| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
16. இந்த்³ரியபச்சயனித்³தே³ஸவண்ணனா
16. Indriyapaccayaniddesavaṇṇanā
16. இந்த்³ரியபச்சயனித்³தே³ஸே சக்கு²ந்த்³ரியந்தி சக்கு²ஸங்கா²தங் இந்த்³ரியங். இந்த்³ரியபச்சயேனாதி ஸயங் புரேஜாதோ ஹுத்வா அரூபத⁴ம்மானங் உப்பாத³தோ பட்டா²ய யாவ ப⁴ங்கா³ இந்த்³ரியபச்சயேன பச்சயோ ஹோதி. ஸோதிந்த்³ரியாதீ³ஸுபி ஏஸேவ நயோ. அரூபினோ இந்த்³ரியாதி எத்த² அரூபஜீவிதிந்த்³ரியம்பி ஸங்க³ஹிதங். தங்ஸமுட்டா²னானந்தி எத்த² ஹெட்டா² வுத்தனயேனேவ கடத்தாரூபம்பி ஸங்க³ஹிதங். வுத்தஞ்ஹேதங் பஞ்ஹாவாரே – படிஸந்தி⁴க்க²ணே விபாகாப்³யாகதா இந்த்³ரியா ஸம்பயுத்தகானங் க²ந்தா⁴னங் கடத்தா ச ரூபானங் இந்த்³ரியபச்சயேன பச்சயோதி. ஏவங் தாவெத்த² பாளிவண்ணனா வேதி³தப்³பா³.
16. Indriyapaccayaniddese cakkhundriyanti cakkhusaṅkhātaṃ indriyaṃ. Indriyapaccayenāti sayaṃ purejāto hutvā arūpadhammānaṃ uppādato paṭṭhāya yāva bhaṅgā indriyapaccayena paccayo hoti. Sotindriyādīsupi eseva nayo. Arūpino indriyāti ettha arūpajīvitindriyampi saṅgahitaṃ. Taṃsamuṭṭhānānanti ettha heṭṭhā vuttanayeneva kaṭattārūpampi saṅgahitaṃ. Vuttañhetaṃ pañhāvāre – paṭisandhikkhaṇe vipākābyākatā indriyā sampayuttakānaṃ khandhānaṃ kaṭattā ca rūpānaṃ indriyapaccayena paccayoti. Evaṃ tāvettha pāḷivaṇṇanā veditabbā.
அயங் பன இந்த்³ரியபச்சயோ இத்தி²ந்த்³ரியபுரிஸிந்த்³ரியவஜ்ஜானங் ஸமவீஸதியா இந்த்³ரியானங் வஸேன டி²தோ. இத்தி²ந்த்³ரியபுரிஸிந்த்³ரியானி ஹி கிஞ்சாபி இத்தி²லிங்க³புரிஸலிங்கா³தீ³னங் பீ³ஜபூ⁴தானி, கலலாதி³காலே பன விஜ்ஜமானேஸுபி தேஸு இத்தி²லிங்க³புரிஸலிங்கா³தீ³னங் அபா⁴வா தானி நேவ தேஸங், ந அஞ்ஞேஸங் இந்த்³ரியபச்சயதங் ப²ரந்தி. இந்த்³ரியபச்சயோ ஹி அத்தனோ விஜ்ஜமானக்க²ணே அவினிப்³பு⁴த்தத⁴ம்மானங் இந்த்³ரியபச்சயதங் அப²ரந்தோ நாம நத்தி², தஸ்மா தானி இந்த்³ரியபச்சயா ந ஹொந்தி. யேஸங் பனேதானி பீ³ஜபூ⁴தானி, தேஸங் தானி ஸுத்தந்திகபரியாயேன பகதூபனிஸ்ஸயபா⁴வங் ப⁴ஜந்தி. இதி இந்த்³ரியபச்சயோ ஸமவீஸதியா இந்த்³ரியானங் வஸேன டி²தோதி வேதி³தப்³போ³. ஸோ ஜாதிதோ குஸலாகுஸலவிபாககிரியரூபவஸேன பஞ்சதா⁴ பி⁴ஜ்ஜதி. தத்த² குஸலோ பூ⁴மிவஸேன சதுதா⁴, அகுஸலோ காமாவசரோவ விபாகோ சதுதா⁴வ கிரியாஸங்கா²தோ திதா⁴, ரூபங் காமாவசரமேவாதி ஏவங் அனேகதா⁴ பி⁴ஜ்ஜதீதி ஏவங் தாவெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Ayaṃ pana indriyapaccayo itthindriyapurisindriyavajjānaṃ samavīsatiyā indriyānaṃ vasena ṭhito. Itthindriyapurisindriyāni hi kiñcāpi itthiliṅgapurisaliṅgādīnaṃ bījabhūtāni, kalalādikāle pana vijjamānesupi tesu itthiliṅgapurisaliṅgādīnaṃ abhāvā tāni neva tesaṃ, na aññesaṃ indriyapaccayataṃ pharanti. Indriyapaccayo hi attano vijjamānakkhaṇe avinibbhuttadhammānaṃ indriyapaccayataṃ apharanto nāma natthi, tasmā tāni indriyapaccayā na honti. Yesaṃ panetāni bījabhūtāni, tesaṃ tāni suttantikapariyāyena pakatūpanissayabhāvaṃ bhajanti. Iti indriyapaccayo samavīsatiyā indriyānaṃ vasena ṭhitoti veditabbo. So jātito kusalākusalavipākakiriyarūpavasena pañcadhā bhijjati. Tattha kusalo bhūmivasena catudhā, akusalo kāmāvacarova vipāko catudhāva kiriyāsaṅkhāto tidhā, rūpaṃ kāmāvacaramevāti evaṃ anekadhā bhijjatīti evaṃ tāvettha nānappakārabhedato viññātabbo vinicchayo.
ஏவங் பி⁴ன்னே பனெத்த² சதுபூ⁴மகோபி குஸலிந்த்³ரியபச்சயோ பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச இந்த்³ரியபச்சயேன பச்சயோ, ததா² அகுஸலோ. ட²பெத்வா பன ரூபாவசரகுஸலங் அவஸேஸா குஸலாகுஸலா ஆருப்பே ஸம்பயுத்தத⁴ம்மானஞ்ஞேவ இந்த்³ரியபச்சயேன பச்சயோ. சதுபூ⁴மகோ விபாகிந்த்³ரியபச்சயோ ஏகந்தேனேவ ஸம்பயுத்தகானங் இந்த்³ரியபச்சயேன பச்சயோ. காமாவசரரூபாவசரா பனெத்த² பஞ்சவோகாரே உப்பஜ்ஜனதோ பவத்தே சித்தஸமுட்டா²னரூபஸ்ஸ, படிஸந்தி⁴யங் கடத்தாரூபஸ்ஸாபி இந்த்³ரியபச்சயேன பச்சயா ஹொந்தி. லோகுத்தரா சித்தஸமுட்டா²னரூபஸ்ஸேவ. ஆருப்பே உப்பன்னா லோகுத்தரவிபாகா இந்த்³ரியா ரூபஸ்ஸ பச்சயா ந ஹொந்தி. தேபூ⁴மகா கிரியிந்த்³ரியா பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, காமாவசராரூபாவசரா பன ஆருப்பே ஸம்பயுத்தத⁴ம்மானஞ்ஞேவ இந்த்³ரியபச்சயதங் ப²ரந்தி. சக்கு²ந்த்³ரியாதி³வஸேன ச²ப்³பி³தே⁴ ரூபிந்த்³ரியே சக்கு²ந்த்³ரியங் குஸலாகுஸலவிபாகதோ ஸம்பயுத்தத⁴ம்மானங் த்³வின்னங் சக்கு²விஞ்ஞாணானங், ஸோதிந்த்³ரியாதீ³னி ததா²விதா⁴னஞ்ஞேவ ஸோதவிஞ்ஞாணாதீ³னங், ரூபஜீவிதிந்த்³ரியங் அத்தனா ஸஹஜாதரூபானங் டி²திக்க²ணே இந்த்³ரியபச்சயேன பச்சயோ. ஸஹஜாதபச்சயதா பன தஸ்ஸ நத்தீ²தி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha catubhūmakopi kusalindriyapaccayo pañcavokāre sampayuttadhammānañceva cittasamuṭṭhānarūpassa ca indriyapaccayena paccayo, tathā akusalo. Ṭhapetvā pana rūpāvacarakusalaṃ avasesā kusalākusalā āruppe sampayuttadhammānaññeva indriyapaccayena paccayo. Catubhūmako vipākindriyapaccayo ekanteneva sampayuttakānaṃ indriyapaccayena paccayo. Kāmāvacararūpāvacarā panettha pañcavokāre uppajjanato pavatte cittasamuṭṭhānarūpassa, paṭisandhiyaṃ kaṭattārūpassāpi indriyapaccayena paccayā honti. Lokuttarā cittasamuṭṭhānarūpasseva. Āruppe uppannā lokuttaravipākā indriyā rūpassa paccayā na honti. Tebhūmakā kiriyindriyā pañcavokāre sampayuttadhammānañceva cittasamuṭṭhānarūpassa ca, kāmāvacarārūpāvacarā pana āruppe sampayuttadhammānaññeva indriyapaccayataṃ pharanti. Cakkhundriyādivasena chabbidhe rūpindriye cakkhundriyaṃ kusalākusalavipākato sampayuttadhammānaṃ dvinnaṃ cakkhuviññāṇānaṃ, sotindriyādīni tathāvidhānaññeva sotaviññāṇādīnaṃ, rūpajīvitindriyaṃ attanā sahajātarūpānaṃ ṭhitikkhaṇe indriyapaccayena paccayo. Sahajātapaccayatā pana tassa natthīti evamettha paccayuppannatopi viññātabbo vinicchayoti.
இந்த்³ரியபச்சயனித்³தே³ஸவண்ணனா.
Indriyapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
