| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
பட்டா²னபகரண-மூலடீகா
Paṭṭhānapakaraṇa-mūlaṭīkā
க³ந்தா²ரம்ப⁴வண்ணனா
Ganthārambhavaṇṇanā
தி³ப்³ப³ந்தி காமகு³ணாதீ³ஹி கீளந்தி லளந்தி, தேஸு வா விஹரந்தி, விஜயஸமத்த²தாயோகே³ன பச்சத்தி²கே விஜேதுங் இச்ச²ந்தி, இஸ்ஸரியட்டா²னாதி³ஸக்காரதா³னக்³க³ஹணங் தங்தங்அத்தா²னுஸாஸனஞ்ச கரொந்தா வோஹரந்தி, புஞ்ஞயோகா³னுபா⁴வப்பத்தாய ஜுதியா ஜோதந்தி, யதா²பி⁴லாஸிதஞ்ச விஸயங் அப்படிகா⁴தேன க³ச்ச²ந்தி, யதி²ச்சி²தனிப்பா²த³னே ஸக்கொந்தீதி வா தே³வா, தே³வனீயா வா தங்தங்ப்³யஸனநித்த²ரணத்தி²கேஹி ஸரணங் பராயணந்தி க³மனீயா, அபி⁴த்த²வனீயா வா. ஸோபா⁴விஸேஸயோகே³ன கமனீயாதி வா தே³வா. தே திவிதா⁴ – ஸம்முதிதே³வா உபபத்திதே³வா விஸுத்³தி⁴தே³வாதி. ப⁴க³வா பன நிரதிஸயாய அபி⁴ஞ்ஞாகீளாய, உத்தமேஹி தி³ப்³ப³ப்³ரஹ்மஅரியவிஹாரேஹி, ஸபரஸந்தானஸித்³தா⁴ய பஞ்சவித⁴மாரவிஜயிச்சா²னிப்ப²த்தியா, சித்திஸ்ஸரியஸத்தத⁴னாதி³ஸம்மாபடிபத்திஅவேச்சப்பஸாத³ஸக்காரதா³னக்³க³ஹணஸங்கா²தேன த⁴ம்மஸபா⁴வபுக்³க³லஜ்ஜா²ஸயானுரூபானுஸாஸனீஸங்கா²தேன ச வோஹாராதிஸயேன, பரமாய பஞ்ஞாஸரீரப்பபா⁴ஸங்கா²தாய ஜுதியா, அனோபமாய ச ஞாணஸரீரக³தியா, மாரவிஜயஸப்³ப³ஞ்ஞுகு³ணபரஹிதனிப்பா²த³னேஸு அப்படிஹதாய ஸத்தியா ச ஸமன்னாக³தத்தா ஸதே³வகேன லோகேன ஸரணந்தி க³மனீயதோ, அபி⁴த்த²வனீயதோ, ப⁴த்திவஸேன கமனீயதோ ச ஸப்³பே³ தே தே³வே தேஹி கு³ணேஹி அதிக்கந்தோ அதிஸயோ வா தே³வோதி தே³வாதிதே³வோ. ஸப்³ப³தே³வேஹி பூஜனீயதரோ தே³வோதி வா தே³வாதிதே³வோ, விஸுத்³தி⁴தே³வபா⁴வங் வா ஸப்³ப³ஞ்ஞுகு³ணாலங்காரங் பத்தத்தா அஞ்ஞதே³வேஹி அதிரேகதரோ வா தே³வோ தே³வாதிதே³வோ. தே³வானந்தி உபபத்திதே³வானங் ததா³ த⁴ம்மபடிக்³கா³ஹகானங். ஸக்காதீ³ஹி தே³வேஹி பஹாராத³அஸுரிந்தா³தீ³ஹி தா³னவேஹி ச பூஜிதோ. காயவசீஸங்யமஸ்ஸ ஸீலஸ்ஸ இந்த்³ரியஸங்வரஸ்ஸ சித்தஸங்யமஸ்ஸ ஸமாதி⁴ஸ்ஸ ச படிபக்கா²னங் அச்சந்தபடிப்பஸ்ஸத்³தி⁴யா ஸுத்³த⁴ஸங்யமோ.
Dibbanti kāmaguṇādīhi kīḷanti laḷanti, tesu vā viharanti, vijayasamatthatāyogena paccatthike vijetuṃ icchanti, issariyaṭṭhānādisakkāradānaggahaṇaṃ taṃtaṃatthānusāsanañca karontā voharanti, puññayogānubhāvappattāya jutiyā jotanti, yathābhilāsitañca visayaṃ appaṭighātena gacchanti, yathicchitanipphādane sakkontīti vā devā, devanīyā vā taṃtaṃbyasananittharaṇatthikehi saraṇaṃ parāyaṇanti gamanīyā, abhitthavanīyā vā. Sobhāvisesayogena kamanīyāti vā devā. Te tividhā – sammutidevā upapattidevā visuddhidevāti. Bhagavā pana niratisayāya abhiññākīḷāya, uttamehi dibbabrahmaariyavihārehi, saparasantānasiddhāya pañcavidhamāravijayicchānipphattiyā, cittissariyasattadhanādisammāpaṭipattiaveccappasādasakkāradānaggahaṇasaṅkhātena dhammasabhāvapuggalajjhāsayānurūpānusāsanīsaṅkhātena ca vohārātisayena, paramāya paññāsarīrappabhāsaṅkhātāya jutiyā, anopamāya ca ñāṇasarīragatiyā, māravijayasabbaññuguṇaparahitanipphādanesu appaṭihatāya sattiyā ca samannāgatattā sadevakena lokena saraṇanti gamanīyato, abhitthavanīyato, bhattivasena kamanīyato ca sabbe te deve tehi guṇehi atikkanto atisayo vā devoti devātidevo. Sabbadevehi pūjanīyataro devoti vā devātidevo, visuddhidevabhāvaṃ vā sabbaññuguṇālaṅkāraṃ pattattā aññadevehi atirekataro vā devo devātidevo. Devānanti upapattidevānaṃ tadā dhammapaṭiggāhakānaṃ. Sakkādīhi devehi pahārādaasurindādīhi dānavehi ca pūjito. Kāyavacīsaṃyamassa sīlassa indriyasaṃvarassa cittasaṃyamassa samādhissa ca paṭipakkhānaṃ accantapaṭippassaddhiyā suddhasaṃyamo.
இஸிஸத்தமோதி சதுஸச்சாவபோ³த⁴க³தியா இஸயோதி ஸங்க்²யங் க³தானங் ஸதங் பஸத்தா²னங் இஸீனங் அதிஸயேன ஸந்தோ பஸத்தோ²தி அத்தோ². விபஸ்ஸீஆத³யோ ச உபாதா³ய ப⁴க³வா ‘‘ஸத்தமோ’’தி வுத்தோ. யதோ விஞ்ஞாணங் பச்சுதா³வத்ததி, தங் நாமரூபங் ஸமுத³யனிரோத⁴னேன நிரோதே⁴ஸீதி நாமரூபனிரோத⁴னோ. அதிக³ம்பீ⁴ரனயமண்டி³ததே³ஸனங் பட்டா²னங் நாம தே³ஸேஸி பகரணந்தி ஸம்ப³ந்தோ⁴.
Isisattamoti catusaccāvabodhagatiyā isayoti saṅkhyaṃ gatānaṃ sataṃ pasatthānaṃ isīnaṃ atisayena santo pasatthoti attho. Vipassīādayo ca upādāya bhagavā ‘‘sattamo’’ti vutto. Yato viññāṇaṃ paccudāvattati, taṃ nāmarūpaṃ samudayanirodhanena nirodhesīti nāmarūpanirodhano. Atigambhīranayamaṇḍitadesanaṃ paṭṭhānaṃ nāma desesi pakaraṇanti sambandho.
க³ந்தா²ரம்ப⁴வண்ணனா நிட்டி²தா.
Ganthārambhavaṇṇanā niṭṭhitā.
