Library / Tipiṭaka / д̇ибидага • Tipiṭaka / ан̇г̇уд̇д̇аранигааяа • Aṅguttaranikāya |
10. г̇авзсийсуд̇д̇ам̣
10. Gavesīsuttaṃ
180. згам̣ самаяам̣ бхаг̇аваа госалзсу жааригам̣ жарад̇и махад̇аа бхигкусан̇гхзна сад̣̇д̇хим̣. ад̣̇д̣̇асаа ко бхаг̇аваа ад̣̇д̇хаанамаг̇г̇аббадибанно ан̃н̃ад̇арасмим̣ бад̣̇зсз маханд̇ам̣ саалаванам̣; д̣̇исваана 1 маг̇г̇аа оггамма 2 язна д̇ам̣ саалаванам̣ д̇знубасан̇гами; убасан̇гамид̇ваа д̇ам̣ саалаванам̣ аж̇жхог̇аахзд̇ваа ан̃н̃ад̇арасмим̣ бад̣̇зсз сид̇ам̣ баад̇ваагааси.
180. Ekaṃ samayaṃ bhagavā kosalesu cārikaṃ carati mahatā bhikkhusaṅghena saddhiṃ. Addasā kho bhagavā addhānamaggappaṭipanno aññatarasmiṃ padese mahantaṃ sālavanaṃ; disvāna 3 maggā okkamma 4 yena taṃ sālavanaṃ tenupasaṅkami; upasaṅkamitvā taṃ sālavanaṃ ajjhogāhetvā aññatarasmiṃ padese sitaṃ pātvākāsi.
ат̇а ко ааяасмад̇о аананд̣̇асса зд̇ад̣̇ахоси – ‘‘го ну ко хзд̇у го бажжаяо бхаг̇авад̇о сид̇асса баад̇угаммааяа? на агааран̣зна д̇ат̇ааг̇ад̇аа сид̇ам̣ баад̇угаронд̇ий’’д̇и. ат̇а ко ааяасмаа аананд̣̇о бхаг̇аванд̇ам̣ зд̇ад̣̇авожа – ‘‘го ну ко, бханд̇з, хзд̇у го бажжаяо бхаг̇авад̇о сид̇асса баад̇угаммааяа? на агааран̣зна д̇ат̇ааг̇ад̇аа сид̇ам̣ баад̇угаронд̇ий’’д̇и.
Atha kho āyasmato ānandassa etadahosi – ‘‘ko nu kho hetu ko paccayo bhagavato sitassa pātukammāya? Na akāraṇena tathāgatā sitaṃ pātukarontī’’ti. Atha kho āyasmā ānando bhagavantaṃ etadavoca – ‘‘ko nu kho, bhante, hetu ko paccayo bhagavato sitassa pātukammāya? Na akāraṇena tathāgatā sitaṃ pātukarontī’’ti.
‘‘бхууд̇абуб̣б̣ам̣, аананд̣̇а, имасмим̣ бад̣̇зсз наг̇арам̣ ахоси ид̣̇д̇хан̃жзва пийд̇ан̃жа б̣ахуж̇анам̣ аагин̣н̣амануссам̣. д̇ам̣ ко банаананд̣̇а, наг̇арам̣ гассабо бхаг̇аваа арахам̣ саммаасамб̣уд̣̇д̇хо убаниссааяа вихааси. гассабасса ко банаананд̣̇а, бхаг̇авад̇о арахад̇о саммаасамб̣уд̣̇д̇хасса г̇авзсий наама убаасаго ахоси сийлзсу абарибуурагаарий. г̇авзсинаа ко, аананд̣̇а, убаасагзна бан̃жамад̇д̇аани убаасагасад̇аани бадид̣̇зсид̇аани самаад̣̇абид̇аани 5 ахзсум̣ сийлзсу абарибуурагаарино. ат̇а ко, аананд̣̇а, г̇авзсисса убаасагасса зд̇ад̣̇ахоси – ‘ахам̣ ко имзсам̣ бан̃жаннам̣ убаасагасад̇аанам̣ б̣ахуубагааро 6 буб̣б̣ан̇г̇амо самаад̣̇абзд̇аа 7, ахан̃жамхи сийлзсу абарибуурагаарий, имаани жа бан̃жа убаасагасад̇аани сийлзсу абарибуурагаарино. ижжзд̇ам̣ самасамам̣, над̇т̇и гин̃жи ад̇ирзгам̣; ханд̣̇аахам̣ ад̇ирзгааяаа’’’д̇и.
‘‘Bhūtapubbaṃ, ānanda, imasmiṃ padese nagaraṃ ahosi iddhañceva phītañca bahujanaṃ ākiṇṇamanussaṃ. Taṃ kho panānanda, nagaraṃ kassapo bhagavā arahaṃ sammāsambuddho upanissāya vihāsi. Kassapassa kho panānanda, bhagavato arahato sammāsambuddhassa gavesī nāma upāsako ahosi sīlesu aparipūrakārī. Gavesinā kho, ānanda, upāsakena pañcamattāni upāsakasatāni paṭidesitāni samādapitāni 8 ahesuṃ sīlesu aparipūrakārino. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro 9 pubbaṅgamo samādapetā 10, ahañcamhi sīlesu aparipūrakārī, imāni ca pañca upāsakasatāni sīlesu aparipūrakārino. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ат̇а ко, аананд̣̇а, г̇авзсий убаасаго язна д̇аани бан̃жа убаасагасад̇аани д̇знубасан̇гами; убасан̇гамид̇ваа д̇аани бан̃жа убаасагасад̇аани зд̇ад̣̇авожа – ‘аж̇ж̇ад̇аг̇г̇з мам̣ ааяасманд̇о сийлзсу барибуурагаарим̣ д̇хаарзт̇аа’д̇и! ат̇а ко, аананд̣̇а, д̇зсам̣ бан̃жаннам̣ убаасагасад̇аанам̣ зд̇ад̣̇ахоси – ‘аяяо ко г̇авзсий амхаагам̣ б̣ахуубагааро буб̣б̣ан̇г̇амо самаад̣̇абзд̇аа . аяяо хи наама г̇авзсий сийлзсу барибуурагаарий бхависсад̇и. гиман̇г̇ам̣ 11 бана маяа’нд̇и 12! ат̇а ко, аананд̣̇а, д̇аани бан̃жа убаасагасад̇аани язна г̇авзсий убаасаго д̇знубасан̇гамим̣су; убасан̇гамид̇ваа г̇авзсим̣ убаасагам̣ зд̇ад̣̇авожум̣ – ‘аж̇ж̇ад̇аг̇г̇з аяяо г̇авзсий имааниби бан̃жа убаасагасад̇аани сийлзсу барибуурагаарино д̇хаарзд̇уу’д̇и. ат̇а ко, аананд̣̇а, г̇авзсисса убаасагасса зд̇ад̣̇ахоси – ‘ахам̣ ко имзсам̣ бан̃жаннам̣ убаасагасад̇аанам̣ б̣ахуубагааро буб̣б̣ан̇г̇амо самаад̣̇абзд̇аа, ахан̃жамхи сийлзсу барибуурагаарий, имааниби бан̃жа убаасагасад̇аани сийлзсу барибуурагаарино . ижжзд̇ам̣ самасамам̣, над̇т̇и гин̃жи ад̇ирзгам̣; ханд̣̇аахам̣ ад̇ирзгааяаа’’’д̇и!
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto sīlesu paripūrakāriṃ dhārethā’ti! Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā . Ayyo hi nāma gavesī sīlesu paripūrakārī bhavissati. Kimaṅgaṃ 13 pana maya’nti 14! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni sīlesu paripūrakārino dhāretū’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā, ahañcamhi sīlesu paripūrakārī, imānipi pañca upāsakasatāni sīlesu paripūrakārino . Iccetaṃ samasamaṃ, natthi kiñci atirekaṃ; handāhaṃ atirekāyā’’’ti!
‘‘ат̇а ко, аананд̣̇а, г̇авзсий убаасаго язна д̇аани бан̃жа убаасагасад̇аани д̇знубасан̇гами; убасан̇гамид̇ваа д̇аани бан̃жа убаасагасад̇аани зд̇ад̣̇авожа – ‘аж̇ж̇ад̇аг̇г̇з мам̣ ааяасманд̇о б̣рахмажаарим̣ д̇хаарзт̇а аараажаари 15 вирад̇ам̣ мзт̇унаа г̇аамад̇хаммаа’д̇и. ат̇а ко, аананд̣̇а, д̇зсам̣ бан̃жаннам̣ убаасагасад̇аанам̣ зд̇ад̣̇ахоси – ‘аяяо ко г̇авзсий амхаагам̣ б̣ахуубагааро буб̣б̣ан̇г̇амо самаад̣̇абзд̇аа. аяяо хи наама г̇авзсий б̣рахмажаарий бхависсад̇и аараажаарий вирад̇о мзт̇унаа г̇аамад̇хаммаа. гиман̇г̇ам̣ бана маяа’нд̇и! ат̇а ко, аананд̣̇а, д̇аани бан̃жа убаасагасад̇аани язна г̇авзсий убаасаго д̇знубасан̇гамим̣су; убасан̇гамид̇ваа г̇авзсим̣ убаасагам̣ зд̇ад̣̇авожум̣ – ‘аж̇ж̇ад̇аг̇г̇з аяяо г̇авзсий имааниби бан̃жа убаасагасад̇аани б̣рахмажаарино д̇хаарзд̇у аараажаарино вирад̇аа мзт̇унаа г̇аамад̇хаммаа’д̇и. ат̇а ко, аананд̣̇а, г̇авзсисса убаасагасса зд̇ад̣̇ахоси – ‘ахам̣ ко имзсам̣ бан̃жаннам̣ убаасагасад̇аанам̣ б̣ахуубагааро буб̣б̣ан̇г̇амо самаад̣̇абзд̇аа. ахан̃жамхи сийлзсу барибуурагаарий. имааниби бан̃жа убаасагасад̇аани сийлзсу барибуурагаарино. ахан̃жамхи б̣рахмажаарий аараажаарий вирад̇о мзт̇унаа г̇аамад̇хаммаа. имааниби бан̃жа убаасагасад̇аани б̣рахмажаарино аараажаарино вирад̇аа мзт̇унаа г̇аамад̇хаммаа. ижжзд̇ам̣ самасамам̣, над̇т̇и гин̃жи ад̇ирзгам̣; ханд̣̇аахам̣ ад̇ирзгааяаа’’’д̇и.
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto brahmacāriṃ dhāretha ārācāri 16 virataṃ methunā gāmadhammā’ti. Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā. Ayyo hi nāma gavesī brahmacārī bhavissati ārācārī virato methunā gāmadhammā. Kimaṅgaṃ pana maya’nti! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni brahmacārino dhāretu ārācārino viratā methunā gāmadhammā’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā. Ahañcamhi sīlesu paripūrakārī. Imānipi pañca upāsakasatāni sīlesu paripūrakārino. Ahañcamhi brahmacārī ārācārī virato methunā gāmadhammā. Imānipi pañca upāsakasatāni brahmacārino ārācārino viratā methunā gāmadhammā. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ат̇а ко, аананд̣̇а, г̇авзсий убаасаго язна д̇аани бан̃жа убаасагасад̇аани д̇знубасан̇гами; убасан̇гамид̇ваа д̇аани бан̃жа убаасагасад̇аани зд̇ад̣̇авожа – ‘аж̇ж̇ад̇аг̇г̇з мам̣ ааяасманд̇о згабхад̇д̇игам̣ д̇хаарзт̇а рад̇д̇уубарад̇ам̣ вирад̇ам̣ вигаалабхож̇анаа’д̇и. ат̇а ко, аананд̣̇а, д̇зсам̣ бан̃жаннам̣ убаасагасад̇аанам̣ зд̇ад̣̇ахоси – ‘аяяо ко г̇авзсий б̣ахуубагааро буб̣б̣ан̇г̇амо самаад̣̇абзд̇аа. аяяо хи наама г̇авзсий згабхад̇д̇иго бхависсад̇и рад̇д̇уубарад̇о вирад̇о вигаалабхож̇анаа. гиман̇г̇ам̣ бана маяа’нд̇и! ат̇а ко, аананд̣̇а, д̇аани бан̃жа убаасагасад̇аани язна г̇авзсий убаасаго д̇знубасан̇гамим̣су; убасан̇гамид̇ваа г̇авзсим̣ убаасагам̣ зд̇ад̣̇авожум̣ – ‘аж̇ж̇ад̇аг̇г̇з аяяо г̇авзсий имааниби бан̃жа убаасагасад̇аани згабхад̇д̇игз д̇хаарзд̇у рад̇д̇уубарад̇з вирад̇з вигаалабхож̇анаа’д̇и. ат̇а ко, аананд̣̇а, г̇авзсисса убаасагасса зд̇ад̣̇ахоси – ‘ахам̣ ко имзсам̣ бан̃жаннам̣ убаасагасад̇аанам̣ б̣ахуубагааро буб̣б̣ан̇г̇амо самаад̣̇абзд̇аа. ахан̃жамхи сийлзсу барибуурагаарий. имааниби бан̃жа убаасагасад̇аани сийлзсу барибуурагаарино. ахан̃жамхи б̣рахмажаарий аараажаарий вирад̇о мзт̇унаа г̇аамад̇хаммаа. имааниби бан̃жа убаасагасад̇аани б̣рахмажаарино аараажаарино вирад̇аа мзт̇унаа г̇аамад̇хаммаа. ахан̃жамхи згабхад̇д̇иго рад̇д̇уубарад̇о вирад̇о вигаалабхож̇анаа. имааниби бан̃жа убаасагасад̇аани згабхад̇д̇игаа рад̇д̇уубарад̇аа вирад̇аа вигаалабхож̇анаа. ижжзд̇ам̣ самасамам̣, над̇т̇и гин̃жи ад̇ирзгам̣; ханд̣̇аахам̣ ад̇ирзгааяаа’’’д̇и.
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto ekabhattikaṃ dhāretha rattūparataṃ virataṃ vikālabhojanā’ti. Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī bahūpakāro pubbaṅgamo samādapetā. Ayyo hi nāma gavesī ekabhattiko bhavissati rattūparato virato vikālabhojanā. Kimaṅgaṃ pana maya’nti! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni ekabhattike dhāretu rattūparate virate vikālabhojanā’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā. Ahañcamhi sīlesu paripūrakārī. Imānipi pañca upāsakasatāni sīlesu paripūrakārino. Ahañcamhi brahmacārī ārācārī virato methunā gāmadhammā. Imānipi pañca upāsakasatāni brahmacārino ārācārino viratā methunā gāmadhammā. Ahañcamhi ekabhattiko rattūparato virato vikālabhojanā. Imānipi pañca upāsakasatāni ekabhattikā rattūparatā viratā vikālabhojanā. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ат̇а ко, аананд̣̇а, г̇авзсий убаасаго язна гассабо бхаг̇аваа арахам̣ саммаасамб̣уд̣̇д̇хо д̇знубасан̇гами ; убасан̇гамид̇ваа гассабам̣ бхаг̇аванд̇ам̣ араханд̇ам̣ саммаасамб̣уд̣̇д̇хам̣ зд̇ад̣̇авожа – ‘лабхзяяаахам̣, бханд̇з, бхаг̇авад̇о санд̇игз баб̣б̣аж̇ж̇ам̣ лабхзяяам̣ убасамбад̣̇а’нд̇и. алад̇т̇а ко, аананд̣̇а, г̇авзсий убаасаго гассабасса бхаг̇авад̇о арахад̇о саммаасамб̣уд̣̇д̇хасса санд̇игз баб̣б̣аж̇ж̇ам̣, алад̇т̇а убасамбад̣̇ам̣. ажируубасамбанно ко банаананд̣̇а, г̇авзсий бхигку зго вуубагадто аббамад̇д̇о аад̇аабий бахид̇ад̇д̇о вихаранд̇о нажирассзва – яассад̇т̇ааяа гулабуд̇д̇аа саммад̣̇зва аг̇аарасмаа анаг̇аарияам̣ баб̣б̣аж̇анд̇и, д̇ад̣̇ануд̇д̇арам̣ – б̣рахмажарияабарияосаанам̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихааси. ‘кийн̣аа ж̇аад̇и, вусид̇ам̣ б̣рахмажарияам̣, гад̇ам̣ гаран̣ийяам̣, наабарам̣ ид̇т̇ад̇д̇ааяаа’д̇и аб̣бхан̃н̃ааси. ан̃н̃ад̇аро жа банаананд̣̇а, г̇авзсий бхигку арахад̇ам̣ ахоси.
‘‘Atha kho, ānanda, gavesī upāsako yena kassapo bhagavā arahaṃ sammāsambuddho tenupasaṅkami ; upasaṅkamitvā kassapaṃ bhagavantaṃ arahantaṃ sammāsambuddhaṃ etadavoca – ‘labheyyāhaṃ, bhante, bhagavato santike pabbajjaṃ labheyyaṃ upasampada’nti. Alattha kho, ānanda, gavesī upāsako kassapassa bhagavato arahato sammāsambuddhassa santike pabbajjaṃ, alattha upasampadaṃ. Acirūpasampanno kho panānanda, gavesī bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññāsi. Aññataro ca panānanda, gavesī bhikkhu arahataṃ ahosi.
‘‘ат̇а ко, аананд̣̇а, д̇зса бан̃жаннам̣ убаасагасад̇аанам̣ зд̇ад̣̇ахоси – ‘аяяо ко г̇авзсий амхаагам̣ б̣ахуубагааро буб̣б̣ан̇г̇амо самаад̣̇абзд̇аа. аяяо хи наама г̇авзсий гзсамассум̣ охаарзд̇ваа гаасааяаани вад̇т̇аани ажчаад̣̇зд̇ваа аг̇аарасмаа анаг̇аарияам̣ баб̣б̣аж̇иссад̇и. гиман̇г̇ам̣ бана маяа’нд̇и! ат̇а ко, аананд̣̇а, д̇аани бан̃жа убаасагасад̇аани язна гассабо бхаг̇аваа арахам̣ саммаасамб̣уд̣̇д̇хо д̇знубасан̇гамим̣су ; убасан̇гамид̇ваа гассабам̣ бхаг̇аванд̇ам̣ араханд̇ам̣ саммаасамб̣уд̣̇д̇хам̣ зд̇ад̣̇авожум̣ – ‘лабхзяяаама маяам̣, бханд̇з, бхаг̇авад̇о санд̇игз баб̣б̣аж̇ж̇ам̣, лабхзяяаама убасамбад̣̇а’нд̇и. алабхим̣су ко, аананд̣̇а, д̇аани бан̃жа убаасагасад̇аани гассабасса бхаг̇авад̇о арахад̇о саммаасамб̣уд̣̇д̇хасса санд̇игз баб̣б̣аж̇ж̇ам̣, алабхим̣су убасамбад̣̇ам̣.
‘‘Atha kho, ānanda, tesa pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā. Ayyo hi nāma gavesī kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissati. Kimaṅgaṃ pana maya’nti! Atha kho, ānanda, tāni pañca upāsakasatāni yena kassapo bhagavā arahaṃ sammāsambuddho tenupasaṅkamiṃsu ; upasaṅkamitvā kassapaṃ bhagavantaṃ arahantaṃ sammāsambuddhaṃ etadavocuṃ – ‘labheyyāma mayaṃ, bhante, bhagavato santike pabbajjaṃ, labheyyāma upasampada’nti. Alabhiṃsu kho, ānanda, tāni pañca upāsakasatāni kassapassa bhagavato arahato sammāsambuddhassa santike pabbajjaṃ, alabhiṃsu upasampadaṃ.
‘‘ат̇а ко, аананд̣̇а, г̇авзсисса бхигкуно зд̇ад̣̇ахоси – ‘ахам̣ ко имасса ануд̇д̇арасса вимуд̇д̇исукасса нигаамалаабхий хоми агижчалаабхий агасиралаабхий. ахо вад̇имааниби бан̃жа бхигкусад̇аани имасса ануд̇д̇арасса вимуд̇д̇исукасса нигаамалаабхино ассу агижчалаабхино агасиралаабхино’д̇и. ат̇а ко, аананд̣̇а, д̇аани бан̃жа бхигкусад̇аани вуубагадтаа 17 аббамад̇д̇аа аад̇аабино бахид̇ад̇д̇аа вихаранд̇аа нажирассзва – яассад̇т̇ааяа гулабуд̇д̇аа саммад̣̇зва аг̇аарасмаа анаг̇аарияам̣ баб̣б̣аж̇анд̇и, д̇ад̣̇ануд̇д̇арам̣ – б̣рахмажарияабарияосаанам̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихарим̣су. ‘кийн̣аа ж̇аад̇и, вусид̇ам̣ б̣рахмажарияам̣, гад̇ам̣ гаран̣ийяам̣, наабарам̣ ид̇т̇ад̇д̇ааяаа’д̇и аб̣бхан̃н̃им̣су’’.
‘‘Atha kho, ānanda, gavesissa bhikkhuno etadahosi – ‘ahaṃ kho imassa anuttarassa vimuttisukhassa nikāmalābhī homi akicchalābhī akasiralābhī. Aho vatimānipi pañca bhikkhusatāni imassa anuttarassa vimuttisukhassa nikāmalābhino assu akicchalābhino akasiralābhino’ti. Atha kho, ānanda, tāni pañca bhikkhusatāni vūpakaṭṭhā 18 appamattā ātāpino pahitattā viharantā nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihariṃsu. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññiṃsu’’.
‘‘ид̇и ко , аананд̣̇а, д̇аани бан̃жа бхигкусад̇аани г̇авзсийбамукаани уд̇д̇аруд̇д̇ари 19 бан̣ийд̇абан̣ийд̇ам̣ вааяамамаанаа ануд̇д̇арам̣ вимуд̇д̇им̣ сажчаагам̣су. д̇асмаад̇иха, аананд̣̇а, звам̣ сигкид̇аб̣б̣ам̣ – ‘уд̇д̇аруд̇д̇ари бан̣ийд̇абан̣ийд̇ам̣ вааяамамаанаа ануд̇д̇арам̣ вимуд̇д̇им̣ сажчигариссаамаа’д̇и. зван̃хи во, аананд̣̇а, сигкид̇аб̣б̣а’’нд̇и. д̣̇асамам̣.
‘‘Iti kho , ānanda, tāni pañca bhikkhusatāni gavesīpamukhāni uttaruttari 20 paṇītapaṇītaṃ vāyamamānā anuttaraṃ vimuttiṃ sacchākaṃsu. Tasmātiha, ānanda, evaṃ sikkhitabbaṃ – ‘uttaruttari paṇītapaṇītaṃ vāyamamānā anuttaraṃ vimuttiṃ sacchikarissāmā’ti. Evañhi vo, ānanda, sikkhitabba’’nti. Dasamaṃ.
убаасагаваг̇г̇о д̇ад̇ияо.
Upāsakavaggo tatiyo.
д̇ассуд̣̇д̣̇аанам̣ –
Tassuddānaṃ –
саараж̇ж̇ам̣ висаарад̣̇о нираяам̣, взрам̣ жан̣д̣аалабан̃жамам̣;
Sārajjaṃ visārado nirayaṃ, veraṃ caṇḍālapañcamaṃ;
бийд̇и ван̣иж̇ж̇аа рааж̇аано, г̇ихий жзва г̇авзсинаад̇и.
Pīti vaṇijjā rājāno, gihī ceva gavesināti.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 10. г̇авзсийсуд̇д̇аван̣н̣анаа • 10. Gavesīsuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 10. г̇авзсийсуд̇д̇аван̣н̣анаа • 10. Gavesīsuttavaṇṇanā