| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౮. జానన్తాజానన్తపాపకరణపఞ్హో
8. Jānantājānantapāpakaraṇapañho
౮. రాజా ఆహ ‘‘భన్తే నాగసేన, యో జానన్తో పాపకమ్మం కరోతి, యో అజానన్తో పాపకమ్మం కరోతి, కస్స బహుతరం అపుఞ్ఞ’’న్తి? థేరో ఆహ ‘‘యో ఖో, మహారాజ, అజానన్తో పాపకమ్మం కరోతి, తస్స బహుతరం అపుఞ్ఞ’’న్తి. ‘‘తేన హి, భన్తే నాగసేన, యో అమ్హాకం రాజపుత్తో వా రాజమహామత్తో వా అజానన్తో పాపకమ్మం కరోతి, తం మయం దిగుణం దణ్డేమా’’తి? ‘‘తం కిం మఞ్ఞసి, మహారాజ, తత్తం అయోగుళం ఆదిత్తం సమ్పజ్జలితం సజోతిభూతం ఏకో జానన్తో గణ్హేయ్య, ఏకో అజానన్తో గణ్హేయ్య, కతమో 1 బలవతరం డయ్హేయ్యా’’తి. ‘‘యో ఖో, భన్తే, అజానన్తో గణ్హేయ్య, సో 2 బలవతరం డయ్హేయ్యా’’తి. ‘‘ఏవమేవ ఖో, మహారాజ, యో అజానన్తో పాపకమ్మం కరోతి, తస్స బహుతరం అపుఞ్ఞ’’న్తి.
8. Rājā āha ‘‘bhante nāgasena, yo jānanto pāpakammaṃ karoti, yo ajānanto pāpakammaṃ karoti, kassa bahutaraṃ apuñña’’nti? Thero āha ‘‘yo kho, mahārāja, ajānanto pāpakammaṃ karoti, tassa bahutaraṃ apuñña’’nti. ‘‘Tena hi, bhante nāgasena, yo amhākaṃ rājaputto vā rājamahāmatto vā ajānanto pāpakammaṃ karoti, taṃ mayaṃ diguṇaṃ daṇḍemā’’ti? ‘‘Taṃ kiṃ maññasi, mahārāja, tattaṃ ayoguḷaṃ ādittaṃ sampajjalitaṃ sajotibhūtaṃ eko jānanto gaṇheyya, eko ajānanto gaṇheyya, katamo 3 balavataraṃ ḍayheyyā’’ti. ‘‘Yo kho, bhante, ajānanto gaṇheyya, so 4 balavataraṃ ḍayheyyā’’ti. ‘‘Evameva kho, mahārāja, yo ajānanto pāpakammaṃ karoti, tassa bahutaraṃ apuñña’’nti.
‘‘కల్లోసి, భన్తే నాగసేనా’’తి.
‘‘Kallosi, bhante nāgasenā’’ti.
జానన్తాజానన్తపాపకరణపఞ్హో అట్ఠమో.
Jānantājānantapāpakaraṇapañho aṭṭhamo.
Footnotes:
