Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
1. இந்த்³ரியவாரோ
1. Indriyavāro
23. ஸப்³பே³ஸங் ஸத்தானங் பீளனங் வஜ்ஜெத்வா அபீளனாய, உபகா⁴தங் வஜ்ஜெத்வா அனுபகா⁴தேன, ஸந்தாபங் வஜ்ஜெத்வா அஸந்தாபேன, பரியாதா³னங் வஜ்ஜெத்வா அபரியாதா³னேன, விஹேஸங் வஜ்ஜெத்வா அவிஹேஸாய, ஸப்³பே³ ஸத்தா அவேரினோ ஹொந்து மா வேரினோ, ஸுகி²னோ ஹொந்து மா து³க்கி²னோ, ஸுகி²தத்தா ஹொந்து மா து³க்கி²தத்தாதி – இமேஹி அட்ட²ஹாகாரேஹி ஸப்³பே³ ஸத்தே மெத்தாயதீதி – மெத்தா. தங் த⁴ம்மங் சேதயதீதி – சேதோ. ஸப்³ப³ப்³யாபாத³பரியுட்டா²னேஹி விமுச்சதீதி – விமுத்தி. மெத்தா ச சேதோ ச விமுத்தி சாதி – மெத்தாசேதோவிமுத்தி.
23. Sabbesaṃ sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – ஸத்³தா⁴ய அதி⁴முச்சதி. ஸத்³தி⁴ந்த்³ரியபரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – வீரியங் பக்³க³ண்ஹாதி. வீரியிந்த்³ரியபரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – ஸதிங் உபட்டா²பேதி. ஸதிந்த்³ரியபரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – satiṃ upaṭṭhāpeti. Satindriyaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – சித்தங் ஸமாத³ஹதி. ஸமாதி⁴ந்த்³ரியபரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – cittaṃ samādahati. Samādhindriyaparibhāvitā hoti mettācetovimutti.
ஸப்³பே³ ஸத்தா அவேரினோ ஹொந்து, கே²மினோ ஹொந்து, ஸுகி²னோ ஹொந்தூதி – பஞ்ஞாய பஜானாதி. பஞ்ஞிந்த்³ரியபரிபா⁴விதா ஹோதி மெத்தாசேதோவிமுத்தி.
Sabbe sattā averino hontu, khemino hontu, sukhino hontūti – paññāya pajānāti. Paññindriyaparibhāvitā hoti mettācetovimutti.
இமானி பஞ்சிந்த்³ரியானி மெத்தாய சேதோவிமுத்தியா ஆஸேவனா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி ஆஸேவீயதி. இமானி பஞ்சிந்த்³ரியானி மெத்தாய சேதோவிமுத்தியா பா⁴வனா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி பா⁴வீயதி. இமானி பஞ்சிந்த்³ரியானி மெத்தாய சேதோவிமுத்தியா ப³ஹுலீகதா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி ப³ஹுலீகரீயதி. இமானி பஞ்சிந்த்³ரியானி மெத்தாய சேதோவிமுத்தியா அலங்காரா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி ஸ்வாலங்கதா ஹோதி. இமானி பஞ்சிந்த்³ரியானி மெத்தாய சேதோவிமுத்தியா பரிக்கா²ரா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி ஸுபரிக்க²தா ஹோதி. இமானி பஞ்சிந்த்³ரியானி மெத்தாய சேதோவிமுத்தியா பரிவாரா ஹொந்தி. இமேஹி பஞ்சஹி இந்த்³ரியேஹி மெத்தாசேதோவிமுத்தி ஸுபரிவுதா ஹோதி. இமானி பஞ்சிந்த்³ரியானி மெத்தாய சேதோவிமுத்தியா ஆஸேவனா ஹொந்தி, பா⁴வனா ஹொந்தி, ப³ஹுலீகதா ஹொந்தி, அலங்காரா ஹொந்தி, பரிக்கா²ரா ஹொந்தி, பரிவாரா ஹொந்தி, பாரிபூரீ ஹொந்தி, ஸஹக³தா ஹொந்தி, ஸஹஜாதா ஹொந்தி, ஸங்ஸட்டா² ஹொந்தி, ஸம்பயுத்தா ஹொந்தி, பக்க²ந்த³னா ஹொந்தி, பஸீத³னா 1 ஹொந்தி, ஸந்திட்ட²னா ஹொந்தி, விமுச்சனா ஹொந்தி, ‘‘ஏதங் ஸந்த’’ந்தி ப²ஸ்ஸனா ஹொந்தி, யானீகதா ஹொந்தி , வத்து²கதா ஹொந்தி, அனுட்டி²தா ஹொந்தி, பரிசிதா ஹொந்தி, ஸுஸமாரத்³தா⁴ ஹொந்தி, ஸுபா⁴விதா ஹொந்தி, ஸ்வாதி⁴ட்டி²தா ஹொந்தி, ஸுஸமுக்³க³தா ஹொந்தி , ஸுவிமுத்தா ஹொந்தி, நிப்³ப³த்தெந்தி ஜோதெந்தி பதாபெந்தி.
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati. Imāni pañcindriyāni mettāya cetovimuttiyā bhāvanā honti. Imehi pañcahi indriyehi mettācetovimutti bhāvīyati. Imāni pañcindriyāni mettāya cetovimuttiyā bahulīkatā honti. Imehi pañcahi indriyehi mettācetovimutti bahulīkarīyati. Imāni pañcindriyāni mettāya cetovimuttiyā alaṅkārā honti. Imehi pañcahi indriyehi mettācetovimutti svālaṅkatā hoti. Imāni pañcindriyāni mettāya cetovimuttiyā parikkhārā honti. Imehi pañcahi indriyehi mettācetovimutti suparikkhatā hoti. Imāni pañcindriyāni mettāya cetovimuttiyā parivārā honti. Imehi pañcahi indriyehi mettācetovimutti suparivutā hoti. Imāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā 2 honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti , vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti , suvimuttā honti, nibbattenti jotenti patāpenti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 1. இந்த்³ரியவாரவண்ணனா • 1. Indriyavāravaṇṇanā