| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. ஹத்த²கஸுத்தவண்ணனா
5. Hatthakasuttavaṇṇanā
35. பஞ்சமே ஆளவியந்தி ஆளவிரட்டே². கோ³மக்³கே³தி கு³ன்னங் க³மனமக்³கே³. பண்ணஸந்த²ரேதி ஸயங் பதிதபண்ணஸந்த²ரே. அதா²தி ஏவங் கு³ன்னங் க³மனமக்³க³ங் உஜுங் மஹாபத²ங் நிஸ்ஸாய ஸிங்ஸபாவனே ஸயங் பதிதபண்ணானி ஸங்கட்³டி⁴த்வா கதஸந்த²ரே ஸுக³தமஹாசீவரங் பத்த²ரித்வா பல்லங்கங் ஆபு⁴ஜித்வா நிஸின்னே ததா²க³தே. ஹத்த²கோ ஆளவகோதி ஹத்த²தோ ஹத்த²ங் க³தத்தா ஏவங்லத்³த⁴னாமோ ஆளவகோ ராஜபுத்தோ. ஏதத³வோசாதி ஏதங் ‘‘கச்சி, ப⁴ந்தே , ப⁴க³வா’’திஆதி³வசனங் அவோச. கஸ்மா பன ஸம்மாஸம்பு³த்³தோ⁴ தங் டா²னங் க³ந்த்வா நிஸின்னோ, கஸ்மா ராஜகுமாரோ தத்த² க³தோதி? ஸம்மாஸம்பு³த்³தோ⁴ தாவ அட்டு²ப்பத்திகாய த⁴ம்மதே³ஸனாய ஸமுட்டா²னங் தி³ஸ்வா தத்த² நிஸின்னோ, ராஜகுமாரோபி பாதோவ உட்டா²ய பஞ்சஹி உபாஸகஸதேஹி பரிவுதோ பு³த்³து⁴பட்டா²னங் க³ச்ச²ந்தோ மஹாமக்³கா³ ஓக்கம்ம கோ³பத²ங் க³ஹெத்வா ‘‘பு³த்³தா⁴னங் பூஜனத்தா²ய மிஸ்ஸகமாலங் ஓசினிஸ்ஸாமீ’’தி க³ச்ச²ந்தோ ஸத்தா²ரங் தி³ஸ்வா உபஸங்கமித்வா வந்தி³த்வா ஏகமந்தங் நிஸீதி³, ஏவங் ஸோ தத்த² க³தோதி. ஸுக²மஸயித்தா²தி ஸுக²ங் ஸயித்த².
35. Pañcame āḷaviyanti āḷaviraṭṭhe. Gomaggeti gunnaṃ gamanamagge. Paṇṇasanthareti sayaṃ patitapaṇṇasanthare. Athāti evaṃ gunnaṃ gamanamaggaṃ ujuṃ mahāpathaṃ nissāya siṃsapāvane sayaṃ patitapaṇṇāni saṅkaḍḍhitvā katasanthare sugatamahācīvaraṃ pattharitvā pallaṅkaṃ ābhujitvā nisinne tathāgate. Hatthako āḷavakoti hatthato hatthaṃ gatattā evaṃladdhanāmo āḷavako rājaputto. Etadavocāti etaṃ ‘‘kacci, bhante , bhagavā’’tiādivacanaṃ avoca. Kasmā pana sammāsambuddho taṃ ṭhānaṃ gantvā nisinno, kasmā rājakumāro tattha gatoti? Sammāsambuddho tāva aṭṭhuppattikāya dhammadesanāya samuṭṭhānaṃ disvā tattha nisinno, rājakumāropi pātova uṭṭhāya pañcahi upāsakasatehi parivuto buddhupaṭṭhānaṃ gacchanto mahāmaggā okkamma gopathaṃ gahetvā ‘‘buddhānaṃ pūjanatthāya missakamālaṃ ocinissāmī’’ti gacchanto satthāraṃ disvā upasaṅkamitvā vanditvā ekamantaṃ nisīdi, evaṃ so tattha gatoti. Sukhamasayitthāti sukhaṃ sayittha.
அந்தரட்ட²கோதி மாக⁴ப²க்³கு³ணானங் அந்தரே அட்ட²தி³வஸபரிமாணோ காலோ. மாக⁴ஸ்ஸ ஹி அவஸானே சத்தாரோ தி³வஸா, ப²க்³கு³ணஸ்ஸ ஆதி³ம்ஹி சத்தாரோதி அயங் ‘‘அந்தரட்ட²கோ’’தி வுச்சதி. ஹிமபாதஸமயோதி ஹிமஸ்ஸ பதனஸமயோ. க²ராதி ப²ருஸா கக்க²ளா வா. கோ³கண்டகஹதாதி நவவுட்டே² தே³வே கா³வீனங் அக்கந்தக்கந்தட்டா²னே கு²ரந்தரேஹி கத்³த³மோ உக்³க³ந்த்வா திட்ட²தி, ஸோ வாதாதபேன ஸுக்கோ² ககசத³ந்தஸதி³ஸோ ஹோதி து³க்க²ஸம்ப²ஸ்ஸோ. தங் ஸந்தா⁴யாஹ – ‘‘கோ³கண்டகஹதா பூ⁴மீ’’தி. கு³ன்னங் கு²ரந்தரேஹி சி²ன்னாதிபி அத்தோ². வேரம்போ⁴ வாதோ வாயதீதி சதூஹி தி³ஸாஹி வாயந்தோ வாதோ வாயதி. ஏகாய தி³ஸாய வா த்³வீஹி வா தி³ஸாஹி தீஹி வா தி³ஸாஹி வாயந்தோ வாதோ வேரம்போ⁴தி ந வுச்சதி.
Antaraṭṭhakoti māghaphagguṇānaṃ antare aṭṭhadivasaparimāṇo kālo. Māghassa hi avasāne cattāro divasā, phagguṇassa ādimhi cattāroti ayaṃ ‘‘antaraṭṭhako’’ti vuccati. Himapātasamayoti himassa patanasamayo. Kharāti pharusā kakkhaḷā vā. Gokaṇṭakahatāti navavuṭṭhe deve gāvīnaṃ akkantakkantaṭṭhāne khurantarehi kaddamo uggantvā tiṭṭhati, so vātātapena sukkho kakacadantasadiso hoti dukkhasamphasso. Taṃ sandhāyāha – ‘‘gokaṇṭakahatā bhūmī’’ti. Gunnaṃ khurantarehi chinnātipi attho. Verambho vāto vāyatīti catūhi disāhi vāyanto vāto vāyati. Ekāya disāya vā dvīhi vā disāhi tīhi vā disāhi vāyanto vāto verambhoti na vuccati.
தேன ஹி ராஜகுமாராதி இத³ங் ஸத்தா² ‘‘அயங் ராஜகுமாரோ லோகஸ்மிங் நேவ ஸுக²வாஸினோ, ந து³க்க²வாஸினோ ஜானாதி, ஜானாபெஸ்ஸாமி ந’’ந்தி உபரி தே³ஸனங் வட்³டெ⁴ந்தோ ஆஹ. தத்த² யதா² தே க²மெய்யாதி யதா² துய்ஹங் ருச்செய்ய. இத⁴ஸ்ஸாதி இமஸ்மிங் லோகே அஸ்ஸ. கோ³னகத்த²தோதி சதுரங்கு³லாதி⁴கலோமேன காளகோஜவேன அத்த²தோ. படிகத்த²தோதி உண்ணாமயேன ஸேதத்த²ரணேன அத்த²தோ. படலிகத்த²தோதி க⁴னபுப்பே²ன உண்ணாமயஅத்த²ரணேன அத்த²தோ. கத³லிமிக³பவரபச்சத்த²ரணோதி கத³லிமிக³சம்மமயேன உத்தமபச்சத்த²ரணேன அத்த²தோ. தங் கிர பச்சத்த²ரணங் ஸேதவத்த²ஸ்ஸ உபரி கத³லிமிக³சம்மங் அத்த²ரித்வா ஸிப்³பி³த்வா கரொந்தி. ஸஉத்தரச்ச²தோ³தி ஸஹ உத்தரச்ச²தே³ன, உபரி ப³த்³தே⁴ன ரத்தவிதானேன ஸத்³தி⁴ந்தி அத்தோ². உப⁴தோலோஹிதகூபதா⁴னோதி ஸீஸூபதா⁴னஞ்ச பாதூ³பதா⁴னஞ்சாதி பல்லங்கஸ்ஸ உப⁴தோ ட²பிதலோஹிதகூபதா⁴னோ. பஜாபதியோதி ப⁴ரியாயோ. மனாபேன பச்சுபட்டி²தா அஸ்ஸூதி மனாபேன உபட்டா²னவிதா⁴னேன பச்சுபட்டி²தா ப⁴வெய்யுங்.
Tena hi rājakumārāti idaṃ satthā ‘‘ayaṃ rājakumāro lokasmiṃ neva sukhavāsino, na dukkhavāsino jānāti, jānāpessāmi na’’nti upari desanaṃ vaḍḍhento āha. Tattha yathā te khameyyāti yathā tuyhaṃ rucceyya. Idhassāti imasmiṃ loke assa. Gonakatthatoti caturaṅgulādhikalomena kāḷakojavena atthato. Paṭikatthatoti uṇṇāmayena setattharaṇena atthato. Paṭalikatthatoti ghanapupphena uṇṇāmayaattharaṇena atthato. Kadalimigapavarapaccattharaṇoti kadalimigacammamayena uttamapaccattharaṇena atthato. Taṃ kira paccattharaṇaṃ setavatthassa upari kadalimigacammaṃ attharitvā sibbitvā karonti. Sauttaracchadoti saha uttaracchadena, upari baddhena rattavitānena saddhinti attho. Ubhatolohitakūpadhānoti sīsūpadhānañca pādūpadhānañcāti pallaṅkassa ubhato ṭhapitalohitakūpadhāno. Pajāpatiyoti bhariyāyo. Manāpenapaccupaṭṭhitā assūti manāpena upaṭṭhānavidhānena paccupaṭṭhitā bhaveyyuṃ.
காயிகாதி பஞ்சத்³வாரகாயங் கோ²ப⁴யமானா. சேதஸிகாதி மனொத்³வாரங் கோ²ப⁴யமானா. ஸோ ராகோ³ ததா²க³தஸ்ஸ பஹீனோதி ததா²ரூபோ ராகோ³ ததா²க³தஸ்ஸ பஹீனோதி அத்தோ². யோ பன தஸ்ஸ ராகோ³, ந ஸோ ததா²க³தஸ்ஸ பஹீனோ நாம. தோ³ஸமோஹேஸுபி ஏஸேவ நயோ.
Kāyikāti pañcadvārakāyaṃ khobhayamānā. Cetasikāti manodvāraṃ khobhayamānā. So rāgo tathāgatassa pahīnoti tathārūpo rāgo tathāgatassa pahīnoti attho. Yo pana tassa rāgo, na so tathāgatassa pahīno nāma. Dosamohesupi eseva nayo.
ப்³ராஹ்மணோதி பா³ஹிதபாபோ கீ²ணாஸவப்³ராஹ்மணோ. பரினிப்³பு³தோதி கிலேஸபரினிப்³பா³னேன பரினிப்³பு³தோ . ந லிம்பதி காமேஸூதி வத்து²காமேஸு ச கிலேஸகாமேஸு ச தண்ஹாதி³ட்டி²லேபேஹி ந லிம்பதி. ஸீதிபூ⁴தோதி அப்³ப⁴ந்தரே தாபனகிலேஸானங் அபா⁴வேன ஸீதிபூ⁴தோ. நிரூபதீ⁴தி கிலேஸூபதீ⁴னங் அபா⁴வேன நிரூபதி⁴. ஸப்³பா³ ஆஸத்தியோ செ²த்வாதி ஆஸத்தியோ வுச்சந்தி தண்ஹாயோ, தா ஸப்³பா³பி ரூபாதீ³ஸு ஆரம்மணேஸு ஆஸத்தவிஸத்தா ஆஸத்தியோ சி²ந்தி³த்வா. வினெய்ய ஹத³யே த³ரந்தி ஹத³யனிஸ்ஸிதங் த³ரத²ங் வினயித்வா வூபஸமெத்வா. ஸந்திங் பப்புய்ய சேதஸோதி சித்தஸ்ஸ கிலேஸனிப்³பா³னங் பாபுணித்வா. கரணவசனங் வா ஏதங் ‘‘ஸப்³ப³சேதஸோ ஸமன்னாஹரித்வா’’திஆதீ³ஸு விய, சேதஸா நிப்³பா³னங் பாபுணித்வாதி அத்தோ².
Brāhmaṇoti bāhitapāpo khīṇāsavabrāhmaṇo. Parinibbutoti kilesaparinibbānena parinibbuto . Na limpati kāmesūti vatthukāmesu ca kilesakāmesu ca taṇhādiṭṭhilepehi na limpati. Sītibhūtoti abbhantare tāpanakilesānaṃ abhāvena sītibhūto. Nirūpadhīti kilesūpadhīnaṃ abhāvena nirūpadhi. Sabbā āsattiyo chetvāti āsattiyo vuccanti taṇhāyo, tā sabbāpi rūpādīsu ārammaṇesu āsattavisattā āsattiyo chinditvā. Vineyya hadaye daranti hadayanissitaṃ darathaṃ vinayitvā vūpasametvā. Santiṃ pappuyya cetasoti cittassa kilesanibbānaṃ pāpuṇitvā. Karaṇavacanaṃ vā etaṃ ‘‘sabbacetaso samannāharitvā’’tiādīsu viya, cetasā nibbānaṃ pāpuṇitvāti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ஹத்த²கஸுத்தங் • 5. Hatthakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. ஹத்த²கஸுத்தவண்ணனா • 5. Hatthakasuttavaṇṇanā
