| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೭. ಗೋದತ್ತಸುತ್ತವಣ್ಣನಾ
7. Godattasuttavaṇṇanā
೩೪೯. ನೇಸನ್ತಿ ಅಪ್ಪಮಾಣಚೇತೋವಿಮುತ್ತಿ-ಆಕಿಞ್ಚಞ್ಞಚೇತೋವಿಮುತ್ತಿಸಞ್ಞಿತಾನಂ ಝಾನಾನಂ। ಅತ್ಥೋಪಿ ನಾನಾತಿ ಆನೇತ್ವಾ ಯೋಜನಾ। ಫರಣಅಪ್ಪಮಾಣತಾಯ ‘‘ಅಪ್ಪಮಾಣಾ ಚೇತೋವಿಮುತ್ತೀ’’ತಿ ಲದ್ಧನಾಮಂ ಬ್ರಹ್ಮವಿಹಾರಜ್ಝಾನನ್ತಿ ಆಹ ‘‘ಭೂಮನ್ತರತೋ’’ತಿಆದಿ। ಆಕಿಞ್ಚಞ್ಞಾ ಚೇತೋವಿಮುತ್ತೀತಿ ಆಕಿಞ್ಚಞ್ಞಾಯತನಜ್ಝಾನನ್ತಿ ಆಹ ‘‘ಭೂಮನ್ತರತೋ’’ತಿಆದಿ। ವಿಪಸ್ಸನಾತಿ ಅನಿಚ್ಚಾನುಪಸ್ಸನಾ, ಸಬ್ಬಾಪಿ ವಾ। ಪಮಾಣಕರಣೋ ನಾಮ ಯಸ್ಸ ಸಯಂ ಉಪ್ಪಜ್ಜತಿ, ತಸ್ಸ ಗುಣಾಭಾವದಸ್ಸನವಸೇನ ಪಮಾಣಕರಣತೋ।
349.Nesanti appamāṇacetovimutti-ākiñcaññacetovimuttisaññitānaṃ jhānānaṃ. Atthopi nānāti ānetvā yojanā. Pharaṇaappamāṇatāya ‘‘appamāṇā cetovimuttī’’ti laddhanāmaṃ brahmavihārajjhānanti āha ‘‘bhūmantarato’’tiādi. Ākiñcaññā cetovimuttīti ākiñcaññāyatanajjhānanti āha ‘‘bhūmantarato’’tiādi. Vipassanāti aniccānupassanā, sabbāpi vā. Pamāṇakaraṇo nāma yassa sayaṃ uppajjati, tassa guṇābhāvadassanavasena pamāṇakaraṇato.
ಫರಣಅಪ್ಪಮಾಣತಾಯಾತಿ ಫರಣವಸೇನ ಅಪ್ಪಮಾಣಗೋಚರತಾಯ। ನಿಬ್ಬಾನಮ್ಪಿ ಅಪ್ಪಮಾಣಮೇವ ಪಮಾಣಗೋಚರಾನಂ ಕಿಲೇಸಾನಂ ಆರಮ್ಮಣಭಾವಸ್ಸಪಿ ಅನಾಗಮನತೋ। ಖಲನ್ತಿ ಖಲೇ ಪಸಾರಿತಸಾಲಿಸೀಸಾದಿಭಣ್ಡಂ। ಕಿಞ್ಚೇಹೀತಿ ಮದ್ದಸ್ಸು। ತೇನಾಹ ‘‘ಮದ್ದನಟ್ಠೋ’’ತಿ। ಆರಮ್ಮಣಭೂತಂ, ಪಲಿಬುದ್ಧಕಂ ವಾ ನತ್ಥಿ ಏತಸ್ಸ ಕಿಞ್ಚನನ್ತಿ ಅಕಿಞ್ಚನಂ, ಅಕಿಞ್ಚನಮೇವ ಆಕಿಞ್ಚಞ್ಞಂ।
Pharaṇaappamāṇatāyāti pharaṇavasena appamāṇagocaratāya. Nibbānampi appamāṇameva pamāṇagocarānaṃ kilesānaṃ ārammaṇabhāvassapi anāgamanato. Khalanti khale pasāritasālisīsādibhaṇḍaṃ. Kiñcehīti maddassu. Tenāha ‘‘maddanaṭṭho’’ti. Ārammaṇabhūtaṃ, palibuddhakaṃ vā natthi etassa kiñcananti akiñcanaṃ, akiñcanameva ākiñcaññaṃ.
ರೂಪನಿಮಿತ್ತಸ್ಸಾತಿ ಕಸಿಣರೂಪನಿಮಿತ್ತಸ್ಸ। ನ ಗಹಿತಾತಿ ಸರೂಪತೋ ನ ಗಹಿತಾ, ಅತ್ಥತೋ ಪನ ಗಹಿತಾ ಏವ। ತೇನಾಹ – ‘‘ಸಾ ಸುಞ್ಞಾ ರಾಗೇನಾತಿಆದಿವಚನತೋ ಸಬ್ಬತ್ಥ ಅನುಪವಿತ್ಥಾವಾ’’ತಿ।
Rūpanimittassāti kasiṇarūpanimittassa. Na gahitāti sarūpato na gahitā, atthato pana gahitā eva. Tenāha – ‘‘sā suññā rāgenātiādivacanato sabbattha anupavitthāvā’’ti.
ನಾನಾತಿ ಸದ್ದವಸೇನ। ಏಕತ್ಥಾತಿ ಆರಮ್ಮಣವಸೇನ ಆರಮ್ಮಣಭಾವೇನ ಏಕಸಭಾವಾ। ತೇನಾಹ ‘‘ಅಪ್ಪಮಾಣಂ…ಪೇ॰… ಏಕತ್ಥಾ’’ತಿ। ಆರಮ್ಮಣವಸೇನಾತಿ ಆರಮ್ಮಣಸ್ಸ ವಸೇನ। ಚತ್ತಾರೋ ಹಿ ಮಗ್ಗಾ, ಚತ್ತಾರಿ ಫಲಾನಿ ಆರಮ್ಮಣವಸೇನ ನಿಬ್ಬಾನಪವಿಟ್ಠತಾಯ ಏಕತ್ಥಾ ಏಕಾರಮ್ಮಣಾ। ಅಞ್ಞಸ್ಮಿಂ ಪನ ಠಾನೇತಿ ಇದಂ ವಿಸುಂ ವಿಸುಂ ಗಹೇತ್ವಾ ವುತ್ತಂ ಅಪ್ಪಮಾಣಾದಿ ಪರಿಯಾಯವುತ್ತಂ, ನಿಬ್ಬಾನಂ ಆರಬ್ಭ ಪವತ್ತನತೋ। ತಸ್ಮಾ ‘‘ಅಞ್ಞಸ್ಮಿ’’ನ್ತಿ ಇದಂ ತೇನ ತೇನ ಪರಿಯಾಯೇನ ತತ್ಥ ತತ್ಥ ಆಗತಭಾವಂ ಸನ್ಧಾಯ ವುತ್ತಂ।
Nānāti saddavasena. Ekatthāti ārammaṇavasena ārammaṇabhāvena ekasabhāvā. Tenāha ‘‘appamāṇaṃ…pe… ekatthā’’ti. Ārammaṇavasenāti ārammaṇassa vasena. Cattāro hi maggā, cattāri phalāni ārammaṇavasena nibbānapaviṭṭhatāya ekatthā ekārammaṇā. Aññasmiṃ pana ṭhāneti idaṃ visuṃ visuṃ gahetvā vuttaṃ appamāṇādi pariyāyavuttaṃ, nibbānaṃ ārabbha pavattanato. Tasmā ‘‘aññasmi’’nti idaṃ tena tena pariyāyena tattha tattha āgatabhāvaṃ sandhāya vuttaṃ.
ಗೋದತ್ತಸುತ್ತವಣ್ಣನಾ ನಿಟ್ಠಿತಾ।
Godattasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಗೋದತ್ತಸುತ್ತಂ • 7. Godattasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಗೋದತ್ತಸುತ್ತವಣ್ಣನಾ • 7. Godattasuttavaṇṇanā
