| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
ин̣ааяигавад̇т̇угат̇аа
Iṇāyikavatthukathā
96. на бхигкавз ин̣ааяигод̇и зд̇т̇а ин̣ааяиго наама яасса бид̇ибид̇аамахзхи ваа ин̣ам̣ г̇ахид̇ам̣ ход̇и, саяам̣ ваа ин̣ам̣ г̇ахид̇ам̣ ход̇и, яам̣ ваа аат̇абзд̇ваа маад̇аабид̇уухи гин̃жи г̇ахид̇ам̣ ход̇и, со д̇ам̣ ин̣ам̣ барзсам̣ д̇хаарзд̇ийд̇и ин̣ааяиго. яам̣ бана ан̃н̃з н̃аад̇агаа аат̇абзд̇ваа гин̃жи г̇ан̣ханд̇и, со на ин̣ааяиго. на хи д̇з д̇ам̣ аат̇абзд̇ум̣ иссараа, д̇асмаа д̇ам̣ баб̣б̣ааж̇зд̇ум̣ ваддад̇и, ид̇арам̣ на ваддад̇и. сажз банасса н̃аад̇исаалохид̇аа ‘‘маяам̣ д̣̇ассаама, баб̣б̣ааж̇зт̇а на’’нд̇и ин̣ам̣ ад̇д̇ано бхаарам̣ гаронд̇и, ан̃н̃о ваа гожи д̇асса аажаарасамбад̇д̇им̣ д̣̇исваа ‘‘баб̣б̣ааж̇зт̇а нам̣, ахам̣ ин̣ам̣ д̣̇ассаамий’’д̇и вад̣̇ад̇и, баб̣б̣ааж̇зд̇ум̣ ваддад̇и. д̇зсу асад̇и бхигкунаа д̇ат̇ааруубасса убадтаагассааби аарожзд̇аб̣б̣ам̣ ‘‘сахзд̇уго сад̇д̇о ин̣абалиб̣од̇хзна на баб̣б̣аж̇ад̇ий’’д̇и. сажз со бадибаж̇ж̇ад̇и, баб̣б̣ааж̇зд̇аб̣б̣о. сажзби ад̇д̇ано габбияабхан̣д̣ам̣ ад̇т̇и, ‘‘зд̇ам̣ д̣̇ассаамий’’д̇и баб̣б̣ааж̇зд̇аб̣б̣о. сажз бана нзва н̃аад̇агаад̣̇аяо бадибаж̇ж̇анд̇и, на ад̇д̇ано д̇ханам̣ ад̇т̇и, ‘‘баб̣б̣ааж̇зд̇ваа бхигкааяа жарид̇ваа можзссаамий’’д̇и баб̣б̣ааж̇зд̇ум̣ на ваддад̇и. сажз баб̣б̣ааж̇зд̇и д̣̇уггадам̣. балаад̇оби аанзд̇ваа д̣̇аад̇аб̣б̣о. но жз д̣̇зд̇и, саб̣б̣ам̣ ин̣ам̣ г̇ийваа ход̇и. аж̇аанид̇ваа баб̣б̣ааж̇аяад̇о анаабад̇д̇и. бассанд̇зна бана аанзд̇ваа ин̣асаамигаанам̣ д̣̇ассзд̇аб̣б̣о. абассанд̇асса г̇ийваа на ход̇и.
96.Na bhikkhave iṇāyikoti ettha iṇāyiko nāma yassa pitipitāmahehi vā iṇaṃ gahitaṃ hoti, sayaṃ vā iṇaṃ gahitaṃ hoti, yaṃ vā āthapetvā mātāpitūhi kiñci gahitaṃ hoti, so taṃ iṇaṃ paresaṃ dhāretīti iṇāyiko. Yaṃ pana aññe ñātakā āthapetvā kiñci gaṇhanti, so na iṇāyiko. Na hi te taṃ āthapetuṃ issarā, tasmā taṃ pabbājetuṃ vaṭṭati, itaraṃ na vaṭṭati. Sace panassa ñātisālohitā ‘‘mayaṃ dassāma, pabbājetha na’’nti iṇaṃ attano bhāraṃ karonti, añño vā koci tassa ācārasampattiṃ disvā ‘‘pabbājetha naṃ, ahaṃ iṇaṃ dassāmī’’ti vadati, pabbājetuṃ vaṭṭati. Tesu asati bhikkhunā tathārūpassa upaṭṭhākassāpi ārocetabbaṃ ‘‘sahetuko satto iṇapalibodhena na pabbajatī’’ti. Sace so paṭipajjati, pabbājetabbo. Sacepi attano kappiyabhaṇḍaṃ atthi, ‘‘etaṃ dassāmī’’ti pabbājetabbo. Sace pana neva ñātakādayo paṭipajjanti, na attano dhanaṃ atthi, ‘‘pabbājetvā bhikkhāya caritvā mocessāmī’’ti pabbājetuṃ na vaṭṭati. Sace pabbājeti dukkaṭaṃ. Palātopi ānetvā dātabbo. No ce deti, sabbaṃ iṇaṃ gīvā hoti. Ajānitvā pabbājayato anāpatti. Passantena pana ānetvā iṇasāmikānaṃ dassetabbo. Apassantassa gīvā na hoti.
сажз ин̣ааяиго ан̃н̃ам̣ д̣̇зсам̣ г̇анд̇ваа бужчияамааноби ‘‘наахам̣ гассажи гин̃жи д̇хаарзмий’’д̇и вад̇ваа баб̣б̣аж̇ад̇и, ин̣асаамиго жа д̇ам̣ бариязсанд̇о д̇ад̇т̇а г̇ажчад̇и, д̣̇ахаро д̇ам̣ д̣̇исваа балааяад̇и, со жа т̇зрам̣ убасан̇гамид̇ваа ‘‘аяам̣ бханд̇з гзна баб̣б̣ааж̇ид̇о, мама зд̇д̇агам̣ наама д̇ханам̣ г̇ахзд̇ваа балаад̇о’’д̇и вад̣̇ад̇и, т̇зрзна вад̇д̇аб̣б̣ам̣ ‘‘маяаа убаасага ‘ан̣ан̣о аха’нд̇и вад̣̇анд̇о баб̣б̣ааж̇ид̇о, гим̣ д̣̇аани гароми, басса мз бад̇д̇ажийварамад̇д̇а’’нд̇и аяам̣ д̇ад̇т̇а саамийжи. балаад̇з бана г̇ийваа на ход̇и.
Sace iṇāyiko aññaṃ desaṃ gantvā pucchiyamānopi ‘‘nāhaṃ kassaci kiñci dhāremī’’ti vatvā pabbajati, iṇasāmiko ca taṃ pariyesanto tattha gacchati, daharo taṃ disvā palāyati, so ca theraṃ upasaṅkamitvā ‘‘ayaṃ bhante kena pabbājito, mama ettakaṃ nāma dhanaṃ gahetvā palāto’’ti vadati, therena vattabbaṃ ‘‘mayā upāsaka ‘aṇaṇo aha’nti vadanto pabbājito, kiṃ dāni karomi, passa me pattacīvaramatta’’nti ayaṃ tattha sāmīci. Palāte pana gīvā na hoti.
сажз бана нам̣ т̇зрасса саммукаава д̣̇исваа ‘‘аяам̣ мама ин̣ааяиго’’д̇и вад̣̇ад̇и, ‘‘д̇ава ин̣ааяигам̣ д̇вамзва ж̇аанаахий’’д̇и вад̇д̇аб̣б̣о. звамби г̇ийваа на ход̇и. сажзби со ‘‘баб̣б̣аж̇ид̇о аяам̣ ид̣̇аани гухим̣ г̇амиссад̇ий’’д̇и вад̣̇ад̇и, т̇зрзна ‘‘д̇вам̣язва ж̇аанаахий’’д̇и вад̇д̇аб̣б̣о. звамбисса балаад̇з г̇ийваа на ход̇и. сажз бана т̇зро ‘‘гухим̣ д̣̇аани аяам̣ г̇амиссад̇и, ид̇хзва ажчад̇уу’’д̇и вад̣̇ад̇и, со жз балааяад̇и, г̇ийваа ход̇и. сажз со сахзд̇угасад̇д̇о ход̇и вад̇д̇асамбанно, т̇зрзна ‘‘ийд̣̇исо аяа’’нд̇и вад̇д̇аб̣б̣ам̣. ин̣асаамиго жз ‘‘саад̇хуу’’д̇и виссаж̇ж̇зд̇и, ижжзд̇ам̣ гусалам̣. сажз бана ‘‘убад̣дхубад̣дхам̣ д̣̇зт̇аа’’д̇и вад̣̇ад̇и, д̣̇аад̇аб̣б̣ам̣. абарзна самаязна ад̇иаараад̇хаго ход̇и, ‘‘саб̣б̣ам̣ д̣̇зт̇аа’’д̇и вуд̇д̇зби д̣̇аад̇аб̣б̣амзва. сажз бана уд̣̇д̣̇зсабарибужчаад̣̇ийсу гусало ход̇и б̣ахуубагааро бхигкуунам̣, бхигкаажааравад̇д̇зна бариязсид̇вааби ин̣ам̣ д̣̇аад̇аб̣б̣амзваад̇и.
Sace pana naṃ therassa sammukhāva disvā ‘‘ayaṃ mama iṇāyiko’’ti vadati, ‘‘tava iṇāyikaṃ tvameva jānāhī’’ti vattabbo. Evampi gīvā na hoti. Sacepi so ‘‘pabbajito ayaṃ idāni kuhiṃ gamissatī’’ti vadati, therena ‘‘tvaṃyeva jānāhī’’ti vattabbo. Evampissa palāte gīvā na hoti. Sace pana thero ‘‘kuhiṃ dāni ayaṃ gamissati, idheva acchatū’’ti vadati, so ce palāyati, gīvā hoti. Sace so sahetukasatto hoti vattasampanno, therena ‘‘īdiso aya’’nti vattabbaṃ. Iṇasāmiko ce ‘‘sādhū’’ti vissajjeti, iccetaṃ kusalaṃ. Sace pana ‘‘upaḍḍhupaḍḍhaṃ dethā’’ti vadati, dātabbaṃ. Aparena samayena atiārādhako hoti, ‘‘sabbaṃ dethā’’ti vuttepi dātabbameva. Sace pana uddesaparipucchādīsu kusalo hoti bahūpakāro bhikkhūnaṃ, bhikkhācāravattena pariyesitvāpi iṇaṃ dātabbamevāti.
ин̣ааяигавад̇т̇угат̇аа нидтид̇аа.
Iṇāyikavatthukathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 33. ин̣ааяигавад̇т̇у • 33. Iṇāyikavatthu
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / рааж̇абхадаад̣̇ивад̇т̇угат̇ааван̣н̣анаа • Rājabhaṭādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ин̣ааяигад̣̇аасавад̇т̇угат̇ааван̣н̣анаа • Iṇāyikadāsavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / ин̣ааяигавад̇т̇угат̇ааван̣н̣анаа • Iṇāyikavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 33. ин̣ааяигавад̇т̇угат̇аа • 33. Iṇāyikavatthukathā
