| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੮. ਇਨ੍ਦ੍ਰਿਯਸਂવਰਸੁਤ੍ਤવਣ੍ਣਨਾ
8. Indriyasaṃvarasuttavaṇṇanā
੫੦. ਅਟ੍ਠਮੇ ਉਪਨਿਸੀਦਤਿ ਫਲਂ ਏਤ੍ਥਾਤਿ ਕਾਰਣਂ ਉਪਨਿਸਾ। ਯਥਾਭੂਤਞਾਣਦਸ੍ਸਨਨ੍ਤਿ ਯਥਾਸਭਾવਜਾਨਨਸਙ੍ਖਾਤਂ ਦਸ੍ਸਨਂ। ਏਤੇਨ ਤਰੁਣવਿਪਸ੍ਸਨਂ ਦਸ੍ਸੇਤਿ। ਤਰੁਣવਿਪਸ੍ਸਨਾ ਹਿ ਬਲવવਿਪਸ੍ਸਨਾਯ ਪਚ੍ਚਯੋ ਹੋਤਿ। ਤਰੁਣવਿਪਸ੍ਸਨਾਤਿ ਨਾਮਰੂਪਪਰਿਗ੍ਗਹੇ ਞਾਣਂ, ਪਚ੍ਚਯਪਰਿਗ੍ਗਹੇ ਞਾਣਂ, ਸਮ੍ਮਸਨੇ ਞਾਣਂ, ਮਗ੍ਗਾਮਗ੍ਗੇ વવਤ੍ਥਪੇਤ੍વਾ ਠਿਤਞਾਣਨ੍ਤਿ ਚਤੁਨ੍ਨਂ ਞਾਣਾਨਂ ਅਧਿવਚਨਂ। ਨਿਬ੍ਬਿਨ੍ਦਤਿ ਏਤਾਯਾਤਿ ਨਿਬ੍ਬਿਦਾ। ਬਲવવਿਪਸ੍ਸਨਾਤਿ ਭਯਤੁਪਟ੍ਠਾਨੇ ਞਾਣਂ ਆਦੀਨવਾਨੁਪਸ੍ਸਨੇ ਞਾਣਂ ਮੁਚ੍ਚਿਤੁਕਮ੍ਯਤਾਞਾਣਂ ਸਙ੍ਖਾਰੁਪੇਕ੍ਖਾਞਾਣਨ੍ਤਿ ਚਤੁਨ੍ਨਂ ਞਾਣਾਨਂ ਅਧਿવਚਨਂ। ਪਟਿਸਙ੍ਖਾਨੁਪਸ੍ਸਨਾ ਪਨ ਮੁਚ੍ਚਿਤੁਕਮ੍ਯਤਾਪਕ੍ਖਿਕਾ ਏવ। ‘‘ਯਾવ ਮਗ੍ਗਾਮਗ੍ਗਞਾਣਦਸ੍ਸਨવਿਸੁਦ੍ਧਿ, ਤਾવ ਤਰੁਣવਿਪਸ੍ਸਨਾ’’ਤਿ ਹਿ વਚਨਤੋ ਉਪਕ੍ਕਿਲੇਸવਿਮੁਤ੍ਤਉਦਯਬ੍ਬਯਞਾਣਤੋ ਬਲવવਿਪਸ੍ਸਨਾ। વਿਰਜ੍ਜਤਿ ਅਰਿਯੋ ਸਙ੍ਖਾਰਤੋ ਏਤੇਨਾਤਿ વਿਰਾਗੋ, ਅਰਿਯਮਗ੍ਗੋ। ਅਰਹਤ੍ਤਫਲਨ੍ਤਿ ਉਕ੍ਕਟ੍ਠਨਿਦ੍ਦੇਸਤੋ વੁਤ੍ਤਂ। ਇਨ੍ਦ੍ਰਿਯਸਂવਰਸ੍ਸ ਸੀਲਰਕ੍ਖਣਹੇਤੁਤ੍ਤਾ વੁਤ੍ਤਂ ‘‘ਸੀਲਾਨੁਰਕ੍ਖਣਇਨ੍ਦ੍ਰਿਯਸਂવਰੋ ਕਥਿਤੋ’’ਤਿ।
50. Aṭṭhame upanisīdati phalaṃ etthāti kāraṇaṃ upanisā. Yathābhūtañāṇadassananti yathāsabhāvajānanasaṅkhātaṃ dassanaṃ. Etena taruṇavipassanaṃ dasseti. Taruṇavipassanā hi balavavipassanāya paccayo hoti. Taruṇavipassanāti nāmarūpapariggahe ñāṇaṃ, paccayapariggahe ñāṇaṃ, sammasane ñāṇaṃ, maggāmagge vavatthapetvā ṭhitañāṇanti catunnaṃ ñāṇānaṃ adhivacanaṃ. Nibbindati etāyāti nibbidā. Balavavipassanāti bhayatupaṭṭhāne ñāṇaṃ ādīnavānupassane ñāṇaṃ muccitukamyatāñāṇaṃ saṅkhārupekkhāñāṇanti catunnaṃ ñāṇānaṃ adhivacanaṃ. Paṭisaṅkhānupassanā pana muccitukamyatāpakkhikā eva. ‘‘Yāva maggāmaggañāṇadassanavisuddhi, tāva taruṇavipassanā’’ti hi vacanato upakkilesavimuttaudayabbayañāṇato balavavipassanā. Virajjati ariyo saṅkhārato etenāti virāgo, ariyamaggo. Arahattaphalanti ukkaṭṭhaniddesato vuttaṃ. Indriyasaṃvarassa sīlarakkhaṇahetuttā vuttaṃ ‘‘sīlānurakkhaṇaindriyasaṃvaro kathito’’ti.
ਇਨ੍ਦ੍ਰਿਯਸਂવਰਸੁਤ੍ਤવਣ੍ਣਨਾ ਨਿਟ੍ਠਿਤਾ।
Indriyasaṃvarasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੮. ਇਨ੍ਦ੍ਰਿਯਸਂવਰਸੁਤ੍ਤਂ • 8. Indriyasaṃvarasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੮. ਇਨ੍ਦ੍ਰਿਯਸਂવਰਸੁਤ੍ਤવਣ੍ਣਨਾ • 8. Indriyasaṃvarasuttavaṇṇanā
