| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
3. гхадасуд̇д̇аван̣н̣анаа
3. Ghaṭasuttavaṇṇanā
237. д̇ад̇ияз згавихаарзд̇и згасмим̣ г̇аб̣бхз. д̇ад̣̇аа гира б̣ахуу ааг̇анд̇угаа бхигкуу саннибад̇им̣су. д̇асмим̣ баривзн̣аг̇г̇зна ваа вихаараг̇г̇зна ваа сзнаасанзсу абаабун̣анд̇зсу д̣̇виннам̣ т̇зраанам̣ зго г̇аб̣бхо самбад̇д̇о. д̇з д̣̇иваа баадиязггзсу таанзсу нисийд̣̇анд̇и, рад̇д̇им̣ бана нзсам̣ анд̇арз жийварасаан̣им̣ басаарзнд̇и. д̇з ад̇д̇ано ад̇д̇ано бад̇д̇абад̇д̇адтаанзязва нисийд̣̇анд̇и. д̇зна вуд̇д̇ам̣ ‘‘згавихаарз’’д̇и. ол̣ааригзнаад̇и ид̣̇ам̣ ол̣ааригаарамман̣ад̇ам̣ санд̇хааяа вуд̇д̇ам̣. д̣̇иб̣б̣ажагкуд̣̇иб̣б̣асод̇ад̇хаад̇увихаарзна хи со вихааси, д̇зсан̃жа руубааяад̇анасад̣̇д̣̇ааяад̇анасан̇каад̇ам̣ ол̣ааригам̣ аарамман̣ам̣. ид̇и д̣̇иб̣б̣ажагкунаа руубасса д̣̇идтад̇д̇аа д̣̇иб̣б̣ааяа жа сод̇ад̇хаад̇уяаа сад̣̇д̣̇асса суд̇ад̇д̇аа со вихааро ол̣аариго наама ж̇аад̇о. д̣̇иб̣б̣ажагку висуж̇жхийд̇и бхаг̇авад̇о руубад̣̇ассанад̇т̇ааяа висуд̣̇д̇хам̣ ахоси. д̣̇иб̣б̣аа жа сод̇ад̇хаад̇ууд̇и сааби бхаг̇авад̇о сад̣̇д̣̇асун̣анад̇т̇ам̣ висуж̇жхи . бхаг̇авад̇оби т̇зрасса руубад̣̇ассанад̇т̇ан̃жзва сад̣̇д̣̇асун̣анад̇т̇ан̃жа д̇ад̣̇убхаяам̣ висуж̇жхи. д̇ад̣̇аа гира т̇зро ‘‘гат̇ам̣ ну ко зд̇арахи сад̇т̇аа вихарад̇ий’’д̇и аалогам̣ вад̣дхзд̇ваа д̣̇иб̣б̣зна жагкунаа сад̇т̇аарам̣ ж̇зд̇аванз вихаарз г̇анд̇хагудияам̣ нисиннам̣ д̣̇исваа д̇асса д̣̇иб̣б̣ааяа сод̇ад̇хаад̇уяаа сад̣̇д̣̇ам̣ сун̣и. сад̇т̇ааби д̇ат̇зва агааси. звам̣ д̇з ан̃н̃аман̃н̃ам̣ бассим̣су жзва, сад̣̇д̣̇ан̃жа ассосум̣.
237. Tatiye ekavihāreti ekasmiṃ gabbhe. Tadā kira bahū āgantukā bhikkhū sannipatiṃsu. Tasmiṃ pariveṇaggena vā vihāraggena vā senāsanesu apāpuṇantesu dvinnaṃ therānaṃ eko gabbho sampatto. Te divā pāṭiyekkesu ṭhānesu nisīdanti, rattiṃ pana nesaṃ antare cīvarasāṇiṃ pasārenti. Te attano attano pattapattaṭṭhāneyeva nisīdanti. Tena vuttaṃ ‘‘ekavihāre’’ti. Oḷārikenāti idaṃ oḷārikārammaṇataṃ sandhāya vuttaṃ. Dibbacakkhudibbasotadhātuvihārena hi so vihāsi, tesañca rūpāyatanasaddāyatanasaṅkhātaṃ oḷārikaṃ ārammaṇaṃ. Iti dibbacakkhunā rūpassa diṭṭhattā dibbāya ca sotadhātuyā saddassa sutattā so vihāro oḷāriko nāma jāto. Dibbacakkhu visujjhīti bhagavato rūpadassanatthāya visuddhaṃ ahosi. Dibbā ca sotadhātūti sāpi bhagavato saddasuṇanatthaṃ visujjhi . Bhagavatopi therassa rūpadassanatthañceva saddasuṇanatthañca tadubhayaṃ visujjhi. Tadā kira thero ‘‘kathaṃ nu kho etarahi satthā viharatī’’ti ālokaṃ vaḍḍhetvā dibbena cakkhunā satthāraṃ jetavane vihāre gandhakuṭiyaṃ nisinnaṃ disvā tassa dibbāya sotadhātuyā saddaṃ suṇi. Satthāpi tatheva akāsi. Evaṃ te aññamaññaṃ passiṃsu ceva, saddañca assosuṃ.
аарад̣̇д̇хавийрияод̇и барибун̣н̣авийрияо баг̇г̇ахид̇авийрияо. яаавад̣̇зва убанигкзбанамад̇д̇ааяаад̇и д̇ияож̇анасахассавид̇т̇аарасса химавад̇о санд̇игз табид̇аа саасабамад̇д̇аа баасаан̣асагкараа ‘‘химаваа ну ко махаа, аяам̣ ну ко баасаан̣асагкараа’’д̇и звам̣ яаава убанигкзбанамад̇д̇ассзва ад̇т̇ааяа бхавзяяаад̇и вуд̇д̇ам̣ ход̇и. барад̇оби зсзва наяо. габбанд̇и ааяугаббам̣. лон̣агхадааяаад̇и жаггаваал̣амукаваддияаа аад̇хаарагам̣ гад̇ваа мукаваддияаа б̣рахмалогам̣ аахажжа тид̇ааяа лон̣ажаадияаад̇и д̣̇ассзд̇и.
Āraddhavīriyoti paripuṇṇavīriyo paggahitavīriyo. Yāvadeva upanikkhepanamattāyāti tiyojanasahassavitthārassa himavato santike ṭhapitā sāsapamattā pāsāṇasakkharā ‘‘himavā nu kho mahā, ayaṃ nu kho pāsāṇasakkharā’’ti evaṃ yāva upanikkhepanamattasseva atthāya bhaveyyāti vuttaṃ hoti. Paratopi eseva nayo. Kappanti āyukappaṃ. Loṇaghaṭāyāti cakkavāḷamukhavaṭṭiyā ādhārakaṃ katvā mukhavaṭṭiyā brahmalokaṃ āhacca ṭhitāya loṇacāṭiyāti dasseti.
имз бана т̇зраа убамам̣ аахаранд̇аа саригкагзнзва жа виж̇ж̇амаанаг̇ун̣зна жа аахарим̣су. гат̇ам̣? аяан̃хи ид̣̇д̇хи наама ажжуг̇г̇ад̇адтзна жзва вибуладтзна жа химаванд̇асад̣̇исаа, бан̃н̃аа жад̇убхуумагад̇хаммз анубависид̇ваа тид̇адтзна саб̣б̣аб̣яан̃ж̇анзсу анубавидталон̣арасасад̣̇исаа. звам̣ д̇аава саригкагадтзна аахарим̣су. самаад̇хилагкан̣ам̣ бана махаамог̇г̇аллаанад̇т̇зрасса вибхууд̇ам̣ баагадам̣. гин̃жааби саарибуд̇д̇ад̇т̇зрасса авиж̇ж̇амаанаид̣̇д̇хи наама над̇т̇и, бхаг̇авад̇аа бана ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ ид̣̇д̇химанд̇аанам̣ яад̣̇ид̣̇ам̣ махаамог̇г̇аллаано’’д̇и аяамзва зд̇ад̣̇аг̇г̇з табид̇о. вибассанаалагкан̣ам̣ бана саарибуд̇д̇ад̇т̇зрасса вибхууд̇ам̣ баагадам̣. гин̃жааби махаамог̇г̇аллаанад̇т̇зрассааби бан̃н̃аа ад̇т̇и, бхаг̇авад̇аа бана ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ махаабан̃н̃аанам̣ яад̣̇ид̣̇ам̣ саарибуд̇д̇о’’д̇и (а. ни. 1.189) аяамзва зд̇ад̣̇аг̇г̇з табид̇о. д̇асмаа яат̇аа зд̇з ан̃н̃аман̃н̃асса д̇хурам̣ на баабун̣анд̇и, звам̣ виж̇ж̇амаанаг̇ун̣зна аахарим̣су. самаад̇хилагкан̣асмин̃хи махаамог̇г̇аллаано нибпад̇д̇им̣ г̇ад̇о, вибассанаалагкан̣з саарибуд̇д̇ад̇т̇зро, д̣̇вийсуби зд̇зсу саммаасамб̣уд̣̇д̇ход̇и. д̇ад̇ияам̣.
Ime pana therā upamaṃ āharantā sarikkhakeneva ca vijjamānaguṇena ca āhariṃsu. Kathaṃ? Ayañhi iddhi nāma accuggataṭṭhena ceva vipulaṭṭhena ca himavantasadisā, paññā catubhūmakadhamme anupavisitvā ṭhitaṭṭhena sabbabyañjanesu anupaviṭṭhaloṇarasasadisā. Evaṃ tāva sarikkhakaṭṭhena āhariṃsu. Samādhilakkhaṇaṃ pana mahāmoggallānattherassa vibhūtaṃ pākaṭaṃ. Kiñcāpi sāriputtattherassa avijjamānaiddhi nāma natthi, bhagavatā pana ‘‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’’ti ayameva etadagge ṭhapito. Vipassanālakkhaṇaṃ pana sāriputtattherassa vibhūtaṃ pākaṭaṃ. Kiñcāpi mahāmoggallānattherassāpi paññā atthi, bhagavatā pana ‘‘etadaggaṃ, bhikkhave, mama sāvakānaṃ bhikkhūnaṃ mahāpaññānaṃ yadidaṃ sāriputto’’ti (a. ni. 1.189) ayameva etadagge ṭhapito. Tasmā yathā ete aññamaññassa dhuraṃ na pāpuṇanti, evaṃ vijjamānaguṇena āhariṃsu. Samādhilakkhaṇasmiñhi mahāmoggallāno nipphattiṃ gato, vipassanālakkhaṇe sāriputtatthero, dvīsupi etesu sammāsambuddhoti. Tatiyaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 3. гхадасуд̇д̇ам̣ • 3. Ghaṭasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 3. гхадасуд̇д̇аван̣н̣анаа • 3. Ghaṭasuttavaṇṇanā
