| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಗಯಾಸೀಸಸುತ್ತಂ
4. Gayāsīsasuttaṃ
೬೪. ಏಕಂ ಸಮಯಂ ಭಗವಾ ಗಯಾಯಂ ವಿಹರತಿ ಗಯಾಸೀಸೇ। ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ…ಪೇ॰… ‘‘ಪುಬ್ಬಾಹಂ, ಭಿಕ್ಖವೇ, ಸಮ್ಬೋಧಾ ಅನಭಿಸಮ್ಬುದ್ಧೋ ಬೋಧಿಸತ್ತೋವ ಸಮಾನೋ ಓಭಾಸಞ್ಞೇವ ಖೋ ಸಞ್ಜಾನಾಮಿ, ನೋ ಚ ರೂಪಾನಿ ಪಸ್ಸಾಮಿ’’।
64. Ekaṃ samayaṃ bhagavā gayāyaṃ viharati gayāsīse. Tatra kho bhagavā bhikkhū āmantesi…pe… ‘‘pubbāhaṃ, bhikkhave, sambodhā anabhisambuddho bodhisattova samāno obhāsaññeva kho sañjānāmi, no ca rūpāni passāmi’’.
‘‘ತಸ್ಸ ಮಯ್ಹಂ, ಭಿಕ್ಖವೇ, ಏತದಹೋಸಿ – ‘ಸಚೇ ಖೋ ಅಹಂ ಓಭಾಸಞ್ಚೇವ ಸಞ್ಜಾನೇಯ್ಯಂ ರೂಪಾನಿ ಚ ಪಸ್ಸೇಯ್ಯಂ; ಏವಂ ಮೇ ಇದಂ ಞಾಣದಸ್ಸನಂ ಪರಿಸುದ್ಧತರಂ ಅಸ್ಸಾ’’’ತಿ।
‘‘Tassa mayhaṃ, bhikkhave, etadahosi – ‘sace kho ahaṃ obhāsañceva sañjāneyyaṃ rūpāni ca passeyyaṃ; evaṃ me idaṃ ñāṇadassanaṃ parisuddhataraṃ assā’’’ti.
‘‘ಸೋ ಖೋ ಅಹಂ, ಭಿಕ್ಖವೇ, ಅಪರೇನ ಸಮಯೇನ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಓಭಾಸಞ್ಚೇವ ಸಞ್ಜಾನಾಮಿ, ರೂಪಾನಿ ಚ ಪಸ್ಸಾಮಿ; ನೋ ಚ ಖೋ ತಾಹಿ ದೇವತಾಹಿ ಸದ್ಧಿಂ ಸನ್ತಿಟ್ಠಾಮಿ ಸಲ್ಲಪಾಮಿ ಸಾಕಚ್ಛಂ ಸಮಾಪಜ್ಜಾಮಿ।
‘‘So kho ahaṃ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi; no ca kho tāhi devatāhi saddhiṃ santiṭṭhāmi sallapāmi sākacchaṃ samāpajjāmi.
‘‘ತಸ್ಸ ಮಯ್ಹಂ, ಭಿಕ್ಖವೇ, ಏತದಹೋಸಿ – ‘ಸಚೇ ಖೋ ಅಹಂ ಓಭಾಸಞ್ಚೇವ ಸಞ್ಜಾನೇಯ್ಯಂ, ರೂಪಾನಿ ಚ ಪಸ್ಸೇಯ್ಯಂ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠೇಯ್ಯಂ ಸಲ್ಲಪೇಯ್ಯಂ ಸಾಕಚ್ಛಂ ಸಮಾಪಜ್ಜೇಯ್ಯಂ; ಏವಂ ಮೇ ಇದಂ ಞಾಣದಸ್ಸನಂ ಪರಿಸುದ್ಧತರಂ ಅಸ್ಸಾ’’’ತಿ।
‘‘Tassa mayhaṃ, bhikkhave, etadahosi – ‘sace kho ahaṃ obhāsañceva sañjāneyyaṃ, rūpāni ca passeyyaṃ, tāhi ca devatāhi saddhiṃ santiṭṭheyyaṃ sallapeyyaṃ sākacchaṃ samāpajjeyyaṃ; evaṃ me idaṃ ñāṇadassanaṃ parisuddhataraṃ assā’’’ti.
‘‘ಸೋ ಖೋ ಅಹಂ, ಭಿಕ್ಖವೇ, ಅಪರೇನ ಸಮಯೇನ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಓಭಾಸಞ್ಚೇವ ಸಞ್ಜಾನಾಮಿ, ರೂಪಾನಿ ಚ ಪಸ್ಸಾಮಿ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠಾಮಿ ಸಲ್ಲಪಾಮಿ ಸಾಕಚ್ಛಂ ಸಮಾಪಜ್ಜಾಮಿ; ನೋ ಚ ಖೋ ತಾ ದೇವತಾ ಜಾನಾಮಿ – ಇಮಾ ದೇವತಾ ಅಮುಕಮ್ಹಾ ವಾ ಅಮುಕಮ್ಹಾ ವಾ ದೇವನಿಕಾಯಾತಿ।
‘‘So kho ahaṃ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṃ santiṭṭhāmi sallapāmi sākacchaṃ samāpajjāmi; no ca kho tā devatā jānāmi – imā devatā amukamhā vā amukamhā vā devanikāyāti.
‘‘ತಸ್ಸ ಮಯ್ಹಂ, ಭಿಕ್ಖವೇ, ಏತದಹೋಸಿ – ‘ಸಚೇ ಖೋ ಅಹಂ ಓಭಾಸಞ್ಚೇವ ಸಞ್ಜಾನೇಯ್ಯಂ, ರೂಪಾನಿ ಚ ಪಸ್ಸೇಯ್ಯಂ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠೇಯ್ಯಂ ಸಲ್ಲಪೇಯ್ಯಂ ಸಾಕಚ್ಛಂ ಸಮಾಪಜ್ಜೇಯ್ಯಂ, ತಾ ಚ ದೇವತಾ ಜಾನೇಯ್ಯಂ – ಇಮಾ ದೇವತಾ ಅಮುಕಮ್ಹಾ ವಾ ಅಮುಕಮ್ಹಾ ವಾ ದೇವನಿಕಾಯಾ’ತಿ; ಏವಂ ಮೇ ಇದಂ ಞಾಣದಸ್ಸನಂ ಪರಿಸುದ್ಧತರಂ ಅಸ್ಸಾ’’’ತಿ।
‘‘Tassa mayhaṃ, bhikkhave, etadahosi – ‘sace kho ahaṃ obhāsañceva sañjāneyyaṃ, rūpāni ca passeyyaṃ, tāhi ca devatāhi saddhiṃ santiṭṭheyyaṃ sallapeyyaṃ sākacchaṃ samāpajjeyyaṃ, tā ca devatā jāneyyaṃ – imā devatā amukamhā vā amukamhā vā devanikāyā’ti; evaṃ me idaṃ ñāṇadassanaṃ parisuddhataraṃ assā’’’ti.
‘‘ಸೋ ಖೋ ಅಹಂ, ಭಿಕ್ಖವೇ, ಅಪರೇನ ಸಮಯೇನ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಓಭಾಸಞ್ಚೇವ ಸಞ್ಜಾನಾಮಿ, ರೂಪಾನಿ ಚ ಪಸ್ಸಾಮಿ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠಾಮಿ ಸಲ್ಲಪಾಮಿ ಸಾಕಚ್ಛಂ ಸಮಾಪಜ್ಜಾಮಿ, ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಅಮುಕಮ್ಹಾ ವಾ ಅಮುಕಮ್ಹಾ ವಾ ದೇವನಿಕಾಯಾ’ತಿ; ನೋ ಚ ಖೋ ತಾ ದೇವತಾ ಜಾನಾಮಿ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಇತೋ ಚುತಾ ತತ್ಥ ಉಪಪನ್ನಾ’ತಿ…ಪೇ॰… ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಇತೋ ಚುತಾ ತತ್ಥ ಉಪಪನ್ನಾ’ತಿ; ನೋ ಚ ಖೋ ತಾ ದೇವತಾ ಜಾನಾಮಿ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಏವಮಾಹಾರಾ ಏವಂಸುಖದುಕ್ಖಪ್ಪಟಿಸಂವೇದಿನಿಯೋ’ತಿ …ಪೇ॰… ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಏವಮಾಹಾರಾ ಏವಂಸುಖದುಕ್ಖಪ್ಪಟಿಸಂವೇದಿನಿಯೋ’ತಿ; ನೋ ಚ ಖೋ ತಾ ದೇವತಾ ಜಾನಾಮಿ – ‘ಇಮಾ ದೇವತಾ ಏವಂದೀಘಾಯುಕಾ ಏವಂಚಿರಟ್ಠಿತಿಕಾ’ತಿ…ಪೇ॰… ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಏವಂದೀಘಾಯುಕಾ ಏವಂಚಿರಟ್ಠಿತಿಕಾ’ತಿ; ನೋ ಚ ಖೋ ತಾ ದೇವತಾ ಜಾನಾಮಿ ಯದಿ ವಾ ಮೇ ಇಮಾಹಿ ದೇವತಾಹಿ ಸದ್ಧಿಂ ಸನ್ನಿವುತ್ಥಪುಬ್ಬಂ ಯದಿ ವಾ ನ ಸನ್ನಿವುತ್ಥಪುಬ್ಬನ್ತಿ।
‘‘So kho ahaṃ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṃ santiṭṭhāmi sallapāmi sākacchaṃ samāpajjāmi, tā ca devatā jānāmi – ‘imā devatā amukamhā vā amukamhā vā devanikāyā’ti; no ca kho tā devatā jānāmi – ‘imā devatā imassa kammassa vipākena ito cutā tattha upapannā’ti…pe… tā ca devatā jānāmi – ‘imā devatā imassa kammassa vipākena ito cutā tattha upapannā’ti; no ca kho tā devatā jānāmi – ‘imā devatā imassa kammassa vipākena evamāhārā evaṃsukhadukkhappaṭisaṃvediniyo’ti …pe… tā ca devatā jānāmi – ‘imā devatā imassa kammassa vipākena evamāhārā evaṃsukhadukkhappaṭisaṃvediniyo’ti; no ca kho tā devatā jānāmi – ‘imā devatā evaṃdīghāyukā evaṃciraṭṭhitikā’ti…pe… tā ca devatā jānāmi – ‘imā devatā evaṃdīghāyukā evaṃciraṭṭhitikā’ti; no ca kho tā devatā jānāmi yadi vā me imāhi devatāhi saddhiṃ sannivutthapubbaṃ yadi vā na sannivutthapubbanti.
‘‘ತಸ್ಸ ಮಯ್ಹಂ, ಭಿಕ್ಖವೇ, ಏತದಹೋಸಿ – ‘ಸಚೇ ಖೋ ಅಹಂ ಓಭಾಸಞ್ಚೇವ ಸಞ್ಜಾನೇಯ್ಯಂ, ರೂಪಾನಿ ಚ ಪಸ್ಸೇಯ್ಯಂ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠೇಯ್ಯಂ ಸಲ್ಲಪೇಯ್ಯಂ ಸಾಕಚ್ಛಂ ಸಮಾಪಜ್ಜೇಯ್ಯಂ , ತಾ ಚ ದೇವತಾ ಜಾನೇಯ್ಯಂ – ‘ಇಮಾ ದೇವತಾ ಅಮುಕಮ್ಹಾ ವಾ ಅಮುಕಮ್ಹಾ ವಾ ದೇವನಿಕಾಯಾ’ತಿ, ತಾ ಚ ದೇವತಾ ಜಾನೇಯ್ಯಂ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಇತೋ ಚುತಾ ತತ್ಥ ಉಪಪನ್ನಾ’ತಿ, ತಾ ಚ ದೇವತಾ ಜಾನೇಯ್ಯಂ – ‘ಇಮಾ ದೇವತಾ ಏವಮಾಹಾರಾ ಏವಂಸುಖದುಕ್ಖಪ್ಪಟಿಸಂವೇದಿನಿಯೋ’ತಿ, ತಾ ಚ ದೇವತಾ ಜಾನೇಯ್ಯಂ – ‘ಇಮಾ ದೇವತಾ ಏವಂದೀಘಾಯುಕಾ ಏವಂಚಿರಟ್ಠಿತಿಕಾ’ತಿ, ತಾ ಚ ದೇವತಾ ಜಾನೇಯ್ಯಂ ಯದಿ ವಾ ಮೇ ಇಮಾಹಿ ದೇವತಾಹಿ ಸದ್ಧಿಂ ಸನ್ನಿವುತ್ಥಪುಬ್ಬಂ ಯದಿ ವಾ ನ ಸನ್ನಿವುತ್ಥಪುಬ್ಬನ್ತಿ; ಏವಂ ಮೇ ಇದಂ ಞಾಣದಸ್ಸನಂ ಪರಿಸುದ್ಧತರಂ ಅಸ್ಸಾ’’’ತಿ।
‘‘Tassa mayhaṃ, bhikkhave, etadahosi – ‘sace kho ahaṃ obhāsañceva sañjāneyyaṃ, rūpāni ca passeyyaṃ, tāhi ca devatāhi saddhiṃ santiṭṭheyyaṃ sallapeyyaṃ sākacchaṃ samāpajjeyyaṃ , tā ca devatā jāneyyaṃ – ‘imā devatā amukamhā vā amukamhā vā devanikāyā’ti, tā ca devatā jāneyyaṃ – ‘imā devatā imassa kammassa vipākena ito cutā tattha upapannā’ti, tā ca devatā jāneyyaṃ – ‘imā devatā evamāhārā evaṃsukhadukkhappaṭisaṃvediniyo’ti, tā ca devatā jāneyyaṃ – ‘imā devatā evaṃdīghāyukā evaṃciraṭṭhitikā’ti, tā ca devatā jāneyyaṃ yadi vā me imāhi devatāhi saddhiṃ sannivutthapubbaṃ yadi vā na sannivutthapubbanti; evaṃ me idaṃ ñāṇadassanaṃ parisuddhataraṃ assā’’’ti.
‘‘ಸೋ ಖೋ ಅಹಂ, ಭಿಕ್ಖವೇ, ಅಪರೇನ ಸಮಯೇನ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ಓಭಾಸಞ್ಚೇವ ಸಞ್ಜಾನಾಮಿ, ರೂಪಾನಿ ಚ ಪಸ್ಸಾಮಿ, ತಾಹಿ ಚ ದೇವತಾಹಿ ಸದ್ಧಿಂ ಸನ್ತಿಟ್ಠಾಮಿ ಸಲ್ಲಪಾಮಿ ಸಾಕಚ್ಛಂ ಸಮಾಪಜ್ಜಾಮಿ, ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಅಮುಕಮ್ಹಾ ವಾ ಅಮುಕಮ್ಹಾ ವಾ ದೇವನಿಕಾಯಾ’ತಿ, ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಇಮಸ್ಸ ಕಮ್ಮಸ್ಸ ವಿಪಾಕೇನ ಇತೋ ಚುತಾ ತತ್ಥ ಉಪಪನ್ನಾ’ತಿ, ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಏವಮಾಹಾರಾ ಏವಂಸುಖದುಕ್ಖಪ್ಪಟಿಸಂವೇದಿನಿಯೋ’ತಿ , ತಾ ಚ ದೇವತಾ ಜಾನಾಮಿ – ‘ಇಮಾ ದೇವತಾ ಏವಂದೀಘಾಯುಕಾ ಏವಂಚಿರಟ್ಠಿತಿಕಾ’ತಿ, ತಾ ಚ ದೇವತಾ ಜಾನಾಮಿ ಯದಿ ವಾ ಮೇ ದೇವತಾಹಿ ಸದ್ಧಿಂ ಸನ್ನಿವುತ್ಥಪುಬ್ಬಂ ಯದಿ ವಾ ನ ಸನ್ನಿವುತ್ಥಪುಬ್ಬನ್ತಿ।
‘‘So kho ahaṃ, bhikkhave, aparena samayena appamatto ātāpī pahitatto viharanto obhāsañceva sañjānāmi, rūpāni ca passāmi, tāhi ca devatāhi saddhiṃ santiṭṭhāmi sallapāmi sākacchaṃ samāpajjāmi, tā ca devatā jānāmi – ‘imā devatā amukamhā vā amukamhā vā devanikāyā’ti, tā ca devatā jānāmi – ‘imā devatā imassa kammassa vipākena ito cutā tattha upapannā’ti, tā ca devatā jānāmi – ‘imā devatā evamāhārā evaṃsukhadukkhappaṭisaṃvediniyo’ti , tā ca devatā jānāmi – ‘imā devatā evaṃdīghāyukā evaṃciraṭṭhitikā’ti, tā ca devatā jānāmi yadi vā me devatāhi saddhiṃ sannivutthapubbaṃ yadi vā na sannivutthapubbanti.
‘‘ಯಾವಕೀವಞ್ಚ ಮೇ, ಭಿಕ್ಖವೇ, ಏವಂ ಅಟ್ಠಪರಿವಟ್ಟಂ ಅಧಿದೇವಞಾಣದಸ್ಸನಂ ನ ಸುವಿಸುದ್ಧಂ ಅಹೋಸಿ, ನೇವ ತಾವಾಹಂ, ಭಿಕ್ಖವೇ, ‘ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ 1 ಪಚ್ಚಞ್ಞಾಸಿಂ। ಯತೋ ಚ ಖೋ ಮೇ , ಭಿಕ್ಖವೇ, ಏವಂ ಅಟ್ಠಪರಿವಟ್ಟಂ ಅಧಿದೇವಞಾಣದಸ್ಸನಂ ಸುವಿಸುದ್ಧಂ ಅಹೋಸಿ, ಅಥಾಹಂ, ಭಿಕ್ಖವೇ, ‘ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ ಪಚ್ಚಞ್ಞಾಸಿಂ; ಞಾಣಞ್ಚ ಪನ ಮೇ ದಸ್ಸನಂ ಉದಪಾದಿ; ಅಕುಪ್ಪಾ ಮೇ ಚೇತೋವಿಮುತ್ತಿ 2; ಅಯಮನ್ತಿಮಾ ಜಾತಿ ನತ್ಥಿ ದಾನಿ ಪುನಬ್ಭವೋ’’ತಿ। ಚತುತ್ಥಂ।
‘‘Yāvakīvañca me, bhikkhave, evaṃ aṭṭhaparivaṭṭaṃ adhidevañāṇadassanaṃ na suvisuddhaṃ ahosi, neva tāvāhaṃ, bhikkhave, ‘sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho’ti 3 paccaññāsiṃ. Yato ca kho me , bhikkhave, evaṃ aṭṭhaparivaṭṭaṃ adhidevañāṇadassanaṃ suvisuddhaṃ ahosi, athāhaṃ, bhikkhave, ‘sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddho’ti paccaññāsiṃ; ñāṇañca pana me dassanaṃ udapādi; akuppā me cetovimutti 4; ayamantimā jāti natthi dāni punabbhavo’’ti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಗಯಾಸೀಸಸುತ್ತವಣ್ಣನಾ • 4. Gayāsīsasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೫. ಇಚ್ಛಾಸುತ್ತಾದಿವಣ್ಣನಾ • 1-5. Icchāsuttādivaṇṇanā
