| Library / Tipiṭaka / તિપિટક • Tipiṭaka / પાચિત્યાદિયોજનાપાળિ • Pācityādiyojanāpāḷi |
૯. જન્તાઘરવત્તાદિકથા
9. Jantāgharavattādikathā
૩૭૧. જન્તાઘરવત્તે એવં વિનિચ્છયો વેદિતબ્બોતિ યોજના. બહિજગતીતિ બહિઆલિન્દો.
371. Jantāgharavatte evaṃ vinicchayo veditabboti yojanā. Bahijagatīti bahiālindo.
૩૭૩. આચમનવત્થુસ્મિં એવમત્થો વેદિતબ્બોતિ યોજના. નીહરિત્વાતિ ઉદકં નીહરિત્વા. આચમિતબ્બન્તિ ધોવિતબ્બં. ‘‘આપુબ્બો ચમુ ધોવને’’તિ હિ ધાતુપાઠેસુ વુત્તં. ઇદં અતિવિવટન્તિ ઇદં ઠાનં અતિવિવટં, ન કેનચિ પટિચ્છન્નન્તિ અત્થો. ઉદકં અલભન્તસ્સેવાતિ ઉદકં અલભન્તેયેવ.
373. Ācamanavatthusmiṃ evamattho veditabboti yojanā. Nīharitvāti udakaṃ nīharitvā. Ācamitabbanti dhovitabbaṃ. ‘‘Āpubbo camu dhovane’’ti hi dhātupāṭhesu vuttaṃ. Idaṃ ativivaṭanti idaṃ ṭhānaṃ ativivaṭaṃ, na kenaci paṭicchannanti attho. Udakaṃ alabhantassevāti udakaṃ alabhanteyeva.
૩૭૪. વચ્ચકુટિવત્તે એવં વિનિચ્છયો વેદિતબ્બોતિ યોજના. અયન્તિ દન્તકટ્ઠં ખાદતો વચ્ચકરણં. સબ્બત્થેવાતિ સબ્બસ્મિં એવ ઠાને. ‘‘ન ફરુસેન કટ્ઠેના’’તિ એત્થ ન કેવલં ખરકટ્ઠમેવ, ફાલિતકટ્ઠાદયોપિ છવિઅવલેખનકટ્ઠા ફરુસાયેવ નામાતિ દસ્સેન્તો આહ ‘‘ફાલિતકટ્ઠેન વા’’તિઆદિ. પવિટ્ઠસ્સાતિ વચ્ચકુટિં પવિટ્ઠસ્સ.
374. Vaccakuṭivatte evaṃ vinicchayo veditabboti yojanā. Ayanti dantakaṭṭhaṃ khādato vaccakaraṇaṃ. Sabbatthevāti sabbasmiṃ eva ṭhāne. ‘‘Na pharusena kaṭṭhenā’’ti ettha na kevalaṃ kharakaṭṭhameva, phālitakaṭṭhādayopi chaviavalekhanakaṭṭhā pharusāyeva nāmāti dassento āha ‘‘phālitakaṭṭhena vā’’tiādi. Paviṭṭhassāti vaccakuṭiṃ paviṭṭhassa.
સબ્બસાધારણટ્ઠાનન્તિ સબ્બેસં ભિક્ખૂનં, સબ્બેહિ વા સાધારણં વચ્ચકુટિસઙ્ખાતં ઠાનં. તત્રાતિ તસ્મિં સબ્બસાધારણે ઠાને. નિબદ્ધગમનત્થાયાતિ અત્તનો નિબદ્ધગમનત્થાય કતં યં ઠાનં વા યં પુગ્ગલિકટ્ઠાનં વા હોતીતિ યોજના.
Sabbasādhāraṇaṭṭhānanti sabbesaṃ bhikkhūnaṃ, sabbehi vā sādhāraṇaṃ vaccakuṭisaṅkhātaṃ ṭhānaṃ. Tatrāti tasmiṃ sabbasādhāraṇe ṭhāne. Nibaddhagamanatthāyāti attano nibaddhagamanatthāya kataṃ yaṃ ṭhānaṃ vā yaṃ puggalikaṭṭhānaṃ vā hotīti yojanā.
ઉહતાતિ એત્થ ઉપુબ્બો હદધાતૂતિ દસ્સેન્તો આહ ‘‘ઉહદિતા’’તિ. ‘‘હદ કરીસોસ્સગ્ગે’’તિ ધાતુપાઠેસુ (પાણિની ૯૭૭ ધાતુપાઠે; સદ્દનીતિધાતુમાલાયં ૧૫ દકારન્તધાતુ) વુત્તત્તા વચ્ચકૂપતો બહિ કરીસસ્સ ઓસ્સજ્જનન્તિ આહ ‘‘બહિ વચ્ચમક્ખિતા’’તિ. ધોવિતબ્બાતિ ઉદકેન ધોવિતબ્બા. એતમ્પીતિ ઉદકસ્સ અવિજ્જમાનમ્પિ. સબ્બત્થાતિ સબ્બસ્મિં વત્તક્ખન્ધકે.
Uhatāti ettha upubbo hadadhātūti dassento āha ‘‘uhaditā’’ti. ‘‘Hada karīsossagge’’ti dhātupāṭhesu (pāṇinī 977 dhātupāṭhe; saddanītidhātumālāyaṃ 15 dakārantadhātu) vuttattā vaccakūpato bahi karīsassa ossajjananti āha ‘‘bahi vaccamakkhitā’’ti. Dhovitabbāti udakena dhovitabbā. Etampīti udakassa avijjamānampi. Sabbatthāti sabbasmiṃ vattakkhandhake.
ઇતિ વત્તક્ખન્ધકવણ્ણનાય યોજના સમત્તા.
Iti vattakkhandhakavaṇṇanāya yojanā samattā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ચૂળવગ્ગપાળિ • Cūḷavaggapāḷi
૯. જન્તાઘરવત્તકથા • 9. Jantāgharavattakathā
૧૦. વચ્ચકુટિવત્તકથા • 10. Vaccakuṭivattakathā
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ચૂળવગ્ગ-અટ્ઠકથા • Cūḷavagga-aṭṭhakathā / જન્તાઘરવત્તાદિકથા • Jantāgharavattādikathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / વચ્ચકુટિવત્તકથાવણ્ણના • Vaccakuṭivattakathāvaṇṇanā
