| Library / Tipiṭaka / తిపిటక • Tipiṭaka / పటిసమ్భిదామగ్గపాళి • Paṭisambhidāmaggapāḷi |
౧. ఇన్ద్రియవారో
1. Indriyavāro
౨౩. సబ్బేసం సత్తానం పీళనం వజ్జేత్వా అపీళనాయ, ఉపఘాతం వజ్జేత్వా అనుపఘాతేన, సన్తాపం వజ్జేత్వా అసన్తాపేన, పరియాదానం వజ్జేత్వా అపరియాదానేన, విహేసం వజ్జేత్వా అవిహేసాయ, సబ్బే సత్తా అవేరినో హోన్తు మా వేరినో, సుఖినో హోన్తు మా దుక్ఖినో, సుఖితత్తా హోన్తు మా దుక్ఖితత్తాతి – ఇమేహి అట్ఠహాకారేహి సబ్బే సత్తే మేత్తాయతీతి – మేత్తా. తం ధమ్మం చేతయతీతి – చేతో. సబ్బబ్యాపాదపరియుట్ఠానేహి విముచ్చతీతి – విముత్తి. మేత్తా చ చేతో చ విముత్తి చాతి – మేత్తాచేతోవిముత్తి.
23. Sabbesaṃ sattānaṃ pīḷanaṃ vajjetvā apīḷanāya, upaghātaṃ vajjetvā anupaghātena, santāpaṃ vajjetvā asantāpena, pariyādānaṃ vajjetvā apariyādānena, vihesaṃ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti – imehi aṭṭhahākārehi sabbe satte mettāyatīti – mettā. Taṃ dhammaṃ cetayatīti – ceto. Sabbabyāpādapariyuṭṭhānehi vimuccatīti – vimutti. Mettā ca ceto ca vimutti cāti – mettācetovimutti.
సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సద్ధాయ అధిముచ్చతి. సద్ధిన్ద్రియపరిభావితా హోతి మేత్తాచేతోవిముత్తి.
Sabbe sattā averino hontu, khemino hontu, sukhino hontūti – saddhāya adhimuccati. Saddhindriyaparibhāvitā hoti mettācetovimutti.
సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – వీరియం పగ్గణ్హాతి. వీరియిన్ద్రియపరిభావితా హోతి మేత్తాచేతోవిముత్తి.
Sabbe sattā averino hontu, khemino hontu, sukhino hontūti – vīriyaṃ paggaṇhāti. Vīriyindriyaparibhāvitā hoti mettācetovimutti.
సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – సతిం ఉపట్ఠాపేతి. సతిన్ద్రియపరిభావితా హోతి మేత్తాచేతోవిముత్తి.
Sabbe sattā averino hontu, khemino hontu, sukhino hontūti – satiṃ upaṭṭhāpeti. Satindriyaparibhāvitā hoti mettācetovimutti.
సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – చిత్తం సమాదహతి. సమాధిన్ద్రియపరిభావితా హోతి మేత్తాచేతోవిముత్తి.
Sabbe sattā averino hontu, khemino hontu, sukhino hontūti – cittaṃ samādahati. Samādhindriyaparibhāvitā hoti mettācetovimutti.
సబ్బే సత్తా అవేరినో హోన్తు, ఖేమినో హోన్తు, సుఖినో హోన్తూతి – పఞ్ఞాయ పజానాతి. పఞ్ఞిన్ద్రియపరిభావితా హోతి మేత్తాచేతోవిముత్తి.
Sabbe sattā averino hontu, khemino hontu, sukhino hontūti – paññāya pajānāti. Paññindriyaparibhāvitā hoti mettācetovimutti.
ఇమాని పఞ్చిన్ద్రియాని మేత్తాయ చేతోవిముత్తియా ఆసేవనా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి ఆసేవీయతి. ఇమాని పఞ్చిన్ద్రియాని మేత్తాయ చేతోవిముత్తియా భావనా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి భావీయతి. ఇమాని పఞ్చిన్ద్రియాని మేత్తాయ చేతోవిముత్తియా బహులీకతా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి బహులీకరీయతి. ఇమాని పఞ్చిన్ద్రియాని మేత్తాయ చేతోవిముత్తియా అలఙ్కారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి స్వాలఙ్కతా హోతి. ఇమాని పఞ్చిన్ద్రియాని మేత్తాయ చేతోవిముత్తియా పరిక్ఖారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి సుపరిక్ఖతా హోతి. ఇమాని పఞ్చిన్ద్రియాని మేత్తాయ చేతోవిముత్తియా పరివారా హోన్తి. ఇమేహి పఞ్చహి ఇన్ద్రియేహి మేత్తాచేతోవిముత్తి సుపరివుతా హోతి. ఇమాని పఞ్చిన్ద్రియాని మేత్తాయ చేతోవిముత్తియా ఆసేవనా హోన్తి, భావనా హోన్తి, బహులీకతా హోన్తి, అలఙ్కారా హోన్తి, పరిక్ఖారా హోన్తి, పరివారా హోన్తి, పారిపూరీ హోన్తి, సహగతా హోన్తి, సహజాతా హోన్తి, సంసట్ఠా హోన్తి, సమ్పయుత్తా హోన్తి, పక్ఖన్దనా హోన్తి, పసీదనా 1 హోన్తి, సన్తిట్ఠనా హోన్తి, విముచ్చనా హోన్తి, ‘‘ఏతం సన్త’’న్తి ఫస్సనా హోన్తి, యానీకతా హోన్తి , వత్థుకతా హోన్తి, అనుట్ఠితా హోన్తి, పరిచితా హోన్తి, సుసమారద్ధా హోన్తి, సుభావితా హోన్తి, స్వాధిట్ఠితా హోన్తి, సుసముగ్గతా హోన్తి , సువిముత్తా హోన్తి, నిబ్బత్తేన్తి జోతేన్తి పతాపేన్తి.
Imāni pañcindriyāni mettāya cetovimuttiyā āsevanā honti. Imehi pañcahi indriyehi mettācetovimutti āsevīyati. Imāni pañcindriyāni mettāya cetovimuttiyā bhāvanā honti. Imehi pañcahi indriyehi mettācetovimutti bhāvīyati. Imāni pañcindriyāni mettāya cetovimuttiyā bahulīkatā honti. Imehi pañcahi indriyehi mettācetovimutti bahulīkarīyati. Imāni pañcindriyāni mettāya cetovimuttiyā alaṅkārā honti. Imehi pañcahi indriyehi mettācetovimutti svālaṅkatā hoti. Imāni pañcindriyāni mettāya cetovimuttiyā parikkhārā honti. Imehi pañcahi indriyehi mettācetovimutti suparikkhatā hoti. Imāni pañcindriyāni mettāya cetovimuttiyā parivārā honti. Imehi pañcahi indriyehi mettācetovimutti suparivutā hoti. Imāni pañcindriyāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā 2 honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti , vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti , suvimuttā honti, nibbattenti jotenti patāpenti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / ఖుద్దకనికాయ (అట్ఠకథా) • Khuddakanikāya (aṭṭhakathā) / పటిసమ్భిదామగ్గ-అట్ఠకథా • Paṭisambhidāmagga-aṭṭhakathā / ౧. ఇన్ద్రియవారవణ్ణనా • 1. Indriyavāravaṇṇanā
