| Library / Tipiṭaka / તિપિટક • Tipiṭaka / પટિસમ્ભિદામગ્ગપાળિ • Paṭisambhidāmaggapāḷi |
૩. ઇદ્ધિપાદવારો
3. Iddhipādavāro
૪૨. ‘‘‘અયં છન્દસમાધિપધાનસઙ્ખારસમન્નાગતો ઇદ્ધિપાદો’તિ મે , ભિક્ખવે પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ. ‘સો ખો પનાયં છન્દસમાધિપધાનસઙ્ખારસમન્નાગતો ઇદ્ધિપાદો ભાવેતબ્બો’તિ મે, ભિક્ખવે…પે॰… ભાવિતોતિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ.
42. ‘‘‘Ayaṃ chandasamādhipadhānasaṅkhārasamannāgato iddhipādo’ti me , bhikkhave pubbe ananussutesu dhammesu cakkhuṃ udapādi…pe… āloko udapādi. ‘So kho panāyaṃ chandasamādhipadhānasaṅkhārasamannāgato iddhipādo bhāvetabbo’ti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṃ udapādi…pe… āloko udapādi.
‘‘અયં વીરિયસમાધિ…પે॰… અયં ચિત્તસમાધિ…પે॰… અયં વીમંસાસમાધિપધાનસઙ્ખારસમન્નાગતો ઇદ્ધિપાદોતિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ. સો ખો પનાયં વીમંસાસમાધિપધાનસઙ્ખારસમન્નાગતો ઇદ્ધિપાદો ભાવેતબ્બોતિ મે, ભિક્ખવે…પે॰… ભાવિતોતિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ’’.
‘‘Ayaṃ vīriyasamādhi…pe… ayaṃ cittasamādhi…pe… ayaṃ vīmaṃsāsamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṃ udapādi…pe… āloko udapādi. So kho panāyaṃ vīmaṃsāsamādhipadhānasaṅkhārasamannāgato iddhipādo bhāvetabboti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
અયં છન્દસમાધિપધાનસઙ્ખારસમન્નાગતો ઇદ્ધિપાદોતિ પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ…પે॰… સો ખો પનાયં છન્દસમાધિપધાનસઙ્ખારસમન્નાગતો ઇદ્ધિપાદો ભાવેતબ્બોતિ…પે॰… ભાવિતોતિ પુબ્બે અનનુસ્સુતેસુ ધમ્મેસુ ચક્ખું ઉદપાદિ, ઞાણં ઉદપાદિ, પઞ્ઞા ઉદપાદિ, વિજ્જા ઉદપાદિ, આલોકો ઉદપાદિ.
Ayaṃ chandasamādhipadhānasaṅkhārasamannāgato iddhipādoti pubbe ananussutesu dhammesu cakkhuṃ udapādi…pe… āloko udapādi…pe… so kho panāyaṃ chandasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
ચક્ખું ઉદપાદીતિ – કેનટ્ઠેન? ઞાણં ઉદપાદીતિ – કેનટ્ઠેન? પઞ્ઞા ઉદપાદીતિ – કેનટ્ઠેન? વિજ્જા ઉદપાદીતિ – કેનટ્ઠેન? આલોકો ઉદપાદીતિ – કેનટ્ઠેન? ચક્ખું ઉદપાદીતિ – દસ્સનટ્ઠેન. ઞાણં ઉદપાદીતિ – ઞાતટ્ઠેન. પઞ્ઞા ઉદપાદીતિ – પજાનનટ્ઠેન. વિજ્જા ઉદપાદીતિ – પટિવેધટ્ઠેન. આલોકો ઉદપાદીતિ – ઓભાસટ્ઠેન.
Cakkhuṃ udapādīti – kenaṭṭhena? Ñāṇaṃ udapādīti – kenaṭṭhena? Paññā udapādīti – kenaṭṭhena? Vijjā udapādīti – kenaṭṭhena? Āloko udapādīti – kenaṭṭhena? Cakkhuṃ udapādīti – dassanaṭṭhena. Ñāṇaṃ udapādīti – ñātaṭṭhena. Paññāudapādīti – pajānanaṭṭhena. Vijjā udapādīti – paṭivedhaṭṭhena. Āloko udapādīti – obhāsaṭṭhena.
ચક્ખું ધમ્મો, દસ્સનટ્ઠો અત્થો. ઞાણં ધમ્મો, ઞાતટ્ઠો અત્થો. પઞ્ઞા ધમ્મો, પજાનનટ્ઠો અત્થો. વિજ્જા ધમ્મો, પટિવેધટ્ઠો અત્થો. આલોકો ધમ્મો, ઓભાસટ્ઠો અત્થો. ઇમે પઞ્ચ ધમ્મા પઞ્ચ અત્થા છન્દવત્થુકા ઇદ્ધિપાદવત્થુકા ઇદ્ધિપાદારમ્મણા ઇદ્ધિપાદગોચરા ઇદ્ધિપાદસઙ્ગહિતા ઇદ્ધિપાદપરિયાપન્ના ઇદ્ધિપાદે સમુદાગતા ઇદ્ધિપાદે ઠિતા ઇદ્ધિપાદે પતિટ્ઠિતા.
Cakkhuṃ dhammo, dassanaṭṭho attho. Ñāṇaṃ dhammo, ñātaṭṭho attho. Paññā dhammo, pajānanaṭṭho attho. Vijjā dhammo, paṭivedhaṭṭho attho. Āloko dhammo, obhāsaṭṭho attho. Ime pañca dhammā pañca atthā chandavatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā.
ધમ્મચક્કન્તિ કેનટ્ઠેન ધમ્મચક્કં? ધમ્મઞ્ચ પવત્તેતિ ચક્કઞ્ચાતિ – ધમ્મચક્કં. ચક્કઞ્ચ પવત્તેતિ ધમ્મઞ્ચાતિ – ધમ્મચક્કં. ધમ્મેન પવત્તેતીતિ – ધમ્મચક્કં. ધમ્મચરિયાય પવત્તેતીતિ – ધમ્મચક્કં. ધમ્મે ઠિતો પવત્તેતીતિ – ધમ્મચક્કં. ધમ્મે પતિટ્ઠિતો પવત્તેતીતિ – ધમ્મચક્કં. ધમ્મે પતિટ્ઠાપેન્તો પવત્તેતીતિ – ધમ્મચક્કં. ધમ્મે વસિપ્પત્તો પવત્તેતીતિ – ધમ્મચક્કં. ધમ્મે વસિં પાપેન્તો પવત્તેતીતિ – ધમ્મચક્કં. ધમ્મે પારમિપ્પત્તો પવત્તેતીતિ – ધમ્મચક્કં. ધમ્મે પારમિં પાપેન્તો પવત્તેતીતિ – ધમ્મચક્કં…પે॰… ધમ્મં અપચાયમાનો પવત્તેતીતિ – ધમ્મચક્કં. ધમ્મદ્ધજો પવત્તેતીતિ – ધમ્મચક્કં. ધમ્મકેતુ પવત્તેતીતિ – ધમ્મચક્કં. ધમ્માધિપતેય્યો પવત્તેતીતિ – ધમ્મચક્કં. તં ખો પન ધમ્મચક્કં અપ્પટિવત્તિયં સમણેન વા બ્રાહ્મણેન વા દેવેન વા મારેન વા બ્રહ્મુના વા કેનચિ વા લોકસ્મિન્તિ – ધમ્મચક્કં.
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ. Dhamme patiṭṭhāpento pavattetīti – dhammacakkaṃ. Dhamme vasippatto pavattetīti – dhammacakkaṃ. Dhamme vasiṃ pāpento pavattetīti – dhammacakkaṃ. Dhamme pāramippatto pavattetīti – dhammacakkaṃ. Dhamme pāramiṃ pāpento pavattetīti – dhammacakkaṃ…pe… dhammaṃ apacāyamāno pavattetīti – dhammacakkaṃ. Dhammaddhajo pavattetīti – dhammacakkaṃ. Dhammaketu pavattetīti – dhammacakkaṃ. Dhammādhipateyyo pavattetīti – dhammacakkaṃ. Taṃ kho pana dhammacakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasminti – dhammacakkaṃ.
સદ્ધિન્દ્રિયં ધમ્મો. તં ધમ્મં પવત્તેતીતિ – ધમ્મચક્કં…પે॰… અમતોગધં નિબ્બાનં પરિયોસાનટ્ઠેન ધમ્મો. તં ધમ્મં પવત્તેતીતિ – ધમ્મચક્કં.
Saddhindriyaṃ dhammo. Taṃ dhammaṃ pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
અયં વીરિયસમાધિપધાનસઙ્ખારસમન્નાગતો ઇદ્ધિપાદોતિ પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ…પે॰… સો ખો પનાયં વીરિયસમાધિપધાનસઙ્ખારસમન્નાગતો ઇદ્ધિપાદો ભાવેતબ્બોતિ…પે॰… ભાવિતોતિ પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે॰… આલોકો ઉદપાદિ.
Ayaṃ vīriyasamādhipadhānasaṅkhārasamannāgato iddhipādoti pubbe ananussutesu dhammesu cakkhuṃ udapādi…pe… āloko udapādi…pe… so kho panāyaṃ vīriyasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṃ udapādi…pe… āloko udapādi.
ચક્ખું ઉદપાદીતિ – કેનટ્ઠેન…પે॰… આલોકો ઉદપાદીતિ – કેનટ્ઠેન? ચક્ખું ઉદપાદીતિ – દસ્સનટ્ઠેન…પે॰… આલોકો ઉદપાદીતિ – ઓભાસટ્ઠેન.
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
ચક્ખું ધમ્મો, દસ્સનટ્ઠો અત્થો…પે॰… આલોકો ધમ્મો, ઓભાસટ્ઠો અત્થો. ઇમે પઞ્ચ ધમ્મા પઞ્ચ અત્થા વીરિયવત્થુકા ઇદ્ધિપાદવત્થુકા…પે॰… ચિત્તવત્થુકા ઇદ્ધિપાદવત્થુકા… વીમંસાવત્થુકા ઇદ્ધિપાદવત્થુકા ઇદ્ધિપાદારમ્મણા ઇદ્ધિપાદગોચરા ઇદ્ધિપાદસઙ્ગહિતા ઇદ્ધિપાદપરિયાપન્ના ઇદ્ધિપાદે સમુદાગતા ઇદ્ધિપાદે ઠિતા ઇદ્ધિપાદે પતિટ્ઠિતા .
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā vīriyavatthukā iddhipādavatthukā…pe… cittavatthukā iddhipādavatthukā… vīmaṃsāvatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā .
ધમ્મચક્કન્તિ કેનટ્ઠેન ધમ્મચક્કં? ધમ્મઞ્ચ પવત્તેતિ ચક્કઞ્ચાતિ – ધમ્મચક્કં. ચક્કઞ્ચ પવત્તેતિ ધમ્મઞ્ચાતિ – ધમ્મચક્કં. ધમ્મેન પવત્તેતીતિ – ધમ્મચક્કં. ધમ્મચરિયાય પવત્તેતીતિ – ધમ્મચક્કં. ધમ્મે ઠિતો પવત્તેતીતિ – ધમ્મચક્કં. ધમ્મે પતિટ્ઠિતો પવત્તેતીતિ – ધમ્મચક્કં…પે॰… અમતોગધં નિબ્બાનં પરિયોસાનટ્ઠેન ધમ્મો. તં ધમ્મં પવત્તેતીતિ – ધમ્મચક્કન્તિ.
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkanti.
ધમ્મચક્કકથા નિટ્ઠિતા.
Dhammacakkakathā niṭṭhitā.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / પટિસમ્ભિદામગ્ગ-અટ્ઠકથા • Paṭisambhidāmagga-aṭṭhakathā / ૨-૩. સતિપટ્ઠાનવારાદિવણ્ણના • 2-3. Satipaṭṭhānavārādivaṇṇanā
