོ མེཐུནཾ དྷམྨཾ པཊིསེཝཏི།
Tattha katamaṃ sīlaṃ, katamaṃ adhisīlaṃ, katamaṃ cittaṃ, katamaṃ adhicittaṃ, katamā paññā, katamā adhipaññāti? Vuccate – pañcaṅgaaṭṭhaṅgadasaṅgasīlaṃ tāva sīlameva. Pātimokkhasaṃvarasīlaṃ pana ‘‘adhisīla’’nti vuccati. Tañhi sūriyo viya pajjotānaṃ, sineru viya pabbatānaṃ sabbalokiyasīlānaṃ adhikañceva uttamañca. Pātimokkhasaṃvaratopi ca maggaphalasampayuttameva sīlaṃ adhisīlaṃ, taṃ pana idha nādhippetaṃ. Na hi taṃ sikkhanto methunaṃ dhammaṃ paṭisevati. Kāmāvacarāni pana aṭṭha kusalacittāni, lokiyaaṭṭhasamāpatticittāni ca ekajjhaṃ katvā cittameva. Vipassanāpādakaṃ aṭṭhasamāpatticittaṃ pana ‘‘adhicitta’’nti vuccati. Tañhi sabbalokiyacittānaṃ adhikañceva uttamañca. Tatopi ca maggaphalacittameva adhicittaṃ, taṃ pana idha nādhippetaṃ. Na hi taṃ sikkhanto methunaṃ dhammaṃ paṭisevati. ‘‘Atthi dinnaṃ, atthi yiṭṭha’’ntiādinayappavattaṃ kammassakatāñāṇaṃ paññā, tilakkhaṇākāraparicchedakaṃ pana vipassanāñāṇaṃ ‘‘adhipaññā’’ti vuccati. Sā hi sabbalokiyapaññānaṃ adhikā ceva uttamā ca. Tatopi ca maggaphalapaññāva adhipaññā, sā pana idha nādhippetā. Na hi taṃ sikkhanto methunaṃ dhammaṃ paṭisevati.
ཏཱསུ ཏཱིསུ ཨདྷིསཱིལསིཀྑཱ ཙཱརིཏྟཝཱརིཏྟཝསེན དུཝིདྷམྤི སཱིལཾ ཡཐཱནུསིཊྛཾ པཊིཔཛྫམཱནེན, ཏཔྤཊིཔཀྑེ ཀིལེསེ ཏདངྒཔྤཧཱནཝསེན པཛཧནྟེན སིཀྑིཏབྦཱ། ཨདྷིཙིཏྟསིཀྑཱ ཡཐཱཝུཏྟེསུ ཨཱརམྨཎེསུ ཨབྷིཡོགཝསེན ཛྷཱནཔྤཊིཔཀྑཱནཾ ནཱིཝརཎགཎཱནཾ ཝིཀྑམྦྷནཔྤཧཱནཾ ཀུརུམཱནེན སིཀྑིཏབྦཱ། ཨདྷིཔཉྙཱསིཀྑཱ པན ཡཐཱནུརཱུཔཾ ཏདངྒཔྤཧཱནསམུཙྪེདཝསེན སཱནུསཡེ ཀིལེསེ སམུཙྪིནྡནྟེན སིཀྑིཏབྦཱ། ཏསྨཱ སུཔྤཏིཊྛིཏབྷཱཝསཱདྷནཊྛེན མཱུལཱ ཙ སཱ སིཀྑིཏབྦཏོ སིཀྑཱ ཙཱཏི མཱུལསིཀྑཱ, ཀམྨཝཙནིཙྪཱཡཾ ‘‘མཱུལསིཀྑ’’ནྟི ཝུཏྟཾ།
Tāsu tīsu adhisīlasikkhā cārittavārittavasena duvidhampi sīlaṃ yathānusiṭṭhaṃ paṭipajjamānena, tappaṭipakkhe kilese tadaṅgappahānavasena pajahantena sikkhitabbā. Adhicittasikkhā yathāvuttesu ārammaṇesu abhiyogavasena jhānappaṭipakkhānaṃ nīvaraṇagaṇānaṃ vikkhambhanappahānaṃ kurumānena sikkhitabbā. Adhipaññāsikkhā pana yathānurūpaṃ tadaṅgappahānasamucchedavasena sānusaye kilese samucchindantena sikkhitabbā. Tasmā suppatiṭṭhitabhāvasādhanaṭṭhena mūlā ca sā sikkhitabbato sikkhā cāti mūlasikkhā, kammavacanicchāyaṃ ‘‘mūlasikkha’’nti vuttaṃ.
སམཱསཱིཡཏེ སངྑིཔཱིཡཏེཏི སམཱསོ, ཏཏོ སམཱསཏོ། སམགྒེན སངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣོཏི བྷིཀྑུ། ཏཏྠ སབྦནྟིམེན པརིཡཱཡེན པཉྩཝགྒཀརཎཱིཡེ ཀམྨེ ཡཱཝཏིཀཱ བྷིཀྑཱུ ཀམྨཔྤཏྟཱ, ཏེསཾ ཨཱགཏཏྟཱ, ཚནྡཱརཧཱནཾ ཚནྡསྶ ཨཱཧཊཏྟཱ, སམྨུཁཱིབྷཱུཏཱནཉྩ ཨཔྤཊིཀྐོསནཏོ ཨེཀསྨིཾ ཀམྨེ སམགྒབྷཱཝཾ ཨུཔགཏེན སངྒྷེན ཏཱིཧི ཨནུསྶཱཝནཱཧི ཨེཀཱཡ ཉཏྟིཡཱ ཀཱཏབྦཀམྨསངྑཱཏེན ཉཏྟིཙཏུཏྠེན དྷམྨིཀེན ཝིནཡཀམྨེན ཝཏྠུཉཏྟིཨནུསྶཱཝནསཱིམཱཔརིསཱསམྤཏྟིསམྤནྣཏྟཱ ཨཀོཔེཏབྦཏཾ, ཨཔྤཊིཀྐོསིཏབྦཏཾ ཨུཔགཏེན ཋཱནཱརཧེན ཀཱརཎཱརཧེན སཏྠུསཱསནཱརཧེན ཨུཔསམྤནྣོ ནཱམ, ཨུཔརིབྷཱཝཾ སམཱཔནྣོ པཏྟོཏི ཨཏྠོ། བྷིཀྑུབྷཱཝོ ཧི ཨུཔརིབྷཱཝོ། ཏཉྩེས ཡཐཱཝུཏྟེན ཀམྨེན སམཱཔནྣཏྟཱ ‘‘ཨུཔསམྤནྣོ’’ཏི ཝུཙྩཏི, ཏེན བྷིཀྑུནཱ། ཨཱུནཔཉྩཝསྶཏཱཡ ནཝཀོ, ཏེན ནཝཀེན ཨདྷུནཱ པབྦཛིཏེན, ཨཙིརཔབྦཛིཏེནཱཏི ཝུཏྟཾ ཧོཏི། ཨཱདོཏི ཨཱདིམྷིཡེཝཱཏི ཨཏྠོ, ཨཱདིཏོ པཊྛཱཡཱཏི ཝཱ། ཨཔི ཙ ཐེརོ ‘‘ཨཱདོ’’ཏི ཝཙནེན སདྡྷཱཔབྦཛིཏཱནཾ ཀུལཔུཏྟཱནཾ ཨཱལསིཡདོསེན, ཨཔྤཊིཔཛྫནྟཱནཾ ཨཉྙཱཎདོསེན ཙ ཨཉྙཐཱ པཊིཔཛྫནྟཱནཾ སཾཝེགཾ ཛནེཏི། ཀཐཾ? ཨཏིདུལླབྷཾ ཁཎཾ སམཝཱཡཾ པཊིལབྷིཏྭཱ ཏངྑཎཾ ན ཀུསཱིཏེན ཝཱ ནིརཏྠཀཀཐཱཔསུཏེན ཝཱ ཝཱིཏིནཱམེཏབྦཾ, ཀིཾ ཀཱཏབྦཾ? ཨཱདིཏོ པཊྛཱཡ ནིརནྟརམེཝ ཏཱིསུ སིཀྑཱསུ ཨཱདརོ ཛནེཏབྦོཏི།
Samāsīyate saṅkhipīyateti samāso, tato samāsato. Samaggena saṅghena ñatticatutthena kammena akuppena ṭhānārahena upasampannoti bhikkhu. Tattha sabbantimena pariyāyena pañcavaggakaraṇīye kamme yāvatikā bhikkhū kammappattā, tesaṃ āgatattā, chandārahānaṃ chandassa āhaṭattā, sammukhībhūtānañca appaṭikkosanato ekasmiṃ kamme samaggabhāvaṃ upagatena saṅghena tīhi anussāvanāhi ekāya ñattiyā kātabbakammasaṅkhātena ñatticatutthena dhammikena vinayakammena vatthuñattianussāvanasīmāparisāsampattisampannattā akopetabbataṃ, appaṭikkositabbataṃ upagatena ṭhānārahena kāraṇārahena satthusāsanārahena upasampanno nāma, uparibhāvaṃ samāpanno pattoti attho. Bhikkhubhāvo hi uparibhāvo. Tañcesa yathāvuttena kammena samāpannattā ‘‘upasampanno’’ti vuccati, tena bhikkhunā. Ūnapañcavassatāya navako, tena navakena adhunā pabbajitena, acirapabbajitenāti vuttaṃ hoti. Ādoti ādimhiyevāti attho, ādito paṭṭhāyāti vā. Api ca thero ‘‘ādo’’ti vacanena saddhāpabbajitānaṃ kulaputtānaṃ ālasiyadosena, appaṭipajjantānaṃ aññāṇadosena ca aññathā paṭipajjantānaṃ saṃvegaṃ janeti. Kathaṃ? Atidullabhaṃ khaṇaṃ samavāyaṃ paṭilabhitvā taṅkhaṇaṃ na kusītena vā niratthakakathāpasutena vā vītināmetabbaṃ, kiṃ kātabbaṃ? Ādito paṭṭhāya nirantarameva tīsu sikkhāsu ādaro janetabboti.
‘‘སཱ མཱགདྷཱི མཱུལབྷཱསཱ, ནརཱ ཡཱཡཱདིཀཔྤིཀཱ།
‘‘Sā māgadhī mūlabhāsā, narā yāyādikappikā;
བྲཧྨཱནོ ཙསྶུཏཱལཱཔཱ, སམྦུདྡྷཱ ཙཱཔི བྷཱསརེ’’ཏི༎ –
Brahmāno cassutālāpā, sambuddhā cāpi bhāsare’’ti. –
ཝཙནཏོ མཱུལབྷཱསཱཡཱཏི མཱགདྷམཱུལཱཡ བྷཱསཱཡ, སབྷཱཝནིརུཏྟིཡཱ བྷཱསཱཡཱཏི ཝུཏྟཾ ཧོཏི། སིཀྑིཏུནྟི ཨུགྒཎྷིཏུཾ།
Vacanato mūlabhāsāyāti māgadhamūlāya bhāsāya, sabhāvaniruttiyā bhāsāyāti vuttaṃ hoti. Sikkhitunti uggaṇhituṃ.
