| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༧. གོདཏྟསུཏྟཝཎྞནཱ
7. Godattasuttavaṇṇanā
༣༤༩. ནེསནྟི ཨཔྤམཱཎཙེཏོཝིམུཏྟི-ཨཱཀིཉྩཉྙཙེཏོཝིམུཏྟིསཉྙིཏཱནཾ ཛྷཱནཱནཾ། ཨཏྠོཔི ནཱནཱཏི ཨཱནེཏྭཱ ཡོཛནཱ། ཕརཎཨཔྤམཱཎཏཱཡ ‘‘ཨཔྤམཱཎཱ ཙེཏོཝིམུཏྟཱི’’ཏི ལདྡྷནཱམཾ བྲཧྨཝིཧཱརཛ྄ཛྷཱནནྟི ཨཱཧ ‘‘བྷཱུམནྟརཏོ’’ཏིཨཱདི། ཨཱཀིཉྩཉྙཱ ཙེཏོཝིམུཏྟཱིཏི ཨཱཀིཉྩཉྙཱཡཏནཛ྄ཛྷཱནནྟི ཨཱཧ ‘‘བྷཱུམནྟརཏོ’’ཏིཨཱདི། ཝིཔསྶནཱཏི ཨནིཙྩཱནུཔསྶནཱ, སབྦཱཔི ཝཱ། པམཱཎཀརཎོ ནཱམ ཡསྶ སཡཾ ཨུཔྤཛྫཏི, ཏསྶ གུཎཱབྷཱཝདསྶནཝསེན པམཱཎཀརཎཏོ།
349.Nesanti appamāṇacetovimutti-ākiñcaññacetovimuttisaññitānaṃ jhānānaṃ. Atthopi nānāti ānetvā yojanā. Pharaṇaappamāṇatāya ‘‘appamāṇā cetovimuttī’’ti laddhanāmaṃ brahmavihārajjhānanti āha ‘‘bhūmantarato’’tiādi. Ākiñcaññā cetovimuttīti ākiñcaññāyatanajjhānanti āha ‘‘bhūmantarato’’tiādi. Vipassanāti aniccānupassanā, sabbāpi vā. Pamāṇakaraṇo nāma yassa sayaṃ uppajjati, tassa guṇābhāvadassanavasena pamāṇakaraṇato.
ཕརཎཨཔྤམཱཎཏཱཡཱཏི ཕརཎཝསེན ཨཔྤམཱཎགོཙརཏཱཡ། ནིབྦཱནམྤི ཨཔྤམཱཎམེཝ པམཱཎགོཙརཱནཾ ཀིལེསཱནཾ ཨཱརམྨཎབྷཱཝསྶཔི ཨནཱགམནཏོ། ཁལནྟི ཁལེ པསཱརིཏསཱལིསཱིསཱདིབྷཎྜཾ། ཀིཉྩེཧཱིཏི མདྡསྶུ། ཏེནཱཧ ‘‘མདྡནཊྛོ’’ཏི། ཨཱརམྨཎབྷཱུཏཾ, པལིབུདྡྷཀཾ ཝཱ ནཏྠི ཨེཏསྶ ཀིཉྩནནྟི ཨཀིཉྩནཾ, ཨཀིཉྩནམེཝ ཨཱཀིཉྩཉྙཾ།
Pharaṇaappamāṇatāyāti pharaṇavasena appamāṇagocaratāya. Nibbānampi appamāṇameva pamāṇagocarānaṃ kilesānaṃ ārammaṇabhāvassapi anāgamanato. Khalanti khale pasāritasālisīsādibhaṇḍaṃ. Kiñcehīti maddassu. Tenāha ‘‘maddanaṭṭho’’ti. Ārammaṇabhūtaṃ, palibuddhakaṃ vā natthi etassa kiñcananti akiñcanaṃ, akiñcanameva ākiñcaññaṃ.
རཱུཔནིམིཏྟསྶཱཏི ཀསིཎརཱུཔནིམིཏྟསྶ། ན གཧིཏཱཏི སརཱུཔཏོ ན གཧིཏཱ, ཨཏྠཏོ པན གཧིཏཱ ཨེཝ། ཏེནཱཧ – ‘‘སཱ སུཉྙཱ རཱགེནཱཏིཨཱདིཝཙནཏོ སབྦཏྠ ཨནུཔཝིཏྠཱཝཱ’’ཏི།
Rūpanimittassāti kasiṇarūpanimittassa. Na gahitāti sarūpato na gahitā, atthato pana gahitā eva. Tenāha – ‘‘sā suññā rāgenātiādivacanato sabbattha anupavitthāvā’’ti.
ནཱནཱཏི སདྡཝསེན། ཨེཀཏྠཱཏི ཨཱརམྨཎཝསེན ཨཱརམྨཎབྷཱཝེན ཨེཀསབྷཱཝཱ། ཏེནཱཧ ‘‘ཨཔྤམཱཎཾ…པེ॰… ཨེཀཏྠཱ’’ཏི། ཨཱརམྨཎཝསེནཱཏི ཨཱརམྨཎསྶ ཝསེན། ཙཏྟཱརོ ཧི མགྒཱ, ཙཏྟཱརི ཕལཱནི ཨཱརམྨཎཝསེན ནིབྦཱནཔཝིཊྛཏཱཡ ཨེཀཏྠཱ ཨེཀཱརམྨཎཱ། ཨཉྙསྨིཾ པན ཋཱནེཏི ཨིདཾ ཝིསུཾ ཝིསུཾ གཧེཏྭཱ ཝུཏྟཾ ཨཔྤམཱཎཱདི པརིཡཱཡཝུཏྟཾ, ནིབྦཱནཾ ཨཱརབྦྷ པཝཏྟནཏོ། ཏསྨཱ ‘‘ཨཉྙསྨི’’ནྟི ཨིདཾ ཏེན ཏེན པརིཡཱཡེན ཏཏྠ ཏཏྠ ཨཱགཏབྷཱཝཾ སནྡྷཱཡ ཝུཏྟཾ།
Nānāti saddavasena. Ekatthāti ārammaṇavasena ārammaṇabhāvena ekasabhāvā. Tenāha ‘‘appamāṇaṃ…pe… ekatthā’’ti. Ārammaṇavasenāti ārammaṇassa vasena. Cattāro hi maggā, cattāri phalāni ārammaṇavasena nibbānapaviṭṭhatāya ekatthā ekārammaṇā. Aññasmiṃ pana ṭhāneti idaṃ visuṃ visuṃ gahetvā vuttaṃ appamāṇādi pariyāyavuttaṃ, nibbānaṃ ārabbha pavattanato. Tasmā ‘‘aññasmi’’nti idaṃ tena tena pariyāyena tattha tattha āgatabhāvaṃ sandhāya vuttaṃ.
གོདཏྟསུཏྟཝཎྞནཱ ནིཊྛིཏཱ།
Godattasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༧. གོདཏྟསུཏྟཾ • 7. Godattasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. གོདཏྟསུཏྟཝཎྞནཱ • 7. Godattasuttavaṇṇanā
