| Library / Tipiṭaka / ತಿಪಿಟಕ • Tipiṭaka / ಚೂಳನಿದ್ದೇಸ-ಅಟ್ಠಕಥಾ • Cūḷaniddesa-aṭṭhakathā |
೮. ಹೇಮಕಮಾಣವಸುತ್ತನಿದ್ದೇಸವಣ್ಣನಾ
8. Hemakamāṇavasuttaniddesavaṇṇanā
೫೩. ಅಟ್ಠಮೇ ಹೇಮಕಸುತ್ತೇ – ಯೇ ಮೇ ಪುಬ್ಬೇ ವಿಯಾಕಂಸೂತಿ ಯೇ ಬಾವರಿಆದಯೋ ಪುಬ್ಬೇ ಮಯ್ಹಂ ಸಕಂ ಲದ್ಧಿಂ ವಿಯಾಕಂಸು। ಹುರಂ ಗೋತಮಸಾಸನಾತಿ ಗೋತಮಸಾಸನತೋ ಪುಬ್ಬತರಂ। ಸಬ್ಬಂ ತಂ ತಕ್ಕವಡ್ಢನನ್ತಿ ಸಬ್ಬಂ ತಂ ಕಾಮವಿತಕ್ಕಾದಿವಡ್ಢನಂ।
53. Aṭṭhame hemakasutte – ye me pubbe viyākaṃsūti ye bāvariādayo pubbe mayhaṃ sakaṃ laddhiṃ viyākaṃsu. Huraṃ gotamasāsanāti gotamasāsanato pubbataraṃ. Sabbaṃ taṃ takkavaḍḍhananti sabbaṃ taṃ kāmavitakkādivaḍḍhanaṃ.
ಯೇ ಚಞ್ಞೇ ತಸ್ಸ ಆಚರಿಯಾತಿ ಯೇ ಚ ಅಞ್ಞೇ ತಸ್ಸ ಬಾವರಿಯಸ್ಸ ಆಚಾರೇ ಸಿಕ್ಖಾಪಕಾ ಆಚರಿಯಾ। ತೇ ಸಕಂ ದಿಟ್ಠಿನ್ತಿ ತೇ ಆಚರಿಯಾ ಅತ್ತನೋ ದಿಟ್ಠಿಂ। ಸಕಂ ಖನ್ತಿನ್ತಿ ಅತ್ತನೋ ಖಮನಂ। ಸಕಂ ರುಚಿನ್ತಿ ಅತ್ತನೋ ರೋಚನಂ। ವಿತಕ್ಕವಡ್ಢನನ್ತಿ ಕಾಮವಿತಕ್ಕಾದಿವಿತಕ್ಕಾನಂ ಉಪ್ಪಾದನಂ ಪುನಪ್ಪುನಂ ಪವತ್ತನಂ। ಸಙ್ಕಪ್ಪವಡ್ಢನನ್ತಿ ಕಾಮಸಙ್ಕಪ್ಪಾದೀನಂ ವಡ್ಢನಂ। ಇಮಾನಿ ದ್ವೇ ಪದಾನಿ ಸಬ್ಬಸಙ್ಗಾಹಿಕವಸೇನ ವುತ್ತಾನಿ। ಇದಾನಿ ಕಾಮವಿತಕ್ಕಾದಿಕೇ ಸರೂಪತೋ ದಸ್ಸೇತುಂ ‘‘ಕಾಮವಿತಕ್ಕವಡ್ಢನ’’ನ್ತಿಆದಿನಾ ನಯೇನ ನವವಿತಕ್ಕೇ ದಸ್ಸೇಸಿ।
Ye caññe tassa ācariyāti ye ca aññe tassa bāvariyassa ācāre sikkhāpakā ācariyā. Te sakaṃ diṭṭhinti te ācariyā attano diṭṭhiṃ. Sakaṃ khantinti attano khamanaṃ. Sakaṃ rucinti attano rocanaṃ. Vitakkavaḍḍhananti kāmavitakkādivitakkānaṃ uppādanaṃ punappunaṃ pavattanaṃ. Saṅkappavaḍḍhananti kāmasaṅkappādīnaṃ vaḍḍhanaṃ. Imāni dve padāni sabbasaṅgāhikavasena vuttāni. Idāni kāmavitakkādike sarūpato dassetuṃ ‘‘kāmavitakkavaḍḍhana’’ntiādinā nayena navavitakke dassesi.
೫೪. ತಣ್ಹಾನಿಗ್ಘಾತನನ್ತಿ ತಣ್ಹಾವಿನಾಸನಂ।
54.Taṇhānigghātananti taṇhāvināsanaṃ.
೫೫-೬. ಅಥಸ್ಸ ಭಗವಾ ತಂ ಧಮ್ಮಂ ಆಚಿಕ್ಖನ್ತೋ ‘‘ಇಧಾ’’ತಿ ಗಾಥಾದ್ವಯಮಾಹ। ತತ್ಥ ಏತದಞ್ಞಾಯ ಯೇ ಸತಾತಿ ಏತಂ ನಿಬ್ಬಾನಂ ಪದಮಚ್ಚುತಂ ‘‘ಸಬ್ಬೇ ಸಙ್ಖಾರಾ ಅನಿಚ್ಚಾ’’ತಿಆದಿನಾ (ಧ॰ ಪ॰ ೨೭೭; ಥೇರಗಾ॰ ೬೭೬; ಕಥಾ॰ ೭೫೩) ನಯೇನ ವಿಪಸ್ಸನ್ತಾ ಅನುಪುಬ್ಬೇನ ಜಾನಿತ್ವಾ ಯೇ ಕಾಯಾನುಪಸ್ಸನಾಸತಿಆದೀಹಿ ಸತಾ। ದಿಟ್ಠಧಮ್ಮಾಭಿನಿಬ್ಬುತಾತಿ ವಿದಿತಧಮ್ಮತ್ತಾ ದಿಟ್ಠಧಮ್ಮಾ ಚ ರಾಗಾದಿನಿಬ್ಬಾನೇನ ಚ ಅಭಿನಿಬ್ಬುತಾ। ಸೇಸಂ ಸಬ್ಬತ್ಥ ಪಾಕಟಮೇವ।
55-6. Athassa bhagavā taṃ dhammaṃ ācikkhanto ‘‘idhā’’ti gāthādvayamāha. Tattha etadaññāya ye satāti etaṃ nibbānaṃ padamaccutaṃ ‘‘sabbe saṅkhārā aniccā’’tiādinā (dha. pa. 277; theragā. 676; kathā. 753) nayena vipassantā anupubbena jānitvā ye kāyānupassanāsatiādīhi satā. Diṭṭhadhammābhinibbutāti viditadhammattā diṭṭhadhammā ca rāgādinibbānena ca abhinibbutā. Sesaṃ sabbattha pākaṭameva.
ಏವಂ ಭಗವಾ ಇದಮ್ಪಿ ಸುತ್ತಂ ಅರಹತ್ತನಿಕೂಟೇನೇವ ದೇಸೇಸಿ, ದೇಸನಾಪರಿಯೋಸಾನೇ ಚ ಪುಬ್ಬಸದಿಸೋ ಏವ ಧಮ್ಮಾಭಿಸಮಯೋ ಅಹೋಸೀತಿ।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
ಸದ್ಧಮ್ಮಪ್ಪಜ್ಜೋತಿಕಾಯ ಚೂಳನಿದ್ದೇಸ-ಅಟ್ಠಕಥಾಯ
Saddhammappajjotikāya cūḷaniddesa-aṭṭhakathāya
ಹೇಮಕಮಾಣವಸುತ್ತನಿದ್ದೇಸವಣ್ಣನಾ ನಿಟ್ಠಿತಾ।
Hemakamāṇavasuttaniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಚೂಳನಿದ್ದೇಸಪಾಳಿ • Cūḷaniddesapāḷi
೮. ಹೇಮಕಮಾಣವಪುಚ್ಛಾ • 8. Hemakamāṇavapucchā
೮. ಹೇಮಕಮಾಣವಪುಚ್ಛಾನಿದ್ದೇಸೋ • 8. Hemakamāṇavapucchāniddeso
