| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
10. инд̣̇рияаяамагам̣
10. Indriyayamakaṃ
1. бан̣н̣ад̇д̇ивааро
1. Paṇṇattivāro
уд̣̇д̣̇зсаваараван̣н̣анаа
Uddesavāravaṇṇanā
1. инд̣̇рияаяамагз вибхан̇г̇з вияа ж̇ийвид̇инд̣̇рияам̣ манинд̣̇рияаананд̇арам̣ анид̣̇д̣̇исид̇ваа бурисинд̣̇рияаананд̇арам̣ уд̣̇д̣̇идтам̣ ‘‘д̇ийн̣имаани, бхигкавз, инд̣̇рияаани. гад̇амаани д̇ийн̣и? ид̇т̇инд̣̇рияам̣ бурисинд̣̇рияам̣ ж̇ийвид̇инд̣̇рияа’’нд̇и (сам̣. ни. 5.492) суд̇д̇з д̣̇зсид̇аггамзна. бавад̇д̇иваарз хи зганд̇ам̣ бавад̇д̇ияам̣ зва уббаж̇ж̇амаанаанам̣ сукинд̣̇рияаад̣̇ийнам̣ гаммаж̇аанам̣ агаммаж̇аанан̃жа анубаалагам̣ ж̇ийвид̇инд̣̇рияам̣ жуд̇ибадисанд̇хийсу жа бавад̇д̇амаанаанам̣ гаммаж̇аананд̇и д̇ам̣муулагаани яамагаани жуд̇ибадисанд̇хибавад̇д̇ивасзна вад̇д̇аб̣б̣аанийд̇и взд̣̇ид̇аб̣б̣аани. жагкунд̣̇рияаад̣̇ийсу бана бурисинд̣̇рияаавасаанзсу яам̣ муулагамзва на ход̇и манинд̣̇рияам̣, д̇ам̣ табзд̇ваа авасзсамуулагаани жуд̇иубабад̇д̇ивасзнзва вад̇д̇аб̣б̣аани ааяад̇анаяамагз вияа, д̇асмаа ж̇ийвид̇инд̣̇рияам̣ д̇зсам̣ маж̇жхз ануд̣̇д̣̇исид̇ваа анд̇з уд̣̇д̣̇идтанд̇и.
1. Indriyayamake vibhaṅge viya jīvitindriyaṃ manindriyānantaraṃ aniddisitvā purisindriyānantaraṃ uddiṭṭhaṃ ‘‘tīṇimāni, bhikkhave, indriyāni. Katamāni tīṇi? Itthindriyaṃ purisindriyaṃ jīvitindriya’’nti (saṃ. ni. 5.492) sutte desitakkamena. Pavattivāre hi ekantaṃ pavattiyaṃ eva uppajjamānānaṃ sukhindriyādīnaṃ kammajānaṃ akammajānañca anupālakaṃ jīvitindriyaṃ cutipaṭisandhīsu ca pavattamānānaṃ kammajānanti taṃmūlakāni yamakāni cutipaṭisandhipavattivasena vattabbānīti veditabbāni. Cakkhundriyādīsu pana purisindriyāvasānesu yaṃ mūlakameva na hoti manindriyaṃ, taṃ ṭhapetvā avasesamūlakāni cutiupapattivaseneva vattabbāni āyatanayamake viya, tasmā jīvitindriyaṃ tesaṃ majjhe anuddisitvā ante uddiṭṭhanti.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
94. ид̇т̇ий ид̇т̇инд̣̇рияанд̇и зд̇т̇а яасмаа ид̇т̇ийд̇и гожи сабхааво над̇т̇и, на жа руубаад̣̇ид̇хаммз убаад̣̇ааяа ид̇т̇иг̇г̇ахан̣ам̣ на ход̇и, д̇асмаа ид̇т̇иг̇г̇ахан̣асса авиж̇ж̇амаанамби виж̇ж̇амаанамива г̇ахзд̇ваа бавад̇д̇ид̇о д̇ат̇ааг̇ахид̇асса васзна ‘‘над̇т̇ий’’д̇и авад̇ваа ‘‘но’’д̇и вуд̇д̇ам̣. сукасса жа бхзд̣̇ам̣ гад̇ваа ‘‘сукам̣ соманасса’’нд̇и, д̣̇угкасса жа ‘‘д̣̇угкам̣ д̣̇оманасса’’нд̇и важанзнзва соманассад̇о ан̃н̃аа сукаа взд̣̇анаа сукам̣, д̣̇оманассад̇о жа ан̃н̃аа д̣̇угкаа взд̣̇анаа д̣̇угканд̇и аяам̣ висзсо г̇ахид̇оязваад̇и ‘‘сукам̣ сукинд̣̇рияам̣ д̣̇угкам̣ д̣̇угкинд̣̇рияа’’нд̇и зд̇т̇а ‘‘ааманд̇аа’’д̇и вуд̇д̇ам̣.
94. Itthī itthindriyanti ettha yasmā itthīti koci sabhāvo natthi, na ca rūpādidhamme upādāya itthiggahaṇaṃ na hoti, tasmā itthiggahaṇassa avijjamānampi vijjamānamiva gahetvā pavattito tathāgahitassa vasena ‘‘natthī’’ti avatvā ‘‘no’’ti vuttaṃ. Sukhassa ca bhedaṃ katvā ‘‘sukhaṃ somanassa’’nti, dukkhassa ca ‘‘dukkhaṃ domanassa’’nti vacaneneva somanassato aññā sukhā vedanā sukhaṃ, domanassato ca aññā dukkhā vedanā dukkhanti ayaṃ viseso gahitoyevāti ‘‘sukhaṃ sukhindriyaṃ dukkhaṃ dukkhindriya’’nti ettha ‘‘āmantā’’ti vuttaṃ.
140. суд̣̇д̇хинд̣̇рияаваарз жагку инд̣̇рияанд̇и зд̇т̇а д̣̇иб̣б̣ажагкубан̃н̃аажагкууни бан̃н̃инд̣̇рияаани хонд̇ийд̇и ‘‘ааманд̇аа’’д̇и вуд̇д̇ам̣. авасзсам̣ сод̇анд̇и д̇ан̣хаасод̇амзвааха.
140. Suddhindriyavāre cakkhu indriyanti ettha dibbacakkhupaññācakkhūni paññindriyāni hontīti ‘‘āmantā’’ti vuttaṃ. Avasesaṃ sotanti taṇhāsotamevāha.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
2.бавад̇д̇иваараван̣н̣анаа
2.Pavattivāravaṇṇanā
186. бавад̇д̇иваарз ‘‘чаяимаани, бхигкавз, инд̣̇рияаани. гад̇амаани ча? жагкунд̣̇рияам̣…бз… гааяинд̣̇рияам̣ манинд̣̇рияа’’нд̇и (сам̣. ни. 5.495) суд̇д̇з вуд̇д̇анаязна ид̇ха уд̣̇д̣̇идтам̣ манинд̣̇рияам̣ жуд̇ибадисанд̇хибавад̇д̇ийсу бавад̇д̇амаанзхи гаммаж̇аагаммаж̇зхи саб̣б̣зхиби яог̇ам̣ г̇ажчад̇и, на жа ж̇ийвид̇инд̣̇рияам̣ вияа ан̃н̃ад̇хамманиссаязна г̇ахзд̇аб̣б̣ам̣, буб̣б̣ан̇г̇амад̇д̇аава бад̇хаанам̣, д̇асмаа гуудам̣ вияа г̇обаанасийнам̣ саб̣б̣инд̣̇рияаанам̣ самосаран̣адтаанам̣ анд̇з табзд̇ваа яож̇ид̇ам̣. ж̇ийвид̇инд̣̇рияаад̣̇имуулагзсу бавад̇д̇ин̃жа г̇ахзд̇ваа г̇ад̇зсу ‘‘яасса ж̇ийвид̇инд̣̇рияам̣ уббаж̇ж̇ад̇и, д̇асса сукинд̣̇рияам̣ уббаж̇ж̇ад̇ийд̇и? саб̣б̣зсам̣ убабаж̇ж̇анд̇аанам̣, бавад̇д̇з сукинд̣̇рияавиббаяуд̇д̇ажид̇д̇асса уббаад̣̇агкан̣з д̇зсам̣ ж̇ийвид̇инд̣̇рияам̣ уббаж̇ж̇ад̇и, но жа д̇зсам̣ сукинд̣̇рияам̣ уббаж̇ж̇ад̇и, сукинд̣̇рияасамбаяуд̇д̇ажид̇д̇асса уббаад̣̇агкан̣з д̇зсам̣ ж̇ийвид̇инд̣̇рияан̃жа уббаж̇ж̇ад̇и сукинд̣̇рияан̃жа уббаж̇ж̇ад̇ий’’д̇иаад̣̇инаа сукад̣̇угкад̣̇оманассинд̣̇риязхи логуд̇д̇аринд̣̇риязхи жа яож̇анаа лаб̣бхад̇и, д̇ат̇аа ‘‘яасса сукинд̣̇рияам̣ уббаж̇ж̇ад̇и, д̇асса д̣̇угкинд̣̇рияам̣ уббаж̇ж̇ад̇ийд̇и? но’’д̇иаад̣̇инаа д̇ам̣муулагаа жа наяаа. д̇зхи бана бавад̇д̇ияам̣язва уббаж̇ж̇амаанзхи яож̇анаа д̇ам̣муулагаа жа жуд̇ибадисанд̇хибавад̇д̇ийсу бавад̇д̇амаанзхи соманассинд̣̇рияаад̣̇ийхи яож̇анааяа ж̇ийвид̇инд̣̇рияамуулагзхи жа наязхи баагадааязваад̇и гад̇ваа на вуд̇д̇аад̇и д̣̇адтаб̣б̣аа.
186. Pavattivāre ‘‘chayimāni, bhikkhave, indriyāni. Katamāni cha? Cakkhundriyaṃ…pe… kāyindriyaṃ manindriya’’nti (saṃ. ni. 5.495) sutte vuttanayena idha uddiṭṭhaṃ manindriyaṃ cutipaṭisandhipavattīsu pavattamānehi kammajākammajehi sabbehipi yogaṃ gacchati, na ca jīvitindriyaṃ viya aññadhammanissayena gahetabbaṃ, pubbaṅgamattāva padhānaṃ, tasmā kūṭaṃ viya gopānasīnaṃ sabbindriyānaṃ samosaraṇaṭṭhānaṃ ante ṭhapetvā yojitaṃ. Jīvitindriyādimūlakesu pavattiñca gahetvā gatesu ‘‘yassa jīvitindriyaṃ uppajjati, tassa sukhindriyaṃ uppajjatīti? Sabbesaṃ upapajjantānaṃ, pavatte sukhindriyavippayuttacittassa uppādakkhaṇe tesaṃ jīvitindriyaṃ uppajjati, no ca tesaṃ sukhindriyaṃ uppajjati, sukhindriyasampayuttacittassa uppādakkhaṇe tesaṃ jīvitindriyañca uppajjati sukhindriyañca uppajjatī’’tiādinā sukhadukkhadomanassindriyehi lokuttarindriyehi ca yojanā labbhati, tathā ‘‘yassa sukhindriyaṃ uppajjati, tassa dukkhindriyaṃ uppajjatīti? No’’tiādinā taṃmūlakā ca nayā. Tehi pana pavattiyaṃyeva uppajjamānehi yojanā taṃmūlakā ca cutipaṭisandhipavattīsu pavattamānehi somanassindriyādīhi yojanāya jīvitindriyamūlakehi ca nayehi pākaṭāyevāti katvā na vuttāti daṭṭhabbā.
‘‘сажагкугаанам̣ винаа соманассзнаад̇и убзгкаасахаг̇ад̇аанам̣ жад̇уннам̣ махаавибаагабадисанд̇хийнам̣ васзна вуд̇д̇а’’нд̇и адтагат̇ааяам̣ вуд̇д̇ам̣, д̇ам̣ соманассавирахид̇асажагкугабадисанд̇хинид̣̇ассанавасзна вуд̇д̇анд̇и д̣̇адтаб̣б̣ам̣. на хи ‘‘жад̇уннам̣язваа’’д̇и нияамо гад̇о, д̇зна д̇ам̣самааналагкан̣аа барид̇д̇авибаагаруубааважарабадисанд̇хияоби д̣̇ассид̇аа хонд̇и. д̇ад̇т̇а гаамааважарзсу соманассабадисанд̇хисамаанад̇ааяа махаавибаагзхи жад̇уухи нид̣̇ассанам̣ гад̇ам̣, д̇зна яат̇аа сасоманассабадисанд̇хигаа ажагкугаа на хонд̇и, звам̣ ид̇арамахаавибаагабадисанд̇хигаабийд̇и аяамад̇т̇о д̣̇ассид̇о ход̇и. г̇аб̣бхасзяяагаанан̃жа ануббаннзсу жагкаад̣̇ийсу жаванд̇аанам̣ ахзд̇угабадисанд̇хигад̇аа сахзд̇угабадисанд̇хигаанам̣ гаамааважараанам̣ нияамад̇о сажагкугаад̣̇ибхаавад̣̇ассанзна д̣̇ассид̇аа ход̇и. г̇аб̣бхасзяяагзби хи санд̇хааяа ‘‘яасса ваа бана соманассинд̣̇рияам̣ уббаж̇ж̇ад̇и, д̇асса жагкунд̣̇рияам̣ уббаж̇ж̇ад̇ийд̇и? ааманд̇аа’’д̇и ид̣̇ам̣ важанам̣ яат̇аа яуж̇ж̇ад̇и, д̇ат̇аа ааяад̇анаяамагз д̣̇ассид̇ам̣. на хи саннидтаанзна сан̇г̇ахид̇аанам̣ г̇аб̣бхасзяяагаанам̣ важ̇ж̇анз гааран̣ам̣ ад̇т̇и, ‘‘ид̇т̇ийнам̣ агхаанагаанам̣ убабаж̇ж̇анд̇ийна’’нд̇иаад̣̇ийсу (яама. 3.инд̣̇рияаяамага.187) жа д̇з зва вуд̇д̇аад̇и.
‘‘Sacakkhukānaṃvinā somanassenāti upekkhāsahagatānaṃ catunnaṃ mahāvipākapaṭisandhīnaṃ vasena vutta’’nti aṭṭhakathāyaṃ vuttaṃ, taṃ somanassavirahitasacakkhukapaṭisandhinidassanavasena vuttanti daṭṭhabbaṃ. Na hi ‘‘catunnaṃyevā’’ti niyamo kato, tena taṃsamānalakkhaṇā parittavipākarūpāvacarapaṭisandhiyopi dassitā honti. Tattha kāmāvacaresu somanassapaṭisandhisamānatāya mahāvipākehi catūhi nidassanaṃ kataṃ, tena yathā sasomanassapaṭisandhikā acakkhukā na honti, evaṃ itaramahāvipākapaṭisandhikāpīti ayamattho dassito hoti. Gabbhaseyyakānañca anuppannesu cakkhādīsu cavantānaṃ ahetukapaṭisandhikatā sahetukapaṭisandhikānaṃ kāmāvacarānaṃ niyamato sacakkhukādibhāvadassanena dassitā hoti. Gabbhaseyyakepi hi sandhāya ‘‘yassa vā pana somanassindriyaṃ uppajjati, tassa cakkhundriyaṃ uppajjatīti? Āmantā’’ti idaṃ vacanaṃ yathā yujjati, tathā āyatanayamake dassitaṃ. Na hi sanniṭṭhānena saṅgahitānaṃ gabbhaseyyakānaṃ vajjane kāraṇaṃ atthi, ‘‘itthīnaṃ aghānakānaṃ upapajjantīna’’ntiādīsu (yama. 3.indriyayamaka.187) ca te eva vuttāti.
убзгкааяа ажагкугаананд̇и ахзд̇угабадисанд̇хивасзна вуд̇д̇анд̇и зд̇т̇а жа гаамааважарз собзгкаажагкугабадисанд̇хияаа д̇ам̣самааналагкан̣ам̣ аруубабадисанд̇хин̃жа нид̣̇ассзд̇ийд̇и д̣̇адтаб̣б̣ам̣. гзсужи бана бод̇т̇агзсу ‘‘ахзд̇угааруубабадисанд̇хивасзнаа’’д̇и баато д̣̇иссад̇и, со зва сзяяо.
Upekkhāya acakkhukānanti ahetukapaṭisandhivasena vuttanti ettha ca kāmāvacare sopekkhaacakkhukapaṭisandhiyā taṃsamānalakkhaṇaṃ arūpapaṭisandhiñca nidassetīti daṭṭhabbaṃ. Kesuci pana potthakesu ‘‘ahetukārūpapaṭisandhivasenā’’ti pāṭho dissati, so eva seyyo.
‘‘д̇ад̇т̇а хи зганд̇знзва сад̣̇д̇хаасад̇ибан̃н̃ааяо над̇т̇и, самаад̇хивийрияаани бана инд̣̇рияаббад̇д̇аани на хонд̇ий’’д̇и вуд̇д̇ам̣, яад̣̇и бана самаад̇хивийрияаани санд̇и, ‘‘инд̣̇рияаббад̇д̇аани на хонд̇ий’’д̇и на саггаа вад̇д̇ум̣ ‘‘самаад̇хи самаад̇хинд̣̇рияанд̇и? ааманд̇аа’’д̇и (яама. 3.инд̣̇рияаяамага.113) ‘‘вийрияам̣ вийрияинд̣̇рияанд̇и? ааманд̇аа’’д̇и (яама. 3.инд̣̇рияаяамага.111) важанад̇о. ахзд̇угабадисанд̇хижид̇д̇з жа яат̇аа самаад̇хилзсо згаг̇г̇ад̇аа ад̇т̇и, на звам̣ вийрияалзсо ад̇т̇и, д̇асмаа звамзд̇т̇а вад̇д̇аб̣б̣ам̣ сияаа ‘‘д̇ад̇т̇а хи зганд̇знзва сад̣̇д̇хаавийрияасад̇ибан̃н̃ааяо над̇т̇и, згаг̇г̇ад̇аа бана самаад̇хилзсо зва ход̇ий’’д̇и. аяам̣ банзд̇т̇а ад̇хиббааяо сияаа – яат̇аа ан̃н̃зсу гзсужи ахзд̇угажид̇д̇зсу самаад̇хивийрияаани хонд̇и инд̣̇рияаббад̇д̇аани жа, звамид̇ха самаад̇хивийрияаани инд̣̇рияаббад̇д̇аани на хонд̇ийд̇и. самаад̇хивийрияинд̣̇рияаанамзва абхаавам̣ д̣̇ассзнд̇о ахзд̇уганд̇арад̇о висзсзд̇и . д̇ад̇т̇а ‘‘самаад̇хивийрияаани бана на хонд̇ий’’д̇и вад̇д̇аб̣б̣з ‘‘инд̣̇рияаббад̇д̇ааний’’д̇и самаад̇хилзсасса самаад̇хинд̣̇рияабхаавам̣ аббад̇д̇асса саб̣бхаавад̇о вуд̇д̇ам̣, на вийрияалзсасса. висзсанан̃хи висзсид̇аб̣б̣з бавад̇д̇ад̇и. язсу бана бод̇т̇агзсу ‘‘д̇ад̇т̇а зганд̇знзва сад̣̇д̇хаавийрияасад̇ибан̃н̃ааяо над̇т̇ий’’д̇и баато, со зва сунд̣̇арад̇аро.
‘‘Tattha hi ekanteneva saddhāsatipaññāyo natthi, samādhivīriyāni pana indriyappattāni na hontī’’ti vuttaṃ, yadi pana samādhivīriyāni santi, ‘‘indriyappattāni na hontī’’ti na sakkā vattuṃ ‘‘samādhi samādhindriyanti? Āmantā’’ti (yama. 3.indriyayamaka.113) ‘‘vīriyaṃ vīriyindriyanti? Āmantā’’ti (yama. 3.indriyayamaka.111) vacanato. Ahetukapaṭisandhicitte ca yathā samādhileso ekaggatā atthi, na evaṃ vīriyaleso atthi, tasmā evamettha vattabbaṃ siyā ‘‘tattha hi ekanteneva saddhāvīriyasatipaññāyo natthi, ekaggatā pana samādhileso eva hotī’’ti. Ayaṃ panettha adhippāyo siyā – yathā aññesu kesuci ahetukacittesu samādhivīriyāni honti indriyappattāni ca, evamidha samādhivīriyāni indriyappattāni na hontīti. Samādhivīriyindriyānameva abhāvaṃ dassento ahetukantarato viseseti . Tattha ‘‘samādhivīriyāni pana na hontī’’ti vattabbe ‘‘indriyappattānī’’ti samādhilesassa samādhindriyabhāvaṃ appattassa sabbhāvato vuttaṃ, na vīriyalesassa. Visesanañhi visesitabbe pavattati. Yesu pana potthakesu ‘‘tattha ekanteneva saddhāvīriyasatipaññāyo natthī’’ti pāṭho, so eva sundarataro.
яаава жагкунд̣̇рияам̣ нуббаж̇ж̇ад̇и, д̇аава г̇аб̣бхаг̇ад̇аанам̣ ажагкугаанам̣ бхааво ад̇т̇ийд̇и иминаа ад̇хиббааязнааха ‘‘сахзд̇угаанам̣ ажагкугаананд̇и г̇аб̣бхасзяяагавасзна жзва аруубийвасзна жа вуд̇д̇а’’нд̇и. г̇аб̣бхасзяяагааби бана авассам̣ уббаж̇ж̇анагажагкугаа на лаб̣бханд̇ийд̇и д̣̇адтаб̣б̣аа. сажагкугаанам̣ н̃аан̣авиббаяуд̇д̇аананд̇и гаамад̇хаад̇уяам̣ д̣̇ухзд̇угабадисанд̇хигаанам̣ васзна вуд̇д̇анд̇и ид̇хааби ахзд̇угабадисанд̇хигаа жа ажагкугаа лаб̣бханд̇зва. ид̇т̇ибурисинд̣̇рияасанд̇аанаанамби убабад̇д̇ивасзна уббаад̣̇о, жуд̇ивасзна нирод̇хо б̣аахуллавасзна д̣̇ассид̇о. гад̣̇аажи хи д̇зсам̣ батамагаббигаад̣̇ийнам̣ вияа бавад̇д̇ияамби уббаад̣̇анирод̇хаа хонд̇ийд̇и. зд̇т̇а бурисинд̣̇рияаавасаанзсу инд̣̇рияамуулаяамагзсу батамабужчаасу саннидтаанзхи г̇ахид̇зхи убабад̇д̇ижуд̇ивасзна г̇ажчанд̇зхи жагкунд̣̇рияаад̣̇ийхи нияамид̇ад̇д̇аа ж̇ийвид̇инд̣̇рияаад̣̇ийнам̣ бавад̇д̇ивасзнаби лаб̣бхамаанаанам̣ убабад̇д̇ижуд̇ивасзнзва д̣̇уд̇ияабужчаасу саннидтаанзхи г̇ахан̣ам̣ взд̣̇ид̇аб̣б̣ам̣.
Yāva cakkhundriyaṃ nuppajjati, tāva gabbhagatānaṃ acakkhukānaṃ bhāvo atthīti iminā adhippāyenāha ‘‘sahetukānaṃ acakkhukānanti gabbhaseyyakavasena ceva arūpīvasena ca vutta’’nti. Gabbhaseyyakāpi pana avassaṃ uppajjanakacakkhukā na labbhantīti daṭṭhabbā. Sacakkhukānaṃ ñāṇavippayuttānanti kāmadhātuyaṃ duhetukapaṭisandhikānaṃ vasena vuttanti idhāpi ahetukapaṭisandhikā ca acakkhukā labbhanteva. Itthipurisindriyasantānānampi upapattivasena uppādo, cutivasena nirodho bāhullavasena dassito. Kadāci hi tesaṃ paṭhamakappikādīnaṃ viya pavattiyampi uppādanirodhā hontīti. Ettha purisindriyāvasānesu indriyamūlayamakesu paṭhamapucchāsu sanniṭṭhānehi gahitehi upapatticutivasena gacchantehi cakkhundriyādīhi niyamitattā jīvitindriyādīnaṃ pavattivasenapi labbhamānānaṃ upapatticutivaseneva dutiyapucchāsu sanniṭṭhānehi gahaṇaṃ veditabbaṃ.
190. руубаж̇ийвид̇инд̣̇рияам̣ жагкунд̣̇рияаад̣̇исамаанаг̇ад̇игам̣ жуд̇ибадисанд̇хивасзнзва г̇ажчад̇и санд̇аануббад̇д̇инирод̇хад̣̇ассанад̇од̇и ааха ‘‘бавад̇д̇з соманассавиббаяуд̇д̇ажид̇д̇асса уббаад̣̇агкан̣зд̇и аруубаж̇ийвид̇инд̣̇рияам̣ санд̇хааяа вуд̇д̇а’’нд̇и. зд̇зсан̃жзва ан̃н̃зсан̃жа бан̃жинд̣̇рияаанам̣ яат̇аалаабхавасзнаад̇и зд̇т̇а зд̇зсам̣ ж̇ийвид̇инд̣̇рияаад̣̇ийнам̣ жуд̇ибадисанд̇хибавад̇д̇зсу, ан̃н̃зсан̃жа жагкунд̣̇рияаад̣̇ийнам̣ жуд̇ибадисанд̇хийсууд̇и звам̣ яат̇аалаабхо д̣̇адтаб̣б̣о. аяам̣ бана чзд̣̇зязваад̇и зд̇т̇а д̇асса д̇асса барибун̣н̣абан̃хасса д̇асмим̣ д̇асмим̣ саруубад̣̇ассанзна виссаж̇ж̇анз виссаж̇ж̇ид̇з бажчимагодтаасасса чзд̣̇од̇и наамам̣ д̣̇адтаб̣б̣ам̣.
190. Rūpajīvitindriyaṃ cakkhundriyādisamānagatikaṃ cutipaṭisandhivaseneva gacchati santānuppattinirodhadassanatoti āha ‘‘pavatte somanassavippayuttacittassa uppādakkhaṇeti arūpajīvitindriyaṃ sandhāya vutta’’nti. Etesañceva aññesañca pañcindriyānaṃ yathālābhavasenāti ettha etesaṃ jīvitindriyādīnaṃ cutipaṭisandhipavattesu, aññesañca cakkhundriyādīnaṃ cutipaṭisandhīsūti evaṃ yathālābho daṭṭhabbo. Ayaṃ pana chedeyevāti ettha tassa tassa paripuṇṇapañhassa tasmiṃ tasmiṃ sarūpadassanena vissajjane vissajjite pacchimakoṭṭhāsassa chedoti nāmaṃ daṭṭhabbaṃ.
яасса ваа бана соманассинд̣̇рияам̣ на уббаж̇ж̇ад̇и, д̇асса ж̇ийвид̇инд̣̇рияам̣ на уббаж̇ж̇ад̇ийд̇и? винаа соманассзна убабаж̇ж̇анд̇аанам̣ бавад̇д̇з соманассавиббаяуд̇д̇ажид̇д̇асса уббаад̣̇агкан̣з д̇зсам̣ соманассинд̣̇рияам̣ на уббаж̇ж̇ад̇и, но жа д̇зсам̣ ж̇ийвид̇инд̣̇рияам̣ на уббаж̇ж̇ад̇ийд̇и зд̇т̇а ‘‘нирод̇хасамаабаннаанам̣ асан̃н̃асад̇д̇аана’’нд̇и аважанам̣ руубаж̇ийвид̇инд̣̇рияасса жагкунд̣̇рияаад̣̇исамаанаг̇ад̇игад̇ам̣ д̣̇ийбзд̇и. д̇асса хи убабад̇д̇ияам̣язва уббаад̣̇о вад̇д̇аб̣б̣од̇и. ‘‘винаа соманассзна убабаж̇ж̇анд̇аана’’нд̇и зд̇т̇а асан̃н̃асад̇д̇з сан̇г̇ахзд̇ваа бавад̇д̇ивасзна д̇з жа нирод̇хасамаабаннаа жа на вуд̇д̇аа, ануббаад̣̇оби банзд̇асса жуд̇иубабад̇д̇ийсвзва вад̇д̇аб̣б̣о, на бавад̇д̇зд̇и. бажчимагодтаасзби ‘‘саб̣б̣зсам̣ жаванд̇аанам̣, бавад̇д̇з жид̇д̇асса бхан̇г̇агкан̣з д̇зсам̣ соманассинд̣̇рияан̃жа на уббаж̇ж̇ад̇и ж̇ийвид̇инд̣̇рияан̃жа на уббаж̇ж̇ад̇ий’’д̇и звам̣ ‘‘саб̣б̣зсам̣ жаванд̇аана’’нд̇и зд̇т̇зва асан̃н̃асад̇д̇з сан̇г̇ан̣хид̇ваа бавад̇д̇ивасзна д̇з жа нирод̇хасамаабаннаа на жа вуд̇д̇аа. яассаяад̇т̇агз жа нирод̇хасамаабаннаа на д̣̇ассзд̇аб̣б̣аа на г̇ахзд̇аб̣б̣аад̇и ад̇т̇о. на хи ‘‘нирод̇хасамаабаннаана’’нд̇и важанам̣ ‘‘асан̃н̃асад̇д̇аана’’нд̇и важанам̣ вияа огаасад̣̇ийбагам̣, нааби ‘‘убзгкаасамбаяуд̇д̇ажид̇д̇асса уббаад̣̇агкан̣з, саб̣б̣зсам̣ жид̇д̇асса бхан̇г̇агкан̣з’’д̇иаад̣̇иважанам̣ вияа соманассинд̣̇рияаад̣̇ийнам̣ ануббаад̣̇агкан̣ад̣̇ийбагам̣, ат̇а ко буг̇г̇алад̣̇ийбагамзваад̇и.
Yassa vā pana somanassindriyaṃ na uppajjati, tassa jīvitindriyaṃ na uppajjatīti? Vinā somanassena upapajjantānaṃ pavatte somanassavippayuttacittassa uppādakkhaṇe tesaṃ somanassindriyaṃ na uppajjati, no ca tesaṃ jīvitindriyaṃ na uppajjatīti ettha ‘‘nirodhasamāpannānaṃ asaññasattāna’’nti avacanaṃ rūpajīvitindriyassa cakkhundriyādisamānagatikataṃ dīpeti. Tassa hi upapattiyaṃyeva uppādo vattabboti. ‘‘Vinā somanassena upapajjantāna’’nti ettha asaññasatte saṅgahetvā pavattivasena te ca nirodhasamāpannā ca na vuttā, anuppādopi panetassa cutiupapattīsveva vattabbo, na pavatteti. Pacchimakoṭṭhāsepi ‘‘sabbesaṃ cavantānaṃ, pavatte cittassa bhaṅgakkhaṇe tesaṃ somanassindriyañca na uppajjati jīvitindriyañca na uppajjatī’’ti evaṃ ‘‘sabbesaṃ cavantāna’’nti ettheva asaññasatte saṅgaṇhitvā pavattivasena te ca nirodhasamāpannā na ca vuttā. Yassayatthake ca nirodhasamāpannā na dassetabbā na gahetabbāti attho. Na hi ‘‘nirodhasamāpannāna’’nti vacanaṃ ‘‘asaññasattāna’’nti vacanaṃ viya okāsadīpakaṃ, nāpi ‘‘upekkhāsampayuttacittassa uppādakkhaṇe, sabbesaṃ cittassa bhaṅgakkhaṇe’’tiādivacanaṃ viya somanassindriyādīnaṃ anuppādakkhaṇadīpakaṃ, atha kho puggaladīpakamevāti.
ад̇ийд̇агаалабхзд̣̇з суд̣̇д̇хааваасаанам̣ убабад̇д̇ижид̇д̇асса уббаад̣̇агкан̣з д̇зсам̣ д̇ад̇т̇а соманассинд̣̇рияан̃жа на уббаж̇ж̇ид̇т̇а ж̇ийвид̇инд̣̇рияан̃жа на уббаж̇ж̇ид̇т̇аад̇и зд̇т̇а ‘‘убабад̇д̇ижид̇д̇асса уббаад̣̇агкан̣з’’д̇и гасмаа вуд̇д̇ам̣, нану ‘‘суд̣̇д̇хааваасам̣ убабаж̇ж̇анд̇аанам̣, асан̃н̃асад̇д̇аанам̣ д̇зсам̣ д̇ад̇т̇а соманассинд̣̇рияан̃жа на уббаж̇ж̇ид̇т̇а манинд̣̇рияан̃жа на уббаж̇ж̇ид̇т̇аа’’д̇и (яама. 3.инд̣̇рияаяамага.277) зд̇т̇а вияа ‘‘убабаж̇ж̇анд̇аана’’нд̇и вад̇д̇аб̣б̣анд̇и? на вад̇д̇аб̣б̣ам̣. яат̇аа хи соманассаманинд̣̇рияаанам̣ васзна убабаж̇ж̇анд̇аа буг̇г̇алаа убабад̇д̇ижид̇д̇асаман̇г̇ино хонд̇и, на звам̣ соманассаж̇ийвид̇инд̣̇рияаанам̣ васзна убабад̇д̇исаман̇г̇иноязва хонд̇и. ж̇ийвид̇инд̣̇рияасса хи васзна яаава батамаруубаж̇ийвид̇инд̣̇рияам̣ д̇харад̇и, д̇аава убабаж̇ж̇анд̇аа наама хонд̇и. д̇ад̣̇аа жа д̣̇уд̇ияажид̇д̇ад̇о бадтааяа ‘‘ж̇ийвид̇инд̣̇рияан̃жа на уббаж̇ж̇ид̇т̇аа’’д̇и на саггаа вад̇д̇ум̣ аруубаж̇ийвид̇инд̣̇рияасса уббаж̇ж̇ид̇ваа нируд̣̇д̇хад̇д̇аа, д̇асмаа убхаяам̣ уббаад̣̇агкан̣зна нид̣̇ассид̇ам̣. яат̇аа хи ‘‘на нируж̇жхид̇т̇аа’’д̇и ид̣̇ам̣ лагкан̣ам̣ убабад̇д̇ижид̇д̇асса д̣̇вийсу кан̣зсу лаб̣бхамаанам̣ саб̣б̣абатамзна убабад̇д̇ижид̇д̇асса бхан̇г̇агкан̣зна нид̣̇ассид̇ам̣, звамид̇хааби д̣̇адтаб̣б̣ам̣.
Atītakālabhede suddhāvāsānaṃ upapatticittassa uppādakkhaṇe tesaṃ tattha somanassindriyañca na uppajjittha jīvitindriyañca na uppajjitthāti ettha ‘‘upapatticittassa uppādakkhaṇe’’ti kasmā vuttaṃ, nanu ‘‘suddhāvāsaṃ upapajjantānaṃ, asaññasattānaṃ tesaṃ tattha somanassindriyañca na uppajjittha manindriyañca na uppajjitthā’’ti (yama. 3.indriyayamaka.277) ettha viya ‘‘upapajjantāna’’nti vattabbanti? Na vattabbaṃ. Yathā hi somanassamanindriyānaṃ vasena upapajjantā puggalā upapatticittasamaṅgino honti, na evaṃ somanassajīvitindriyānaṃ vasena upapattisamaṅginoyeva honti. Jīvitindriyassa hi vasena yāva paṭhamarūpajīvitindriyaṃ dharati, tāva upapajjantā nāma honti. Tadā ca dutiyacittato paṭṭhāya ‘‘jīvitindriyañca na uppajjitthā’’ti na sakkā vattuṃ arūpajīvitindriyassa uppajjitvā niruddhattā, tasmā ubhayaṃ uppādakkhaṇena nidassitaṃ. Yathā hi ‘‘na nirujjhitthā’’ti idaṃ lakkhaṇaṃ upapatticittassa dvīsu khaṇesu labbhamānaṃ sabbapaṭhamena upapatticittassa bhaṅgakkhaṇena nidassitaṃ, evamidhāpi daṭṭhabbaṃ.
анааг̇ад̇агаалабхзд̣̇з уббаж̇ж̇иссамаанз саннидтаанам̣ гад̇ваа ан̃н̃асса жа уббаж̇ж̇иссамаанад̇аава бужчид̇аа. д̇ад̇т̇а яат̇аа бажжуббаннагаалабхзд̣̇з саннидтаанасам̣саяабхзд̣̇зхи уббаж̇ж̇амаанассзва г̇ахид̇ад̇д̇аа ‘‘яасса жагкунд̣̇рияаад̣̇ийни уббаж̇ж̇анд̇и , убабаж̇ж̇анд̇асса д̇асса ж̇ийвид̇инд̣̇рияаад̣̇ийни уббаж̇ж̇анд̇ий’’д̇и убабаж̇ж̇анд̇ассзва бужчид̇аанам̣ убабад̇д̇ияам̣язва д̇зсам̣ уббаад̣̇о самбхавад̇и, на ан̃н̃ад̇т̇а, на звамид̇ха ‘‘яасса жагкунд̣̇рияаад̣̇ийни уббаж̇ж̇иссанд̇и, убабаж̇ж̇анд̇асса д̇асса ж̇ийвид̇инд̣̇рияаад̣̇ийни уббаж̇ж̇иссанд̇ий’’д̇и убабаж̇ж̇анд̇ассзва бужчид̇аанам̣ д̇зсам̣ убабад̇д̇ид̇о ан̃н̃ад̇т̇а уббаад̣̇о на самбхавад̇и, д̇асмаа ‘‘яасса жагкунд̣̇рияам̣ уббаж̇ж̇иссад̇и, д̇асса соманассинд̣̇рияам̣ уббаж̇ж̇иссад̇ийд̇и? ааманд̇аа’’д̇и вуд̇д̇ам̣. зван̃жа гад̇ваа нирод̇хаваарзби ‘‘яасса жагкунд̣̇рияам̣ нируж̇жхиссад̇и, д̇асса соманассинд̣̇рияам̣ нируж̇жхиссад̇ийд̇и? ааманд̇аа’’д̇и вуд̇д̇ам̣. на хи яасса жагкунд̣̇рияам̣ нируж̇жхиссад̇и, д̇асса соманассинд̣̇рияам̣ на нируж̇жхиссад̇и, аби бажчимабхавигасса убзгкаасахаг̇ад̇абадисанд̇хигасса. на хи убабаж̇ж̇анд̇асса д̇асса жуд̇ид̇о буб̣б̣зва соманассинд̣̇рияанирод̇хо на самбхавад̇ийд̇и. зд̇т̇а хи батамабужчаасу саннидтаанад̇т̇о бужчид̇аб̣б̣ад̇т̇аниссаяо маад̣̇исова убабад̇д̇иуббаад̣̇инд̣̇рияаваа убхаяуббаад̣̇инд̣̇рияаваа ад̇т̇о бадинивад̇д̇ид̇вааби бужчид̇аб̣б̣ад̇т̇асса ниссаяод̇и звам̣ вияа д̣̇уд̇ияабужчаасу саннидтаанад̇т̇амзва нияамзд̇и, на д̇ад̇т̇зва бужчид̇аб̣б̣ам̣ анааг̇ад̇абхаавамад̇д̇зна саруубад̇о г̇ахид̇ам̣ уббаад̣̇ам̣ ваа нирод̇хам̣ ваа сам̣саяад̇т̇анд̇и. яасмаа жзвам̣ саннидтаанад̇т̇асса нияамо ход̇и, д̇асмаа ‘‘яасса ваа бана соманассинд̣̇рияам̣ уббаж̇ж̇иссад̇и, д̇асса жагкунд̣̇рияам̣ уббаж̇ж̇иссад̇ийд̇и? ааманд̇аа’’д̇и (яама. 3.инд̣̇рияаяамага.281) вуд̇д̇ам̣. зса наяо нирод̇хаваарзби.
Anāgatakālabhede uppajjissamāne sanniṭṭhānaṃ katvā aññassa ca uppajjissamānatāva pucchitā. Tattha yathā paccuppannakālabhede sanniṭṭhānasaṃsayabhedehi uppajjamānasseva gahitattā ‘‘yassa cakkhundriyādīni uppajjanti , upapajjantassa tassa jīvitindriyādīni uppajjantī’’ti upapajjantasseva pucchitānaṃ upapattiyaṃyeva tesaṃ uppādo sambhavati, na aññattha, na evamidha ‘‘yassa cakkhundriyādīni uppajjissanti, upapajjantassa tassa jīvitindriyādīni uppajjissantī’’ti upapajjantasseva pucchitānaṃ tesaṃ upapattito aññattha uppādo na sambhavati, tasmā ‘‘yassa cakkhundriyaṃ uppajjissati, tassa somanassindriyaṃ uppajjissatīti? Āmantā’’ti vuttaṃ. Evañca katvā nirodhavārepi ‘‘yassa cakkhundriyaṃ nirujjhissati, tassa somanassindriyaṃ nirujjhissatīti? Āmantā’’ti vuttaṃ. Na hi yassa cakkhundriyaṃ nirujjhissati, tassa somanassindriyaṃ na nirujjhissati, api pacchimabhavikassa upekkhāsahagatapaṭisandhikassa. Na hi upapajjantassa tassa cutito pubbeva somanassindriyanirodho na sambhavatīti. Ettha hi paṭhamapucchāsu sanniṭṭhānattho pucchitabbatthanissayo mādisova upapattiuppādindriyavā ubhayuppādindriyavā attho paṭinivattitvāpi pucchitabbatthassa nissayoti evaṃ viya dutiyapucchāsu sanniṭṭhānatthameva niyameti, na tattheva pucchitabbaṃ anāgatabhāvamattena sarūpato gahitaṃ uppādaṃ vā nirodhaṃ vā saṃsayatthanti. Yasmā cevaṃ sanniṭṭhānatthassa niyamo hoti, tasmā ‘‘yassa vā pana somanassindriyaṃ uppajjissati, tassa cakkhundriyaṃ uppajjissatīti? Āmantā’’ti (yama. 3.indriyayamaka.281) vuttaṃ. Esa nayo nirodhavārepi.
бадиломз бана яат̇аа ануломз ‘‘уббаж̇ж̇иссад̇и нируж̇жхиссад̇ий’’д̇и уббаад̣̇анирод̇хаа анааг̇ад̇аа саруубавасзна вуд̇д̇аа, звам̣ авуд̇д̇ад̇д̇аа яат̇аа д̇ад̇т̇а сам̣саяабад̣̇зна г̇ахид̇асса инд̣̇рияасса бавад̇д̇ияамби уббаад̣̇анирод̇хаа жагкунд̣̇рияаад̣̇имуулагзсу яож̇ид̇аа, на звам̣ яож̇зд̇аб̣б̣аа. яат̇аа хи уббаад̣̇анирод̇хз ад̇иггамид̇ваа аббад̇ваа жа уббаад̣̇анирод̇хаа самбхаванд̇и яож̇зд̇ум̣, на звам̣ ануббаад̣̇аанирод̇хз ад̇иггамид̇ваа аббад̇ваа жа ануббаад̣̇аанирод̇хаа самбхаванд̇и абхууд̇аабхаавасса абхууд̇аабхаавам̣ ад̇иггамид̇ваа аббад̇ваа жа самбхаваануббад̇д̇ид̇о, абхууд̇уббаад̣̇анирод̇хаабхааво жа бадиломз бужчид̇о, д̇асмаасса висзсарахид̇асса абхууд̇аабхаавасса вад̇д̇амаанаанам̣ уббаад̣̇асса вияа гааланд̇араяог̇аабхаавад̇о яаад̣̇исаанам̣ жагкаад̣̇ийнам̣ уббаад̣̇анирод̇хаабхаавзна бужчид̇аб̣б̣асса ниссаяо саннидтаанзна саннижчид̇о, д̇анниссаяаа д̇аад̣̇исаанам̣язва убабад̇д̇ижуд̇иуббаад̣̇анирод̇хаанам̣ ж̇ийвид̇аад̣̇ийнамби ануббаад̣̇аанирод̇хаа сам̣саяабад̣̇зна бужчид̇аа хонд̇ийд̇и ‘‘яасса жагкунд̣̇рияам̣ нуббаж̇ж̇иссад̇и, д̇асса соманассинд̣̇рияам̣ нуббаж̇ж̇иссад̇ийд̇и? ааманд̇аа’’д̇и (яама. 3.инд̣̇рияаяамага.308) жа, ‘‘яасса жагкунд̣̇рияам̣ на нируж̇жхиссад̇и, д̇асса соманассинд̣̇рияам̣ на нируж̇жхиссад̇ийд̇и? ааманд̇аа’’д̇и жа вуд̇д̇ам̣, на вуд̇д̇ам̣ ‘‘яз аруубам̣ убабаж̇ж̇ид̇ваа бариниб̣б̣ааяиссанд̇ий’’д̇иаад̣̇инаа ж̇ийвид̇инд̣̇рияаубзгкинд̣̇рияаад̣̇ийсу вияа виссаж̇ж̇ананд̇и.
Paṭilome pana yathā anulome ‘‘uppajjissati nirujjhissatī’’ti uppādanirodhā anāgatā sarūpavasena vuttā, evaṃ avuttattā yathā tattha saṃsayapadena gahitassa indriyassa pavattiyampi uppādanirodhā cakkhundriyādimūlakesu yojitā, na evaṃ yojetabbā. Yathā hi uppādanirodhe atikkamitvā appatvā ca uppādanirodhā sambhavanti yojetuṃ, na evaṃ anuppādānirodhe atikkamitvā appatvā ca anuppādānirodhā sambhavanti abhūtābhāvassa abhūtābhāvaṃ atikkamitvā appatvā ca sambhavānuppattito, abhūtuppādanirodhābhāvo ca paṭilome pucchito, tasmāssa visesarahitassa abhūtābhāvassa vattamānānaṃ uppādassa viya kālantarayogābhāvato yādisānaṃ cakkhādīnaṃ uppādanirodhābhāvena pucchitabbassa nissayo sanniṭṭhānena sannicchito, tannissayā tādisānaṃyeva upapatticutiuppādanirodhānaṃ jīvitādīnampi anuppādānirodhā saṃsayapadena pucchitā hontīti ‘‘yassa cakkhundriyaṃ nuppajjissati, tassa somanassindriyaṃ nuppajjissatīti? Āmantā’’ti (yama. 3.indriyayamaka.308) ca, ‘‘yassa cakkhundriyaṃ na nirujjhissati, tassa somanassindriyaṃ na nirujjhissatīti? Āmantā’’ti ca vuttaṃ, na vuttaṃ ‘‘ye arūpaṃ upapajjitvā parinibbāyissantī’’tiādinā jīvitindriyaupekkhindriyādīsu viya vissajjananti.
яз руубааважарам̣ убабаж̇ж̇ид̇ваа бариниб̣б̣ааяиссанд̇и, д̇зсам̣ гхаанинд̣̇рияам̣ на уббаж̇ж̇иссад̇и, но жа д̇зсам̣ соманассинд̣̇рияам̣ на уббаж̇ж̇иссад̇ий’’д̇и зд̇т̇а яз собзгкабадисанд̇хигаа бхависсанд̇и, д̇з ‘‘яз жа аруубам̣ убабаж̇ж̇ид̇ваа бариниб̣б̣ааяиссанд̇ий’’д̇и зд̇зна бажчимагодтаасаважанзна д̇ам̣самааналагкан̣ад̇ааяа сан̇г̇ахид̇аад̇и яз соманассабадисанд̇хигаа бхависсанд̇и, д̇з зва вуд̇д̇аад̇и д̣̇адтаб̣б̣аа.
Ye rūpāvacaraṃ upapajjitvā parinibbāyissanti, tesaṃ ghānindriyaṃ na uppajjissati, no ca tesaṃ somanassindriyaṃ na uppajjissatī’’ti ettha ye sopekkhapaṭisandhikā bhavissanti, te ‘‘ye ca arūpaṃ upapajjitvā parinibbāyissantī’’ti etena pacchimakoṭṭhāsavacanena taṃsamānalakkhaṇatāya saṅgahitāti ye somanassapaṭisandhikā bhavissanti, te eva vuttāti daṭṭhabbā.
адтагат̇ааяам̣ язсу аад̣̇имабод̇т̇агзсу ‘‘ад̇ийд̇аанааг̇ад̇аваарз суд̣̇д̇хааваасаанам̣ убабад̇д̇ижид̇д̇асса бхан̇г̇агкан̣з манинд̣̇рияан̃жа нуббаж̇ж̇ид̇т̇аад̇и д̇хаммаяамагз вияа уббаад̣̇агкан̣аад̇иггамавасзна ад̇т̇ам̣ аг̇г̇ахзд̇ваа’’д̇и ликид̇ам̣, д̇ам̣ бамаад̣̇аликид̇ам̣. язсу бана бод̇т̇агзсу ‘‘бажжуббаннаад̇ийд̇аваарз суд̣̇д̇хааваасаанам̣ убабад̇д̇ижид̇д̇асса бхан̇г̇агкан̣з манинд̣̇рияан̃жа нуббаж̇ж̇ид̇т̇аад̇и…бз… д̇асмим̣ бхавз ануббаннабуб̣б̣авасзна ад̇т̇о г̇ахзд̇аб̣б̣о’’д̇и баато д̣̇иссад̇и, со зва сунд̣̇арад̇арод̇и.
Aṭṭhakathāyaṃ yesu ādimapotthakesu ‘‘atītānāgatavāre suddhāvāsānaṃ upapatticittassa bhaṅgakkhaṇe manindriyañca nuppajjitthāti dhammayamake viya uppādakkhaṇātikkamavasena atthaṃ aggahetvā’’ti likhitaṃ, taṃ pamādalikhitaṃ. Yesu pana potthakesu ‘‘paccuppannātītavāre suddhāvāsānaṃ upapatticittassa bhaṅgakkhaṇe manindriyañca nuppajjitthāti…pe… tasmiṃ bhave anuppannapubbavasena attho gahetabbo’’ti pāṭho dissati, so eva sundarataroti.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
3. барин̃н̃ааваараван̣н̣анаа
3. Pariññāvāravaṇṇanā
435-482. барин̃н̃ааваарз логияааб̣яаагад̇амиссагаани жаад̇и д̣̇угкасажжабарияаабаннзхи зганд̇абарин̃н̃зяязхи логияааб̣яаагад̇зхи миссагад̇д̇аа д̇аани убаад̣̇ааяа манинд̣̇рияаад̣̇ийнам̣ взд̣̇анаагканд̇хаад̣̇ийнам̣ вияа барин̃н̃зяяад̇аа жа вуд̇д̇аа. яад̣̇и барин̃н̃зяяамиссагад̇д̇аа барин̃н̃зяяад̇аа ход̇и, гасмаа д̇хаммаяамагз ‘‘яо гусалам̣ д̇хаммам̣ бхаавзд̇и, со аб̣яаагад̇ам̣ д̇хаммам̣ бариж̇аанаад̇ий’’д̇иаад̣̇инаа аб̣яаагад̇абад̣̇зна яож̇зд̇ваа яамагаани на вуд̇д̇аанийд̇и? яат̇аа ‘‘гусалам̣ бхаавзми, агусалам̣ баж̇ахаамий’’д̇и гусалаагусалзсу бхааванаабахаанаабхинивзсо ход̇и, д̇ат̇аа ‘‘взд̣̇анаагканд̇хо анижжо, д̇хаммааяад̇анам̣ анижжа’’нд̇иаад̣̇инаа канд̇хаад̣̇ийсу бариж̇аанаабхинивзсо ход̇и, д̇ад̇т̇а взд̣̇анаагканд̇хаад̣̇аяо ‘‘анижжа’’нд̇иаад̣̇инаа бариж̇аанид̇аб̣б̣аа, д̇з жа взд̣̇анаагканд̇хаад̣̇ибхаавам̣ г̇ахзд̇ваа бариж̇аанид̇аб̣б̣аа, на аб̣яаагад̇абхааванд̇и.
435-482. Pariññāvāre lokiyaabyākatamissakāni cāti dukkhasaccapariyāpannehi ekantapariññeyyehi lokiyaabyākatehi missakattā tāni upādāya manindriyādīnaṃ vedanākkhandhādīnaṃ viya pariññeyyatā ca vuttā. Yadi pariññeyyamissakattā pariññeyyatā hoti, kasmā dhammayamake ‘‘yo kusalaṃ dhammaṃ bhāveti, so abyākataṃ dhammaṃ parijānātī’’tiādinā abyākatapadena yojetvā yamakāni na vuttānīti? Yathā ‘‘kusalaṃ bhāvemi, akusalaṃ pajahāmī’’ti kusalākusalesu bhāvanāpahānābhiniveso hoti, tathā ‘‘vedanākkhandho anicco, dhammāyatanaṃ anicca’’ntiādinā khandhādīsu parijānābhiniveso hoti, tattha vedanākkhandhādayo ‘‘anicca’’ntiādinā parijānitabbā, te ca vedanākkhandhādibhāvaṃ gahetvā parijānitabbā, na abyākatabhāvanti.
гасмаа банзд̇т̇а д̣̇угкасажжабхааж̇анийяз ааг̇ад̇асса д̣̇оманассасса бахаад̇аб̣б̣ад̇аава вуд̇д̇аа, на барин̃н̃зяяад̇аа, нану д̣̇угкасажжабарияаабаннаа взд̣̇анаагканд̇хаад̣̇аяо гусалаагусалабхаавзна аг̇г̇ахид̇аа гусалаагусалааби барин̃н̃зяяаад̇и? сажжам̣, яат̇аа бана взд̣̇анаагканд̇хаад̣̇ибхааво бхаавзд̇аб̣б̣абахаад̇аб̣б̣абхаавзхи винааби ход̇и, на звам̣ д̣̇оманассинд̣̇рияабхааво бахаад̇аб̣б̣абхаавзна винаа ход̇ийд̇и имам̣ висзсам̣ д̣̇ассзд̇ум̣ д̣̇оманассинд̣̇рияасса бахаад̇аб̣б̣ад̇аава ид̇ха вуд̇д̇аа, на барин̃н̃зяяабхаавасса абхаавад̇од̇и д̣̇адтаб̣б̣о. агусалам̣ зганд̇ад̇о бахаад̇аб̣б̣амзваад̇и зд̇зна бахаад̇аб̣б̣амзва, на аббахаад̇аб̣б̣анд̇и аббахаад̇аб̣б̣амзва ниваарзд̇и, на барин̃н̃зяяабхааванд̇и д̣̇адтаб̣б̣ам̣. ан̃н̃инд̣̇рияам̣ бхаавзд̇аб̣б̣анидтам̣, на бана сажчигаад̇аб̣б̣анидтанд̇и бхаавзд̇аб̣б̣абхааво зва д̇асса г̇ахид̇од̇и. ‘‘д̣̇вз буг̇г̇алаа’’д̇иаад̣̇и ‘‘жагкунд̣̇рияам̣ на бариж̇аанаад̇ий’’д̇иаад̣̇игасса барад̇о ликид̇аб̣б̣ам̣ уббадибаадияаа ликид̇анд̇и д̣̇адтаб̣б̣ам̣. жагкунд̣̇рияамуулаган̃хи ад̇иггамид̇ваа д̣̇оманассинд̣̇рияамуулагз ид̣̇ам̣ вуд̇д̇ам̣ ‘‘д̣̇вз буг̇г̇алаа д̣̇оманассинд̣̇рияам̣ на баж̇аханд̇и но жа ан̃н̃инд̣̇рияам̣ на бхаавзнд̇ий’’д̇и (яама. 3.инд̣̇рияаяамага.440).
Kasmā panettha dukkhasaccabhājanīye āgatassa domanassassa pahātabbatāva vuttā, na pariññeyyatā, nanu dukkhasaccapariyāpannā vedanākkhandhādayo kusalākusalabhāvena aggahitā kusalākusalāpi pariññeyyāti? Saccaṃ, yathā pana vedanākkhandhādibhāvo bhāvetabbapahātabbabhāvehi vināpi hoti, na evaṃ domanassindriyabhāvo pahātabbabhāvena vinā hotīti imaṃ visesaṃ dassetuṃ domanassindriyassa pahātabbatāva idha vuttā, na pariññeyyabhāvassa abhāvatoti daṭṭhabbo. Akusalaṃ ekantato pahātabbamevāti etena pahātabbameva, na appahātabbanti appahātabbameva nivāreti, na pariññeyyabhāvanti daṭṭhabbaṃ. Aññindriyaṃ bhāvetabbaniṭṭhaṃ, na pana sacchikātabbaniṭṭhanti bhāvetabbabhāvo eva tassa gahitoti. ‘‘Dve puggalā’’tiādi ‘‘cakkhundriyaṃ na parijānātī’’tiādikassa parato likhitabbaṃ uppaṭipāṭiyā likhitanti daṭṭhabbaṃ. Cakkhundriyamūlakañhi atikkamitvā domanassindriyamūlake idaṃ vuttaṃ ‘‘dve puggalā domanassindriyaṃ na pajahanti no ca aññindriyaṃ na bhāventī’’ti (yama. 3.indriyayamaka.440).
зд̇т̇а жа бут̇уж̇ж̇ано, адта жа арияаад̇и нава буг̇г̇алаа. д̇зсу бут̇уж̇ж̇ано бхаб̣б̣аабхаб̣б̣авасзна д̣̇увид̇хо, со ‘‘бут̇уж̇ж̇ано’’д̇и ааг̇ад̇адтаанзсу ‘‘ча буг̇г̇алаа жагкунд̣̇рияан̃жа на бариж̇аанид̇т̇а д̣̇оманассинд̣̇рияан̃жа на баж̇ахид̇т̇аа’’д̇иаад̣̇ийсу жа абхинд̣̇ид̇ваа г̇ахид̇о. ‘‘яз бут̇уж̇ж̇анаа маг̇г̇ам̣ бадилабхиссанд̇ий’’д̇и (яама. 1.сажжаяамага.49, 51-52) ааг̇ад̇адтаанзсу ‘‘бан̃жа буг̇г̇алаа жагкунд̣̇рияан̃жа бариж̇ааниссанд̇и д̣̇оманассинд̣̇рияан̃жа баж̇ахиссанд̇ий’’д̇иаад̣̇ийсу (яама. 3.инд̣̇рияаяамага.451) жа бхаб̣б̣о зва бхинд̣̇ид̇ваа г̇ахид̇о. ‘‘яз жа бут̇уж̇ж̇анаа маг̇г̇ам̣ на бадилабхиссанд̇ий’’д̇и (яама. 1.сажжаяамага.51) ааг̇ад̇адтаанзсу ‘‘д̇аяо буг̇г̇алаа д̣̇оманассинд̣̇рияан̃жа наббаж̇ахиссанд̇и жагкунд̣̇рияан̃жа на бариж̇ааниссанд̇ий’’д̇иаад̣̇ийсу (яама. 3.инд̣̇рияаяамага.455) жа абхаб̣б̣о зва. аг̇г̇апаласаман̇г̇ий жа батамапаласаман̇г̇ий арахаа жаад̇и д̣̇увид̇хо. соби ‘‘арахаа’’д̇и ааг̇ад̇адтаанзсу ‘‘д̇аяо буг̇г̇алаа анан̃н̃аад̇ан̃н̃ассаамийд̇инд̣̇рияан̃жа бхаавид̇т̇а д̣̇оманассинд̣̇рияан̃жа баж̇ахид̇т̇аа’’д̇иаад̣̇ийсу (яама. 3.инд̣̇рияаяамага.444) жа абхинд̣̇ид̇ваа г̇ахид̇о. ‘‘яо аг̇г̇апалам̣ сажчигарод̇ий’’д̇и (яама. 3.инд̣̇рияаяамага.446) ааг̇ад̇адтаанзсу ‘‘д̇аяо буг̇г̇алаа д̣̇оманассинд̣̇рияам̣ баж̇ахид̇т̇а, но жа ан̃н̃аад̇аавинд̣̇рияам̣ сажчигарид̇т̇аа’’д̇иаад̣̇ийсу (яама. 3.инд̣̇рияаяамага.444) жа батамапаласаман̇г̇ий жа бхинд̣̇ид̇ваа г̇ахид̇о. ‘‘яо аг̇г̇апалам̣ сажчаагаасий’’д̇и (яама. 3.инд̣̇рияаяамага.443, 446) ааг̇ад̇адтаанзсу ид̇ароваад̇и звам̣ буг̇г̇алабхзд̣̇ам̣ н̃ад̇ваа д̇ад̇т̇а д̇ад̇т̇а саннидтаанзна г̇ахид̇абуг̇г̇алз нид̣̇д̇хаарзд̇ваа виссаж̇ж̇анам̣ яож̇зд̇аб̣б̣анд̇и.
Ettha ca puthujjano, aṭṭha ca ariyāti nava puggalā. Tesu puthujjano bhabbābhabbavasena duvidho, so ‘‘puthujjano’’ti āgataṭṭhānesu ‘‘cha puggalā cakkhundriyañca na parijānittha domanassindriyañca na pajahitthā’’tiādīsu ca abhinditvā gahito. ‘‘Ye puthujjanā maggaṃ paṭilabhissantī’’ti (yama. 1.saccayamaka.49, 51-52) āgataṭṭhānesu ‘‘pañca puggalā cakkhundriyañca parijānissanti domanassindriyañca pajahissantī’’tiādīsu (yama. 3.indriyayamaka.451) ca bhabbo eva bhinditvā gahito. ‘‘Ye ca puthujjanā maggaṃ na paṭilabhissantī’’ti (yama. 1.saccayamaka.51) āgataṭṭhānesu ‘‘tayo puggalā domanassindriyañca nappajahissanti cakkhundriyañca na parijānissantī’’tiādīsu (yama. 3.indriyayamaka.455) ca abhabbo eva. Aggaphalasamaṅgī ca paṭhamaphalasamaṅgī arahā cāti duvidho. Sopi ‘‘arahā’’ti āgataṭṭhānesu ‘‘tayo puggalā anaññātaññassāmītindriyañca bhāvittha domanassindriyañca pajahitthā’’tiādīsu (yama. 3.indriyayamaka.444) ca abhinditvā gahito. ‘‘Yo aggaphalaṃ sacchikarotī’’ti (yama. 3.indriyayamaka.446) āgataṭṭhānesu ‘‘tayo puggalā domanassindriyaṃ pajahittha, no ca aññātāvindriyaṃ sacchikaritthā’’tiādīsu (yama. 3.indriyayamaka.444) ca paṭhamaphalasamaṅgī ca bhinditvā gahito. ‘‘Yo aggaphalaṃ sacchākāsī’’ti (yama. 3.indriyayamaka.443, 446) āgataṭṭhānesu itarovāti evaṃ puggalabhedaṃ ñatvā tattha tattha sanniṭṭhānena gahitapuggale niddhāretvā vissajjanaṃ yojetabbanti.
барин̃н̃ааваараван̣н̣анаа нидтид̇аа.
Pariññāvāravaṇṇanā niṭṭhitā.
инд̣̇рияаяамагаван̣н̣анаа нидтид̇аа.
Indriyayamakavaṇṇanā niṭṭhitā.
яамагабагаран̣а-мууладийгаа самад̇д̇аа.
Yamakapakaraṇa-mūlaṭīkā samattā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 8. жид̇д̇аяамагам̣ • 8. Cittayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 10. инд̣̇рияаяамагам̣ • 10. Indriyayamakaṃ
