| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[239] 9. харид̇аман̣д̣уугаж̇аад̇агаван̣н̣анаа
[239] 9. Haritamaṇḍūkajātakavaṇṇanā
аасийвисамби мам̣ санд̇анд̇и ид̣̇ам̣ сад̇т̇аа взл̣уванз вихаранд̇о аж̇аад̇асад̇д̇ум̣ аараб̣бха гат̇зси. госаларааж̇асса хи бид̇аа махаагосало б̣имб̣исаараран̃н̃о д̇хийд̇арам̣ д̣̇ад̣̇амаано д̇хийд̇у нхаанамуулам̣ гаасиг̇аамагам̣ наама ад̣̇ааси. саа аж̇аад̇асад̇д̇унаа бид̇угхаад̇агагаммз гад̇з ран̃н̃о синзхзна нажирассзва гааламагааси. аж̇аад̇асад̇д̇у маад̇ари гаалагад̇ааяаби д̇ам̣ г̇аамам̣ бхун̃ж̇ад̇зва. госаларааж̇аа ‘‘бид̇угхаад̇агасса жорасса мама гуласанд̇агам̣ г̇аамам̣ на д̣̇ассаамий’’д̇и д̇зна сад̣̇д̇хим̣ яуж̇жхад̇и. гад̣̇аажи маад̇уласса ж̇аяо ход̇и, гад̣̇аажи бхааг̇инзяяасса. яад̣̇аа бана аж̇аад̇асад̇д̇у ж̇инаад̇и, д̇ад̣̇аа соманассаббад̇д̇о рат̇з д̇хаж̇ам̣ уссаабзд̇ваа маханд̇зна яасзна наг̇арам̣ бависад̇и. яад̣̇аа бана барааж̇аяад̇и, д̇ад̣̇аа д̣̇оманассаббад̇д̇о ган̃жи аж̇аанаабзд̇ваава бависад̇и. ат̇згад̣̇ивасам̣ д̇хаммасабхааяам̣ бхигкуу гат̇ам̣ самудтаабзсум̣ ‘‘аавусо, аж̇аад̇асад̇д̇у маад̇улам̣ ж̇инид̇ваа д̇уссад̇и, барааж̇ид̇о д̣̇оманассаббад̇д̇о ход̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва, буб̣б̣збзса ж̇инид̇ваа д̇уссад̇и, барааж̇ид̇о д̣̇оманассаббад̇д̇о ход̇ий’’д̇и вад̇ваа ад̇ийд̇ам̣ аахари.
Āsīvisampimaṃ santanti idaṃ satthā veḷuvane viharanto ajātasattuṃ ārabbha kathesi. Kosalarājassa hi pitā mahākosalo bimbisārarañño dhītaraṃ dadamāno dhītu nhānamūlaṃ kāsigāmakaṃ nāma adāsi. Sā ajātasattunā pitughātakakamme kate rañño sinehena nacirasseva kālamakāsi. Ajātasattu mātari kālakatāyapi taṃ gāmaṃ bhuñjateva. Kosalarājā ‘‘pitughātakassa corassa mama kulasantakaṃ gāmaṃ na dassāmī’’ti tena saddhiṃ yujjhati. Kadāci mātulassa jayo hoti, kadāci bhāgineyyassa. Yadā pana ajātasattu jināti, tadā somanassappatto rathe dhajaṃ ussāpetvā mahantena yasena nagaraṃ pavisati. Yadā pana parājayati, tadā domanassappatto kañci ajānāpetvāva pavisati. Athekadivasaṃ dhammasabhāyaṃ bhikkhū kathaṃ samuṭṭhāpesuṃ ‘‘āvuso, ajātasattu mātulaṃ jinitvā tussati, parājito domanassappatto hotī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepesa jinitvā tussati, parājito domanassappatto hotī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о нийламан̣д̣уугаяонияам̣ ниб̣б̣ад̇д̇и. д̇ад̣̇аа мануссаа над̣̇ийганд̣̇араад̣̇ийсу д̇ад̇т̇а д̇ад̇т̇а мажчз г̇ахан̣ад̇т̇ааяа гумийнаани од̣д̣зсум̣. згасмим̣ гумийнз б̣ахуу мажчаа бависим̣су. ат̇зго уд̣̇агаасийвисо мажчз каад̣̇анд̇о д̇ам̣ гумийнам̣ баависи, б̣ахуу мажчаа згад̇о худ̇ваа д̇ам̣ каад̣̇анд̇аа згалохид̇ам̣ агам̣су. со бадисаран̣ам̣ абассанд̇о маран̣абхаяад̇аж̇ж̇ид̇о гумийнамукзна нигкамид̇ваа взд̣̇анааббад̇д̇о уд̣̇агабарияанд̇з нибаж̇ж̇и. нийламан̣д̣уугоби д̇асмим̣ кан̣з уббад̇ид̇ваа гумийнасууламад̇т̇агз нибанно ход̇и. аасийвисо винижчаяадтаанам̣ алабханд̇о д̇ад̇т̇а нибаннам̣ д̇ам̣ д̣̇исваа ‘‘самма нийламан̣д̣ууга, имзсам̣ мажчаанам̣ гирияаа ружжад̇и д̇уяха’’нд̇и бужчанд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto nīlamaṇḍūkayoniyaṃ nibbatti. Tadā manussā nadīkandarādīsu tattha tattha macche gahaṇatthāya kumīnāni oḍḍesuṃ. Ekasmiṃ kumīne bahū macchā pavisiṃsu. Atheko udakāsīviso macche khādanto taṃ kumīnaṃ pāvisi, bahū macchā ekato hutvā taṃ khādantā ekalohitaṃ akaṃsu. So paṭisaraṇaṃ apassanto maraṇabhayatajjito kumīnamukhena nikkhamitvā vedanāppatto udakapariyante nipajji. Nīlamaṇḍūkopi tasmiṃ khaṇe uppatitvā kumīnasūlamatthake nipanno hoti. Āsīviso vinicchayaṭṭhānaṃ alabhanto tattha nipannaṃ taṃ disvā ‘‘samma nīlamaṇḍūka, imesaṃ macchānaṃ kiriyā ruccati tuyha’’nti pucchanto paṭhamaṃ gāthamāha –
177.
177.
‘‘аасийвисамби мам̣ санд̇ам̣, бавидтам̣ гуминаамукам̣;
‘‘Āsīvisampi maṃ santaṃ, paviṭṭhaṃ kumināmukhaṃ;
ружжад̇з харид̇аамаад̇аа, яам̣ мам̣ каад̣̇анд̇и мажчагаа’’д̇и.
Ruccate haritāmātā, yaṃ maṃ khādanti macchakā’’ti.
д̇ад̇т̇а аасийвисамби мам̣ санд̇анд̇и мам̣ ааг̇ад̇ависам̣ самаанам̣. ружжад̇з харид̇аамаад̇аа, яам̣ мам̣ каад̣̇анд̇и мажчагаад̇и зд̇ам̣ д̇ава ружжад̇и харид̇аман̣д̣уугабуд̇д̇аад̇и вад̣̇ад̇и.
Tattha āsīvisampi maṃ santanti maṃ āgatavisaṃ samānaṃ. Ruccate haritāmātā, yaṃ maṃ khādanti macchakāti etaṃ tava ruccati haritamaṇḍūkaputtāti vadati.
ат̇а нам̣ харид̇аман̣д̣ууго ‘‘аама, самма, ружжад̇ий’’д̇и. ‘‘гим̣гааран̣аа’’д̇и? ‘‘сажз д̇вамби д̇ава бад̣̇зсам̣ ааг̇ад̇з мажчз каад̣̇аси, мажчааби ад̇д̇ано бад̣̇зсам̣ ааг̇ад̇ам̣ д̇ам̣ каад̣̇анд̇и, ад̇д̇ано висаяз бад̣̇зсз г̇ожарабхуумияам̣ аб̣алаваа наама над̇т̇ий’’д̇и вад̇ваа д̣̇уд̇ияам̣ г̇аат̇амааха –
Atha naṃ haritamaṇḍūko ‘‘āma, samma, ruccatī’’ti. ‘‘Kiṃkāraṇā’’ti? ‘‘Sace tvampi tava padesaṃ āgate macche khādasi, macchāpi attano padesaṃ āgataṃ taṃ khādanti, attano visaye padese gocarabhūmiyaṃ abalavā nāma natthī’’ti vatvā dutiyaṃ gāthamāha –
178.
178.
‘‘вилумбад̇зва бурисо, яаавасса убагаббад̇и;
‘‘Vilumpateva puriso, yāvassa upakappati;
яад̣̇аа жан̃н̃з вилумбанд̇и, со вилуд̇д̇о вилумбад̇ий’’д̇и.
Yadā caññe vilumpanti, so vilutto vilumpatī’’ti.
д̇ад̇т̇а вилумбад̇зва бурисо, яаавасса убагаббад̇ийд̇и яаава асса бурисасса иссарияам̣ убагаббад̇и иж̇жхад̇и бавад̇д̇ад̇и, д̇аава со ан̃н̃ам̣ вилумбад̇иязва. ‘‘яаава со убагаббад̇ий’’д̇иби баато , яад̇д̇агам̣ гаалам̣ со бурисо саггод̇и вилумбид̇унд̇и ад̇т̇о. яад̣̇аа жан̃н̃з вилумбанд̇ийд̇и яад̣̇аа жа ан̃н̃з иссараа худ̇ваа вилумбанд̇и. со вилуд̇д̇о вилумбад̇ийд̇и ат̇а со вилумбаго ан̃н̃зхи вилумбад̇и. ‘‘вилумбад̇з’’д̇иби баато, аяамзвад̇т̇о. ‘‘вилумбана’’нд̇иби батанд̇и, д̇ассад̇т̇о на самзд̇и. звам̣ ‘‘вилумбаго буна вилумбам̣ баабун̣аад̇ий’’д̇и б̣од̇хисад̇д̇зна ад̣д̣з винижчид̇з уд̣̇агаасийвисасса д̣̇уб̣б̣алабхаавам̣ н̃ад̇ваа ‘‘бажжаамид̇д̇ам̣ г̇ан̣хиссаамаа’’д̇и мажчаг̇ан̣аа гумийнамукаа нигкамид̇ваа д̇ад̇т̇зва нам̣ ж̇ийвид̇агкаяам̣ баабзд̇ваа баггамум̣.
Tattha vilumpateva puriso, yāvassa upakappatīti yāva assa purisassa issariyaṃ upakappati ijjhati pavattati, tāva so aññaṃ vilumpatiyeva. ‘‘Yāva so upakappatī’’tipi pāṭho , yattakaṃ kālaṃ so puriso sakkoti vilumpitunti attho. Yadā caññe vilumpantīti yadā ca aññe issarā hutvā vilumpanti. So vilutto vilumpatīti atha so vilumpako aññehi vilumpati. ‘‘Vilumpate’’tipi pāṭho, ayamevattho. ‘‘Vilumpana’’ntipi paṭhanti, tassattho na sameti. Evaṃ ‘‘vilumpako puna vilumpaṃ pāpuṇātī’’ti bodhisattena aḍḍe vinicchite udakāsīvisassa dubbalabhāvaṃ ñatvā ‘‘paccāmittaṃ gaṇhissāmā’’ti macchagaṇā kumīnamukhā nikkhamitvā tattheva naṃ jīvitakkhayaṃ pāpetvā pakkamuṃ.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа уд̣̇агаасийвисо аж̇аад̇асад̇д̇у ахоси, нийламан̣д̣ууго бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā udakāsīviso ajātasattu ahosi, nīlamaṇḍūko pana ahameva ahosi’’nti.
харид̇аман̣д̣уугаж̇аад̇агаван̣н̣анаа навамаа.
Haritamaṇḍūkajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 239. харид̇аман̣д̣уугаж̇аад̇агам̣ • 239. Haritamaṇḍūkajātakaṃ
