Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā)

    ૫. હત્થકસુત્તવણ્ણના

    5. Hatthakasuttavaṇṇanā

    ૩૫. પઞ્ચમે આળવિયન્તિ આળવિરટ્ઠે, ન આળવિનગરે. તેનાહ ‘‘આળવિયન્તિ આળવિરટ્ઠે’’તિ. અથાતિ અવિચ્છેદત્થે નિપાતો. તત્થ ભગવતો નિસજ્જાય અવિચ્છિન્નાય એવાતિ અત્થો. તેનાહ ‘‘એવ’’ન્તિઆદિ. હત્થતો હત્થં ગતત્તાતિ આળવકસ્સ યક્ખસ્સ હત્થતો સમ્માસમ્બુદ્ધસ્સ હત્થં, તતો રાજપુરિસાનં હત્થં ગતત્તા.

    35. Pañcame āḷaviyanti āḷaviraṭṭhe, na āḷavinagare. Tenāha ‘‘āḷaviyanti āḷaviraṭṭhe’’ti. Athāti avicchedatthe nipāto. Tattha bhagavato nisajjāya avicchinnāya evāti attho. Tenāha ‘‘eva’’ntiādi. Hatthato hatthaṃ gatattāti āḷavakassa yakkhassa hatthato sammāsambuddhassa hatthaṃ, tato rājapurisānaṃ hatthaṃ gatattā.

    માઘસ્સાતિ માઘમાસસ્સ. એવં ફગ્ગુનસ્સાતિ એત્થાપિ. ખુરન્તરેહિ કદ્દમો ઉગ્ગન્ત્વા તિટ્ઠતીતિ કદ્દમો ખુરન્તરેહિ ઉગ્ગન્ત્વા તિટ્ઠતિ. ચતૂહિ દિસાહિ વાયન્તો વાતો વેરમ્ભોતિ વુચ્ચતિ વેરમ્ભવાતસદિસત્તા.

    Māghassāti māghamāsassa. Evaṃ phaggunassāti etthāpi. Khurantarehi kaddamo uggantvā tiṭṭhatīti kaddamo khurantarehi uggantvā tiṭṭhati. Catūhi disāhi vāyanto vāto verambhoti vuccati verambhavātasadisattā.

    પઞ્ચદ્વારકાયન્તિ પઞ્ચદ્વારાનુસારેન પવત્તં વિઞ્ઞાણકાયં. ખોભયમાનાતિ કિલેસખોભવસેન ખોભયમાના ચિત્તં સઙ્ખોભં કરોન્તા. ચેતસિકાતિ મનોદ્વારિકચિત્તસન્નિસ્સિતા. તેનાહ ‘‘મનોદ્વારં ખોભયમાના’’તિ. સો રાગોતિ તંસદિસો રાગો. ભવતિ હિ તંસદિસે તબ્બોહારો યથા ‘‘સા એવ તિત્તિરિકા, તાનિ એવ ઓસધાની’’તિ. યાદિસો હિ એકસ્સ પુગ્ગલસ્સ ઉપ્પજ્જનકરાગો, તાદિસો એવ તતો અઞ્ઞસ્સ રાગભાવસામઞ્ઞતો. તેન વુત્તં ‘‘તથારૂપો રાગો’’તિઆદિ. ઇચ્છિતાલાભેન રજનીયેસુ વા નિરુદ્ધેસુ વત્થૂસુ દોમનસ્સુપ્પત્તિયા દોસપરિળાહાનં સમ્ભવો વેદિતબ્બો.

    Pañcadvārakāyanti pañcadvārānusārena pavattaṃ viññāṇakāyaṃ. Khobhayamānāti kilesakhobhavasena khobhayamānā cittaṃ saṅkhobhaṃ karontā. Cetasikāti manodvārikacittasannissitā. Tenāha ‘‘manodvāraṃ khobhayamānā’’ti. So rāgoti taṃsadiso rāgo. Bhavati hi taṃsadise tabbohāro yathā ‘‘sā eva tittirikā, tāni eva osadhānī’’ti. Yādiso hi ekassa puggalassa uppajjanakarāgo, tādiso eva tato aññassa rāgabhāvasāmaññato. Tena vuttaṃ ‘‘tathārūporāgo’’tiādi. Icchitālābhena rajanīyesu vā niruddhesu vatthūsu domanassuppattiyā dosapariḷāhānaṃ sambhavo veditabbo.

    ન લિમ્પતિ અનુપલિત્તચિત્તત્તા. સીતિભૂતો નિબ્બુતસબ્બપરિળાહત્તા. આસત્તિયો વુચ્ચન્તિ તણ્હાયો તત્થ તત્થ આસઞ્જનટ્ઠેન. દરથન્તિ પરિળાહજાતં. ચેતસોતિ સામિવચનં.

    Na limpati anupalittacittattā. Sītibhūto nibbutasabbapariḷāhattā. Āsattiyo vuccanti taṇhāyo tattha tattha āsañjanaṭṭhena. Darathanti pariḷāhajātaṃ. Cetasoti sāmivacanaṃ.

    હત્થકસુત્તવણ્ણના નિટ્ઠિતા.

    Hatthakasuttavaṇṇanā niṭṭhitā.







    Related texts:



    તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૫. હત્થકસુત્તં • 5. Hatthakasuttaṃ

    અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫. હત્થકસુત્તવણ્ણના • 5. Hatthakasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact