| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༩. གོལིཡཱནིསུཏྟཝཎྞནཱ
9. Goliyānisuttavaṇṇanā
༡༧༣. པདསམཱཙཱརོཏི ཏཾཏཾཔཙྩཡབྷེདདསྶནཱཡ ཝིགཏཏྟཱ པཀཱརེཧི དལིདྡསམཱཙཱརོ སིཐིལསམཱཙཱརོཏི ཨཏྠོ། ཡསྨཱ པན ཏཱདིསོ སམཱཙཱརོ ཐིརོ དལ༹ྷོ ནཱམ ན ཧོཏི, ཏསྨཱ ཝུཏྟཾ ‘‘དུབྦལསམཱཙཱརོ’’ཏི། ‘‘སཱཁསམཱཙཱརོ’’ཏི ཝཱ པཱཋོ, ཏཏྠ ཏཏྠ ལགྒནཊྛེན སཱཁཱསདིསསཱིལོཏི ཨཏྠོ། ཏེནཱཧ ‘‘ཨོལཱ༹རིཀཱཙཱརོ’’ཏི། པཙྩཡེསུ སཱཔེཀྑོཏི པཙྩཡེསུ སཱཔེཀྑཏཱཡ ཨེཝ ཧིསྶ ཨོལཱ༹རིཀཱཙཱརཏཱ ཝེདིཏབྦཱ། གརུནཱ ཀིསྨིཉྩི ཝུཏྟེ གཱརཝཝསེན པཏིསྶཝནཾ པཏིསྶོ, པཏིསྶཝཙནབྷཱུཏཾ ཏཾསབྷཱགཉྩ ཡཾ ཀིཉྩི གཱརཝནྟི ཨཏྠོ། སཧ པཏིསྶེནཱཏི སཔྤཏིསྶེན, སཔྤཏིསྶཝེན ཨོཝཱདསམྤཊིཙྪནེན། པཏིསྶཱིཡཏཱིཏི ཝཱ པཏིསྶོ, གརུཀཱཏབྦོ, ཏེན སཧ པཏིསྶེནཱཏི སབྦཾ པུབྦེ ཝིཡ། ཏེནཱཧ ‘‘སཛེཊྛཀེནཱ’’ཏི། སེརིཝིཧཱརོ ནཱམ ཨཏྟཔྤདྷཱནཝཱསོ། ཏེནཱཧ ‘‘ནིརངྐུསཝིཧཱརེནཱ’’ཏི།
173.Padasamācāroti taṃtaṃpaccayabhedadassanāya vigatattā pakārehi daliddasamācāro sithilasamācāroti attho. Yasmā pana tādiso samācāro thiro daḷho nāma na hoti, tasmā vuttaṃ ‘‘dubbalasamācāro’’ti. ‘‘Sākhasamācāro’’ti vā pāṭho, tattha tattha lagganaṭṭhena sākhāsadisasīloti attho. Tenāha ‘‘oḷārikācāro’’ti. Paccayesu sāpekkhoti paccayesu sāpekkhatāya eva hissa oḷārikācāratā veditabbā. Garunā kismiñci vutte gāravavasena patissavanaṃ patisso, patissavacanabhūtaṃ taṃsabhāgañca yaṃ kiñci gāravanti attho. Saha patissenāti sappatissena, sappatissavena ovādasampaṭicchanena. Patissīyatīti vā patisso, garukātabbo, tena saha patissenāti sabbaṃ pubbe viya. Tenāha ‘‘sajeṭṭhakenā’’ti. Serivihāro nāma attappadhānavāso. Tenāha ‘‘niraṅkusavihārenā’’ti.
ཨནུཔཁཛྫཱཏི ཨནུཔཀཌྜྷིཏྭཱ། གརུཊྛཱནིཡཱནཾ ཨནྟརཾ ཨནཱཔུཙྪཱ ཨནུཔཝིསིཏྭཱཏི ཨིམམཏྠཾ དསྶེཏུཾ ‘‘ཏཏྠ ཡོ’’ཏིཨཱདི ཝུཏྟཾ།
Anupakhajjāti anupakaḍḍhitvā. Garuṭṭhāniyānaṃ antaraṃ anāpucchā anupavisitvāti imamatthaṃ dassetuṃ ‘‘tattha yo’’tiādi vuttaṃ.
ཨཱབྷིསམཱཙཱརིཀནྟི ཨབྷིསམཱཙཱརེ བྷཝཾ། ཀིཾ པན ཏནྟི ཨཱཧ ‘‘ཝཏྟཔཊིཔཏྟིམཏྟམྤཱི’’ཏི། ནཱཏིཀཱལསྶེཝ སངྒྷསྶ པུརཏོ པཝིསིཏབྦཾ, ན པཙྪཱ པཊིཀྐམིཏབྦནྟི ཨདྷིཔྤཱཡེན ཨཏིཀཱལེ ཙ གཱམཔྤཝེསོ ཨཏིདིཝཱ པཊིཀྐམནཉྩ ནིཝཱརིཏཾ, ཏཾ དསྶེཏུཾ ‘‘ན ཨཏིཔཱཏོ’’ཏིཨཱདི ཝུཏྟཾ། ཨུདྡྷཙྩཔཀཏིཀོཏི ཝིབྦྷནྟཙིཏྟོ། ཨཝཙཱཔལྱེནཱཏི དལ༹ྷཝཱཏཱཔཧཏཔལླཝསདིསེན ལོལབྷཱཝེན།
Ābhisamācārikanti abhisamācāre bhavaṃ. Kiṃ pana tanti āha ‘‘vattapaṭipattimattampī’’ti. Nātikālasseva saṅghassa purato pavisitabbaṃ, na pacchā paṭikkamitabbanti adhippāyena atikāle ca gāmappaveso atidivā paṭikkamanañca nivāritaṃ, taṃ dassetuṃ ‘‘na atipāto’’tiādi vuttaṃ. Uddhaccapakatikoti vibbhantacitto. Avacāpalyenāti daḷhavātāpahatapallavasadisena lolabhāvena.
པཉྙཝཏཱཏི ཨིམིནཱ བྷིཀྑུསཱརུཔྤེསུ ཨིཏིཀཏྟབྦེསུ ཨུཔཱཡཔཉྙཱ ཨདྷིཔྤེཏཱ, ན སུཏམཡཔཉྙཱ། ཨབྷིདྷམྨེ ཨབྷིཝིནཡེ ཡོགོཏི ཨིམིནཱ བྷཱཝནཱཔཉྙཱཨུཏྟརིམནུསྶདྷམྨེ ཡོགོ པཀཱསིཏོ། ཡོགོཏི ཙ པརིཙཡོ ཨུགྒཎྷཝསེན།
Paññavatāti iminā bhikkhusāruppesu itikattabbesu upāyapaññā adhippetā, na sutamayapaññā. Abhidhamme abhivinaye yogoti iminā bhāvanāpaññāuttarimanussadhamme yogo pakāsito. Yogoti ca paricayo uggaṇhavasena.
ཨཱརུཔྤཱཏི ཨིམིནཱ ཙཏསྶོཔི ཨརཱུཔསམཱཔཏྟིཡོ གཧིཏཱ, ཏཱ པན ཙཏཱུཧི རཱུཔསམཱཔཏྟཱིཧི ཝིནཱ ན སམྤཛྫནྟཱིཏི ཨཱཧ – ‘‘ཨཱརུཔྤཱཏི ཨེཏྟཱཝཏཱ ཨཊྛཔི སམཱཔཏྟིཡོ ཝུཏྟཱ ཧོནྟཱི’’ཏི། ཀསིཎེཏི དསཝིདྷེ ཀསིཎེ། ཨེཀཾ པརིཀམྨཀམྨཊྛཱནནྟི ཡཾ ཀིཉྩི ཨེཀབྷཱཝནཱ པརིཀམྨདཱིཔནཾ ཁནྡྷཀམྨཊྛཱནཾ། ཏེནཱཧ ‘‘པགུཎཾ ཀཏྭཱ’’ཏི། ཀསིཎཔརིཀམྨཾ པན ཏགྒཧཎེནེཝ གཧིཏཾ ཧོཏི, ལོཀིཡཱ ཨུཏྟརིམནུསྶདྷམྨཱ ཧེཊྛཱ གཧིཏཱཏི ཨཱཧ ‘‘ཨུཏྟརིམནུསྶདྷམྨེཏི ཨིམིནཱ སབྦེཔི ལོཀུཏྟརདྷམྨེ དསྶེཏཱི’’ཏི། ནེཡྻཔུགྒལསྶ ཝསེནཱཏི ཛཱནིཏྭཱ ཝིཏྠཱརེཏྭཱ ཉཱཏབྦཔུགྒལསྶ ཝསེནཱཏི།
Āruppāti iminā catassopi arūpasamāpattiyo gahitā, tā pana catūhi rūpasamāpattīhi vinā na sampajjantīti āha – ‘‘āruppāti ettāvatā aṭṭhapi samāpattiyo vuttā hontī’’ti. Kasiṇeti dasavidhe kasiṇe. Ekaṃ parikammakammaṭṭhānanti yaṃ kiñci ekabhāvanā parikammadīpanaṃ khandhakammaṭṭhānaṃ. Tenāha ‘‘paguṇaṃ katvā’’ti. Kasiṇaparikammaṃ pana taggahaṇeneva gahitaṃ hoti, lokiyā uttarimanussadhammā heṭṭhā gahitāti āha ‘‘uttarimanussadhammeti iminā sabbepi lokuttaradhamme dassetī’’ti. Neyyapuggalassa vasenāti jānitvā vitthāretvā ñātabbapuggalassa vasenāti.
གོལིཡཱནིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Goliyānisuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. གོལིཡཱནིསུཏྟཾ • 9. Goliyānisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༩. གོལིཡཱནིསུཏྟཝཎྞནཱ • 9. Goliyānisuttavaṇṇanā
