| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಗಿಹಿಸಾಮೀಚಿಸುತ್ತಂ
10. Gihisāmīcisuttaṃ
೬೦. ಅಥ ಖೋ ಅನಾಥಪಿಣ್ಡಿಕೋ ಗಹಪತಿ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಅನಾಥಪಿಣ್ಡಿಕಂ ಗಹಪತಿಂ ಭಗವಾ ಏತದವೋಚ –
60. Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘ಚತೂಹಿ ಖೋ, ಗಹಪತಿ, ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಗಿಹಿಸಾಮೀಚಿಪಟಿಪದಂ ಪಟಿಪನ್ನೋ ಹೋತಿ ಯಸೋಪಟಿಲಾಭಿನಿಂ ಸಗ್ಗಸಂವತ್ತನಿಕಂ। ಕತಮೇಹಿ ಚತೂಹಿ? ಇಧ, ಗಹಪತಿ, ಅರಿಯಸಾವಕೋ ಭಿಕ್ಖುಸಙ್ಘಂ ಪಚ್ಚುಪಟ್ಠಿತೋ ಹೋತಿ ಚೀವರೇನ, ಭಿಕ್ಖುಸಙ್ಘಂ ಪಚ್ಚುಪಟ್ಠಿತೋ ಹೋತಿ ಪಿಣ್ಡಪಾತೇನ, ಭಿಕ್ಖುಸಙ್ಘಂ ಪಚ್ಚುಪಟ್ಠಿತೋ ಹೋತಿ ಸೇನಾಸನೇನ , ಭಿಕ್ಖುಸಙ್ಘಂ ಪಚ್ಚುಪಟ್ಠಿತೋ ಹೋತಿ ಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರೇನ। ಇಮೇಹಿ ಖೋ, ಗಹಪತಿ, ಚತೂಹಿ ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಗಿಹಿಸಾಮೀಚಿಪಟಿಪದಂ ಪಟಿಪನ್ನೋ ಹೋತಿ ಯಸೋಪಟಿಲಾಭಿನಿಂ ಸಗ್ಗಸಂವತ್ತನಿಕ’’ನ್ತಿ।
‘‘Catūhi kho, gahapati, dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanikaṃ. Katamehi catūhi? Idha, gahapati, ariyasāvako bhikkhusaṅghaṃ paccupaṭṭhito hoti cīvarena, bhikkhusaṅghaṃ paccupaṭṭhito hoti piṇḍapātena, bhikkhusaṅghaṃ paccupaṭṭhito hoti senāsanena , bhikkhusaṅghaṃ paccupaṭṭhito hoti gilānappaccayabhesajjaparikkhārena. Imehi kho, gahapati, catūhi dhammehi samannāgato ariyasāvako gihisāmīcipaṭipadaṃ paṭipanno hoti yasopaṭilābhiniṃ saggasaṃvattanika’’nti.
‘‘ಗಿಹಿಸಾಮೀಚಿಪಟಿಪದಂ, ಪಟಿಪಜ್ಜನ್ತಿ ಪಣ್ಡಿತಾ।
‘‘Gihisāmīcipaṭipadaṃ, paṭipajjanti paṇḍitā;
ಸಮ್ಮಗ್ಗತೇ ಸೀಲವನ್ತೇ, ಚೀವರೇನ ಉಪಟ್ಠಿತಾ॥
Sammaggate sīlavante, cīvarena upaṭṭhitā.
ಪಿಣ್ಡಪಾತಸಯನೇನ, ಗಿಲಾನಪ್ಪಚ್ಚಯೇನ ಚ।
Piṇḍapātasayanena, gilānappaccayena ca;
ತೇಸಂ ದಿವಾ ಚ ರತ್ತೋ ಚ, ಸದಾ ಪುಞ್ಞಂ ಪವಡ್ಢತಿ।
Tesaṃ divā ca ratto ca, sadā puññaṃ pavaḍḍhati;
ಸಗ್ಗಞ್ಚ ಕಮತಿಟ್ಠಾನಂ 1, ಕಮ್ಮಂ ಕತ್ವಾನ ಭದ್ದಕ’’ನ್ತಿ॥ ದಸಮಂ।
Saggañca kamatiṭṭhānaṃ 2, kammaṃ katvāna bhaddaka’’nti. dasamaṃ;
ಪುಞ್ಞಾಭಿಸನ್ದವಗ್ಗೋ ಪಠಮೋ।
Puññābhisandavaggo paṭhamo.
ತಸ್ಸುದ್ದಾನಂ –
Tassuddānaṃ –
ದ್ವೇ ಪುಞ್ಞಾಭಿಸನ್ದಾ ದ್ವೇ ಚ, ಸಂವಾಸಾ ಸಮಜೀವಿನೋ।
Dve puññābhisandā dve ca, saṃvāsā samajīvino;
ಸುಪ್ಪವಾಸಾ ಸುದತ್ತೋ ಚ, ಭೋಜನಂ ಗಿಹಿಸಾಮಿಚೀತಿ॥
Suppavāsā sudatto ca, bhojanaṃ gihisāmicīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಗಿಹಿಸಾಮೀಚಿಸುತ್ತವಣ್ಣನಾ • 10. Gihisāmīcisuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭-೧೦. ಸುಪ್ಪವಾಸಾಸುತ್ತಾದಿವಣ್ಣನಾ • 7-10. Suppavāsāsuttādivaṇṇanā
