| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ಘಟಸುತ್ತವಣ್ಣನಾ
3. Ghaṭasuttavaṇṇanā
೨೩೭. ಪರಿವೇಣಗ್ಗೇನಾತಿ ಪರಿವೇಣಭಾಗೇನ। ಕೇಚಿ ‘‘ಏಕವಿಹಾರೇತಿ ಏಕಚ್ಛನ್ನೇ ಏಕಸ್ಮಿಂ ಆವಾಸೇ’’ತಿ ವದನ್ತಿ। ತೇತಿ ತೇ ದ್ವೇಪಿ ಥೇರಾ। ಪಾಟಿಯೇಕ್ಕೇಸು ಠಾನೇಸೂತಿ ವಿಸುಂ ವಿಸುಂ ಠಾನೇಸು। ನಿಸೀದನ್ತೀತಿ ದಿವಾವಿಹಾರಂ ನಿಸೀದನ್ತಿ। ಓಳಾರಿಕೋ ನಾಮ ಜಾತೋ ಪರಿತ್ತಧಮ್ಮಾರಮ್ಮಣತ್ತಾ ತಸ್ಸ। ತೇತಿ ಥೇರೋ ಭಗವಾ ಚ।
237.Pariveṇaggenāti pariveṇabhāgena. Keci ‘‘ekavihāreti ekacchanne ekasmiṃ āvāse’’ti vadanti. Teti te dvepi therā. Pāṭiyekkesu ṭhānesūti visuṃ visuṃ ṭhānesu. Nisīdantīti divāvihāraṃ nisīdanti. Oḷāriko nāma jāto parittadhammārammaṇattā tassa. Teti thero bhagavā ca.
ಪರಿಪುಣ್ಣವೀರಿಯೋತಿ ಚತುಕಿಚ್ಚಸಾಧನವಸೇನ ಸಮ್ಪುಣ್ಣವೀರಿಯೋ। ಪಗ್ಗಹಿತವೀರಿಯೋತಿ ಈಸಕಮ್ಪಿ ಸಙ್ಕೋಚಂ ಅನಾಪಜ್ಜಿತ್ವಾ ಪವತ್ತಿತವೀರಿಯೋ। ಉಪನಿಕ್ಖೇಪನಮತ್ತಸ್ಸೇವಾತಿ ಸಮೀಪೇ ಠಪನಮತ್ತಸ್ಸೇವ।
Paripuṇṇavīriyoti catukiccasādhanavasena sampuṇṇavīriyo. Paggahitavīriyoti īsakampi saṅkocaṃ anāpajjitvā pavattitavīriyo. Upanikkhepanamattassevāti samīpe ṭhapanamattasseva.
ಚತುಭೂಮಕಧಮ್ಮೇಸು ಲಬ್ಭಮಾನತ್ತಾ ಪಞ್ಞಾಯ ‘‘ಚತುಭೂಮಕಧಮ್ಮೇ ಅನುಪವಿಸಿತ್ವಾ ಠಿತಟ್ಠೇನಾ’’ತಿ ವುತ್ತಂ। ಲಕ್ಖಿತಬ್ಬಟ್ಠೇನ ಸಮಾಧಿ ಏವ ಸಮಾಧಿಲಕ್ಖಣಂ। ಏವಂ ವಿಪಸ್ಸನಾಲಕ್ಖಣಂ ವೇದಿತಬ್ಬಂ। ಅಞ್ಞಮಞ್ಞಸ್ಸಾತಿ ಅಞ್ಞಸ್ಸ ಅಞ್ಞಸ್ಸ ನಾನಾಲಕ್ಖಣಾತಿ ವೇದಿತಬ್ಬಂ। ಅಞ್ಞಸ್ಸಾತಿ ಇತರಸ್ಸ। ಧುರನ್ತಿ ವಹಿತಬ್ಬಭಾರಂ। ದ್ವೀಸುಪಿ ಏತೇಸೂತಿ ಸಮಾಧಿಲಕ್ಖಣವಿಪಸ್ಸನಾಲಕ್ಖಣೇಸು ಸಮ್ಮಾಸಮ್ಬುದ್ಧೋ ನಿಪ್ಫತ್ತಿಂ ಗತೋ।
Catubhūmakadhammesu labbhamānattā paññāya ‘‘catubhūmakadhamme anupavisitvā ṭhitaṭṭhenā’’ti vuttaṃ. Lakkhitabbaṭṭhena samādhi eva samādhilakkhaṇaṃ. Evaṃ vipassanālakkhaṇaṃ veditabbaṃ. Aññamaññassāti aññassa aññassa nānālakkhaṇāti veditabbaṃ. Aññassāti itarassa. Dhuranti vahitabbabhāraṃ. Dvīsupi etesūti samādhilakkhaṇavipassanālakkhaṇesu sammāsambuddho nipphattiṃ gato.
ಘಟಸುತ್ತವಣ್ಣನಾ ನಿಟ್ಠಿತಾ।
Ghaṭasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಘಟಸುತ್ತಂ • 3. Ghaṭasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಘಟಸುತ್ತವಣ್ಣನಾ • 3. Ghaṭasuttavaṇṇanā
