| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
хад̇т̇ажчиннаад̣̇ивад̇т̇угат̇аа
Hatthacchinnādivatthukathā
119. хад̇т̇ажчиннаад̣̇ивад̇т̇уусу – хад̇т̇ажчиннод̇и яасса хад̇т̇ад̇алз ваа ман̣иб̣анд̇хз ваа габбарз ваа яад̇т̇а гад̇т̇ажи зго ваа д̣̇вз ваа хад̇т̇аа чиннаа хонд̇и. баад̣̇ажчиннод̇и яасса аг̇г̇абаад̣̇з ваа г̇обпагзсу ваа ж̇ан̇гхааяа ваа яад̇т̇а гад̇т̇ажи зго ваа д̣̇вз ваа баад̣̇аа чиннаа хонд̇и. хад̇т̇абаад̣̇ажчиннод̇и яасса вуд̇д̇аббагаарзнзва жад̇уусу хад̇т̇абаад̣̇зсу д̣̇вз ваа д̇аяо ваа саб̣б̣з ваа хад̇т̇абаад̣̇аа чиннаа хонд̇и. ган̣н̣ажчиннод̇и яасса ган̣н̣амуулз ваа ган̣н̣асагкалигааяа ваа зго ваа д̣̇вз ваа ган̣н̣аа чиннаа хонд̇и. яасса бана ган̣н̣аавид̣̇д̇хз чиж̇ж̇анд̇и, саггаа жа ход̇и сан̇гхаадзд̇ум̣, со ган̣н̣ам̣ сан̇гхаадзд̇ваа баб̣б̣ааж̇зд̇аб̣б̣о. наасажчиннод̇и яасса аж̇абад̣̇агз ваа аг̇г̇з ваа згабудз ваа яад̇т̇а гад̇т̇ажи наасаа чиннаа ход̇и. яасса бана наасигаа саггаа ход̇и санд̇хзд̇ум̣, со д̇ам̣ паасугам̣ гад̇ваа баб̣б̣ааж̇зд̇аб̣б̣о. ган̣н̣анаасажчинно убхаяавасзна взд̣̇ид̇аб̣б̣о. ан̇г̇улижчиннод̇и яасса накасзсам̣ ад̣̇ассзд̇ваа згаа ваа б̣ахуу ваа ан̇г̇улияо чиннаа хонд̇и. яасса бана суд̇д̇ад̇анд̇умад̇д̇амби накасзсам̣ бан̃н̃ааяад̇и, д̇ам̣ баб̣б̣ааж̇зд̇ум̣ ваддад̇и. ал̣ажчиннод̇и яасса жад̇уусу ан̇г̇удтагзсу ан̇г̇улияам̣ вуд̇д̇анаязнзва зго ваа б̣ахуу ваа ан̇г̇удтагаа чиннаа хонд̇и. ган̣д̣аражчиннод̇и яасса ган̣д̣аранаамагаа махаанхааруу бурад̇о ваа бажчад̇о ваа чиннаа хонд̇и; язсу згассаби чиннад̇д̇аа аг̇г̇абаад̣̇зна ваа жан̇гамад̇и, муулзна ваа жан̇гамад̇и, на ваа баад̣̇ам̣ бад̇идтаабзд̇ум̣ саггод̇и.
119. Hatthacchinnādivatthūsu – hatthacchinnoti yassa hatthatale vā maṇibandhe vā kappare vā yattha katthaci eko vā dve vā hatthā chinnā honti. Pādacchinnoti yassa aggapāde vā gopphakesu vā jaṅghāya vā yattha katthaci eko vā dve vā pādā chinnā honti. Hatthapādacchinnoti yassa vuttappakāreneva catūsu hatthapādesu dve vā tayo vā sabbe vā hatthapādā chinnā honti. Kaṇṇacchinnoti yassa kaṇṇamūle vā kaṇṇasakkhalikāya vā eko vā dve vā kaṇṇā chinnā honti. Yassa pana kaṇṇāviddhe chijjanti, sakkā ca hoti saṅghāṭetuṃ, so kaṇṇaṃ saṅghāṭetvā pabbājetabbo. Nāsacchinnoti yassa ajapadake vā agge vā ekapuṭe vā yattha katthaci nāsā chinnā hoti. Yassa pana nāsikā sakkā hoti sandhetuṃ, so taṃ phāsukaṃ katvā pabbājetabbo. Kaṇṇanāsacchinno ubhayavasena veditabbo. Aṅgulicchinnoti yassa nakhasesaṃ adassetvā ekā vā bahū vā aṅguliyo chinnā honti. Yassa pana suttatantumattampi nakhasesaṃ paññāyati, taṃ pabbājetuṃ vaṭṭati. Aḷacchinnoti yassa catūsu aṅguṭṭhakesu aṅguliyaṃ vuttanayeneva eko vā bahū vā aṅguṭṭhakā chinnā honti. Kaṇḍaracchinnoti yassa kaṇḍaranāmakā mahānhārū purato vā pacchato vā chinnā honti; yesu ekassapi chinnattā aggapādena vā caṅkamati, mūlena vā caṅkamati, na vā pādaṃ patiṭṭhāpetuṃ sakkoti.
пан̣ахад̇т̇агод̇и яасса ваг̇г̇улибагкагаа вияа ан̇г̇улияо самб̣ад̣̇д̇хаа хонд̇и; зд̇ам̣ баб̣б̣ааж̇зд̇угаамзна ан̇г̇уланд̇аригааяо паалзд̇ваа саб̣б̣ам̣ анд̇аражаммам̣ абанзд̇ваа паасугам̣ гад̇ваа баб̣б̣ааж̇зд̇аб̣б̣о. яассаби ча ан̇г̇улияо хонд̇и, д̇ам̣ баб̣б̣ааж̇зд̇угаамзна ад̇хигаан̇г̇улим̣ чинд̣̇ид̇ваа паасугам̣ гад̇ваа баб̣б̣ааж̇зд̇аб̣б̣о.
Phaṇahatthakoti yassa vaggulipakkhakā viya aṅguliyo sambaddhā honti; etaṃ pabbājetukāmena aṅgulantarikāyo phāletvā sabbaṃ antaracammaṃ apanetvā phāsukaṃ katvā pabbājetabbo. Yassapi cha aṅguliyo honti, taṃ pabbājetukāmena adhikaaṅguliṃ chinditvā phāsukaṃ katvā pabbājetabbo.
куж̇ж̇од̇и яо урасса ваа бидтияаа ваа бассасса ваа нигканд̇ад̇д̇аа куж̇ж̇асарийро. яасса бана гин̃жи гин̃жи ан̇г̇абажжан̇г̇ам̣ ийсагам̣ ван̇гам̣, д̇ам̣ баб̣б̣ааж̇зд̇ум̣ ваддад̇и. махаабурисо зва хи б̣рахмуж̇ж̇уг̇ад̇д̇о, авасзсо сад̇д̇о акуж̇ж̇о наама над̇т̇и.
Khujjoti yo urassa vā piṭṭhiyā vā passassa vā nikkhantattā khujjasarīro. Yassa pana kiñci kiñci aṅgapaccaṅgaṃ īsakaṃ vaṅkaṃ, taṃ pabbājetuṃ vaṭṭati. Mahāpuriso eva hi brahmujjugatto, avaseso satto akhujjo nāma natthi.
вааманод̇и ж̇ан̇гхаваамано ваа гадиваамано ваа убхаяаваамано ваа. ж̇ан̇гхавааманасса гадид̇о бадтааяа хздтимагааяо рассо ход̇и, убаримагааяо барибун̣н̣о. гадивааманасса гадид̇о бадтааяа убаримагааяо рассо ход̇и, хздтимагааяо барибун̣н̣о. убхаяавааманасса убхоби гааяаа рассаа хонд̇и, язсам̣ рассад̇д̇аа бхууд̇аанам̣ вияа баривадумо махаагужчигхадасад̣̇исо ад̇д̇абхааво ход̇и, д̇ам̣ д̇ивид̇хамби баб̣б̣ааж̇зд̇ум̣ на ваддад̇и.
Vāmanoti jaṅghavāmano vā kaṭivāmano vā ubhayavāmano vā. Jaṅghavāmanassa kaṭito paṭṭhāya heṭṭhimakāyo rasso hoti, uparimakāyo paripuṇṇo. Kaṭivāmanassa kaṭito paṭṭhāya uparimakāyo rasso hoti, heṭṭhimakāyo paripuṇṇo. Ubhayavāmanassa ubhopi kāyā rassā honti, yesaṃ rassattā bhūtānaṃ viya parivaṭumo mahākucchighaṭasadiso attabhāvo hoti, taṃ tividhampi pabbājetuṃ na vaṭṭati.
г̇алаг̇ан̣д̣ийд̇и яасса гумбхан̣д̣ам̣ вияа г̇алз г̇ан̣д̣о ход̇и. д̣̇зсанаамад̇д̇амзва жзд̇ам̣, яасмим̣ гисмин̃жи бана бад̣̇зсз г̇ан̣д̣з сад̇и на баб̣б̣ааж̇зд̇аб̣б̣о. д̇ад̇т̇а винижчаяо – ‘‘на бхигкавз бан̃жахи ааб̣аад̇хзхи пудто баб̣б̣ааж̇зд̇аб̣б̣о’’д̇и зд̇т̇а вуд̇д̇анаязнзва взд̣̇ид̇аб̣б̣о. лагкан̣аахад̇агасаахад̇аликид̇агзсу яам̣ вад̇д̇аб̣б̣ам̣, д̇ам̣ ‘‘на бхигкавз лагкан̣аахад̇о’’д̇иаад̣̇ийсу вуд̇д̇амзва.
Galagaṇḍīti yassa kumbhaṇḍaṃ viya gale gaṇḍo hoti. Desanāmattameva cetaṃ, yasmiṃ kismiñci pana padese gaṇḍe sati na pabbājetabbo. Tattha vinicchayo – ‘‘na bhikkhave pañcahi ābādhehi phuṭṭho pabbājetabbo’’ti ettha vuttanayeneva veditabbo. Lakkhaṇāhatakasāhatalikhitakesu yaṃ vattabbaṃ, taṃ ‘‘na bhikkhave lakkhaṇāhato’’tiādīsu vuttameva.
сийбад̣̇ийд̇и бхаарабаад̣̇о вужжад̇и. яасса баад̣̇о т̇ууло ход̇и сан̃ж̇аад̇абил̣аго каро, со на баб̣б̣ааж̇зд̇аб̣б̣о. яасса бана на д̇аава карабхаавам̣ г̇ан̣хаад̇и, саггаа ход̇и убанаахам̣ б̣анд̇хид̇ваа уд̣̇агаааваадз бавзсзд̇ваа уд̣̇агаваалигааяа буурзд̇ваа яат̇аа сираа бан̃н̃ааяанд̇и, ж̇ан̇гхаа жа д̇зланаал̣игаа вияа ход̇и, звам̣ милаабзд̇ум̣ саггаа, д̇асса баад̣̇ам̣ ийд̣̇исам̣ гад̇ваа д̇ам̣ баб̣б̣ааж̇зд̇ум̣ ваддад̇и. сажз буна вад̣дхад̇и, убасамбаад̣̇знд̇знааби д̇ат̇аа гад̇ваава убасамбаад̣̇зд̇аб̣б̣о.
Sīpadīti bhārapādo vuccati. Yassa pādo thūlo hoti sañjātapiḷako kharo, so na pabbājetabbo. Yassa pana na tāva kharabhāvaṃ gaṇhāti, sakkā hoti upanāhaṃ bandhitvā udakaāvāṭe pavesetvā udakavālikāya pūretvā yathā sirā paññāyanti, jaṅghā ca telanāḷikā viya hoti, evaṃ milāpetuṃ sakkā, tassa pādaṃ īdisaṃ katvā taṃ pabbājetuṃ vaṭṭati. Sace puna vaḍḍhati, upasampādentenāpi tathā katvāva upasampādetabbo.
баабарог̇ийд̇и арисабхаг̇анд̣̇арабид̇д̇асзмхагаасасосаад̣̇ийсу язна гзнажи рог̇зна нижжаад̇уро ад̇згижчарог̇о ж̇зг̇ужчо аманаабо; аяам̣ на баб̣б̣ааж̇зд̇аб̣б̣о.
Pāparogīti arisabhagandarapittasemhakāsasosādīsu yena kenaci rogena niccāturo atekiccharogo jeguccho amanāpo; ayaṃ na pabbājetabbo.
барисад̣̇уусагод̇и яо ад̇д̇ано вируубад̇ааяа барисам̣ д̣̇уусзд̇и; ад̇ид̣̇ийгхо ваа ход̇и ан̃н̃зсам̣ сийсаббамаан̣анаабхиббад̣̇зсо, ад̇ирассо ваа убхаяавааманабхууд̇аруубам̣ вияа, ад̇игаал̣о ваа жхаабид̇акзд̇д̇з каан̣уго вияа, ажжод̣̇аад̇о ваа д̣̇ад̇хид̇аггаад̣̇ийхи бамаж̇ж̇ид̇амадтад̇амб̣алохаван̣н̣о, ад̇игисо ваа манд̣̇амам̣салохид̇о адтисираажаммасарийро вияа, ад̇ит̇ууло ваа бхаарияамам̣со, маход̣̇аро ваа махаабхууд̇асад̣̇исо, ад̇имаханд̇асийсо ваа бажчим̣ сийсз гад̇ваа тид̇о вияа, ад̇икуд̣̇д̣̇агасийсо ваа сарийрасса анануруубзна ад̇икуд̣̇д̣̇агзна сийсзна саманнааг̇ад̇о, гуудагуудасийсо ваа д̇аалапалабин̣д̣исад̣̇исзна сийсзна саманнааг̇ад̇о, сикарасийсо ваа уд̣̇д̇хам̣ анубуб̣б̣ад̇анугзна сийсзна саманнааг̇ад̇о, наал̣исийсо ваа махаавзл̣убаб̣б̣асад̣̇исзна сийсзна саманнааг̇ад̇о, габбасийсо ваа баб̣бхаарасийсо ваа жад̇уусу бассзсу язна гзнажи бассзна он̣ад̇зна сийсзна саманнааг̇ад̇о, ван̣асийсо ваа бууд̇исийсо ваа ган̣н̣игагзсо ваа баан̣агзхи кааяид̇агзд̣̇аарз сассасад̣̇исзхи д̇ахим̣ д̇ахим̣ удтид̇зхи гзсзхи саманнааг̇ад̇о, нилломасийсо ваа т̇уулат̇ад̣̇д̇хагзсо ваа д̇аалахийрасад̣̇исзхи гзсзхи саманнааг̇ад̇о, ж̇аад̇ибалид̇зхи бан̣д̣арасийсо ваа багад̇ид̇амб̣агзсо ваа аад̣̇ид̇д̇зхи вияа гзсзхи саманнааг̇ад̇о, ааваддасийсо ваа г̇уннам̣ сарийрз ааваддасад̣̇исзхи уд̣̇д̇хаг̇г̇зхи гзсааваддзхи саманнааг̇ад̇о, сийсаломзхи сад̣̇д̇хим̣ згааб̣ад̣̇д̇хабхамугаломо ваа ж̇аалаб̣ад̣̇д̇хзна вияа налаадзна саманнааг̇ад̇о.
Parisadūsakoti yo attano virūpatāya parisaṃ dūseti; atidīgho vā hoti aññesaṃ sīsappamāṇanābhippadeso, atirasso vā ubhayavāmanabhūtarūpaṃ viya, atikāḷo vā jhāpitakhette khāṇuko viya, accodāto vā dadhitakkādīhi pamajjitamaṭṭhatambalohavaṇṇo, atikiso vā mandamaṃsalohito aṭṭhisirācammasarīro viya, atithūlo vā bhāriyamaṃso, mahodaro vā mahābhūtasadiso, atimahantasīso vā pacchiṃ sīse katvā ṭhito viya, atikhuddakasīso vā sarīrassa ananurūpena atikhuddakena sīsena samannāgato, kūṭakūṭasīso vā tālaphalapiṇḍisadisena sīsena samannāgato, sikharasīso vā uddhaṃ anupubbatanukena sīsena samannāgato, nāḷisīso vā mahāveḷupabbasadisena sīsena samannāgato, kappasīso vā pabbhārasīso vā catūsu passesu yena kenaci passena oṇatena sīsena samannāgato, vaṇasīso vā pūtisīso vā kaṇṇikakeso vā pāṇakehi khāyitakedāre sassasadisehi tahiṃ tahiṃ uṭṭhitehi kesehi samannāgato, nillomasīso vā thūlathaddhakeso vā tālahīrasadisehi kesehi samannāgato, jātipalitehi paṇḍarasīso vā pakatitambakeso vā ādittehi viya kesehi samannāgato, āvaṭṭasīso vā gunnaṃ sarīre āvaṭṭasadisehi uddhaggehi kesāvaṭṭehi samannāgato, sīsalomehi saddhiṃ ekābaddhabhamukalomo vā jālabaddhena viya nalāṭena samannāgato.
самб̣ад̣̇д̇хабхамуго ваа нилломабхамуго ваа маггадабхамуго ваа ад̇имаханд̇агки ваа ад̇икуд̣̇д̣̇агагки ваа махим̣сажаммз ваасигон̣зна бахарид̇ваа гад̇ачид̣̇д̣̇асад̣̇исзхи агкийхи саманнааг̇ад̇о, висамагки ваа згзна маханд̇зна згзна куд̣̇д̣̇агзна агкинаа саманнааг̇ад̇о, висамажаггало ваа згзна уд̣̇д̇хам̣ згзна ад̇ход̇и звам̣ висамаж̇аад̇зхи агкижаггалзхи саманнааг̇ад̇о, гзгаро ваа г̇амбхийрагки ваа яасса г̇амбхийрз уд̣̇абаанз уд̣̇агад̇аарагаа вияа агкид̇аарагаа бан̃н̃ааяанд̇и; нигканд̇агки ваа яасса гаггадагассзва агкид̇аарагаа нигканд̇аа хонд̇и; хад̇т̇иган̣н̣о ваа махад̇ийхи ган̣н̣асагкалигаахи саманнааг̇ад̇о, муусигаган̣н̣о ваа ж̇адугаган̣н̣о ваа куд̣̇д̣̇игаахи ган̣н̣асагкалигаахи саманнааг̇ад̇о, чид̣̇д̣̇амад̇д̇аган̣н̣о ваа яасса винаа ган̣н̣асагкалигаахи ган̣н̣ачид̣̇д̣̇амад̇д̇амзва ход̇и; авид̣̇д̇хаган̣н̣о ваа яонагаж̇аад̇иго бана барисад̣̇уусаго на ход̇и; сабхаавоязва хи со д̇асса ган̣н̣абхаг̇анд̣̇ариго ваа нижжабууд̇инаа ган̣н̣зна саманнааг̇ад̇о, г̇ан̣д̣аган̣н̣о ваа сад̣̇аабаг̇гхарид̇абуб̣б̣зна ган̣н̣зна саманнааг̇ад̇о, дан̇гид̇аган̣н̣о ваа г̇обхад̇д̇анаал̣игааяа аг̇г̇асад̣̇исзхи ган̣н̣зхи саманнааг̇ад̇о, ад̇ибин̇г̇алагки ваа мад̇хубин̇г̇алам̣ бана баб̣б̣ааж̇зд̇ум̣ ваддад̇и. ниббакумагки ваа ассубаг̇гхаран̣агки ваа бубпид̇агки ваа агкибаагзна саманнааг̇ад̇агки ваа.
Sambaddhabhamuko vā nillomabhamuko vā makkaṭabhamuko vā atimahantakkhi vā atikhuddakakkhi vā mahiṃsacamme vāsikoṇena paharitvā katachiddasadisehi akkhīhi samannāgato, visamakkhi vā ekena mahantena ekena khuddakena akkhinā samannāgato, visamacakkalo vā ekena uddhaṃ ekena adhoti evaṃ visamajātehi akkhicakkalehi samannāgato, kekaro vā gambhīrakkhi vā yassa gambhīre udapāne udakatārakā viya akkhitārakā paññāyanti; nikkhantakkhi vā yassa kakkaṭakasseva akkhitārakā nikkhantā honti; hatthikaṇṇo vā mahatīhi kaṇṇasakkhalikāhi samannāgato, mūsikakaṇṇo vā jaṭukakaṇṇo vā khuddikāhi kaṇṇasakkhalikāhi samannāgato, chiddamattakaṇṇo vā yassa vinā kaṇṇasakkhalikāhi kaṇṇachiddamattameva hoti; aviddhakaṇṇo vā yonakajātiko pana parisadūsako na hoti; sabhāvoyeva hi so tassa kaṇṇabhagandariko vā niccapūtinā kaṇṇena samannāgato, gaṇḍakaṇṇo vā sadāpaggharitapubbena kaṇṇena samannāgato, ṭaṅkitakaṇṇo vā gobhattanāḷikāya aggasadisehi kaṇṇehi samannāgato, atipiṅgalakkhi vā madhupiṅgalaṃ pana pabbājetuṃ vaṭṭati. Nippakhumakkhi vā assupaggharaṇakkhi vā pupphitakkhi vā akkhipākena samannāgatakkhi vā.
ад̇имаханд̇анаасиго ваа ад̇икуд̣̇д̣̇аганаасиго ваа жибиданаасиго ваа маж̇жхз аббад̇идтахид̇ваа згабассз тид̇аван̇ганаасиго ваа, д̣̇ийгханаасиго ваа сугад̇ун̣д̣асад̣̇исааяа ж̇ивхааяа лзхид̇ум̣ саггун̣зяяааяа наасигааяа саманнааг̇ад̇о, нижжабаг̇гхарид̇асин̇гхаан̣иганаасо ваа.
Atimahantanāsiko vā atikhuddakanāsiko vā cipiṭanāsiko vā majjhe appatiṭṭhahitvā ekapasse ṭhitavaṅkanāsiko vā, dīghanāsiko vā sukatuṇḍasadisāya jivhāya lehituṃ sakkuṇeyyāya nāsikāya samannāgato, niccapaggharitasiṅghāṇikanāso vā.
махаамуко ваа яасса бадан̇г̇аман̣д̣уугассзва муканимид̇д̇ам̣язва маханд̇ам̣ ход̇и, мукам̣ бана лааб̣усад̣̇исам̣ ад̇икуд̣̇д̣̇агам̣, бхиннамуко ваа ван̇гамуко ваа махааодто ваа угкалимукаваддисад̣̇исзхи одтзхи саманнааг̇ад̇о, д̇анугаодто ваа бхзрижаммасад̣̇исзхи д̣̇анд̇з бид̣̇ахид̇ум̣ асамад̇т̇зхи одтзхи саманнааг̇ад̇о, махаад̇хародто ваа д̇анугауд̇д̇ародто ваа д̇анугаад̇хародто ваа махаауд̇д̇ародто ваа одтачиннаго ваа зл̣амуко ваа уббаггамуко ваа сан̇кад̇ун̣д̣аго ваа б̣ахисзд̇зхи анд̇о ад̇ирад̇д̇зхи одтзхи саманнааг̇ад̇о, д̣̇уг̇г̇анд̇хагун̣абамуко ваа.
Mahāmukho vā yassa paṭaṅgamaṇḍūkasseva mukhanimittaṃyeva mahantaṃ hoti, mukhaṃ pana lābusadisaṃ atikhuddakaṃ, bhinnamukho vā vaṅkamukho vā mahāoṭṭho vā ukkhalimukhavaṭṭisadisehi oṭṭhehi samannāgato, tanukaoṭṭho vā bhericammasadisehi dante pidahituṃ asamatthehi oṭṭhehi samannāgato, mahādharoṭṭho vā tanukauttaroṭṭho vā tanukaadharoṭṭho vā mahāuttaroṭṭho vā oṭṭhachinnako vā eḷamukho vā uppakkamukho vā saṅkhatuṇḍako vā bahisetehi anto atirattehi oṭṭhehi samannāgato, duggandhakuṇapamukho vā.
махаад̣̇анд̇о ваа адтагад̣̇анд̇асад̣̇исзхи д̣̇анд̇зхи саманнааг̇ад̇о асурад̣̇анд̇о ваа хздтаа ваа убари ваа б̣ахинигканд̇ад̣̇анд̇о, яасса бана саггаа ход̇и одтзхи бид̣̇ахид̇ум̣ гат̇знд̇ассзва бан̃н̃ааяад̇и но агат̇знд̇асса, д̇ам̣ баб̣б̣ааж̇зд̇ум̣ ваддад̇и. бууд̇ид̣̇анд̇о ваа нид̣̇д̣̇анд̇о ваа яасса бана д̣̇анд̇анд̇арз галанд̣̇агад̣̇анд̇о вияа сукумад̣̇анд̇о ход̇и, д̇ам̣ баб̣б̣ааж̇зд̇ум̣ ваддад̇и.
Mahādanto vā aṭṭhakadantasadisehi dantehi samannāgato asuradanto vā heṭṭhā vā upari vā bahinikkhantadanto, yassa pana sakkā hoti oṭṭhehi pidahituṃ kathentasseva paññāyati no akathentassa, taṃ pabbājetuṃ vaṭṭati. Pūtidanto vā niddanto vā yassa pana dantantare kalandakadanto viya sukhumadanto hoti, taṃ pabbājetuṃ vaṭṭati.
махаахануго ваа г̇оханусад̣̇исзна ханунаа саманнааг̇ад̇о, д̣̇ийгхахануго ваа жибидахануго ваа анд̇обавидтзна вияа ад̇ирассзна ханугзна саманнааг̇ад̇о, бхиннахануго ваа ван̇гахануго ваа ниммассуд̣̇аатиго ваа бхигкунисад̣̇исамуко д̣̇ийгхаг̇ало ваа б̣агаг̇аласад̣̇исзна г̇алзна саманнааг̇ад̇о, рассаг̇ало ваа анд̇обавидтзна вияа г̇алзна саманнааг̇ад̇о, бхиннаг̇ало ваа бхадтаам̣сагуудо ваа ахад̇т̇о ваа згахад̇т̇о ваа ад̇ирассахад̇т̇о ваа ад̇ид̣̇ийгхахад̇т̇о ваа бхиннауро ваа бхиннабидти ваа гажчуг̇ад̇д̇о ваа ган̣д̣уг̇ад̇д̇о ваа д̣̇ад̣̇д̣̇уг̇ад̇д̇о ваа г̇од̇хааг̇ад̇д̇о ваа, яасса г̇од̇хааяа вияа г̇ад̇д̇ад̇о жун̣н̣аани бад̇анд̇и, саб̣б̣ан̃жзд̇ам̣ вируубагаран̣ам̣ санд̇хааяа вид̇т̇ааригавасзна вуд̇д̇ам̣. винижчаяо банзд̇т̇а ‘‘на бхигкавз бан̃жахи ааб̣аад̇хзхий’’д̇и зд̇т̇а вуд̇д̇анаязнзва взд̣̇ид̇аб̣б̣о.
Mahāhanuko vā gohanusadisena hanunā samannāgato, dīghahanuko vā cipiṭahanuko vā antopaviṭṭhena viya atirassena hanukena samannāgato, bhinnahanuko vā vaṅkahanuko vā nimmassudāṭhiko vā bhikkhunisadisamukho dīghagalo vā bakagalasadisena galena samannāgato, rassagalo vā antopaviṭṭhena viya galena samannāgato, bhinnagalo vā bhaṭṭhaaṃsakūṭo vā ahattho vā ekahattho vā atirassahattho vā atidīghahattho vā bhinnauro vā bhinnapiṭṭhi vā kacchugatto vā kaṇḍugatto vā daddugatto vā godhāgatto vā, yassa godhāya viya gattato cuṇṇāni patanti, sabbañcetaṃ virūpakaraṇaṃ sandhāya vitthārikavasena vuttaṃ. Vinicchayo panettha ‘‘na bhikkhave pañcahi ābādhehī’’ti ettha vuttanayeneva veditabbo.
бхадтагадиго ваа махаааанисад̣̇о ваа уд̣̇д̇ханагуудасад̣̇исзхи аанисад̣̇амам̣сзхи ажжуг̇г̇ад̇зхи саманнааг̇ад̇о, махааууруго ваа ваад̇ан̣д̣иго ваа махааж̇аан̣уго ваа сан̇гхадданаж̇аан̣уго ваа д̣̇ийгхаж̇ан̇гхо ваа яадтисад̣̇исаж̇ан̇гхо вигадо ваа бан̣хо ваа уб̣б̣ад̣̇д̇хабин̣д̣иго ваа, со д̣̇увид̇хо хздтаа орул̣хаахи ваа убари аарул̣хаахи ваа махад̇ийхи ж̇ан̇гхабин̣д̣игаахи саманнааг̇ад̇о, махааж̇ан̇гхо ваа т̇уулаж̇ан̇гхабин̣д̣иго ваа махаабаад̣̇о ваа махаабан̣хи ваа бидтигабаад̣̇о ваа баад̣̇авзмаж̇жхад̇о удтид̇аж̇ан̇гхо ван̇габаад̣̇о ваа со д̣̇увид̇хо – анд̇о ваа б̣ахи ваа баривад̇д̇абаад̣̇о г̇ан̣тиган̇г̇ули ваа син̇г̇ивзрапан̣асад̣̇исаахи ан̇г̇улийхи саманнааг̇ад̇о, анд̇ханако ваа гаал̣аван̣н̣зхи бууд̇инакзхи саманнааг̇ад̇о, саб̣б̣оби зса барисад̣̇уусаго. зваруубо барисад̣̇уусаго на баб̣б̣ааж̇зд̇аб̣б̣о.
Bhaṭṭhakaṭiko vā mahāānisado vā uddhanakūṭasadisehi ānisadamaṃsehi accuggatehi samannāgato, mahāūruko vā vātaṇḍiko vā mahājāṇuko vā saṅghaṭṭanajāṇuko vā dīghajaṅgho vā yaṭṭhisadisajaṅgho vikaṭo vā paṇho vā ubbaddhapiṇḍiko vā, so duvidho heṭṭhā oruḷhāhi vā upari āruḷhāhi vā mahatīhi jaṅghapiṇḍikāhi samannāgato, mahājaṅgho vā thūlajaṅghapiṇḍiko vā mahāpādo vā mahāpaṇhi vā piṭṭhikapādo vā pādavemajjhato uṭṭhitajaṅgho vaṅkapādo vā so duvidho – anto vā bahi vā parivattapādo gaṇṭhikaṅguli vā siṅgiveraphaṇasadisāhi aṅgulīhi samannāgato, andhanakho vā kāḷavaṇṇehi pūtinakhehi samannāgato, sabbopi esa parisadūsako. Evarūpo parisadūsako na pabbājetabbo.
гаан̣од̇и басаннанд̇хо ваа ход̇у бубпаад̣̇ийхи ваа убахад̇абасаад̣̇о. яо д̣̇вийхи ваа згзна ваа агкинаа на бассад̇и, со на баб̣б̣ааж̇зд̇аб̣б̣о. махаабажжарияам̣ бана згагкигаан̣о гаан̣од̇и вуд̇д̇о, д̣̇виагкигаан̣о анд̇хзна сан̇г̇ахид̇о. махааадтагат̇ааяам̣ ж̇ажжанд̇хо анд̇ход̇и вуд̇д̇о, д̇асмаа убхаяамби барияааязна яуж̇ж̇ад̇и. гун̣ийд̇и хад̇т̇агун̣ий ваа баад̣̇агун̣ий ваа ан̇г̇улигун̣ий ваа; яасса зд̇зсу хад̇т̇аад̣̇ийсу яам̣гин̃жи ван̇гам̣ бан̃н̃ааяад̇и, со гун̣ий наама. кан̃ж̇од̇и над̇аж̇аан̣уго ваа бхиннаж̇ан̇гхо ваа маж̇жхз сан̇гудид̇абаад̣̇ад̇д̇аа гун̣д̣абаад̣̇аго ваа бидтибаад̣̇амаж̇жхзна жан̇гаманд̇о аг̇г̇з сан̇гудид̇абаад̣̇ад̇д̇аа гун̣д̣абаад̣̇аго ваа бидтибаад̣̇аг̇г̇зна жан̇гаманд̇о аг̇г̇абаад̣̇знзва жан̇гаманакан̃ж̇о ваа бан̣хигааяа жан̇гаманакан̃ж̇о ваа баад̣̇асса б̣аахиранд̇зна жан̇гаманакан̃ж̇о ваа баад̣̇асса аб̣бханд̇аранд̇зна жан̇гаманакан̃ж̇о ваа г̇обпагаанам̣ убари бхаг̇г̇ад̇д̇аа сагалзна бидтибаад̣̇зна жан̇гаманакан̃ж̇о ваа; саб̣б̣обзса кан̃ж̇оязва, со на баб̣б̣ааж̇зд̇аб̣б̣о.
Kāṇoti pasannandho vā hotu pupphādīhi vā upahatapasādo. Yo dvīhi vā ekena vā akkhinā na passati, so na pabbājetabbo. Mahāpaccariyaṃ pana ekakkhikāṇo kāṇoti vutto, dviakkhikāṇo andhena saṅgahito. Mahāaṭṭhakathāyaṃ jaccandho andhoti vutto, tasmā ubhayampi pariyāyena yujjati. Kuṇīti hatthakuṇī vā pādakuṇī vā aṅgulikuṇī vā; yassa etesu hatthādīsu yaṃkiñci vaṅkaṃ paññāyati, so kuṇī nāma. Khañjoti natajāṇuko vā bhinnajaṅgho vā majjhe saṅkuṭitapādattā kuṇḍapādako vā piṭṭhipādamajjhena caṅkamanto agge saṅkuṭitapādattā kuṇḍapādako vā piṭṭhipādaggena caṅkamanto aggapādeneva caṅkamanakhañjo vā paṇhikāya caṅkamanakhañjo vā pādassa bāhirantena caṅkamanakhañjo vā pādassa abbhantarantena caṅkamanakhañjo vā gopphakānaṃ upari bhaggattā sakalena piṭṭhipādena caṅkamanakhañjo vā; sabbopesa khañjoyeva, so na pabbājetabbo.
багкахад̇од̇и яасса зго хад̇т̇о ваа баад̣̇о ваа ад̣дхасарийрам̣ ваа сукам̣ на вахад̇и. чиннирияаабат̇од̇и бийтасабби вужжад̇и. ж̇араад̣̇уб̣б̣алод̇и ж̇ин̣н̣абхаавзна д̣̇уб̣б̣ало ад̇д̇ано жийварараж̇анаад̣̇игаммам̣ гаад̇умби асамад̇т̇о. яо бана махаллагоби б̣алаваа ход̇и, ад̇д̇аанам̣ бадиж̇аг̇г̇ид̇ум̣ саггод̇и, со баб̣б̣ааж̇зд̇аб̣б̣о. анд̇ход̇и ж̇ажжанд̇хо вужжад̇и. мууг̇од̇и яасса важийбхзд̣̇о наббавад̇д̇ад̇и; яассааби бавад̇д̇ад̇и, саран̣аг̇аманам̣ бана барибун̣н̣ам̣ бхаасид̇ум̣ на саггод̇и, д̇аад̣̇исам̣ мамманамби баб̣б̣ааж̇зд̇ум̣ на ваддад̇и. яо бана саран̣аг̇аманамад̇д̇ам̣ барибун̣н̣ам̣ бхаасид̇ум̣ саггод̇и, д̇ам̣ баб̣б̣ааж̇зд̇ум̣ ваддад̇и.
Pakkhahatoti yassa eko hattho vā pādo vā aḍḍhasarīraṃ vā sukhaṃ na vahati. Chinniriyāpathoti pīṭhasappi vuccati. Jarādubbaloti jiṇṇabhāvena dubbalo attano cīvararajanādikammaṃ kātumpi asamattho. Yo pana mahallakopi balavā hoti, attānaṃ paṭijaggituṃ sakkoti, so pabbājetabbo. Andhoti jaccandho vuccati. Mūgoti yassa vacībhedo nappavattati; yassāpi pavattati, saraṇagamanaṃ pana paripuṇṇaṃ bhāsituṃ na sakkoti, tādisaṃ mammanampi pabbājetuṃ na vaṭṭati. Yo pana saraṇagamanamattaṃ paripuṇṇaṃ bhāsituṃ sakkoti, taṃ pabbājetuṃ vaṭṭati.
б̣ад̇хирод̇и яо саб̣б̣зна саб̣б̣ам̣ на сун̣аад̇и. яо бана махаасад̣̇д̣̇ам̣ сун̣аад̇и, д̇ам̣ баб̣б̣ааж̇зд̇ум̣ ваддад̇и. анд̇хамууг̇аад̣̇аяо убхаяад̣̇осавасзна вуд̇д̇аа. язсан̃жа баб̣б̣аж̇ж̇аа бадигкид̇д̇аа, убасамбад̣̇ааби д̇зсам̣ бадигкид̇д̇аава. сажз бана д̇з сан̇гхо убасамбаад̣̇зд̇и, саб̣б̣зби хад̇т̇ажчиннаад̣̇аяо суубасамбаннаа, гаарагасан̇гхо бана аажарияубаж̇жхааяаа жа аабад̇д̇ид̇о на мужжанд̇и. вагкад̇и жа – ‘‘ад̇т̇и бхигкавз буг̇г̇ало аббад̇д̇о осааран̣ам̣, д̇ан̃жз сан̇гхо осаарзд̇и, згажжо суосаарид̇о, згажжо д̣̇уосаарид̇о’’д̇и д̇ассад̇т̇о ааг̇ад̇адтаанзязва аави бхависсад̇ийд̇и.
Badhiroti yo sabbena sabbaṃ na suṇāti. Yo pana mahāsaddaṃ suṇāti, taṃ pabbājetuṃ vaṭṭati. Andhamūgādayo ubhayadosavasena vuttā. Yesañca pabbajjā paṭikkhittā, upasampadāpi tesaṃ paṭikkhittāva. Sace pana te saṅgho upasampādeti, sabbepi hatthacchinnādayo sūpasampannā, kārakasaṅgho pana ācariyupajjhāyā ca āpattito na muccanti. Vakkhati ca – ‘‘atthi bhikkhave puggalo appatto osāraṇaṃ, tañce saṅgho osāreti, ekacco suosārito, ekacco duosārito’’ti tassattho āgataṭṭhāneyeva āvi bhavissatīti.
хад̇т̇ажчиннаад̣̇ивад̇т̇угат̇аа нидтид̇аа.
Hatthacchinnādivatthukathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 57. набаб̣б̣ааж̇зд̇аб̣б̣ад̣̇вад̇д̇им̣савааро • 57. Napabbājetabbadvattiṃsavāro
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / хад̇т̇ажчиннаад̣̇ивад̇т̇угат̇ааван̣н̣анаа • Hatthacchinnādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / хад̇т̇ажчиннаад̣̇ивад̇т̇угат̇ааван̣н̣анаа • Hatthacchinnādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / хад̇т̇ажчиннаад̣̇ивад̇т̇угат̇ааван̣н̣анаа • Hatthacchinnādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 57. хад̇т̇ажчиннаад̣̇ивад̇т̇угат̇аа • 57. Hatthacchinnādivatthukathā
