| Library / Tipiṭaka / തിപിടക • Tipiṭaka / മഹാവഗ്ഗപാളി • Mahāvaggapāḷi |
൧൬൩. ഗുളാദിഅനുജാനനാ
163. Guḷādianujānanā
൨൭൨. അഥ ഖോ ഭഗവാ സാവത്ഥിയം യഥാഭിരന്തം വിഹരിത്വാ യേന രാജഗഹം തേന ചാരികം പക്കാമി. അദ്ദസാ ഖോ ആയസ്മാ കങ്ഖാരേവതോ അന്തരാമഗ്ഗേ ഗുളകരണം, ഓക്കമിത്വാ ഗുളേ പിട്ഠമ്പി ഛാരികമ്പി പക്ഖിപന്തേ, ദിസ്വാന ‘‘അകപ്പിയോ ഗുളോ സാമിസോ, ന കപ്പതി ഗുളോ വികാലേ പരിഭുഞ്ജിതു’’ന്തി കുക്കുച്ചായന്തോ സപരിസോ ഗുളം ന പരിഭുഞ്ജതി. യേപിസ്സ സോതബ്ബം മഞ്ഞന്തി, തേപി ഗുളം ന പരിഭുഞ്ജന്തി. ഭഗവതോ ഏതമത്ഥം ആരോചേസും. കിമത്ഥായ 1, ഭിക്ഖവേ, ഗുളേ പിട്ഠമ്പി ഛാരികമ്പി പക്ഖിപന്തീതി? ഥദ്ധത്ഥായ 2 ഭഗവാതി. സചേ, ഭിക്ഖവേ, ഥദ്ധത്ഥായ ഗുളേ പിട്ഠമ്പി ഛാരികമ്പി പക്ഖിപന്തി, സോ ച ഗുളോത്വേവ സങ്ഖം ഗച്ഛതി. അനുജാനാമി, ഭിക്ഖവേ, യഥാസുഖം ഗുളം പരിഭുഞ്ജിതുന്തി.
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
അദ്ദസാ ഖോ ആയസ്മാ കങ്ഖാരേവതോ അന്തരാമഗ്ഗേ വച്ചേ മുഗ്ഗം ജാതം, പസ്സിത്വാ ‘‘അകപ്പിയാ മുഗ്ഗാ; പക്കാപി മുഗ്ഗാ ജായന്തീതി’’ കുക്കുച്ചായന്തോ സപരിസോ മുഗ്ഗം ന പരിഭുഞ്ജതി. യേപിസ്സ സോതബ്ബം മഞ്ഞന്തി, തേപി മുഗ്ഗം ന പരിഭുഞ്ജന്തി. ഭഗവതോ ഏതമത്ഥം ആരോചേസും. സചേ 5, ഭിക്ഖവേ, പക്കാപി മുഗ്ഗാ ജായന്തി , അനുജാനാമി, ഭിക്ഖവേ, യഥാസുഖം മുഗ്ഗം പരിഭുഞ്ജിതുന്തി.
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
൨൭൩. തേന ഖോ പന സമയേന അഞ്ഞതരസ്സ ഭിക്ഖുനോ ഉദരവാതാബാധോ ഹോതി. സോ ലോണസോവീരകം അപായി. തസ്സ സോ ഉദരവാതാബാധോ പടിപ്പസ്സമ്ഭി. ഭഗവതോ ഏതമത്ഥം ആരോചേസും . അനുജാനാമി, ഭിക്ഖവേ, ഗിലാനസ്സ ലോണസോവീരകം; അഗിലാനസ്സ ഉദകസമ്ഭിന്നം പാനപരിഭോഗേന പരിഭുഞ്ജിതുന്തി.
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
ഗുളാദിഅനുജാനനാ നിട്ഠിതാ.
Guḷādianujānanā niṭṭhitā.
Footnotes:
Related texts:
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / മഹാവഗ്ഗ-അട്ഠകഥാ • Mahāvagga-aṭṭhakathā / ഗുളാദിഅനുജാനനകഥാ • Guḷādianujānanakathā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ഗുളാദിഅനുജാനനകഥാവണ്ണനാ • Guḷādianujānanakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ഗുളാദിഅനുജാനനകഥാവണ്ണനാ • Guḷādianujānanakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൧൬൩. ഗുളാദിഅനുജാനനകഥാ • 163. Guḷādianujānanakathā
