มชฺฌิม นิกาย ๑๑๖

อิสิคิลิสุตฺต

เอวํ เม สุตํ—เอกํ สมยํ ภควา ราชคเห วิหรติ อิสิคิลิสฺมึ ปพฺพเตฯ ตตฺร โข ภควา ภิกฺขู อามนฺเตสิ: “ภิกฺขโว”ติฯ

“ภทนฺเต”ติ เต ภิกฺขู ภควโต ปจฺจโสฺสสุํฯ ภควา เอตทโวจ:

“ปสฺสถ โน ตุเมฺห, ภิกฺขเว, เอตํ เวภารํ ปพฺพตนฺ”ติ?

“เอวํ, ภนฺเต”ฯ

“เอตสฺสปิ โข, ภิกฺขเว, เวภารสฺส ปพฺพตสฺส อญฺญาว สมญฺญา อโหสิ อญฺญา ปญฺญตฺติฯ ปสฺสถ โน ตุเมฺห, ภิกฺขเว, เอตํ ปณฺฑวํ ปพฺพตนฺ”ติ?

“เอวํ, ภนฺเต”ฯ

“เอตสฺสปิ โข, ภิกฺขเว, ปณฺฑวสฺส ปพฺพตสฺส อญฺญาว สมญฺญา อโหสิ อญฺญา ปญฺญตฺติฯ ปสฺสถ โน ตุเมฺห, ภิกฺขเว, เอตํ เวปุลฺลํ ปพฺพตนฺ”ติ?

“เอวํ, ภนฺเต”ฯ

“เอตสฺสปิ โข, ภิกฺขเว, เวปุลฺลสฺส ปพฺพตสฺส อญฺญาว สมญฺญา อโหสิ อญฺญา ปญฺญตฺติฯ ปสฺสถ โน ตุเมฺห, ภิกฺขเว, เอตํ คิชฺฌกูฏํ ปพฺพตนฺ”ติ?

“เอวํ, ภนฺเต”ฯ

“เอตสฺสปิ โข, ภิกฺขเว, คิชฺฌกูฏสฺส ปพฺพตสฺส อญฺญาว สมญฺญา อโหสิ อญฺญา ปญฺญตฺติฯ ปสฺสถ โน ตุเมฺห, ภิกฺขเว, อิมํ อิสิคิลึ ปพฺพตนฺ”ติ?

“เอวํ, ภนฺเต”ฯ

“อิมสฺส โข ปน, ภิกฺขเว, อิสิคิลิสฺส ปพฺพตสฺส เอสาว สมญฺญา อโหสิ เอสา ปญฺญตฺติฯ

ภูตปุพฺพํ, ภิกฺขเว, ปญฺจ ปจฺเจกพุทฺธสตานิ อิมสฺมึ อิสิคิลิสฺมึ ปพฺพเต จิรนิวาสิโน อเหสุํฯ เต อิมํ ปพฺพตํ ปวิสนฺตา ทิสฺสนฺติ, ปวิฏฺฐา น ทิสฺสนฺติฯ ตเมนํ มนุสฺสา ทิสฺวา เอวมาหํสุ: ‘อยํ ปพฺพโต อิเม อิสี คิลตี'ติ; ‘อิสิคิลิ อิสิคิลิ' เตฺวว สมญฺญา อุทปาทิฯ

อาจิกฺขิสฺสามิ, ภิกฺขเว, ปจฺเจกพุทฺธานํ นามานิ; กิตฺตยิสฺสามิ, ภิกฺขเว, ปจฺเจกพุทฺธานํ นามานิ; เทเสสฺสามิ, ภิกฺขเว, ปจฺเจกพุทฺธานํ นามานิฯ ตํ สุณาถ, สาธุกํ มนสิ กโรถ, ภาสิสฺสามี”ติฯ

“เอวํ, ภนฺเต”ติ โข เต ภิกฺขู ภควโต ปจฺจโสฺสสุํฯ ภควา เอตทโวจ:

“อริฏฺโฐ นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; อุปริฏฺโฐ นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ตครสิขี นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ยสสฺสี นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; สุทสฺสโน นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ปิยทสฺสี นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; คนฺธาโร นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ปิณฺโฑโล นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; อุปาสโภ นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; นีโต นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ตโถ นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ, สุตวา นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิ; ภาวิตตฺโต นาม, ภิกฺขเว, ปจฺเจกสมฺพุทฺโธ อิมสฺมึ อิสิคิลิสฺมึ ปพฺพเต จิรนิวาสี อโหสิฯ

เย สตฺตสารา อนีฆา นิราสา, ปจฺเจกเมวชฺฌคมํสุ โพธึ; เตสํ วิสลฺลาน นรุตฺตมานํ, นามานิ เม กิตฺตยโต สุณาถฯ

อริฏฺโฐ อุปริฏฺโฐ ตครสิขี ยสสฺสี, สุทสฺสโน ปิยทสฺสี จ สุสมฺพุทฺโธ; คนฺธาโร ปิณฺโฑโล อุปาสโภ จ, นีโต ตโถ สุตวา ภาวิตตฺโตฯ

สุมฺโภ สุโภ มตุโล อฏฺฐโม จ, อถสฺสุเมโฆ อนีโฆ สุทาโฐ; ปจฺเจกพุทฺธา ภวเนตฺติขีณา, หิงฺคู จ หิงฺโค จ มหานุภาวาฯ

เทฺว ชาลิโน มุนิโน อฏฺฐโก จ, อถ โกสโลฺล พุทฺโธ อโถ สุพาหุ; อุปเนมิโส เนมิโส สนฺตจิตฺโต, สจฺโจ ตโถ วิรโช ปณฺฑิโต จฯ

กาฬูปกาฬา วิชิโต ชิโต จ, องฺโค จ ปงฺโค จ คุตฺติชิโต จ; ปสฺสิ ชหิ อุปธิทุกฺขมูลํ, อปราชิโต มารพลํ อเชสิฯ

สตฺถา ปวตฺตา สรภงฺโค โลมหํโส, อุจฺจงฺคมาโย อสิโต อนาสโว; มโนมโย มานจฺฉิโท จ พนฺธุมา, ตทาธิมุตฺโต วิมโล จ เกตุมาฯ

เกตุมฺภราโค จ มาตงฺโค อริโย, อถจฺจุโต อจฺจุตคามพฺยามโก; สุมงฺคโล ทพฺพิโล สุปติฏฺฐิโต, อสโยฺห เขมาภิรโต จ โสรโตฯ

ทุรนฺนโย สงฺโฆ อโถปิ อุชฺชโย, อปโร มุนิ สโยฺห อโนมนิกฺกโม; อานนฺโท นนฺโท อุปนนฺโท ทฺวาทส, ภารทฺวาโช อนฺติมเทหธารีฯ

โพธิ มหานาโม อโถปิ อุตฺตโร, เกสี สิขี สุนฺทโร ทฺวารภาโช; ติสฺสูปติสฺสา ภวพนฺธนจฺฉิทา, อุปสิขิ ตณฺหจฺฉิโท จ สิขริฯ

พุทฺโธ อหุ มงฺคโล วีตราโค, อุสภจฺฉิทา ชาลินึ ทุกฺขมูลํ; สนฺตํ ปทํ อชฺฌคโมปนีโต, อุโปสโถ สุนฺทโร สจฺจนาโมฯ

เชโต ชยนฺโต ปทุโม อุปฺปโล จ, ปทุมุตฺตโร รกฺขิโต ปพฺพโต จ; มานตฺถทฺโธ โสภิโต วีตราโค, กโณฺห จ พุทฺโธ สุวิมุตฺตจิตฺโตฯ

เอเต จ อญฺเญ จ มหานุภาวา, ปจฺเจกพุทฺธา ภวเนตฺติขีณา; เต สพฺพสงฺคาติคเต มเหสี, ปรินิพฺพุเต วนฺทถ อปฺปเมเยฺย”ติฯ

อิสิคิลิสุตฺตํ นิฏฺฐิตํ ฉฏฺฐํฯ