| Library / Tipiṭaka / తిపిటక • Tipiṭaka / సంయుత్తనికాయ (అట్ఠకథా) • Saṃyuttanikāya (aṭṭhakathā) |
౮. హిరీసుత్తవణ్ణనా
8. Hirīsuttavaṇṇanā
౧౮. అట్ఠమే హిరీనిసేధోతి హిరియా అకుసలే ధమ్మే నిసేధేతీతి హిరీనిసేధో. కోచి లోకస్మిం విజ్జతీతి కోచి ఏవరూపో విజ్జతీతి పుచ్ఛతి. యో నిన్దం అపబోధతీతి యో గరహం అపహరన్తో బుజ్ఝతి. అస్సో భద్రో కసామివాతి యథా భద్రో అస్సాజానీయో కసం అపహరన్తో బుజ్ఝతి, పతోదచ్ఛాయం దిస్వా సంవిజ్ఝన్తో వియ కసాయ అత్తని నిపాతం న దేతి, ఏవమేవ యో భిక్ఖు భూతస్స దసఅక్కోసవత్థునో అత్తని నిపాతం అదదన్తో నిన్దం అపబోధతి అపహరన్తో బుజ్ఝతి, ఏవరూపో కోచి ఖీణాసవో విజ్జతీతి పుచ్ఛతి. అభూతక్కోసేన పన పరిముత్తో నామ నత్థి. తనుయాతి తనుకా, హిరియా అకుసలే ధమ్మే నిసేధేత్వా చరన్తా ఖీణాసవా నామ అప్పకాతి అత్థో. సదా సతాతి నిచ్చకాలం సతివేపుల్లేన సమన్నాగతా. అన్తం దుక్ఖస్స పప్పుయ్యాతి వట్టదుక్ఖస్స కోటిం అన్తభూతం నిబ్బానం పాపుణిత్వా. సేసం వుత్తనయమేవాతి.
18. Aṭṭhame hirīnisedhoti hiriyā akusale dhamme nisedhetīti hirīnisedho. Koci lokasmiṃvijjatīti koci evarūpo vijjatīti pucchati. Yo nindaṃ apabodhatīti yo garahaṃ apaharanto bujjhati. Asso bhadro kasāmivāti yathā bhadro assājānīyo kasaṃ apaharanto bujjhati, patodacchāyaṃ disvā saṃvijjhanto viya kasāya attani nipātaṃ na deti, evameva yo bhikkhu bhūtassa dasaakkosavatthuno attani nipātaṃ adadanto nindaṃ apabodhati apaharanto bujjhati, evarūpo koci khīṇāsavo vijjatīti pucchati. Abhūtakkosena pana parimutto nāma natthi. Tanuyāti tanukā, hiriyā akusale dhamme nisedhetvā carantā khīṇāsavā nāma appakāti attho. Sadā satāti niccakālaṃ sativepullena samannāgatā. Antaṃ dukkhassa pappuyyāti vaṭṭadukkhassa koṭiṃ antabhūtaṃ nibbānaṃ pāpuṇitvā. Sesaṃ vuttanayamevāti.
హిరీసుత్తవణ్ణనా నిట్ఠితా.
Hirīsuttavaṇṇanā niṭṭhitā.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / సంయుత్తనికాయ • Saṃyuttanikāya / ౮. హిరీసుత్తం • 8. Hirīsuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౮. హిరీసుత్తవణ్ణనా • 8. Hirīsuttavaṇṇanā
