| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ဂဝမ္ပတိသုတ္တံ
10. Gavampatisuttaṃ
၁၁၀၀. ဧကံ သမယံ သမ္ဗဟုလာ ထေရာ ဘိက္ခူ စေတေသု 1 ဝိဟရန္တိ သဟဉ္စနိကေ 2။ တေန ခော ပန သမယေန သမ္ဗဟုလာနံ ထေရာနံ ဘိက္ခူနံ ပစ္ဆာဘတ္တံ ပိဏ္ဍပာတပဋိက္ကန္တာနံ မဏ္ဍလမာဠေ သန္နိသိန္နာနံ သန္နိပတိတာနံ အယမန္တရာကထာ ဥဒပာဒိ – ‘‘ယော နု ခော, အာဝုသော, ဒုက္ခံ ပသ္သတိ ဒုက္ခသမုဒယမ္ပိ သော ပသ္သတိ, ဒုက္ခနိရောဓမ္ပိ ပသ္သတိ, ဒုက္ခနိရောဓဂာမိနိံ ပဋိပဒမ္ပိ ပသ္သတီ’’တိ။
1100. Ekaṃ samayaṃ sambahulā therā bhikkhū cetesu 3 viharanti sahañcanike 4. Tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘yo nu kho, āvuso, dukkhaṃ passati dukkhasamudayampi so passati, dukkhanirodhampi passati, dukkhanirodhagāminiṃ paṭipadampi passatī’’ti.
ဧဝံ ဝုတ္တေ အာယသ္မာ ဂဝမ္ပတိ ထေရော 5 ဘိက္ခူ ဧတဒဝောစ – ‘‘သမ္မုခာ မေတံ, အာဝုသော, ဘဂဝတော သုတံ, သမ္မုခာ ပဋိဂ္ဂဟိတံ – ‘ယော , ဘိက္ခဝေ, ဒုက္ခံ ပသ္သတိ ဒုက္ခသမုဒယမ္ပိ သော ပသ္သတိ, ဒုက္ခနိရောဓမ္ပိ ပသ္သတိ, ဒုက္ခနိရောဓဂာမိနိံ ပဋိပဒမ္ပိ ပသ္သတိ။ ယော ဒုက္ခသမုဒယံ ပသ္သတိ ဒုက္ခမ္ပိ သော ပသ္သတိ, ဒုက္ခနိရောဓမ္ပိ ပသ္သတိ, ဒုက္ခနိရောဓဂာမိနိံ ပဋိပဒမ္ပိ ပသ္သတိ။ ယော ဒုက္ခနိရောဓံ ပသ္သတိ ဒုက္ခမ္ပိ သော ပသ္သတိ, ဒုက္ခသမုဒယမ္ပိ ပသ္သတိ, ဒုက္ခနိရောဓဂာမိနိံ ပဋိပဒမ္ပိ ပသ္သတိ။ ယော ဒုက္ခနိရောဓဂာမိနိံ ပဋိပဒံ ပသ္သတိ ဒုက္ခမ္ပိ သော ပသ္သတိ, ဒုက္ခသမုဒယမ္ပိ ပသ္သတိ, ဒုက္ခနိရောဓမ္ပိ ပသ္သတီ’’’တိ။ ဒသမံ။
Evaṃ vutte āyasmā gavampati thero 6 bhikkhū etadavoca – ‘‘sammukhā metaṃ, āvuso, bhagavato sutaṃ, sammukhā paṭiggahitaṃ – ‘yo , bhikkhave, dukkhaṃ passati dukkhasamudayampi so passati, dukkhanirodhampi passati, dukkhanirodhagāminiṃ paṭipadampi passati. Yo dukkhasamudayaṃ passati dukkhampi so passati, dukkhanirodhampi passati, dukkhanirodhagāminiṃ paṭipadampi passati. Yo dukkhanirodhaṃ passati dukkhampi so passati, dukkhasamudayampi passati, dukkhanirodhagāminiṃ paṭipadampi passati. Yo dukkhanirodhagāminiṃ paṭipadaṃ passati dukkhampi so passati, dukkhasamudayampi passati, dukkhanirodhampi passatī’’’ti. Dasamaṃ.
ကောဋိဂာမဝဂ္ဂော တတိယော။
Koṭigāmavaggo tatiyo.
တသ္သုဒ္ဒာနံ –
Tassuddānaṃ –
ဒ္ဝေ ဝဇ္ဇီ သမ္မာသမ္ဗုဒ္ဓော၊ အရဟံ အာသဝက္ခယော။
Dve vajjī sammāsambuddho, arahaṃ āsavakkhayo;
မိတ္တံ တထာ စ လောကော စ၊ ပရိညေယ္ယံ ဂဝမ္ပတီတိ။
Mittaṃ tathā ca loko ca, pariññeyyaṃ gavampatīti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ဂဝမ္ပတိသုတ္တဝဏ္ဏနာ • 10. Gavampatisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဂဝမ္ပတိသုတ္တဝဏ္ဏနာ • 10. Gavampatisuttavaṇṇanā
