| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[435] 9. халид̣̇д̣̇ирааг̇аж̇аад̇агаван̣н̣анаа
[435] 9. Haliddirāgajātakavaṇṇanā
суд̇ид̇игканд̇и ид̣̇ам̣ сад̇т̇аа ж̇зд̇аванз вихаранд̇о т̇уллагумааригаабалобханам̣ аараб̣бха гат̇зси. вад̇т̇у д̇зрасаганибаад̇з жуул̣анаарад̣̇аж̇аад̇агз (ж̇аа. 1.13.40 аад̣̇аяо) аави бхависсад̇и. ад̇ийд̇авад̇т̇умхи бана саа гумааригаа д̇асса д̇аабасагумаарасса сийлам̣ бхинд̣̇ид̇ваа ад̇д̇ано васз тид̇абхаавам̣ н̃ад̇ваа ‘‘имам̣ ван̃жзд̇ваа мануссабат̇ам̣ нзссаамий’’д̇и жинд̇зд̇ваа ‘‘руубаад̣̇игаамаг̇ун̣авирахид̇з аран̃н̃з рагкид̇асийлам̣ наама на махабпалам̣ ход̇и, мануссабат̇з руубаад̣̇ийнам̣ бажжубадтаанз махабпалам̣ ход̇и, зхи маяаа сад̣̇д̇хим̣ д̇ад̇т̇а г̇анд̇ваа сийлам̣ рагкаахи, гим̣ д̇з аран̃н̃знаа’’д̇и вад̇ваа батамам̣ г̇аат̇амааха –
Sutitikkhanti idaṃ satthā jetavane viharanto thullakumārikāpalobhanaṃ ārabbha kathesi. Vatthu terasakanipāte cūḷanāradajātake (jā. 1.13.40 ādayo) āvi bhavissati. Atītavatthumhi pana sā kumārikā tassa tāpasakumārassa sīlaṃ bhinditvā attano vase ṭhitabhāvaṃ ñatvā ‘‘imaṃ vañcetvā manussapathaṃ nessāmī’’ti cintetvā ‘‘rūpādikāmaguṇavirahite araññe rakkhitasīlaṃ nāma na mahapphalaṃ hoti, manussapathe rūpādīnaṃ paccupaṭṭhāne mahapphalaṃ hoti, ehi mayā saddhiṃ tattha gantvā sīlaṃ rakkhāhi, kiṃ te araññenā’’ti vatvā paṭhamaṃ gāthamāha –
78.
78.
‘‘суд̇ид̇игкам̣ аран̃н̃амхи, банд̇амхи саяанаасанз;
‘‘Sutitikkhaṃ araññamhi, pantamhi sayanāsane;
яз жа г̇аамз д̇ид̇игканд̇и, д̇з ул̣аарад̇араа д̇аяаа’’д̇и.
Ye ca gāme titikkhanti, te uḷāratarā tayā’’ti.
д̇ад̇т̇а суд̇ид̇игканд̇и судту ад̇хиваасанам̣. д̇ид̇игканд̇ийд̇и сийд̇аад̣̇ийни ад̇хиваасзнд̇и.
Tattha sutitikkhanti suṭṭhu adhivāsanaṃ. Titikkhantīti sītādīni adhivāsenti.
д̇ам̣ суд̇ваа д̇аабасагумааро ‘‘бид̇аа мз аран̃н̃ам̣ г̇ад̇о, д̇асмим̣ ааг̇ад̇з д̇ам̣ аабужчид̇ваа г̇амиссаамий’’д̇и ааха. саа жинд̇зси ‘‘бид̇аа гирасса ад̇т̇и, сажз мам̣ со бассиссад̇и, гааж̇агодияаа мам̣ бот̇зд̇ваа винаасам̣ баабзссад̇и, маяаа батамамзва г̇анд̇аб̣б̣а’’нд̇и. ат̇а нам̣ саа ‘‘д̇зна хи ахам̣ маг̇г̇асан̃н̃ам̣ гурумаанаа батамад̇арам̣ г̇амиссаами, д̇вам̣ бажчаа ааг̇ажчаахий’’д̇и вад̇ваа аг̇амааси. со д̇ассаа г̇ад̇агаалз нзва д̣̇аарууни аахари, на баанийяам̣, на барибхож̇анийяам̣ убадтаабзси, гзвалам̣ баж̇жхааяанд̇ова нисийд̣̇и, бид̇у ааг̇аманагаалз бажжуг̇г̇аманам̣ наагааси. ат̇а нам̣ бид̇аа ‘‘ид̇т̇ийнам̣ васам̣ г̇ад̇о зсо’’д̇и н̃ад̇вааби ‘‘гасмаа д̇аад̇а, нзва д̣̇аарууни аахари, на баанийяам̣, на барибхож̇анийяам̣ убадтаабзси, баж̇жхааяанд̇оязва бана нисинносий’’д̇и ааха. ат̇а нам̣ д̇аабасагумааро ‘‘д̇аад̇а, аран̃н̃з гира рагкид̇асийлам̣ наама на махабпалам̣ ход̇и, мануссабат̇з махабпалам̣ , ахам̣ д̇ад̇т̇а г̇анд̇ваа сийлам̣ рагкиссаами, сахааяо мз мам̣ ‘ааг̇ажчзяяаасий’д̇и вад̇ваа бурад̇о г̇ад̇о, ахам̣ д̇знзва сад̣̇д̇хим̣ г̇амиссаами, д̇ад̇т̇а бана васанд̇зна маяаа гад̇аро бурисо сзвид̇аб̣б̣о’’д̇и бужчанд̇о д̣̇уд̇ияам̣ г̇аат̇амааха –
Taṃ sutvā tāpasakumāro ‘‘pitā me araññaṃ gato, tasmiṃ āgate taṃ āpucchitvā gamissāmī’’ti āha. Sā cintesi ‘‘pitā kirassa atthi, sace maṃ so passissati, kājakoṭiyā maṃ pothetvā vināsaṃ pāpessati, mayā paṭhamameva gantabba’’nti. Atha naṃ sā ‘‘tena hi ahaṃ maggasaññaṃ kurumānā paṭhamataraṃ gamissāmi, tvaṃ pacchā āgacchāhī’’ti vatvā agamāsi. So tassā gatakāle neva dārūni āhari, na pānīyaṃ, na paribhojanīyaṃ upaṭṭhāpesi, kevalaṃ pajjhāyantova nisīdi, pitu āgamanakāle paccuggamanaṃ nākāsi. Atha naṃ pitā ‘‘itthīnaṃ vasaṃ gato eso’’ti ñatvāpi ‘‘kasmā tāta, neva dārūni āhari, na pānīyaṃ, na paribhojanīyaṃ upaṭṭhāpesi, pajjhāyantoyeva pana nisinnosī’’ti āha. Atha naṃ tāpasakumāro ‘‘tāta, araññe kira rakkhitasīlaṃ nāma na mahapphalaṃ hoti, manussapathe mahapphalaṃ , ahaṃ tattha gantvā sīlaṃ rakkhissāmi, sahāyo me maṃ ‘āgaccheyyāsī’ti vatvā purato gato, ahaṃ teneva saddhiṃ gamissāmi, tattha pana vasantena mayā kataro puriso sevitabbo’’ti pucchanto dutiyaṃ gāthamāha –
79.
79.
‘‘аран̃н̃аа г̇аамамааг̇амма, гим̣сийлам̣ гим̣вад̇ам̣ ахам̣;
‘‘Araññā gāmamāgamma, kiṃsīlaṃ kiṃvataṃ ahaṃ;
бурисам̣ д̇аад̇а сзвзяяам̣, д̇ам̣ мз агкаахи бужчид̇о’’д̇и.
Purisaṃ tāta seveyyaṃ, taṃ me akkhāhi pucchito’’ti.
ат̇асса бид̇аа гат̇знд̇о сзсаг̇аат̇аа абхааси –
Athassa pitā kathento sesagāthā abhāsi –
80.
80.
‘‘яо д̇з виссаасаяз д̇аад̇а, виссаасан̃жа камзяяа д̇з;
‘‘Yo te vissāsaye tāta, vissāsañca khameyya te;
суссуусий жа д̇ид̇игкий жа, д̇ам̣ бхаж̇зхи ид̇о г̇ад̇о.
Sussūsī ca titikkhī ca, taṃ bhajehi ito gato.
81.
81.
‘‘яасса гааязна ваажааяа, манасаа над̇т̇и д̣̇уггадам̣;
‘‘Yassa kāyena vācāya, manasā natthi dukkaṭaṃ;
урасийва бад̇идтааяа, д̇ам̣ бхаж̇зхи ид̇о г̇ад̇о.
Urasīva patiṭṭhāya, taṃ bhajehi ito gato.
82.
82.
‘‘яо жа д̇хаммзна жарад̇и, жаранд̇оби на ман̃н̃ад̇и;
‘‘Yo ca dhammena carati, carantopi na maññati;
висуд̣̇д̇хагаарим̣ саббан̃н̃ам̣, д̇ам̣ бхаж̇зхи ид̇о г̇ад̇о.
Visuddhakāriṃ sappaññaṃ, taṃ bhajehi ito gato.
83.
83.
‘‘халид̣̇д̣̇ирааг̇ам̣ габижид̇д̇ам̣, бурисам̣ рааг̇авирааг̇инам̣;
‘‘Haliddirāgaṃ kapicittaṃ, purisaṃ rāgavirāginaṃ;
д̇аад̣̇исам̣ д̇аад̇а маа сзви, ниммануссамби жз сияаа.
Tādisaṃ tāta mā sevi, nimmanussampi ce siyā.
84.
84.
‘‘аасийвисам̣ва губид̇ам̣, мийл̣халид̇д̇ам̣ махаабат̇ам̣;
‘‘Āsīvisaṃva kupitaṃ, mīḷhalittaṃ mahāpathaṃ;
аарагаа бариваж̇ж̇зхи, яаанийва висамам̣ бат̇ам̣.
Ārakā parivajjehi, yānīva visamaṃ pathaṃ.
85.
85.
‘‘анад̇т̇аа д̇аад̇а вад̣дханд̇и, б̣аалам̣ ажжубасзвад̇о;
‘‘Anatthā tāta vaḍḍhanti, bālaṃ accupasevato;
маассу б̣аалзна сам̣г̇ажчи, амид̇д̇знзва саб̣б̣ад̣̇аа.
Māssu bālena saṃgacchi, amitteneva sabbadā.
86.
86.
‘‘д̇ам̣ д̇аахам̣ д̇аад̇а яаажаами, гарассу важанам̣ мама;
‘‘Taṃ tāhaṃ tāta yācāmi, karassu vacanaṃ mama;
маассу б̣аалзна сам̣г̇ажчи, д̣̇угко б̣аалзхи сан̇г̇амо’’д̇и.
Māssu bālena saṃgacchi, dukkho bālehi saṅgamo’’ti.
д̇ад̇т̇а яо д̇з виссаасаязд̇и яо д̇ава виссаасзяяа. камзяяа д̇зд̇и яо жа д̇ава ад̇д̇ани д̇аяаа гад̇ам̣ виссаасам̣ камзяяа. суссуусий жа д̇ид̇игкий жаад̇и д̇ава важанам̣ суссуусааяа жзва важанаад̇хиваасанзна жа саманнааг̇ад̇о бхавзяяаад̇и ад̇т̇о. урасийва бад̇идтааяаад̇и яат̇аа маад̇у ураси буд̇д̇о бад̇идтаад̇и, звам̣ бад̇идтахид̇ваа ад̇д̇ано маад̇арам̣ вияа ман̃н̃амаано д̇ам̣ бхаж̇зяяаасийд̇и вад̣̇ад̇и. яо жа д̇хаммзна жарад̇ийд̇и яо д̇ивид̇хзна сужарид̇зна д̇хаммзна ирияад̇и. на ман̃н̃ад̇ийд̇и д̇ат̇аа жаранд̇оби ‘‘ахам̣ д̇хаммам̣ жараамий’’д̇и маанам̣ на гарод̇и. висуд̣̇д̇хагааринд̇и висуд̣̇д̇хаанам̣ д̣̇асагусалагаммабат̇аанам̣ гаарагам̣.
Tattha yo te vissāsayeti yo tava vissāseyya. Khameyya teti yo ca tava attani tayā kataṃ vissāsaṃ khameyya. Sussūsī ca titikkhī cāti tava vacanaṃ sussūsāya ceva vacanādhivāsanena ca samannāgato bhaveyyāti attho. Urasīva patiṭṭhāyāti yathā mātu urasi putto patiṭṭhāti, evaṃ patiṭṭhahitvā attano mātaraṃ viya maññamāno taṃ bhajeyyāsīti vadati. Yo ca dhammena caratīti yo tividhena sucaritena dhammena iriyati. Na maññatīti tathā carantopi ‘‘ahaṃ dhammaṃ carāmī’’ti mānaṃ na karoti. Visuddhakārinti visuddhānaṃ dasakusalakammapathānaṃ kārakaṃ.
рааг̇авирааг̇инанд̇и рааг̇инан̃жа вирааг̇инан̃жа раж̇ж̇ид̇ваа д̇ам̣кан̣ан̃н̃зва вираж̇ж̇анасабхаавам̣. ниммануссамби жз сияаад̇и сажзби сагалаж̇амб̣уд̣̇ийбад̇алам̣ ниммануссам̣ ход̇и, соязва зго мануссо д̇идтад̇и, д̇ат̇ааби д̇аад̣̇исам̣ маа сзви. махаабат̇анд̇и г̇уут̇амагкид̇ам̣ маг̇г̇ам̣ вияа. яаанийваад̇и яаанзна г̇ажчанд̇о вияа. висаманд̇и ниннауннад̇акаан̣убаасаан̣аад̣̇ивисамам̣. б̣аалам̣ ажжубасзвад̇од̇и б̣аалам̣ аббан̃н̃ам̣ ад̇исзванд̇асса. саб̣б̣ад̣̇аад̇и д̇аад̇а, б̣аалзна саха сам̣ваасо наама амид̇д̇асам̣ваасо вияа саб̣б̣ад̣̇аа нижжагааламзва д̣̇угко. д̇ам̣ д̇ааханд̇и д̇зна гааран̣зна д̇ам̣ ахам̣.
Rāgavirāginanti rāginañca virāginañca rajjitvā taṃkhaṇaññeva virajjanasabhāvaṃ. Nimmanussampi ce siyāti sacepi sakalajambudīpatalaṃ nimmanussaṃ hoti, soyeva eko manusso tiṭṭhati, tathāpi tādisaṃ mā sevi. Mahāpathanti gūthamakkhitaṃ maggaṃ viya. Yānīvāti yānena gacchanto viya. Visamanti ninnaunnatakhāṇupāsāṇādivisamaṃ. Bālaṃ accupasevatoti bālaṃ appaññaṃ atisevantassa. Sabbadāti tāta, bālena saha saṃvāso nāma amittasaṃvāso viya sabbadā niccakālameva dukkho. Taṃ tāhanti tena kāraṇena taṃ ahaṃ.
со звам̣ бид̇араа овад̣̇ид̇о ‘‘д̇аад̇а, ахам̣ мануссабат̇ам̣ г̇анд̇ваа д̇умхаад̣̇исз бан̣д̣ид̇з на лабхиссаами, д̇ад̇т̇а г̇анд̇ум̣ бхааяаами, ид̇хзва д̇умхаагам̣ санд̇игз васиссаамий’’д̇и ааха. ат̇асса бхияяоби оваад̣̇ам̣ д̣̇ад̇ваа гасин̣абаригаммам̣ аажигки. со на жирассзва абхин̃н̃аасамаабад̇д̇ияо ниб̣б̣ад̇д̇зд̇ваа сад̣̇д̇хим̣ бид̇араа б̣рахмалогабарааяан̣о ахоси.
So evaṃ pitarā ovadito ‘‘tāta, ahaṃ manussapathaṃ gantvā tumhādise paṇḍite na labhissāmi, tattha gantuṃ bhāyāmi, idheva tumhākaṃ santike vasissāmī’’ti āha. Athassa bhiyyopi ovādaṃ datvā kasiṇaparikammaṃ ācikkhi. So na cirasseva abhiññāsamāpattiyo nibbattetvā saddhiṃ pitarā brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз угган̣тид̇абхигку сод̇аабад̇д̇ипалз бад̇идтахи.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhitabhikkhu sotāpattiphale patiṭṭhahi.
д̇ад̣̇аа д̇аабасагумааро угган̣тид̇абхигку ахоси, гумааригаа т̇уллагумааригаава, бид̇аа д̇аабасо бана ахамзва ахосинд̇и.
Tadā tāpasakumāro ukkaṇṭhitabhikkhu ahosi, kumārikā thullakumārikāva, pitā tāpaso pana ahameva ahosinti.
халид̣̇д̣̇ирааг̇аж̇аад̇агаван̣н̣анаа навамаа.
Haliddirāgajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 435. халид̣̇д̣̇ирааг̇аж̇аад̇агам̣ • 435. Haliddirāgajātakaṃ
