| Library / Tipiṭaka / તિપિટક • Tipiṭaka / મહાવગ્ગપાળિ • Mahāvaggapāḷi |
૧૬૩. ગુળાદિઅનુજાનના
163. Guḷādianujānanā
૨૭૨. અથ ખો ભગવા સાવત્થિયં યથાભિરન્તં વિહરિત્વા યેન રાજગહં તેન ચારિકં પક્કામિ. અદ્દસા ખો આયસ્મા કઙ્ખારેવતો અન્તરામગ્ગે ગુળકરણં, ઓક્કમિત્વા ગુળે પિટ્ઠમ્પિ છારિકમ્પિ પક્ખિપન્તે, દિસ્વાન ‘‘અકપ્પિયો ગુળો સામિસો, ન કપ્પતિ ગુળો વિકાલે પરિભુઞ્જિતુ’’ન્તિ કુક્કુચ્ચાયન્તો સપરિસો ગુળં ન પરિભુઞ્જતિ. યેપિસ્સ સોતબ્બં મઞ્ઞન્તિ, તેપિ ગુળં ન પરિભુઞ્જન્તિ. ભગવતો એતમત્થં આરોચેસું. કિમત્થાય 1, ભિક્ખવે, ગુળે પિટ્ઠમ્પિ છારિકમ્પિ પક્ખિપન્તીતિ? થદ્ધત્થાય 2 ભગવાતિ. સચે, ભિક્ખવે, થદ્ધત્થાય ગુળે પિટ્ઠમ્પિ છારિકમ્પિ પક્ખિપન્તિ, સો ચ ગુળોત્વેવ સઙ્ખં ગચ્છતિ. અનુજાનામિ, ભિક્ખવે, યથાસુખં ગુળં પરિભુઞ્જિતુન્તિ.
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
અદ્દસા ખો આયસ્મા કઙ્ખારેવતો અન્તરામગ્ગે વચ્ચે મુગ્ગં જાતં, પસ્સિત્વા ‘‘અકપ્પિયા મુગ્ગા; પક્કાપિ મુગ્ગા જાયન્તીતિ’’ કુક્કુચ્ચાયન્તો સપરિસો મુગ્ગં ન પરિભુઞ્જતિ. યેપિસ્સ સોતબ્બં મઞ્ઞન્તિ, તેપિ મુગ્ગં ન પરિભુઞ્જન્તિ. ભગવતો એતમત્થં આરોચેસું. સચે 5, ભિક્ખવે, પક્કાપિ મુગ્ગા જાયન્તિ , અનુજાનામિ, ભિક્ખવે, યથાસુખં મુગ્ગં પરિભુઞ્જિતુન્તિ.
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
૨૭૩. તેન ખો પન સમયેન અઞ્ઞતરસ્સ ભિક્ખુનો ઉદરવાતાબાધો હોતિ. સો લોણસોવીરકં અપાયિ. તસ્સ સો ઉદરવાતાબાધો પટિપ્પસ્સમ્ભિ. ભગવતો એતમત્થં આરોચેસું . અનુજાનામિ, ભિક્ખવે, ગિલાનસ્સ લોણસોવીરકં; અગિલાનસ્સ ઉદકસમ્ભિન્નં પાનપરિભોગેન પરિભુઞ્જિતુન્તિ.
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
ગુળાદિઅનુજાનના નિટ્ઠિતા.
Guḷādianujānanā niṭṭhitā.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવગ્ગ-અટ્ઠકથા • Mahāvagga-aṭṭhakathā / ગુળાદિઅનુજાનનકથા • Guḷādianujānanakathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ગુળાદિઅનુજાનનકથાવણ્ણના • Guḷādianujānanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ગુળાદિઅનુજાનનકથાવણ્ણના • Guḷādianujānanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૧૬૩. ગુળાદિઅનુજાનનકથા • 163. Guḷādianujānanakathā
