| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဗောဇ္ဈင္ဂသံယုတ္တံ
2. Bojjhaṅgasaṃyuttaṃ
၁. ပဗ္ဗတဝဂ္ဂော
1. Pabbatavaggo
၁. ဟိမဝန္တသုတ္တံ
1. Himavantasuttaṃ
၁၈၂. သာဝတ္ထိနိဒာနံ ။ ‘‘သေယ္ယထာပိ, ဘိက္ခဝေ, ဟိမဝန္တံ ပဗ္ဗတရာဇာနံ နိသ္သာယ နာဂာ ကာယံ ဝဍ္ဎေန္တိ, ဗလံ ဂာဟေန္တိ; တေ တတ္ထ ကာယံ ဝဍ္ဎေတ္ဝာ ဗလံ ဂာဟေတ္ဝာ ကုသောဗ္ဘေ ဩတရန္တိ, ကုသောဗ္ဘေ ဩတရိတ္ဝာ မဟာသောဗ္ဘေ ဩတရန္တိ, မဟာသောဗ္ဘေ ဩတရိတ္ဝာ ကုန္နဒိယော ဩတရန္တိ, ကုန္နဒိယော ဩတရိတ္ဝာ မဟာနဒိယော ဩတရန္တိ, မဟာနဒိယော ဩတရိတ္ဝာ မဟာသမုဒ္ဒသာဂရံ ဩတရန္တိ; တေ တတ္ထ မဟန္တတ္တံ ဝေပုလ္လတ္တံ အာပဇ္ဇန္တိ ကာယေန; ဧဝမေဝ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေန္တော သတ္တ ဗောဇ္ဈင္ဂေ ဗဟုလီကရောန္တော မဟန္တတ္တံ ဝေပုလ္လတ္တံ ပာပုဏာတိ ဓမ္မေသု။ ကထဉ္စ, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေန္တော သတ္တ ဗောဇ္ဈင္ဂေ ဗဟုလီကရောန္တော မဟန္တတ္တံ ဝေပုလ္လတ္တံ ပာပုဏာတိ ဓမ္မေသူတိ? ဣဓ, ဘိက္ခဝေ, ဘိက္ခု သတိသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ; ဓမ္မဝိစယသမ္ဗောဇ္ဈင္ဂံ ဘာဝေတိ။ပေ.။ ဝီရိယသမ္ဗောဇ္ဈင္ဂံ ဘာဝေတိ။ပေ.။ ပီတိသမ္ဗောဇ္ဈင္ဂံ ဘာဝေတိ။ပေ.။ ပသ္သဒ္ဓိသမ္ဗောဇ္ဈင္ဂံ ဘာဝေတိ။ပေ.။ သမာဓိသမ္ဗောဇ္ဈင္ဂံ ဘာဝေတိ။ပေ.။ ဥပေက္ခာသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု သီလံ နိသ္သာယ သီလေ ပတိဋ္ဌာယ သတ္တ ဗောဇ္ဈင္ဂေ ဘာဝေန္တော သတ္တ ဗောဇ္ဈင္ဂေ ဗဟုလီကရောန္တော မဟန္တတ္တံ ဝေပုလ္လတ္တံ ပာပုဏာတိ ဓမ္မေသူ’’တိ။ ပဌမံ။
182. Sāvatthinidānaṃ . ‘‘Seyyathāpi, bhikkhave, himavantaṃ pabbatarājānaṃ nissāya nāgā kāyaṃ vaḍḍhenti, balaṃ gāhenti; te tattha kāyaṃ vaḍḍhetvā balaṃ gāhetvā kusobbhe otaranti, kusobbhe otaritvā mahāsobbhe otaranti, mahāsobbhe otaritvā kunnadiyo otaranti, kunnadiyo otaritvā mahānadiyo otaranti, mahānadiyo otaritvā mahāsamuddasāgaraṃ otaranti; te tattha mahantattaṃ vepullattaṃ āpajjanti kāyena; evameva kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesu. Kathañca, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesūti? Idha, bhikkhave, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ; dhammavicayasambojjhaṅgaṃ bhāveti…pe… vīriyasambojjhaṅgaṃ bhāveti…pe… pītisambojjhaṅgaṃ bhāveti…pe… passaddhisambojjhaṅgaṃ bhāveti…pe… samādhisambojjhaṅgaṃ bhāveti…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesū’’ti. Paṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဟိမဝန္တသုတ္တဝဏ္ဏနာ • 1. Himavantasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁.ဟိမဝန္တသုတ္တဝဏ္ဏနာ • 1.Himavantasuttavaṇṇanā
